Chihula Chivanakumbulula

◼ Kuma vaka-kwambulula vanapande kupangetha manene intaneti mu kwambulula, nambe kulilongetha na vanu veka vaje vakala ku lifuti lyeka ndi?

Vaka-kwambulula vamo vakapangetha intaneti mu kuwana vilongetha vya Mbimbiliya mu mafuti muje muli vaka-kwambulula vavandondo, nambe muvanavindika chipangi chetu. Thimbu imo, mu kulinga ngocho munatundu vyuma vyavivwa. Oloni vaka-kwambulula vanatha kukovela mu vukalu nga vatuma mithzimbu na kuthimutwiya na vanu va mu mafuti eka. Nambe nga tukashaka kukwatha vanu va vimbunge vyavivwa vathzivuke muthzimbu wauvwa, oloni kuthimutwiya kwachifwa echi kunatha kutulingitha tulikwatathane na vanu vavavi, na vaka-kutengulukila Njambi. (1 Koli. 1:19-25; Kol. 2:8) Mu mafuti aje avashokela chipangi chetu, fulumende yatha kuthzivuka mithzimbu yoshe ivatuma vanu. Cho kuthimutwiya mu ngila eyi kunatha kukoveletha vandolome na vandokathzi mu vukalu. Ngechi, vaka-kwambulula vanapande kujenjuka ku kupangetha intaneti mu kushakathzeka vanu va mu lifuti lyeka va kulilongetha navo muthzimbu wauvwa.

Nga tuliwana na munu uje natundu ku lifuti lyeka, twatha kumwambulwila mu chintulu. Oloni nga neluka ku lifuti lyendi, cho kutwapandele kutwalelelaho kuthimutwiya nendi,kuvanga nga ofisi ya munango inatutavetha kulinga ngocho. Oloni tunapande kumumwetha mwakupangethela keyala yetu ya jw.org haje hali viñanda vyavingi, nambe kumuleka athonekele ofisi ya munango ya mu lifuti lyendi. Twatha lalo kumushongangeya kuya ku Njuvo ya Vumwene ya mu chitingitingi chendi. Mu mafuti amo kumwethi Vinjuvo vya Vumwene, oloni nga ashaka ngwendi Vakaleho va Yehova va mu chitingitingi chendi vamwendele, cho munapande kuthoneka fomu ya Shangwe Mu Mu Potele (S-43), na kuyana kuli muka-kuthoneka uje ayituma kupangetha keyala ya jw.org. Ofisi ya munango ije ili na kutwamenena chipangi cha mu lifuti lyendi, ithzivuka mwamuvwa vyuma vyoshe vya mu lifuti lije, cho yatha kuthzivuka mwakumukwathela ku sipilitu.—Kengeni Chipangi Chetu cha Vumwene cha June 2014 ha lipu. 7 na November 2011 lipu. 2 mu Silozi.

Nga munu itukendela ajalukila ku lifuti lyeka, nambe hamo tuli na kulilongetha na munu wa mu lifuti lyeka kupangetha intaneti, cho tunapande kukavangeya vyuma vivanendeka omu mu ñanda. Oloni tunatha kutwalelelaho kushambeya lishungu lyendi lya kulilongetha, kweta noho hakawanena muka-kwambulula wa kulilongetha nendi wa mu chitingitingi chendi. Nga ou munu wakala mu lifuti lije livanavindika nambe kushoka chipangi chetu, cho tunapande kunyanyama nga tupangetha makina, foni, nambe kuthoneka mikanda mukuthimutwiya ha viñanda vya mu Mbimbiliya.—Mat. 10:16.