Thaathayieni Jehova Bũrĩ Amwe ta Nja

O ta ũrĩa wairitana iukune rĩrĩ, Bibiria ĩrĩna mooritani jarĩa jagagũteethia amwe na njeku. Jehova endaga wĩthĩrwe na kũgwĩrua. Eranĩte atĩ weeka ũthaathayia bwawe mbere, “mantu jau jangi jonthe jakoongeerwa.” (Mathayo 6:​33) Nendeete kamma wĩthĩrwa ũrĩ mũcoore waawe. Tumĩra kaanya o karĩa karaumĩra gũkũria ũcoore amwe na Mũrungu. Bũu nĩbu ũntũ bwa bata mono bũrĩa muntũ oomba kwĩthĩrwa nabu.​​—⁠Mathayo 22:​37, 38.

1 ĨKĨRA INYA NGWATANĨRO YAAKU AMWE NA JEHOVA

ŨRĨA BIBIRIA YUUGAGA: “Ningi nkaa Abagu wenu nabwi bukaa atana bakwa na aari bakwa, uu niu Mwathani Mweneinya yonthe auga.” (2 Akorintho 6:​18) Mũrungu endaga waa mũcoore waawe wa akuĩ. Ĩromba nĩ njĩra ĩmwe ya kũthithia ũu. Jehova nagũkũgwata ũgeni “rombageni butigutirikama.” (1 Athesalonike 5:​17) Arĩna wendi bwa kũthikĩĩra jarĩa ũkũmwĩĩra kuuma nkorone na jarĩa jagũkũthangĩkia. (Afilipi 4:⁠6) Rĩrĩa ũkũromba amwe na antũ ba njeku, bakoona ũrĩa wonaga Mũrungu arĩo kamma.

Amwe na kwaaranĩria na Mũrungu, nũkũbatara kũmũthikĩĩra. Woomba kũthithia ũu gũkũrũkĩĩra kũthooma Bibiria na mauku jegiĩ Bibiria. (Zaburi 1:​1, 2) Thũgaanĩria jarĩa ũkũthooma. (Zaburi 77:​1, 12) Kũthikĩĩra Mũrungu kinya nĩkwendaga wĩthĩrwa na wĩthĩre bwa gwĩta mĩcemanione ya Gĩkristo.​​—⁠Zaburi 122:​1-4.

Kwĩra bangĩ mantũ jegiĩ Jehova nĩ njĩra ĩngĩ ĩnjega ya gwĩkĩra ngwatanĩro yaaku inya amwe nawe. O ũrĩa ũkathithia ũu nkũrũki, nou ũkaigua ũrĩ akuĩ nawe.​​—⁠Mathayo 28:​19, 20.

ŨRĨA BŨŨMBA KŨTHITHIA:

• Ĩthĩrweni na ĩgiita rĩa kũthooma Bibiria na rĩa kũromba ntukũ cionthe

• Ta nja, eeni mantũ ja ũthaathayia kaanya ka mbere nkũrũki ya mantũ ja kwigwĩria na kuurũka

2 GWĨRĨRUENI ŨTHAATHAYIA BWENU BWA NJA

ŨRĨA BIBIRIA YUUGAGA: “Thengeereni Murungu, nawe akabuthengeera.” (Jakubu 4:⁠8) Nũkũbatara kũbaangania na kũthingata ũtĩgũtĩĩria programu ya ũthaathayia bwa nja. (Kiambiriria 18:19) Ĩndĩ kũrĩ na jangĩ nkũrũki jakwendeka. No mwanka Mũrungu ethĩrwe arĩ gĩcuncĩ kĩa mũtũũrĩre jwenu jwa ntukũ cionthe. Ĩkĩra ngwatanĩro yeenu ya nja inya amwe na Mũrungu na njĩra ya kwaria mantu jaawe “riria ukari ndene ya nyomba yaku, na witite na njira, na riria umaami, na riria uukiirite.” (Kuriikithania Maathana 6:​6, 7) Ĩthĩrwa na rĩerekeerĩa ta rĩa Joshua, ũrĩa waugĩre: “Ni na bwakwa na antu ba njekwa, ni Mwathani tugutua kwathikagira.”​​—⁠Joshua 24:⁠15.

ŨRĨA ŨŨMBA KŨTHITHIA:

• Ĩthĩrwa na programu ya kũritana ĩtĩgũtĩĩrua, ĩrĩa ĩkaringithagia moobatu ja o muntũ wonthe wa njeku