Nĩatĩa Ndini Ikeeja Kũthithua?

1.Ndini cionthe rĩ, nĩ injega?

Kũrĩna antũ ba nkoro injega kĩrĩ ndini cionthe. Nkuma ĩnjega nĩ atĩ, Mũrungu noonaga antũ bau na akabamakĩra. Ĩndĩ nĩ ũntũ bwa kĩeba kwona ndini niitumĩrĩtwe kĩrĩ mantũ jamaaĩ. (2 Akorintho 4:​3, 4; 11:​13-​15) Kũringana na aandĩki ba nteto, ndini imwe niigwatĩte mbaru mantũ ja ũgaindi, ndwaa, na kũthithĩria aana mantũ jamaaĩ. Mantũ jau nĩjatũmaga antũ barĩa betĩkĩtie Mũrungu baigua bũbũũĩ mono.​—Thooma Mathayo 24:​3-5, 11, 12.

Kinya kethĩra ndini ya mma nĩkumagia Mũrungu, ndini ya ũrongo nĩmũthũũragia. Ĩritanaga mantũ jarĩa jatĩ Bibiriene, ta ũritani bwa ũrongo bwĩgiĩ Mũrungu na bwĩgiĩ akuũ. Ĩndĩ Jehova endaga antũ bamenya ũmma bũmwĩgiĩ. ​—Thooma Ezekieli 18:4; 1 Timotheo 2:​3-5.

2.Nĩatĩa ndini ikeeja kũthithua?

Ũntũ bũbwega nĩ atĩ, Mũrungu atĩaĩragua nĩ ndini irĩa ciugaga nĩcimwendeete, ĩndĩ kamma nĩ nthĩgũrũ ya Shaitani ciendeete. (Jakubu 4:⁠4) Rũteto rwa Mũrungu rwĩtaga ndini cionthe cia ũrongo “Babiloni Mucii Juria Munene.” Babiloni jwarĩ mũciĩ jwa karaaja, naarĩa ndini cia ũrongo ciambĩrĩĩrie, gĩkondoria gĩa ntukũ cia Nuhu gĩgũkũrũka. Ĩgiita rĩtĩkũraaja, Mũrungu akathiria ntũti ndini irĩa ciaĩragia antũ na ikabainyĩĩria. ​—Thooma Kugwurirwa 17:​1, 2, 5, 16, 17; 18:⁠8.

Kũrĩna nkuma ingĩ injega. Jehova atĩũrĩrĩtue nĩ antũ ba nkoro injega barĩa barĩ ndinine mwanya mwanya cia ũrongo nthĩgũrũne yonthe. Nakũgwatithania antũ bau na njĩra ya kũbaritana ũmma.​—Thooma Mika 4:​2, 5.

3.Nĩatĩa antũ ba nkoro injega babuĩrĩte kũthithia?

Jehova namakagĩra antũ barĩa bendeete ũmma, na mantũ jameega. Arĩbeera baume ndinine cia ũrongo. Antũ barĩa bendeete Mũrungu nĩbendaga kũgarũka nĩkenda bamũgwĩria.​—Thooma Kugwurirwa 18:⁠4.

Karine ya mbere, rĩrĩa antũ ba nkoro injega baigĩrue nkuma ĩnjega kuuma kĩrĩ atũmwa, nĩbamĩĩtĩkĩĩre bagwĩrĩtue. Bairitanĩre njĩra ĩnjerũ ya mũtũũrĩre kuuma kĩrĩ Jehova, mũtũũrĩre jwa gĩkeno jũrĩna mworoto na wĩrĩgĩĩro. Bo nĩ ngerekano ĩnjega kĩrĩ twĩ naarua, tontũ nĩbeetĩkĩĩre nkuma ĩnjega na njĩra ya gwĩĩka Jehova mbere ũtũũrone bwao. ​—Thooma 1 Athesalonike 1:​8, 9; 2:​13.

Jehova nagwataga ũgeni barĩa batigaga ndini cia ũrongo, kĩrĩ nja ya athaathayia baawe. Ũkeeja gwĩtĩkĩra kũgwatwa ũgeni nĩ Jehova, agakweethia mũcoore waawe, na ũtwĩke wa nja yaawe ĩnjerũ ya athaathayia barĩna wendo, na agakwaa mwoyo jwa kenya na kenya. ​—Thooma Mariko 10:​29, 30; 2 Akorintho 6:​17, 18.

4.Nĩatĩa Mũrungu akareeta kũgwĩrua kĩrĩ mĩgongo yonthe?

Kũgambithua kũrĩa kwĩĩjĩte kwa ndini ya ũrongo nĩ nkuma ĩnjega. Gũkareeta kũnogokua kuuma kĩrĩ kwinyĩĩrua nthĩgũrũne yonthe. Gũtĩrĩo ndini cia ũrongo ikaaĩria antũ kaĩrĩ kana kũbaathũrana. Antũ bonthe barĩa bagatũũra bakeethĩrwa bagwatanĩrĩte kĩrĩ kũthaathayia Mũrungu ũmwe wa mma.​—Thooma Kugwurirwa 18:​20, 21; 21:​3, 4.