KĨTHOOMO KĨA 3

Nĩatĩa Ũmma bwa Bibiria Bwacookerue Kaĩrĩ?

Gakuundi ga antũ-arũme gakiiritanaga Bibiria mĩakeene ja 1870 — Aritwa ba Bibiria, mĩakeene ja 1870

Ntomũrũme akĩthoomaga ngacĩti ya mbere kwaandĩkwa ya Mnara wa Mlinzi — Ngacĩti ya mbere ya *Mnara wa Mlinzi,* 1879

Mwekũrũ agwete Mnara wa Mlinzi na Amkeni! — *Mnara wa Mlinzi* naarua

Nĩkwaroretue Bibiriene atĩ nyuma ya gũkua kwa Kristũ, aritani ba ũrongo barĩngĩ kuumĩĩra kĩrĩ Akrĩstũ ba mbere na kũthũũkia ũmma bwa Bibiria. (Mathithio 20:29, 30) Nyuma ya kagiita, ũu nou gwakarĩkĩre bungwa. Nĩbaunganĩrie mooritani ya Jesũ na mooritani ya ndini cia ũrongo, na Akristũ batĩ ba mma baraumĩra. (2 Timotheo 4:3, 4) Nĩatĩa tũũmba kũmenya kamma atĩ naarua tũrĩ na ũmenyo bwa mma bwa ũrĩa Bibiria ĩritanaga bungwa?

Ĩgiita nĩ rĩakinyĩre rĩa Jehova kũgwũra ũmma. Jehova naaroretie atĩ magiita ja mũthiro “umenyo bukoongereka nthiguru.” (Danieli 12:4) Mwakeene jwa 1870, gakuundi kaniini ka antũ, nĩ gaacwaaga ũmma kuuma kĩrĩ Bibiria na baramenya atĩ mooritani jamaingĩ ja makanisa jataumanĩĩtie na Bibiria. Kwou, baraambĩrĩria gũcũnkũũna kenda bamenya mooritani jongwa ja ũmma ja Bibiria, na Jehova arabatharima na ũmenyo bwa gĩkĩrundu.

Antũ eendi ũmma nĩ baacũnkũũnĩre Bibiria bwega. Barĩ na wĩru, Aritwa bau ba Bibiria, o ta ũrĩa Akũũjĩ ba Jehova beetagwa, nĩ baambĩrĩĩrie njĩra ya kwiritana ĩrĩa tũtumagĩra kinya naarua. Baarĩĩragia o ũntũ bũmwe bũmwe bwa Bibiria. Rĩrĩa baatirimaga gĩcuncĩ batĩgũciũkĩrwa nĩkĩo Bibiriene, nĩ baacwaaga Maandĩko jangĩ kĩrĩyo jagũgĩtaarĩĩria. Rĩrĩa baakinyagĩra ĩtua rĩkũgwatanĩra na Maandĩko jau jangĩ, nĩbaandĩkaga ũntũ bũu. Na njĩra ĩu ya kũrekeeria Bibiria ĩitaũra yongwa nĩ baacookerie kaĩrĩ ũmma bwegiĩ riĩtwa rĩa Mũrungu na Ũnene bwawe, mworoto jwawe kĩrĩ antũ na nthĩgũrũ, ũrĩa gũkarĩkaga kĩrĩ akuũ, na wĩrĩgĩĩro bwa kũriũkua. Ũcũnkũũni bwao nĩ bwabaritĩre ũkombone bwa mooritani na mawĩthĩre jamaingĩ ja ũrongo.—Johana 8:31, 32.

Gũkinyia mwaka jwa 1879, Aritwa ba Bibiria nĩ boonere atĩ ĩgiita rĩgũkinya rĩa kũmenyithania ũmma na njĩra ĩnene. Kwou mwakeene jũu, nĩ baambĩrĩĩrie kwaandĩkithia ngacĩti ĩrĩa tũcabithagia kinya naarua ĩjĩ, Mnara wa Mlinzi Unaotangaza Ufalme wa Yehova. Nandĩ nĩ tũgũtaambia ũmma bwa Bibiria kĩrĩ nthĩgũrũ 240, tũgĩtumagĩra mĩgambo nkũrũki ya 750. Gũtĩrĩo kaĩrĩ ũmenyo bwa mma bwethĩrwa bwingĩĩte ũjũ!

Nyuma ya gũkua gwa Kristũ, nĩatĩa gwakarĩkĩre kĩrĩ ũmma bwa Bibiria?
Nĩmbi bitũteethetie kũmenya ũmma kaĩrĩ kuuma kĩrĩ Rũteto rwa Mũrungu?