Muzimbu wa Bumwene bwa Njambi ukewo muzimbu wa seho manene mu Mbimbiliya. Yehova akapangesa obu Bumwene mu kushulisilila biyongola byakele nabyo mwatangele lifuti-libu. Bumwene bwa Njambi bwapwa buka? Tuzibuka bati ngwetu buli na kuyula? Byuma muka bibunalingi obu bumwene? Co bika bibukalinga kulutwe? Muno mu cilongesa na mu bilongesa bibali binatako, tukumbulula ebi bihula.

1. Bumwene bwa Njambi bwapwa buka? Iya Mwene wabwo?

Bumwene bwa Njambi bwapwa fulumende yanashimbika Yehova Njambi. Yesu Kilistu ikeye Mwene, co ali na kuyula kutundilila mwilu. (Mateo 4:17; Yowano 18:36) Mbimbiliya inendeka hali Yesu ngwayo: “Njambi akamupwisa Mwene . . . myaka yoshe.” (Luka 1:32, 33) Ha kupwa Mwene wa Bumwene bwa Njambi, Yesu akayula banu boshe bakakala hano hasi.

2. Beya bakayula hamo na Yesu?

Yesu kakayulu likalyendi. Banu ‘ba kutunda ku miyati yoshe na ku bindaka byoshe na ku mafuti oshe na ku banu boshe bakayula lifuti-libu.’ (Kujombolola 5:9, 10) Kutunda hezilile Yesu hano hasi, banu babangi banapu baka-Kilistu, co banapu baka-kumukabangeya. Kuma boshe bakayula hamo nendi ndi? Embwe, ba kupwa 144, 000 lika bakebo bakayula hamo na Yesu mwilu. (Tandeni Kujombolola 14:1-4.) Co baka-Kilistu boshe baje bakasala hano hasi bakabayula mu Bumwene bwa Njambi.—Myaso 37:29.

3. Bumwene bwa Njambi bwaliseze bati na bifulumende bya banu?

Baka-kuyula bamo bakalingi byuma byabibwa, oloni kubesi kukala na nzili ya kulinga byuma byoshe bibashaka. Co bisimbu bimo, baje bakabengi kubesi kukala na mbunge ya kushaka kukwasa banu. Oloni Yesu Kilistu, uje wapwa Mwene wa Bumwene bwa Njambi, wahi akamwinga. Njambi “akaka bumwene buje kubukahu.” (Ndanyele 2:44) Yesu akayula hano hasi hoshe, co kakakala na kaangu. Wakala na cizemo na ngozi, co akalingi byuma mu kusungama. Akakwasa banu balizeme umo na mukwabo na kulimwesa ngozi na kulinga byuma mu ngila yaibwa.—Tandeni Isaya 11:9.

4. Bumwene bwa Njambi bukayula hano hasi hoshe

Yesu Kilistu ali na nzili ya kuyula kutubakana baka-kuyula boshe ba hano hasi. Tandeni Mateo 28:18, na kusimutwiya ha cihula cinatako:

• Moko ya Yesu ya kuyula yaliseze bati na moko ya baka-kuyula ba hano hasi?

Bifulumende bya banu bikatenguluka simbu yoshe, co lalo kubyesi kuyula kaye koshe. Batico Bumwene bwa Njambi? Tandeni Ndanyele 7:14, na kusimutwiya ha bihula binatako:

• Mwafwa bika kuzibuka ngwetu ‘naumo wahi akafungulula’ Bumwene bwa Njambi kutuzibisa kubwaha?

• Byuma muka bitukalikuwa omwo Bumwene bwa Njambi bukayula kaye koshe?

5. Bumwene bwa Njambi bunapande kwinga bifulumende bya banu

Mwafwa bika? Kengeni VIDIO na kusimutwiya ha cihula cinatako.

VIDIO: Bumwene bwa Njambi Bwapwa Buka?—Mutamba wa Vidio (1:41)

• Biyulo bya banu binanene bika?

Tandeni Muka-kwambulula 8:9, na kusimutwiya ha bihula binatako:

• Mumona bati, kuma Bumwene bwa Njambi bunapande kwinga bifulumende bya banu ndi? Mwafwa bika?

6. Baje bakayula mu Bumwene bwa Njambi batuzibisisa mwamubwa

Mwene yetu Yesu asa ‘kututetela mu buzeye bwetu’ mwafwa nendi wapwile munu. (Vahevelu 4:15) Co lalo Yehova nangula banalume na banakazi ba kulongwa ba kupwa 144,000 “ba kutunda ku miyati yoshe na ku bindaka byoshe na ku mafuti oshe na ku banu boshe” mangana bakayule na Yesu.—Kujombolola 5:9.

• Muliziba bati mumunazibuka ngweni Yesu hamolika na baje bakayula nabo bazibuka mwamubwa mukwafwila kupwa munu? Mwafwa bika?

7. Bumwene bwa Njambi buli na mashiko amabwa

Bifulumende binapande kutunga mashiko aje akwasa banu na kubanyungilila. Bumwene bwa Njambi nabwo buli na mashiko abanapande kukabangeya banu. Tandeni 1 Kolinte 6:9-11, na kusimutwiya ha bihula binatako:

• Kaye kanesi kufwa bati ngwe banu boshe bali na kukabangeya awa mashiko a Njambi?a

• Mumona bati, kuma Yehova napande kuleka baje bashaka kukala mu Bumwene bwendi ngwendi bononoke awa mashiko ndi? Mwafwa bika?

• Tuzibuka bati ngwetu baje kubesi na kukabangeya awa mashiko basa kutenguluka?—Taleni vesi 11.

SIMPI YAKAMA

Bumwene bwa Njambi bunapu fulumende ya mwilu ije ikayula kaye koshe.

Kwitulukamo

• Beya bakayula mu Bumwene bwa Njambi?

• Bumwene bwa Njambi bwalisezela hali na bifulumende bya banu?

• Yehova ashaka ngwendi baje bashaka kukala mu Bumwene bwendi balinge bika?

WANENI BIKWABO

Yesu wendekele ngwendi Bumwene bwa Njambi buli kuli?

“Kuma Bumwene bwa Njambi Buli mu Mbunge Yeni Ndi?” (Ñanda ya ha webusaiti)

Bika bikalingisa Bakaleho ba Yehova bakundwiye Bumwene bwa Njambi kutubakana kukundwiya bifulumende bya banu?

Bakundwiiye Lika Bumwene bwa Njambi (1:43)

Tuzibeni biyendeka Mbimbiliya ha banu 144,000 baje banangula Yehova kukayula na Yesu.

“Beya Bakai Mwilu?” (Ñanda ya ha webusaiti)

Bika byalingisile munakazi umo uje wakele mu kamenga amone ngwendi Njambi lika ikeye asa kulingisa banu boshe babalinge mwamubwa?

“Munjazibukilile Byasa Kulingisa Banu Boshe Babalinge Mwamubwa” (Toneni! ya November 2011)

Bumwene bwa Njambi bwashangumukile kuyula mwilu mu 1914. Ha simbu ei hakeho hawashangumukilile na matangwa a kukotoka kwa ciyulo ca banu. Tuzibuka bati ngoco? Tusimutwiyeni byuma biyendekele Mbimbiliya na byuma binalingiwa kushwa mu 1914, hamolika na bifwa bya banu.

1. Bika biyendekele Mbimbiliya?

Ku mukanda wa Ndanyele, Mbimbiliya yamwesele ngwayo Bumwene bwa Njambi bukashangumuka kuyula ku mamaneselelo a “bisimbu 7.” (Ndanyele 4:16, 17, NWT) Yesu watumbwile ei simbu ngwendi ‘simbu ibanangula ya baka-mafuti.’ Co walongesele banu ngwendi ei simbu te kanda ihwe. (Luka 21:24) Ngwe mutumwena, bisimbu 7 byahwile mu mwaka wa 1914.

2. Bika binalingiwa kushwa mu 1914, co banu banafu bati?

Bandongesi ba Yesu bamwihwile ngwabo: ‘Tuleke, ebi byuma bikalingiwa mwaka uka, co cizibukiso muka tukazibukilaho kukalako kwobe na kuhwa kwa katumameno ka myaka ino?’ (Mateo 24:3) Yesu mwabakumbulwile, wabalekele byuma bikalingiwa omwo akashangumuka kuyula mwilu na kupwa Mwene wa Bumwene bwa Njambi. Ebi binambateselela binzita na njala na mandunduma. (Tandeni Mateo 24:7.) Mbimbiliya yendekele lalo ngwayo bifwa bibakakala nabyo banu mu “matangwa a kukotoka” bikakaluwisa buyoye. (2 Timateo 3:1-5) Ebi byuma bikebyo binalingiwa, maneneni kushwa mu mwaka wa 1914.

3. Bika binalingisa byuma bikaluwe kushwa habunashangumukila kuyula Bumwene bwa Njambi?

Omwo kwetile simbu yaindondo kutunda hapwililile Mwene, Yesu walwile na Satana na bandemone bendi. Co Satana bamuhyanene. Mbimbiliya ngwayo “bamumbilile hasi hamo na tungelo twendi boshe.” (Kujombolola 12:9, 10, 12) Satana nalubala manene mwafwa azibuka ngwendi ololo bamunyongesa. Ngeci, ali na kuyandesa banu. Mukemwo kuli na kulingiwa byuma byabibi manene. Bumwene bwa Njambi bukamanesa byuma byoshe byabibi.

TONDESESENI

4. Mizimbu ya mu Mbimbiliya imwesa ngwayo Bumwene bwa Njambi bwashangumukile kuyula mu 1914

VIDIO: Bumwene bwa Njambi Bwashangumukile Kuyula mu 1914 (5:02)

Njambi walingisile Nebukataneza mwene wa Mbambilone alote cilota. Cije cilota hamolika na byuma byalumbunwine Ndanyele byamwesele ngwabyo cije cilota catalesele ku ciyulo ca Nebukataneza na ku Bumwene bwa Njambi.—Tandeni Ndanyele 4:17.a

Tandeni Ndanyele 4:20-26, na kupangesa cati omwo mukumbulula bihula binatako:

• (A) Bika byamwene Nebukataneza mu cilota calotele?—Taleni vesi 20 na 21.

• (B) Bika byalingiwile ku muti?—Taleni vesi 23.

• (C) Bika byalingiwile munima ya “bisimbu 7”?—Taleni vesi 26.

Cilota ca Muti Cinatalesa Bati ku Bumwene bwa Njambi?

BUPOLOFWETO (Ndanyele 4:20-36)

Bumwene buyula

(A) Muti wakama

Bumwene babwimika

(B) ‘Shinjeni ou muti, eceleni bisimbu 7 bite’

Bumwene buyula lalo

(C) “Ukapwa lalo mwene”

Obu bupolofweto mubwalishulisilile ha kulibanga . . .

• (D) Muti wemanenene iya?—Taleni vesi 22.

• (E) Bumwene bwendi babwimikile bati?—Tandeni Ndanyele 4:29-33.

• (F) Bika byalingiwile kuli Nebukataneza ku mamaneselelo a “bisimbu 7”?—Tandeni Ndanyele 4:34-36.

MUBWALISHULISILILE HA KULIBANGA

Bumwene buyula

(D) Nebukataneza, Mwene wa Mbambilone

Bumwene babwimika

(E) Munima ya mwaka wa 606 B.C.E., Nebukataneza azaluka, co onowa kuyula ha myaka 7

Bumwene buyula lalo

(F) Nebukataneza akala lalo na mana, co ashangumuka lalo kuyula

Obu bupolofweto mubwalishulisilile lwa mu cibali . . .

• (G) Muti wemanenene bika?—Tandeni 1 Mizimbu 29:23.

• (H) Bumwene bwabo babwimikile bati? Tuzibuka bati ngwetu obu bumwene bacibwimikile nameme Yesu mwakele hano hasi?—Tandeni Luka 21:24.

• (I) Obu bumwene bwashangumukile lalo kuyula mwaka uka? Kuli?

MUBWALISHULISILILE LWA MU CIBALI

Bumwene buyula

(G) Bimyene ba Baisalele baje bemanenene Bumwene bwa Njambi

Bumwene babwimika

(H) Yelusalema bainyongesa, co bimyene ba Baisalele becela kuyula ha myaka 2,520

Bumwene buyula lalo

(I) Yesu apwa Mwene wa Bumwene bwa Njambi, co ashangumuka kuyula mwilu

5. Kushwa lika mu 1914, byuma binatenguluka mu kaye

Kengeni VIDIO.

VIDIO: Kaye Kanatenguluka Kushwa mu 1914 (1:10)

Yesu wapolofwetele byuma bikalingiwa mu kaye omwo akapwa Mwene. Tandeni Luka 21:9-11, na kusimutwiya ha cihula cinatako:

• Byuma muka bibanendeka oku ku mukanda bimunalimwena nambe kulizibila?

Kapositolo Paulu wendekele mubakafwila banu mu matangwa a kukotoka. Tandeni 2 Timateo 3:1-5, na kusimutwiya ha cihula cinatako:

• Banu banafu bati ano matangwa?

6. Kuzibuka ngwetu Bumwene bwa Njambi buli na kuyula kutushongangeya tulinge bika?

Tandeni Mateo 24:3, 14, na kusimutwiya ha bihula binatako:

• Cipangi muka ca seho cimwesa ngwaco Bumwene bwa Njambi buli na kuyula?

• Mwasa kukundwiya bati eci cipangi?

Bumwene bwa Njambi buli na kuyula mwilu, co ololo bushangumuka kuyula na hano hasi. Tandeni Vahevelu 10:24, 25, na kusimutwiya ha cihula cinatako:

• Bika bitunapande kulinga omwo twazibuka ngwetu “litangwa lya Mwene lili muyehi”?

SIMPI YAKAMA

Bupolofweto bwa mu Mbimbiliya na byuma bili na kulingiwa mu kaye bimwesa ngwabyo Bumwene bwa Njambi buli na kuyula. Tumwesa ngwetu twakulahela ngoco nga twambulula na kukunguluka.

Kwitulukamo

• Bika byalingiwile ku mamaneselelo a bisimbu 7 bibanendeka ku mukanda wa Ndanyele?

• Bika bimilingisa mukulahele ngweni Bumwene bwa Njambi bwashangumukile kuyula mu 1914?

• Nga Bumwene bwa Njambi buli na kuyula, mwasa kumwesa bati ngweni mwakulahela ngoco?

WANENI BIKWABO

Baka-kutondesesa biñanda bya kusañulu na bakwabo ngwabo kaye kanatenguluka kushwa mu 1914.

“Futisi ya Banu Yashangumukile Kuya Mweka” (Toneni! ya April 2007)

Bupolofweto buli ku mukanda wa Mateo 24:14 bwatengulwile bati yoyesi ya munalume umo?

“Njazemene Manene Bweho bwa Baseball Kutubakana Byoshe!” (Kaposhi ka Kukengela ka Na. 3 2017)

Tuzibuka bati ngwetu bupolofweto buli ku mukanda wa Ndanyele capita 4 bunatalesa ku Bumwene bwa Njambi?

“Bumwene bwa Njambi Bwashangumukile Kuyula Mwaka Uka? (Mutamba 1)” (Kaposhi ka Kukengela ka October 1, 2014)

Bika bimwesa ngwabyo “bisimbu 7” bibanendeka ku mukanda wa Ndanyele capita 4 byahwile mu mwaka wa 1914?

“Bumwene bwa Njambi Bwashangumukile Kuyula Mwaka Uka? (Mutamba 2)” (Kaposhi ka Kukengela ka November 1, 2014)

Bumwene bwa Njambi buli na kuyula mwilu, co ololo buyula na hano hasi. Tusimutwiyeni byuma bimo bibukalinga Bumwene bwa Njambi.

1. Bumwene bwa Njambi bukanena bati kwoloka hano hasi?

Yesu ha kupwa Mwene wa Bumwene bwa Njambi akanyongesa banu boshe bababi na bifulumende ha nzita ya Alamagidoni. (Kujombolola 16:14, 16) Ha simbu oyo, bupolofweto buli ku mukanda wa Myaso 37:10 bukalishulisilila. Obu bupolofweto ngwabwo: “Mu kasimbu kakandondo lika, baka-bubi bakahwa boshe njwa.” Mu Bumwene bwa Njambi, Yesu akanena kwoloka mu kaye koshe.—Tandeni Isaya 11:4.

2. Buyoye bukafwa bati Bumwene bwa Njambi mubukayula hano hasi?

Mu Bumwene bwa Njambi, ‘baka-busunga bakakala mu lifuti, co bakayoyamo myaka yoshe.’ (Myaso 37:29) Lingeni ngwe muli na kuyoya mu kaye muje banu boshe bazema Yehova, co lalo balizema umo na mukwabo! Mu kaye kakaha, wahi akabinja, co banu boshe bakayoya myaka yoshe.

3. Bika bibukalinga Bumwene bwa Njambi munina ya kunyongesa banu bababi?

Munina ya kunyongesa banu bababi, Yesu akayula myaka 1,000. Co mu myaka 1,000, Yesu na baje ba kupwa 144,000 baje bakayula nabo, bakakwasa banu hano hasi bapwe ba kulumbunuka, co kubakakala na bubi. Ku mamaneselelo a myaka 1,000, hano hasi hoshe hakapwa paradaisi. Co banu boshe bakakalaho bakapwa ba kubwahelela, co lalo bakononoka mashiko a Yehova. Kutundaho, Yesu akelwisa Bumwene kuli Ishe, Yehova. Co lizina lya Yehova likapwa lya kujela. (Mateo 6:9, 10) Yesu akamwesa ngwendi Yehova wapwa muka-kuyula wamubwa uje wazema banu. Yehova akanyongesa Satana na bandemone bendi na banu boshe baje kubakalyaka kwisi ya ciyulo cendi. (Kujombolola 20:7-10) Byuma byabibwa bibukanena Bumwene bwa Njambi bikakalako myaka yoshe.

TONDESESENI

4. Bumwene bwa Njambi bukanyongesa bifulumende byoshe bya banu

‘Baje bali na nzili bali na kuyandesa bakwabo.’ (Muka-kwambulula 8:9) Mu Bumwene bwendi, Yehova akamanesa byuma byabibi bibali na kulinga banu ku bakwabo.

Tandeni Ndanyele 2:44 na 2 Tesalonika 1:6-8. Kutundaho, simutwiyeni ha bihula binatako:

• Yehova na Munendi Yesu bakalinga bika ku bifulumende bya banu na baje bali na kubikundwiya?

• Bika bimunalilongesa hali Yehova na Yesu bije bimilingisa mukulahele ngweni bakendesa mwamubwa byuma?

5. Yesu wapwa Mwene wamubwa

Ha kupwa Mwene wa Bumwene bwa Njambi, Yesu akalinga byuma byabingi byabibwa bije bikakwasa banu. Kengeni VIDIO mangana mumone byuma byanalingi Yesu bije bimwesa ngwabyo washaka kukwasa banu, co lalo Njambi namwana nzili ya kulinga ngoco.

VIDIO: Yesu Wamwesele Byuma Bibukalinga Bumwene bwa Njambi (1:13)

Yesu mwakele hano hasi, wamwesele banu byuma bibukalinga Bumwene bwa Njambi. Byuma muka bibanamwesa ha liputa linatako bimunashungwiya manene kukamona? Tandeni na bisoneka bibanamwesa.

6. Bumwene bwa Njambi bukalingila banu byuma byabibwa

VIDIO: Byuma Byabibwa Bili na Kwija Kulutwe (4:38)

Tandeni Myaso 37:4, na kusimutwiya ha cihula cinatako:

• Muliziba bati mumunazibuka ngweni kulutwe Yehova akana banu ‘bibashaka’?

SIMPI YAKAMA

Bumwene bwa Njambi bukashulisilila biyongola bya Njambi. Bukatengulula hano hasi hoshe mangana hakapwe paradaisi, co hakakala banu bababwa baje bakalemesa Yehova myaka yoshe.

Kwitulukamo

• Bumwene bwa Njambi bukajelesa bati lizina lya Yehova?

• Bika bitulingisa tukulahele ngwetu Bumwene bwa Njambi bukashulisilila bikulaheso byoshe bili mu Mbimbiliya?

• Byuma muka bibukalinga Bumwene bwa Njambi bimunashungwiya manene kukamona?

WANENI BIKWABO

Alamagidoni yapwa ika?

“Nzita ya Alamagidoni Yapwa Ika?” (Ñanda ya ha webusaiti)

Moneni byuma bikalingiwa ha simbu ya “kayando kakama“ yendekele Yesu.—Mateu 24:21.

“Kayando Kakama Kapwa Bika?” (Ñanda ya ha Webusaiti)

Moneni byuma biyasa kulinga naanga mangana ilinge ngwe ili mu kaye kakaha.

Lingeni Ngwe Muli mu Paradaisi (1:50)

Munalume umo wa bupolitiki wawanene bikumbululo ku bihula byakele nabyo. Tandeni muzimbu wa, “Njakele na Bihula Byabingi.”

“Mbimbiliya Ikatengulula Buyoye bwa Banu” (Kaposhi ka Kukengela ka January 1, 2012)