Kaanya Ka Mwanya Ka Maromba

1, 2. Nĩkĩ ũkũthũgaania maromba nĩ kĩewa kĩa mwanya mono, na nĩkĩ tũkũbatara kũmenya ũrĩa Bibiria ĩritanaga bwegiĩ jo?

NTHĨGŨRŨ nĩ ĩniini mono ĩringithanĩtue na ĩgũrũ rĩrĩ njota. Rĩrĩa Jehova ategaga nthĩgũrũ, oonaga antũ ba mĩgongo yonthe bakari ta ntanta ĩniini ya rũũjĩ ndoone. (Zaburi 115:15; Isaya 40:15) Kinya kethĩra tũrĩ baaniini mono tũringithanĩtue na ĩgũrũ rĩrĩ njota, Zaburi 145:18, 19 yugaga: ‘Mwathani ari akui na bonthe baria bamukaagira, Ii, ari akui na bonthe baria bamukaagira na mma. Baria bamukiraga akaboojuragiria uria beendaga; Na kwigua aigague gukaya kwao, aboonokagie.’ Tũrĩ na kaanya ka mwanya atĩa! Jehova Mũũmbi mwene inya yonthe, eendaga kwĩthĩrwa arĩ akuĩ naatwĩ, na nendaga kũthikĩĩra maromba jeetũ. Nĩ mma maromba nĩ kaanya ka mwanya, nĩ kĩewa Jehova aete o muntũ.

² Ĩndĩ Jehova agatũthikĩĩra akĩ kethĩra tũkaaranĩria nawe na njĩra ĩrĩa agwĩtĩkĩĩria. Nĩatĩa tũũmba kũthithia ũu? Tiga twone ũrĩa Bibiria yugaga bwegiĩ maromba.

NĨKĨ ŨBUĨRI KŨROMBA JEHOVA?

3. Nĩkĩ ũbuĩri kũromba Jehova?

³ Jehova nakwenda ũmũromba, kana waranĩria nawe. Nĩatĩa tũkũmenya ũu? Itũ bu thooma Afilipi 4:6, 7. Ũthũgaanĩria ũgwati ũgeni bũu bwa wendo! Mũũmbi wa ĩgũrũ na nthĩ nagũkenua mono nĩgwe na arĩenda ũmwĩre ũrĩa ũkwigua na mathĩĩna jaaku.

4. Nĩatĩa kũromba Jehova rĩonthe gwĩkagĩra inya ũcoore bwaku nawe?

⁴ Maromba nĩjatũteethagia kwĩthĩrwa na ũcoore bwa akũĩ na Jehova. Rĩrĩa acoore bakwaranĩria rĩonthe bwegiĩ mathũgaanio jaao, ũrĩa bakwigua, na mathĩĩna jaao, ũcoore bwao nĩbũgĩĩjaga inya nkũrũki. Kinya kũromba Jehova nĩu gũkari. Gũkũrũkĩĩra Bibiria, nakwĩrĩte mathũgaanio jaawe, ũrĩa aigagua, na nagũkwĩra ũrĩa akathithia ĩgiita rĩĩjĩte. No ũmwĩre kinya mantũ jaaku ja ndeene buru na njĩra ya kwaranĩria nawe rĩonthe. O ũrĩa ũkũthithia ũu, ũcoore bwaku na Jehova bũkagĩa inya nkũrũki.—Jakubu 4:8.

NO MWANKA TŨTHITHIE ATĨA KENDA MŨRUNGU ATŨTHIKĨĨRA?

5. Nĩatĩa tũkũmenya Jehova atĩthikagĩĩra maromba jonthe?

⁵ Jehova-rĩ, nathikagĩĩra maromba jonthe? Arĩ, atĩthikagĩĩra. Ĩgiitene rĩa kĩroria Isaya Jehova eerĩre Aisraeli: “Riria bukaromba maromba jamaingi, ni ntiigua; njara cienu niciujuritwe ni tharike.” (Isaya 1:15) Kwou tũkarega kwimenyeera, no tũthithie mantũ joomba gũtwikia kũraaja na Jehova, na gũgatũma arega kũthikĩĩra maromba jeetũ.

6. Nĩkĩ wĩtĩkio bũrĩ bwa gĩtũmi mono? Wonanagia atĩa ũrĩ na wĩtĩkio?

⁶ Kethĩra nĩtũkwenda Jehova athikĩĩra maromba jeetũ, no mwanka tũmwĩtĩkie. (Mariko 11:24) Mũtũmwa Paũlo oonanĩrie: “Gukeethirwa witikio buti o, butiumbika kugwiria Murungu, nikwithirwa muntu uria uthengagiira Murungu no kinya eetikagie ati natwire mwoyo, na niwe weejaga antu baria bamucwaga itui riao.” (Ahibirania 11:6) Ĩndĩ bũtĩng’ani kuuga twĩna wĩtĩkio. Nĩtũkũbatara kwonania wĩtĩkio bwetũ bwega gũkũrũkĩĩra kwathĩkĩra Jehova o ntukũ.—Thooma Jakubu 2:26.

7. (a) Nĩkĩ tũbuĩri kwinyiyia na kwĩthĩrwa na gĩtĩĩo rĩrĩa tũkũromba Jehova? (b) Nĩatĩa tũũmba kwonania tũrĩ ba mma rĩrĩa tũkũromba?

⁷ Nĩtũbuĩrĩte kwinyiyia na kwĩthĩrwa na gĩtĩĩo rĩrĩa tũkũromba Jehova. Nĩkĩ? Kethĩra nĩ mũnene kana ngavana tũkwaria nawe, tũrĩngĩthithia ũu na njĩra ya gĩtĩĩo. Tontũ Jehova nĩwe Mũrungu Mwene Inya Yonthe-rĩ, tũtĩbuĩrĩte kwonania gĩtĩĩo na winyiyia kinya nkũrũki tũkĩaria nawe? (Kiambiriria 17:1; Zaburi 138:6) Tũbuĩrĩte kinya kwĩthĩrwa tũrĩ ba mma na kũromba Jehova kuuma nkorone, tũtĩgũcookera biugo o birĩa rĩngĩ na rĩngĩ.—Mathayo 6:7, 8.

8. Rĩrĩa twaromba ũntũ bũna, nĩatĩa ũũngĩ tũbuĩrĩte kũthithia?

⁸ Bwa mũthia, rĩrĩa tũkũromba ũntũ bũna, no mwanka tũthithie jarĩa jonthe tũkũũmba, kũritĩra ngũgĩ ũntũ bũu. Ngerekano, kethĩra tũkaromba Jehova atwee moobatu ja o ntukũ, tũtĩbuĩrĩte kwaa athao na kwĩrĩgĩĩra Jehova agatwaa bionthe na twĩna ũũmbi bwa kũbicwaa. No mwanka tũrite ngũgĩ na wĩru na twĩtĩkĩĩrie ngũgĩ o ĩrĩa yonthe tũũmba kũthithia. (Mathayo 6:11; 2 Athesalonike 3:10) Kana twaromba Jehova atũteethie gũtiga ũntũ bũbũũĩ, no mwanka tũciebanie na ũntũ bũrĩa bunthe bũũmba gũtũgeria. (Akolosai 3:5) Tiga nandĩ tũcũnkũũne biũria bimwe biũragua mono biegiĩ maromba.

BIŨRIA BIEGIĨ MAROMBA BIRĨA BIŨRAGUA MONO

9. Nũũ tũbuĩrĩte kũromba? Johana 14:6 ĩrĩtũritana atĩa bwegiĩ maromba?

⁹ Nũũ tũbuĩrĩte kũromba? Jesũ aaritanĩre athingati baawe barombe “Baaba wetu uria uri Iguru.” (Mathayo 6:9) Aacookere auga: “Nini njira, na nini umma bungwa, nani ndi mwoyo; guti muntu wijikia kiri Baaba atiijiirite kirini.” (Johana 14:6) Kwou tũbuĩrĩte kũromba kĩrĩ Jehova wenka gũkũrũkĩĩra Jesũ. Kũromba gũkũrũkĩĩra Jesũ nĩ kuuga atĩa? Kenda Jehova etĩkĩĩria maromba jeetũ, nĩtũkũbatara gũtĩĩa kaanya ka mwanya karĩa Jehova aaere Jesũ. O ta ũrĩa twairitanĩre, Jesũ eejĩre nthĩgũrũne gũtwonokia kuuma kĩrĩ meeyia na gĩkuũ. (Johana 3:16; Aroma 5:12) Jehova kinya nathuurĩte Jesũ arĩ Mũthĩnjĩri Ũmũnene wa Mũrungu na Mwathũrani.—Johana 5:22; Ahibirania 6:20.

10. No mwanka twĩthĩrwe tũkari na njĩra nna rĩrĩa tũkũromba? Taarĩria.

¹⁰ No mwanka twĩthĩrwe tũkari na njĩra nna rĩrĩa tũkũromba? Arĩ, Jehova atĩgũtwĩra tũturie maru, tũkare nthĩ, kana tũrũngame rĩrĩa tũkũromba. Bibiria ĩtũritanaga no twarie na Jehova tũkari na njĩra o yonthe ĩkwonania gĩtĩĩo. (1 Mantu ja Karaja 17:16; Nehemia 8:6; Danieli 6:10; Mariko 11:25) Bwa gĩtũmi mono kĩrĩ Jehova rĩrĩa tũkũromba, tĩ njĩra ĩrĩa tũkari nayo, ĩndĩ nĩ twaranĩrie nawe twĩna mwerekera jũmwega. Twomba kũromba na kajũ kana tũkiri, o antũ onthe arĩa tũrĩ, na ĩgiita rĩonthe mũthenya kana ũtukũ. Rĩrĩa tũkũromba Jehova no twĩtĩkie buru agatũthikĩĩra kinya rĩrĩa gũtĩ ũngĩ ũgũtwigua.—Nehemia 2:1-6.

11. Nĩ mantũ ta jarĩkũ tũũmba kwĩra Jehova?

¹¹ Nĩ mantũ jarĩkũ tũũmba kũromba? No tũrombe o ũntũ bunthe bũrĩa bũgwĩtĩkĩrĩka nĩ Jehova. Bibiria yugaga: “Kethira tukamuromba untu kinya buriku buria bwagirite methone jawe, agatuthikiira.” (1 Johana 5:14) No tũrombe bwegiĩ mantũ jeetũ twingwa? Ĩĩ twomba. Kũromba Jehova kũbuĩri kwĩthĩrwa gũkari ta kwaranĩria na mũcoore wa akuĩ. No twĩre Jehova o ũntũ bunthe bũrĩa bũrĩ mathũgaanione na nkorone cietũ. (Zaburi 62:8) No tũrombe atwee kĩrundu kĩawe kĩrĩ inya gĩtũteethie kũthithia ũrĩa kwagĩrĩte. (Luka 11:13) Kinya no tũrombe Jehova atwee ũũme bwa kũthithia matua jameega, na no tũmũrombe inya ya kũũmbana na mathĩĩna. (Jakubu 1:5) Tũbuĩrĩte kũromba Jehova atũrekere meeyia jeetũ. (Aefeso 1:3, 7) Nĩtũbuĩrĩte kinya kũrombera bangĩ, antũ ba nja, na ataana na aarĩ ba baaba kĩũthũranone.—Mathithio 12:5; Akolosai 4:12.

12. Nĩmbi ĩbuĩrĩte kwĩthĩrwa ĩrĩ ya gĩtũmi nkũrũki marombene jeetũ?

¹² Nĩmbi ĩbuĩrĩte kwĩthĩrwa ĩrĩ ya gĩtũmi nkũrũki marombene jeetũ? Nĩ Jehova na wendi bwawe. Tũbuĩrĩte kũmũcookeria nkaatho kuuma nkorone tontũ bwa jarĩa jonthe atũthithĩrĩtie. (1 Mantu ja Karaja 29:10-13) Twijĩ ũu tontũ rĩrĩa Jesũ aarĩ nthĩgũrũne, naaritanĩre aritwa baawe kũromba. (Thooma Mathayo 6:9-13.) Aaugĩre babuĩrĩte mbere kũromba riĩtwa rĩa Mũrungu rĩathũrwe, kũu nĩ kuuga kũrĩjũkia rĩrĩ rĩĩtheru. Rĩu Jesũ aroonania nĩtũbuĩrĩte kũromba Ũnene bwa Mũrungu bwĩje na wendi bwawe bũthithue kunthe nthĩgũrũne. Nĩ nyuma ya kũromba mantũ jau ja bata mono, Jesũ aaugĩre nĩtũbuĩri kũromba moobatu jeetũ. Rĩrĩa tweka Jehova na wendi bwawe mbere marombene jeetũ, twonanagia nĩmbi ya gĩtũmi nkũrũki kĩrĩ twĩ.

13. Maromba jeetũ jabuĩri kwĩthĩrwa na ũraaja bũng’ana?

¹³ Maromba jeetũ jabuĩri kwĩthĩrwa na ũraaja bũng’ana? Bibiria ĩtiugĩte. Maromba jeetũ no jakuĩe kana jakareea, kũringana na ũrĩa mantũ jarĩ. Ngerekano, no tũrombe bũũkuĩ mbere ya tũrĩa, ĩndĩ bũũraaja rĩrĩa tũgũcookeria Jehova nkaatho kana rĩrĩa tũkũmwĩra jarĩa jagũtũcumbũra. (1 Samueli 1:12, 15) Tũtĩkwenda kũromba maromba jamaraaja kenda tũcionania ta ũrĩa antũ bamwe baathithagia ĩgiitene rĩa Jesũ. (Luka 20:46, 47) Jehova atĩgwĩragua nĩ maromba ta jau. Bwa gĩtũmi kĩrĩ Jehova nĩ tũrombe kuuma nkorone cietũ.

14. Tũbuĩrĩte kũromba maita jang’ana, na bũũ bũrĩtũritana atĩa bwegiĩ Jehova?

¹⁴ Tũbuĩrĩte kũromba maita jang’ana? Jehova atwĩraga twaranĩrie nawe rĩonthe. Bibiria ĩtwĩraga “burombage,” ‘rombageni na wiru,’ na “rombageni butigutirikama.” (Mathayo 26:41; Aroma 12:12; 1 Athesalonike 5:17) Jehova nendaga rĩonthe gũtũthikĩĩra. No tũmũcookerie nkaatho o ntukũ tontũ bwa wendo na ũtugi bwawe. Kinya no tũmũrombe atũtongeerie, atwee inya, na atũboorerie. Kethĩra nĩtwonaga bũrĩ wendeeri kũromba Jehova, tũkaaria nawe ĩgiita rĩonthe.

15. Nĩkĩ tũbuĩri kuuga “ameni” mũthiene jwa maromba?

¹⁵ Nĩkĩ tũbuĩri kuuga “ameni” mũthiene jwa maromba? Kiugo “ameni” nĩ kuuga “na mma” kana “nĩgũkare ũu.” Nĩ njĩra ya kwonania ũrĩa twauga marombene nĩu, na tũrĩ na mma na ũrĩa twauga. (Zaburi 41:13) Bibiria ĩtũritanaga kinya nĩ bwega kuuga “ameni” na kajũ kana tũkiri, mũthiene rĩrĩa tũkorombithua, kwonania nĩtũgwĩtĩkanĩĩria na ũrĩa kwaugwa.—1 Mantu ja Karaja 16:36; 1 Akorintho 14:16.

ŨRĨA MŨRUNGU ACOOKAGIA MAROMBA JEETŨ

16. Jehova-rĩ, kamma nacookagia maromba jeetũ? Taarĩria.

¹⁶ Jehova-rĩ, kamma nacookagia maromba jeetũ? Ĩĩ, nacookagia. Bibiria ĩmwĩtaga Ũrĩa “wigagua maromba.” (Zaburi 65:2) Jehova naigagua na agacookia maromba ja kuuma nkorone ja mamirioni ja antũ, na athithagia ũu na njĩra inyiingĩ mwanya mwanya.

17. Jehova atumagĩra atĩa araĩka na atumĩkĩri baawe nthĩgũrũne gũcookia maromba jeetũ?

¹⁷ Jehova natumagĩra araĩka na atumĩkĩri baawe nthĩgũrũne gũcookia maromba jeetũ. (Ahibirania 1:13, 14) Kwĩna ngerekano inyiingĩ cia antũ barĩa baarombere ũteethio bwa gũciũkĩrwa nĩ Bibiria na ĩgiita rĩĩkai barariũngĩrwa nĩ ũmwe wa Akũũjĩ ba Jehova. Bibiria yonanagia araĩka nĩbatũmĩkaga kĩrĩ ngũgĩ ya gũtũmĩĩria “nkuma iria njega” kunthe nthĩgũrũne. (Thooma Kugwurirwa 14:6.) Na kinya babaingĩ beetũ nĩtũrombete Jehova bwegiĩ thĩĩna nna kana ũbatu, na twona ũteethio bũrĩa twabataraga kuuma kĩrĩ mũtaana kana mwarĩ wa baaba Mũkristũ.—Njuno 12:25; Jakubu 2:16.

18. Jehova atumagĩra atĩa kĩrundu kĩawe gĩkĩtheru na Bibiria gũcookia maromba?

¹⁸ Jehova natumagĩra kĩrundu kĩawe gĩkĩtheru gũcookia maromba jeetũ. Rĩrĩa twaromba ũteethio bwa kũũmbana na thĩĩna, no atumĩre kĩrundu kĩawe gĩkĩtheru gũtũtongeeria na gũtwaa inya. (2 Akorintho 4:7) Jehova kinya natumagĩra Bibiria gũcookia maromba jeetũ na gũtũteethia kũthithia matua ja ũũme. Rĩrĩa twathooma Bibiria, twomba kwona maandĩko jagatũteethia. Jehova kinya no atumĩre muntũ mĩcemanione, auge ũntũ bũrĩa tũkũbatara kwigua, kana mũkũrũ wa kĩũthũrano aarĩĩrie ĩandĩko rĩna naatwĩ.—Agalatia 6:1.

19. Nĩkĩ kũũmba kwoneka teeka Jehova atĩcooketie maromba jeetũ?

¹⁹ Ĩndĩ ĩgiita rĩngĩ no tũciũrie, ‘Nĩkĩ Jehova ajũkĩtie ĩgiita atĩracookia maromba jaakwa?’ Riikana, naijĩ nĩrĩ na ũrĩa agacookia maromba jeetũ. Naijĩ kĩrĩa tũkũbatara. No tũbatare gwĩta na mbere kũromba kwa kagiita, kenda twonania kamma twĩna ũbatu na kĩrĩa tũkũromba na nĩtũmwĩtĩkĩtie kamma. (Luka 11:5-10) Ĩgiita rĩngĩ Jehova acookagia maromba na njĩra tũtĩngĩĩrĩgĩĩra. Ngerekano, no tũmũrombe bwegiĩ thĩĩna ĩndito, ĩndĩ antũ amĩebia, no atwee inya ya kũũmĩĩria.—Thooma Isaya 40:29.

20. Nĩkĩ tũbuĩrĩte kũromba Jehova jamaingĩ?

²⁰ Twĩna wendeeri bwa mwanya atĩa bwa kũromba Jehova! Twĩna mma atĩ agatũthikĩĩra. (Zaburi 145:18) Na o ũrĩa tũkũromba Jehova jamaingĩ kuuma nkorone, no-u ũcoore bwetũ nawe bũkagĩa inya nkũrũki.