KĨTHOOMO KĨA 6
Kũrĩna Wĩrĩgĩĩro Bũrĩkũ bwa Barĩa Bakuĩte?
1. Kũrĩna nkuma ĩnjega ĩrĩkũ ĩĩgiĩ akuũ?
Rĩrĩa Jesũ aakinyĩre Bethania akuĩ na Jerusalemu, mũcoore waawe Lazaro naathirĩtie ntukũ inya kuuma arĩgũkua. Jesũ neetanĩrie na Maritha na Maria, aarong’ina ba Lazaro, arĩa aathikĩtwe. Nyuma ya kagiita gaakai kũragĩa ntundu ĩnene ya antũ. Ũthũgaanĩrĩa gĩkeno gĩkĩnene kĩa Maria na Maritha, rĩrĩa Lazaro ariũkĩrue nĩ Jesũ? — Thooma Johana 11:21-24, 38-44.
Maritha naaijĩ nkuma ĩnjega ĩĩgiĩ barĩa bakuĩte. Naamenyaga Jehova akariũkia barĩa bakuĩte batũũre nthĩgũrũne kaĩrĩ. — Thooma Ayubu 14:14, 15.
2. Gũkarĩkaga atĩa rĩrĩa twakua?
Mũrungu eerĩre Adamu: “Ugacoka muthetune, untu niku waritirwe.” —KIAMBIRIRIA 3:19.
Antũ boombĩrwe na mũthetu. (Kiambiriria 2:7; 3:19) Tũtoombĩrwe tũrĩ irundu birĩna mwĩrĩ jwa nyama. Tũũmbĩtwe tũrĩ biũmbe bia nyama na tharike, na gũtĩ gĩntũ kĩrĩ ndeene ya mwĩrĩ jwetũ gĩĩtaga na mbere gũtũũra rĩrĩa twakua. Twakua, ũtombo bwetũ kabũkujaga na tũtĩcookaga kũthũgaania kaĩrĩ. Nĩkĩo gĩtũmi gũtĩkĩo Lazaro augĩre noonere rĩrĩa aakuĩte, nĩũntũ akuũ batĩmenyaga ũntũ kinya bũrĩkũ. — Thooma Zaburi 146:4; Mutumiiria 9:5, 6, 10.
Mũrungu rĩ, nathangĩkagia antũ na mwanki rĩrĩa bakua? Tontũ Bibiria ĩritanaga rĩrĩa muntũ akua atĩmenyaga no atĩa, ũritani bwa mwanki jwa kenya na kenya nĩ ũritani bwa ũrongo na nĩ bũcambagia Mũrungu. Mũrungu nathwĩre mono ĩthũgaanio rĩa kũthangĩkia antũ na mwanki. — Thooma Jeremia 7:31.
Tega vidio ĩjĩ Kũrĩna Wĩrĩgĩĩro Bũrĩkũ bwa Barĩa Bakuĩte?
3. Akuũ rĩ, no baaranĩrie na baatwĩ?
Akuũ batĩũmba kwaria kana kwigua. (Zaburi 115:17) Ĩndĩ, araĩka bamwe baathũũku boomba kwaranĩria na antũ bagĩciethagia antũ barĩa bakuĩte. (2 Petero 2:4) Jehova nakanĩtie kũgeria kwaranĩria na akuũ. — Thooma Kuriikanithia Maathana 18:10, 11.
4. Nĩ baaũ bakariũkua?
Antũ mirioni inyiingĩ barĩa bakuĩte, bakariũkua batũũre nthĩgũrũne. Kinya bamwe barĩa baathithagia bũbũũĩ tontũ bataijĩ Mũrungu bakariũkua. — Thooma Luka 23:43; Mathithio 24:15.
Barĩa bakariũkua bakaritanwa ũmma bwa Mũrungu na boonanie nĩbetĩkĩtie Jesũ na njĩra ya kũmwathĩkĩra. (Kugwurirwa 20:11-13) Barĩa bakariũkua, na bathithie mantũ jameega bakagwĩrĩrua gũtũũra kenya na kenya nthĩgũrũne. — Thooma Johana 5:28, 29.
5. Kũriũka gũtũritanaga ũntũ bũrĩkũ bwĩgiĩ Jehova?
Wĩrĩgĩĩro bwa kũriũkua kwa akuũ bũũmbĩkanaga tontũ Mũrungu naatũmĩre Mũtaana waawe akue nĩũntũ bwetũ. Kwou, kũriũkua kwa akuũ gũtũmenyithagia Jehova arĩ wendo na kĩao gĩkiingĩ. Rĩrĩa akuũ bakariũkua rĩ, nũũ ũrĩngĩenda kwona mono? — Thooma Johana 3:16; Aroma 6:23.