Nĩatĩa Akũrũ Batungatagĩra Kĩũthũrano?

Tũtĩĩthagĩrwa na atongeeria ba kĩndini ba kũrĩgwa kĩrĩ ũthuranĩri bwetũ. Ĩndĩ ta ũrĩa kwathithagua nĩ Akristũ ba mbere, ategeeri barĩa bakwagĩra nĩbeeki ‘nikenda bariithagia’ kĩũthũrano kĩa Mũrungu. (Mathithio 20:28) Akũrũ bau nĩ antũ baagimaru gĩkĩrundu barĩa batongagĩĩria kĩũthũrano na gũkĩrĩĩthia, tĩ na njĩra ya “gukinyiirua na inya; kana untu bwa kwirigiira into biria bitiagirite, indi ni untu bwa guciendera na nkoro” ciao bongwa. (1 Petero 5:1-3) Nĩ ngũgĩ irĩkũ baritaga kenda tũgunĩka?

Nĩbatũmenyagĩĩra na gũtũkaria. Akũrũ nĩ batongagĩĩria na gũteetheria kĩũthũrano gũkũrũkĩĩra Maandĩko kwĩthĩrwa na ngwatanĩro ya akuĩ amwe na Jehova. Bakĩmenyaga atĩ Mũrungu nabaete ngũgĩ ĩu ya gĩtũmi, akũrũ batĩtwathaga na inya, ĩndĩ batũteethagia gũkara bwega na kwĩthĩrwa na nkerũ. (2 Akorintho 1:24) O ta ũrĩa mũrĩĩthi amenyagĩĩra o ĩmwe ya ng’ondu ciawe, nou akũrũ baciũmagia kũmenya o muntũ o muntũ wa kĩũthũrano.—Njuno 27:23.

Batũritanaga ũrĩa tũũmba kũthithia wendi bwa Mũrungu. O kiumia, akũrũ nĩbatongagĩĩria mĩcemanio nĩkenda wĩtĩkio bwetũ bwĩkĩrwa inya. (Mathithio 15:32) Akũrũ baba ba kĩũthũrano nĩbairitanĩrĩtie gũtongeeria kĩrĩ ngũgĩ ya gũtũmĩĩria, na nĩbatũmagĩĩria amwe naatwĩ na gũtũritana mantũ jonthe jegiĩ gũtũmĩĩria.

Nĩbatwĩkagĩra inya tũrĩ o muntũ o muntũ. Kenda bateethia o ũmwe wa cietũ kĩrĩ moobatu jaawe ja gĩkĩrundu, akũrũ no batũriũngĩre mĩciĩne yeetũ kana Nyombeene ya Ũnene, gũtũteethia na gũtũboreeria bagĩtumagĩra Maandĩko.—Jakubu 5:14, 15.

Amwe na ngũgĩ ya kĩũthũrano, akũrũ babaingĩ kinya nĩbethagĩrwa na ngũgĩ ciao na cia nja ciao, irĩa ciendaga kagiita na kũthũgaanĩrua. Nĩtũbuĩri gũtĩĩa akũrũ bau, ariti ngũgĩ na wĩru.—1 Athessalonike 5:12, 13.

• Ngũgĩ ya akũrũ ba kĩũthũrano nĩ ĩrĩkũ?

• Nĩ na njĩra irĩkũ akũrũ ba kĩũthũrano bonanagia atĩ nĩbakũmakĩra o ũmwe wa cietũ?