Nˈokpudëjkëmë jäˈäy parë Jesus yˈëxpëjkpëˈatëdët
1. ¿Ti mbäät nduˈunëm parë jäˈäy nyitsoˈoktët?
1 Extëm yajnigajpxy të nduˈunëm 2014, yëˈë xytyukˈijxëm ko Diosë kyäjpn të tjotmoˈoytyë mä të tkäjpxwäˈkxtë oybyë ayuk diˈib nyimaytyakypyë Diosë Kyutujkën (Mat. 24:14). Mbäät mayë jäˈäy yajtuknijawë tijatyë Biiblyë myaytyakypy, ko ngäjpxwäˈkxëm tëjkmdëjkm, ko ngoonwäˈkxëmë trataadë o inbitasyonk ets ko naskëˈëyëm ja karruˈunk mä mayë jäˈäy nyaxtë. Per parë mbäädë jäˈäy nyitsoˈoktë, tsojkëp nbudëjkëm parë Jesus yˈëxpëjkpëˈatëdët ets ndukniˈˈijxëm ja tëyˈäjtënë diˈib yajpatp mä Biiblyë (1 Tim. 2:4).
2. ¿Diˈibatyë yajtëˈëwën mbäät xypyudëjkëm parë xëmë nˈawäˈänëmë jäˈäy ets tˈëxpëkëdë Biiblyë?
2 Nˈokˈawäˈänëm xëmë jäˈäy parë tˈëxpëkëdë Biiblyë. Pën tuˈugë jäˈäy yˈoymyëdoobyë Diosë yˈayuk, ¿nyajtëˈëwëm mä tsyëënë ets ninëjkxëm netyë parë nˈawäˈänëm ets tˈëxpëkëdë Biiblyë? ¿Të näämnëm xytyukˈixyë jäˈäy ko tim jawyiin xynyinëjkxy wiˈix nyaˈëxpëjkëm mëdë Biiblyë? ¿Näˈä të xyˈaktukˈixy ja diˈib mmoobyë rebistë wiˈix nyaˈëxpëjkëm mëdë Biiblyë? ¿Të xytyukˈixyë bideo ¿Tiko xyˈëxpëkëdë Biiblyë? ets ¿Wiˈixë jäˈäy tˈëxpëkyë Biiblyë? pënaty mëët mduny, mˈeskuelëˈaty, mëjjëmbäˈä mëdëjkpäˈä, mjiiky mëguˈuk o pënaty mˈixyˈajtypy? Ko naskëˈëyëm ja karruˈunk mä mayë jäˈäy yajpääty ets tkondë ja ëxpëjkpajn diˈib nyajtuˈunëm ko mëdë jäˈäy nˈëxpëjkëm, ¿nˈanmäˈäyëm ko mbäät namayˈäjtën yajtukˈëxpëkyë Biiblyë?
3. ¿Ti tsojkëp parë jäˈäy ndukniˈˈijxëmë tëyˈäjtën?
3 Jyobaa mëdë Jesus xypyudëjkëm. Jesus ojts tniˈanaˈamë: “Nëjx yaˈëxpëktë jäˈäyëty [...] esëts ëj njäˈäyˈattët”, ko jyënany “nëjx”, yëˈë yˈandijpy ko tsojkëp nduˈunëmë mëjää ets ninëjkxëmë jäˈäy. Per kyaj naytyuˈuk nyajpatëm, yëˈë wyandak ko yajpäädäˈäny mët ëtsäjtëm (Mat. 28:19, 20). Etsë Jyobaa nan të xymyoˈoyëmë yˈespiritë santë, per kyaj yëˈëyëty, nan të xymyoˈoyëmë ëxpëjkpajn ets të xytyukniˈˈijxëm wiˈixë jäˈäy nduknijäˈäwëmë tëyˈäjtën (Zac. 4:6; 2 Kor. 4:7). Mbäät nˈamdoˈowëmë Dios parë xymyoˈoyëmë mëjää ets ja tsojkën parë nduˈunëmë tyäˈädë tuunk diˈib jantsy jëjpˈam (Filip. 2:13).
4. ¿Tiko mbäät nbudëjkëmë jäˈäy etsë Jesus yˈëxpëjkpëˈatëdët?
4 Agujk jotkujk xyajnayjäˈäwëm ko ngäjpxwäˈkxëmë oybyë ayuk. Per mas jotkujk nëjkx nnayjäˈäwëm ko tuˈugë jäˈäy ndukniˈˈijxëmë tëyˈäjtën ets ko nbudëjkëm parë tpanëjkxët ja “tuˈu diˈibë nëjxp mä ja jikyˈäjtënë” (Mat. 7:14; 1 Tes. 2:19, 20). Per ko nbudëjkëmë jäˈäy parë Jesus yˈëxpëjkpëˈatëdët, nëjkxëbë Jyobaa nyajjotkujkˈäjtëm diˈib tsyejpy ets “ja pojpë jäˈäy jyodëmbittët, [...] këdiibë kyutëgoytyët” (2 Peed. 3:9).