Nˈokˈawäˈänëmë jäˈäy ets mëdë Biiblyë nˈëxpëjkëm
1. ¿Wiˈixën yajkuytyunäˈäny diˈibë Jesus ojts xytyukˈanaˈamëm mä Matewʉ 28:19 ets 20?
1 Jesus ojts xytyukˈanaˈamëm: “Nëjx yaˈëxpëktë jäˈäyëty [...] es tukniˈˈixëdë” (Mat. 28:19, 20). Pääty xëmë mbäät nˈawäˈänëmë jäˈäy ets mëët nˈëxpëjkëmë Biiblyë, kyaj jyaajëty jeˈeyë sääbëdë o domingë extëm të yajtukniwitsë tuˈukpë poˈo. Yä yajnigäjxäˈäny wiˈix mbäät nduˈunëm.
2. ¿Pënaty mbäät xyˈawanë ets mëdë Biiblyë xyˈëxpëktët?
2 Nˈokˈawäˈänëm. Ko kanäägë jäˈäy nˈawäˈänëm ets mëët nˈëxpëjkëmë Biiblyë, mbäät pojënë nbatëm tuˈuk diˈib ëxpëkäämp (Ecl. 11:6). ¿Të mijts duˈun xyˈawanë ëxpëjkën? Mä tuˈugë naymyujkën jap Estados Unidos ojts ttukniwitsëdë parë tuk poˈo tˈawanëyäˈändë jäˈäyë ëxpëjkën. ¡Jantsy jotkujk ojts niˈamukë nyayjawëdë ko yˈëxpëjktsondaky 42 jäˈäy! Kyaj mwinmayët ko jäˈäy diˈib mëtmaytyakypy nyijäˈäp ko mijts myaˈëxpejkypyë jäˈäy. Pääty ko jatëgok xynyijëmbitët, ¿tiko xykyaˈˈanëëmë ets mëët xyˈëxpëkëdë Biiblyë? Pën kyaj tkupeky, kyaj ti jotmay, mbäät duˈunyëm xynyijëmbity. ¿Të nanduˈun xyˈanëëmë mëdëjkpäˈä, mjiiky mmëguˈuk, diˈib mëët mdundë o diˈib mëët mˈeskuelëˈattë pën tsyojkënyëˈäjttëp ets mëët xyˈëxpëktëdë Biiblyë? Nan mbäät xyajtëyë jäˈäy diˈib myaˈëxpejkypy pën jamë myëtnaymyaayëbë o jyiiky myëguˈuk diˈib tsyojkënyëˈäjttëp tˈëxpëkäˈändë Biiblyë.
3. ¿Ti naybyudëkë nmëdäjtëm parë mëdë jäˈäy nˈëxpëjktsondakëm, ets näˈä mbäät nyajtuˈunëm?
3 Tuˈugë naybyudëkë. Diˈib mbäät mbudëkëty parë jäˈäy xyaˈëxpëjktsoonët yëˈë trataadë ¿Mnijawëyaambyë tëyˈäjtën? Mbäät xymyoˈoyë jäˈäy oy të tˈaxäjë wiinkpë ëxpëjkpajn ets oy kyaj. Nan mbäät nyajtuˈunëm ko ngäjxwäˈxëm mä jäˈäy jyuy tyooktë, nëˈääy tuˈääy, ko ngajxëmë neky, ko nijëmbijtëmë jäˈäy diˈib tsyojkënyëˈajtypy ets mbäät nnikakëm ko jäˈäy ngapatëm mä tyëjk. Nˈokmënëjxëm mä nduˈunëm, mä njuˈuy ngëbajtëm o ko nëjxëm karroty. Mä tadë trataadë kyëjxnë tap yaˈˈawanë jäˈäy ets tˈëxpëkëdë Biiblyë mëdë liibrë ¿Ti tukniˈijxëbë Biiblyë?
4. ¿Wiˈix mbäät nyajtuˈunëmë trataadë ¿Mnijawëyaambyë tëyˈäjtën? parë mëdë jäˈäy nˈëxpëjktsondakëm?
4 Ko naty ja jäˈäy të xymyoˈoy ja trataadë, ta net xytyukˈixët ja yajtëˈëwën diˈib myëmiimpy winduuy ets xyˈanëëmët: “¿Diˈibë yajtëˈëwën mas mˈoymyëdoopy?”. Ta net mëët xykyäjxtët mä yaˈˈatsoojëmbity. Ok, ta net xykyäjxët o xyˈanëëmët extëm jyënaˈany trataadë ëxkëˈëy, mä yaˈˈawanë tuˈugë ëxpëjkën. Ta net xytyukˈixëdë liibrë ¿Ti tukniˈijxëbë Biiblyë? mä niˈigyë tnimaytyaˈaky. Ets xyˈawanëdë tadë liibrë ets mëët mnaygyäjxëdët näˈä xynyijëmbitäˈäny.
5. ¿Tiko mbäät xëmë nˈawäˈänëmë jäˈäy ets mëët nˈëxpëjkëmë Biiblyë?
5 Mä ngäjxwäˈxëm taanëmë jäˈäy nbatëm diˈib nyijawëyaampy ja tëyˈäjtën diˈib yajpatp mä Biiblyë. Pääty pën xëmë nˈawäˈänëmë jäˈäy ets mëët nˈëxpëjkëm, nëjxëp jantsy jotkujk nayjäˈäjëm ko mbäät nbudëjkëm ets tpäädët ja nëˈë tuˈu diˈib mënëjxp mä jukyˈäjtën (Mat. 7:13, 14).