Yëˈëyë mbëkëp diˈib “myëbejkypy ja Jesukristë” ¿mbäädëdaa?

Duˈun näägë ënäˈktëjk wyinmaytyë. Per nyijäˈäwëdëp ko Jyobaa tsyejpy ets yëˈë tpëktët diˈibë “myëbejkypy ja Jesukristë”. Tyäˈädë yëˈë yˈandijpy ko yëˈëyë mbäät tpëktë tuˈugë Dios mëduumbë diˈib të nyëbajnë (1 Korintʉ 7:39). Per ¿tiko wyinmaytyë ko kyaj mbäät tpëktë tuˈugë testiigë?

¿TIKO DUˈUN WYINMAYTYË?

Nääk, pääty duˈun wyinmaytyë mët ko niˈigyë nyimayˈattë toˈoxyˈënäˈk ets kyaj dyuˈunëtyë yaˈayˈënäˈk. Ets jantsy duˈun mä kanäägë paˈis. Extëm Corea, mä 100 Testiigë, ja 57 toxytyëjk ets 43 yetyëjk. Ets Colombia, mä 100 Testiigë, ja 66 toxytyëjk ets 34 yetyëjk.

Mä näägë paˈis, tmëdattë kostumbrë ko ja yetyëjk yëˈë myoobyë regalë o meeny ja kiixyë tyääk tyeety parë mëët pyëkët. Pën ja tyääk tyeety kyaj Tyestiigëty, mbäät tˈamdowdë mayë meeny o regalë tsooxatypyë. Ets kom mayë yaˈayˈënäˈk kyaj mbäät tjuytyë regalë tsooxatypyë, ta näägë toˈoxyˈënäˈk wyinmaytyë ko ninäˈä mbäät tkapëktë tuˈugë Testiigë.a

TUKˈIJXPATË JYOBAA

Pën të näˈä duˈun mwinmay, jamyats ko Jyobaa nyijäˈäwëp ets jyaygyujkëp wiˈix mnayjawëty (2 Crónicas 6:29, 30).

Jyobaa xyˈanmäˈäyëm ko yëˈëyë mbäät nbëjkëm diˈib mëduunëp. Mët ko nyijäˈäwëp ko yëˈë diˈib niˈigyë oybyëtsëëmp ets xykyuentˈatäˈänëm. Yëˈë kyaj ttseky ets nduˈunëm diˈib ok nmëjëˈëy nmëyaxëm. Ja tiempë mä jyukyˈajtyë kugajpxy Nehemías, nimayë israelitëty yëˈë pyëjktë ja toxytyëjk diˈib kyaj tˈawdattë Jyobaa. Päätyë Nehemías tyukjamyajtsëdë wiˈix jyajtyë Salomón. Jyënany ko Dios mëkë nety ttsekyë Salomón, pääty dyajtuuny rey jam Israel. Perë Salomón ta tpëjkyë toxytyëjk diˈib kyaj tˈawdattë Jyobaa, ets ta yajpokytyuunë (Nehemías 13:23-26). Jyobaa xytyukmëtsojkëmë oyˈäjtën, pääty xyˈanmäˈäyëm ets yëˈëyë nbëjkëm diˈib nanduˈun mëduunëp (Salmo 19:7-10; Isaías 48:17, 18). Nnijäˈäwëm ko myëdäjtypyë madakën parë xyˈanmäˈäyëm ti mbäät nduˈunëm ets ti kyaj. Nˈokmëjjäˈäwëm ko duˈun xykyäjpxwijëm, pes duˈun dyajnigëxëˈëky ko xytsyojkëm ets ko yëˈë parë ndukˈoyˈäjtëm (Proverbios 1:5).

Pën yëˈë mbëjkypy tuˈugë jäˈäy diˈib kyaj ttsekyë Jyobaa, mbäät mdukmastuˈutyëty parë kyaj xynyekymyëdunët. Ets seguurë ko mijts kyaj duˈun mjatäˈäny (2 Korintʉ 6:14). Jamyats ko Jyobaa xykyäjpxwijëm, yëˈë parë xëmë ndukˈoyˈäjtëm. Nimay tyamë Dios mëduumbë yëˈë të twinˈixtë diˈib oybyëtsëëmp ets të tmëmëdowdë tyäˈädë käjpxwijën. Perë ta diˈib kyaj të tmëmëdowdë.

MBÄÄT XYPYEKY DIˈIBË “MYËBEJKYPY JA JESUKRISTË”

Maggy tuˈugë kiixy diˈib tsënaapy Australia, yëˈë mëët nyayˈixyˈäjttsondakë tuˈugë mixy diˈib kyaj Tyestiigëty.b Maggy jyënany ko kanäkˈok tyëgoyˈajty mä naymyujkën mët ko yajpääty mët ja mixy, ta tmëjagamgekyë Jyobaa. Ratana, jatuˈugë kiixy diˈib tsënaapy India, nyayˈixyˈäjttsondakë mët tuˈugë mixy diˈib mëët yˈeskuelëˈaty. Ja mixy ta tˈëxpëjktsondakyë Biiblyë, parë jeˈeyë mëët yajpäädäˈäny ja kiixy. Ko tiempë nyajxy, ta Ratana tmastutyë Jyobaa ets dyajtëgäjtsyë ryelijyonk parë mëët pyëkäˈäny ja mixy.

Ndenguè, jatuˈugë kiixy diˈib tsënaapy Camerún ja netyë jyëmëjt 19 ko tpëjky tuˈugë mixy diˈib kyaj Tyestiigëty. Ja mixy të nety yˈanëˈëmxëty ko mbäät jeˈeyëm Tyestiigëˈaty. Per ko nyajxy majtsk sëmään mä nety të pyëktë, ta yˈanmääyë ets kyaj nyekynyëjkxët mä reunyonk. Ndenguè jyënaˈany ko jantsy naytyuˈuk nyayjäˈäwë ets jeˈeyë jyëëy yaxnë. Ta tpëjkyë kuentë ko të nety dyajmäˈätyë jyukyˈäjtën, ets xëmë nyaybyokyˈijxë.

Mbäät mwinmay: “Ta nmëguˈukˈäjtëm diˈib të pyëktë mët diˈib kyaj Tyestiigëty ets jantsy oyjyaˈayëty”. Jantsy tëyˈäjtën. Per ko mijts xypyëkët tuˈugë jäˈäy diˈib kyaj Tyestiigëty, ¿mbäät oy nëjkx mˈity mëdë Jyobaa? ¿Wiˈix nëjkx mnayjawëty ko kyaj të xymyëmëdoy ja käjpxwijën diˈibë Jyobaa të mmoˈoyëty parë xytyukˈoyˈatët? Ets diˈib mas jëjpˈam, ¿wiˈix nëjkx nyayjawëtyë Jyobaa? (Proverbios 1:33.)

Nimayë nmëguˈukˈäjtëm myëmëdoodëbë Jyobaa kyäjpxwijën ets yëˈë pyëjktëp diˈib nanduˈun Testiigë. Ijttëp seguurë ko yëˈë diˈib mas oybyëtsëëmp. Nan pääty duˈun ttundë, mët ko yëˈë yajxondäˈägandëbë Jyobaa. Extëmë Michiko diˈib tsënaapy Japón, yëˈë myëmëdowanë Dios, per ja fyamilyë yëˈë tukpëkanë tuˈugë mixy diˈib kyaj Tyestiigëty. Nan yˈijx wiˈix ja myëtnaymyaayëbëty tpëktë diˈib Testiigë ets yëˈë kyaj tpääty pën pyëkëp. Mon tuk nyayjäˈäwë ko duˈun tˈijxy. Per diˈib pudëjkë, yëˈë ko tjamyejtsy ko parë jäˈäy yˈitët jotkujk, kyaj tyim tsekyëty pyëkët, pes diˈib jëjpˈam yëˈë ko tmëdunëdë Jyobaa, ja Dios diˈib jotkujk (1 Timoteo 1:11, Traducción del Nuevo Mundo). Michiko nan ijtp seguurë ko Jyobaa xymyoˈoyëm ti ntsojkënyëˈäjtëm. Pääty jyënaˈany ko pën pëkäˈänëm ets kyaj nbatëm diˈib Dios mëduump, nik oy ko nmaˈkxtujkëm. Pes ko tiempë nyajxy, ta Michiko tpëjky tuˈugë mixy diˈib jantsy oy Dios mëduump. Ets jantsy jotkujk nyayjawëty ko tmëmëdooyë Jyobaa.

Nan taa yaˈayˈënäˈk diˈib awijxtëp axtë koonëm tpäättë ja kiixy diˈib mbäät tpëktë. Extëmë Bill diˈib tsënaapy Australia, jyënaˈany ko näˈäty tsyujˈijxë toˈoxyˈënäˈk diˈib kyaj Tyestiigëty. Per kyaj tlugäärmooy mët ko kyaj nety dyajtsondäˈägäˈänyë ëy kajpxy mët tuˈugë kiixy diˈib kyaj Tyestiigëty. Bill nan ojts tjaˈixy näägë toˈoxyˈënäˈk diˈib Testiigë, per yëˈëjëty kyaj yˈijxëdë. Bill ja yˈawijxy 30 jëmëjt axtë ko tpaty tuˈugë kiixy diˈib mëët ojts kyijpxyë wyinmäˈäny mä tijaty tyunandëp. Yëˈë jyënaˈany ko kyaj axëëk nyayjawëty ko të yˈawixy. Pes jantsy jotkujk nyayjawëty ko mbäät mëdë nyëdoˈoxy kyäjpxwaˈkxy, yˈëxpëktë ets tmëdundë Jyobaa. Nan jotkujk nyayjawëty ko yajpääty mët ja nyëdoˈoxyë myëtnaymyaayëbëty, pes nan myëduundëbë Jyobaa. Ets ko nimajtsk tmëmëdowdë Biiblyë kyäjpxwijën, ta niˈigyë kyëktëkë ja tsyënäˈäy jyukyˈäjtën.

TI MBÄÄT XYTYUNY MYENTRËS MˈAWIXY

Pën kyajnëm mbëky mët ko xymyëmëdoyë Jyobaa, ¿ti mbäät mbudëkëty parë mˈawijxˈadëˈëtsët? Ko xywyinmayët ko Jyobaa jantsy jotkujk nyayjawëty ko xymyëmëdoy (1 Samuel 15:22; Proverbios 27:11). Nan mbäät mbudëkëty ko xëmë xymyënuˈkxtäˈägëdë Jyobaa ets xytyukmëtmaytyäˈägët wiˈix mnayjawëty (Salmo 62:8). Ets pën mduumbyë mëjää parë xyjëjpkudijë diˈib myajtëgoyanëp ets ja axëëkpë tsojkën, ta niˈigyë kyëktëkët ja mnaymyayë mëdë Jyobaa. Jamyats ko Jyobaa mëjwiin kajaa myajtsobäätyëty, ets it seguurë ko yˈijxypy ti myajtëgoyˈajtypy. Jyobaa kyaj pën ttukwandaˈaky tmoˈoyaˈanyë jyamyëët, per mbudëkëyanëp parë mˈitët agujk jotkujk (Salmo 145:16; Matewʉ 6:32).

Mbäät näˈäty mnayjawëty extëmë David. Tëgok jantsy mon tukë nety nyayjawëty ko Jyobaa tˈanmääy ets pyudëkëdët mët ko kyaj nety ti jyot myëjäänë (Salmo 143:5-7, 10). Pääty këdii mˈëxtëkëwaˈaky, awix etsë Jyobaa tˈatsoojëmbitëdë mnuˈkxtakën. Käjpxë Biiblyë ets pawinmay diˈib mgajpxypy. Duˈun xynyijawët wiˈixë Jyobaa tpudëjkë pënaty tëëyëp mëduunë ets ti tsyejpy xytyunët. Tyäˈädë yëˈë mbudëkëyanëp parë xytyukˈijxpatëdë Jyobaa ets xymyëmëdowët.

¿Tijaty mbäät xyˈaktuny mientrës mˈawixy? Tunë mëjää parë niˈigyë xyajkëktëkëdë mnaymyayë mëdë Jyobaa ets oy myajnimaytyäˈägët. Ets nan mbäät xytyunyë mëjää parë oy mnaymyënëjkxëdët mëdë mëguˈuktëjk, mˈitët oyjyaˈay, tuumbë jäˈäy ets xëmë xymyëdunëdë Jyobaa. Jëjpˈam xymyëdatëdë duˈumbë jäˈäyˈäjtën parë nëjkx mgasäädëˈaty agujk jotkujk (Génesis 24:16-21; Rut 1:16, 17; 2:6, 7, 11; Proverbios 31:10-27). Pëjtäˈägë mjot mwinmäˈäny mä Diosë tyuunk ets mä naymyujkën. Ko duˈun xytyunët, yëˈë mbudëkëyanëp parë xywyinˈixët diˈib mdukˈoyˈatëp. Bill jyënaˈany ko jantsy pojënë tjäˈäwë tiempë nyajxy ko nyaytyuˈukˈäjty mët ko tyuny prekursoor.

Mbäät nmëmëdoˈojëmë Jyobaa ets nbëjkëm diˈib “myëbejkypy ja Jesukristë”. Pën yëˈë nbëjkëm diˈib nanduˈun Testiigë, ta nëjkx nyajmëjpëtsëˈëmëmë Jyobaa ets nëjkx nˈijtëm agujk jotkujk. Biiblyë jyënaˈany ko pën nmëmëdoˈojëmë Jyobaa xondaˈakyˈää xondaˈakyjyot, ta nëjkx njukyˈäjtëm agujk jotkujk ets winë xëë (Salmo 112:1, 3). Pääty mmëmëdowë Jyobaa yˈanaˈamën ets yëˈëyë mbëkëbë jäˈäy diˈib “myëbejkypy ja Jesukristë”.