Nĩatĩa Kĩama Kĩrĩa Gĩtongagĩĩria Kĩritaga Ngũgĩ Naarua?

Karine ya mbere, gakundi kaniini ga “atumwa” na akũrũ, Jerusalemu, nĩ gaatumĩkaga ta kĩama kĩrĩa gĩatongagĩĩria gũtua matua jamarito kĩrũngamĩrĩĩte kĩũthũrano gĩa Akristũ etũrĩrua maguta. (Mathithio 15:2) Rĩrĩa baatujaga ũntũ barĩ amwe, beethagĩrwa baambĩte gũcũnkũũna ũrĩa Maandĩko jakuuga na bakathingata ũtongeeria bwa kĩrundu kĩa Mũrungu. (Mathithio 15:25) Ngerekano ĩu nĩthingatagwa naarua.

Nĩgĩtumagĩrwa nĩ Mũrungu kũthithia wendi bwawe. Ataana ba baaba etũrĩrua maguta barĩa batumĩkaga kĩrĩ Kĩama kĩrĩa Gĩtongagĩĩria, nĩbethagĩrwa na wĩru kĩrĩ Rũteto rwa Mũrungu na ũtea bũbwingi bwa gũtua ũrĩa ngũgĩ yeetũ ĩbuĩri kũritwa na gũcookia biũria biegiĩ mantũ ja gĩkĩrundu. Nĩ batirimanaga o kiumia kwaarĩĩria moobatu jegiĩ ndũgũ yeetũ ya nthĩgũrũne yonthe. O ta karine ya mbere, meerekeria jaumanĩtie na Bibiria nĩ jaejanagwa gũkũrũkĩĩra barũga, ateegeri ba mĩthiũrũnko kana na njĩra ingĩ. Bũu bũretaga ũrũmwe bwa kĩmathũgaanio na kĩmathithio kĩrĩ antũ ba Mũrungu. (Mathithio 16:4, 5) Kĩama kĩrĩa Gĩtongagĩĩria nĩkĩrũngamagĩĩra ngũgĩ ya kũthuranĩra biakũrĩa bia gĩkĩrundu, bageekĩra inya bonthe kwaa ngũgĩ ya gũtũmĩĩria kaanya ka mbere, na bakarũngamĩĩra ngũgĩ ya kwaa ataana ba baaba twaanya mwanya mwanya twa ũrũngamĩĩri.

Nĩkĩthingatagĩra ũtongeeria bwa kĩrundu kĩa Mũrungu. Kĩama kĩrĩa Gĩtongagĩĩria kĩĩrĩgagĩĩra ũtoongeeria bwa Mũnene wa ũũmbi bunthe, Jehova, na Jesũ, Kĩongo gĩa kĩũthũrano. (1 Akorintho 11:3; Aefeso 5:23) Antũ ba kĩama kĩu, batĩcionaga ta atongeeria ba antũ ba Mũrungu. Bo, o amwe na Akristũ, etũrĩrua maguta “bathingatanaga na Gaturume [Jesũ] o kunthe kuria geetaga.” (Kugwurirwa 14:4) Kĩama kĩrĩa Gĩtongagĩĩria nĩkĩgwĩragua rĩrĩa tũgũkĩrombera.

• Nĩ baaũ baarĩ kĩrĩ kĩama kĩrĩa gĩatongagĩĩria karine ya mbere?

• Nĩatĩa Kĩama kĩrĩa Gĩtongagĩĩria gĩcwaaga ũtongeeria bwa Mũrungu naarua?