Mu ciyulo ca Njambi, byuma byoshe bya kutanga byalikwatasanene, co byakele mu kwoloka

Bika Bitutondela Bumwene bwa Njambi?

Ha simbu yatangele banu, Yehova Ishamatanga ikeye lika wapwile Muka-kuyula. Walingilile banu byuma byabibwa mwafwa ya kubazema. Wababwaheselele lihya lya Edeni, mangana lipwe limbo lyabo lyalibwa. Co lalo wabanene byakulya byabingi. Kutundaho, wanene banu bipangi byabibwa. (Kushangumuka 1:28, 29; 2:8, 15) Banu banesi kuyoya mu kwoloka ngwe bacili mwisi ya ciyulo ca Njambi.

Adama nakwata bushuka bubababindikile buje bwanamwana Eva. — Banu ba kulibanga babyanene Ciyulo ca Njambi

Mbimbiliya imwesa ngwayo kangelo umo, uje wakupwile Satana Liyabolo, watengulukilile ciyulo ca Njambi. Wamwesele ngwendi banu babwahelela nga baliyula bakebo babenya kutubakana kubayula kuli Njambi. Calubinda, bisemi betu ba kulibanga ba Adama na Eva, batolililile ku makuli a Satana, co balikwatasanene nendi mu kutengulukila Njambi.—Kushangumuka 3:1-6; Kujombolola 12:9.

Ba Adama na Eva bonowele kuyoya myaka yoshe mu Paladaisi oku banalumbunuka, mwafwa batengulukilile ciyulo ca Njambi. (Kushangumuka 3:17-19) Byuma bibangwile kulinga byakele bana babo mu bukalu. Mbimbiliya ngwayo Adama walingile bubi ngeci, “bubi bwezile hano ha kaye hali munu umo lika, co bubi bwendi bunanene kutsa.” (Loma 5:12) Bubi bunanene bukalu bukwabo. ‘Banu bamo baje bali na nzili, bali na kuyandesa baje bali mwisi yabo.’ (Muka-kwambulula 8:9) Banu batwalelelaho kuliwana na bukalu nga baliyula bakebo babenya.

MUCASHANGUMUKILILE CIYULO CA BANU

Nimelonde nemana mu ngila ya kulyalesa. Kunima yendi kuli banu bali na kutunga mutungo. — Nimelonde watengulukilile Yehova

Mbimbiliya ngwayo, Nimelonde ikeye munu wa kulibanga kuyula hano hasi. Co walwisile ciyulo ca Yehova. Kushwa lika mu matangwa ayoyele Nimelonde, banu banapangesa mwamubi moko ya kuyula. Myaka 3,000 kunima, Mwene Solomoni wasonekele ngwendi: “Baka-kuyanda bakele na kulila, co naumo wahi wabazembelekele, omwo baje baka-kubayandesa bakele na nzili hali bakebo.”—Muka-kwambulula 4:1.

Byuma kubyatengulukile. Mu 2009, libulu limo lya munga ya United Nations lyendekele ngwalyo: “Bukalu bwabwingi bubali na kuliwana nabwo banu buli na kwija mwafwa ya ciyulo cacibi.”

SIMBU YA KULINGAKO BIMO

Banu batonda baka-kuyula bababwa na fulumende yaibwa. Co bikebyo bene byanakulahesa Ishamatanga yetu.

Bikupulo: Byuma binaija mwafwa ya biyulo bya banu. 1. Munakazi wa ku Asia natumbama mu ngila ya mazilo oku nakwata munendi uje ali na kulila. 2. Munalume wa kakulukazi uje ali na kubinja nalala ha mwela mu cipatela. 3. Maswalale bali na kupilula mata mu nzita. 4. Baka-kutengulukila bali na kukuwanga oku banakwata mitambi. 5. Munakazi na munendi banemana haja ya njubo yabo oku bali na kukenga gilasi ya ha lipito ije inapwabuka. 6. Nganda ya bwisi na mipaipi ije ikatuwisa bwisi na mikole ya malaiti. — Nameme bifulumende bya banu byabibwa manene binonowa kumanesa bukalu bumo bubali na kuliwana nabwo banu

Njambi nashimbika Bumwene nambe ngwetu fulumende ije ikainga biyulo byoshe bya banu, co “bukebwo bukakala myaka yoshe.” (Ndanyele 2:44) Obu bukebwo Bumwene bubanalombo banu babangi. (Mateo 6:9, 10) Oloni Njambi keti ikeye akayula omu mu fulumende. Nangula Muka-kuyula uje wapwile munu hano hasi. Njambi nangula iya?