Nĩatĩa Ũtũũro Bwambĩrĩĩrie?

Mũrungu nĩwe “woombire into bionthe.” (Kugwurirwa 4:11) Gwe-rĩ, nũgwĩtĩkia ũu? Antũ bamwe baugaga gũtĩwe woombĩre into birĩa birĩ mwoyo. Gũkethĩrwa ũu nĩ mma, nĩ kuuga, ũtũũro bwetũ bwaumĩĩre kĩmũtino. Ĩndĩ kethĩra Jehova nĩwe woombĩre ũtũũro, no mwaka bwithĩrwe na mworoto?a Cũnkũũna jarĩa Bibiria ĩritanaga jegie kaumo ka ũtũũro na nĩkĩ kũrĩ na itũmi bibiega bia gwĩtĩkia atĩ mantũ jau nĩ ja mma.

1. Nĩkũ ĩgũrũ na nthĩ biaumĩre?

Bibiria yugaga: “Kiambiririene Murungu oombire matune na nthi.” (Kiambiriria 1:1) Anasayansi babaingĩ nĩbetĩkagĩĩria atĩ ĩgũrũ na nthĩ ibiarĩ na kĩambĩrĩria. Nĩatĩa Mũrungu abiũmbĩre? Naatumĩĩre “kirundu” kiawe gĩkĩtheru—kũũmba into bionthe birĩa birĩ ĩgũrũ na nthĩgũrũ, nabio nĩ amwe na ikundi bia njota, njota, na into bingĩ bikari ta nthĩgũrũ.—Kiambiriria 1:2.

2. Nĩkĩ Mũrungu oombĩre nthĩgũrũ?

Jehova ‘atombire nthiguru amitiga thirune’, ĩndĩ ‘amiumbire ituuragwa ni antu.’ (Isaya 45:18) Noombĩre nthĩgũrũ ĩrĩ gũntũ gũkwega kwa gũtũũragwa nĩ antũ rĩonthe. (Thooma Isaya 40:28; 42:5.) Sayansi nĩgwũraga atĩ nthĩgũrũ nĩ ya mwanya. Na nĩyo yonka akĩ yũũmba gũtũũrwa nĩ antũ.

3. Antũ barĩ na mwanya jũrĩkũ na nyomoo?

Nyuma ya Jehova kũũmba nthĩgũrũ, noombĩre into birĩa birĩ mwoyo. Mbere, noojũrĩrie nthĩgũrũ imera na nyomoo. Rĩu, “Murungu nawe aroomba muntu ukari ta we wengwa.” (Thooma Kiambiriria 1:27.) Nĩmbi bitũmaga antũ bethĩrwa barĩ ba mwanya? Tontu tũũmbi tũrĩ mũngˈuanano jwa Mũrungu, twomba gũkoobia nkuma ciawe ta wendo na ĩota. Kinya naatũmbĩre tũrĩ na ũũmbi bwa kwiritana mĩgambo, kũgwĩrĩrua into biithongi, na ndwĩmbo. Mwanya na nyomoo no tũgwĩrĩrue kũthathayia Mũũmbi weetũ.

ĨNJA NKŨRŨKI

Cũnkũũna ũrikithia bũrĩa bũkwonania atĩ into birĩa birĩ mwoyo ka biombĩrwe, na jarĩa Bibiria ĩritanaga jegie ũũmbi nĩ ja mma. Iritane ũrĩa nkuma irĩa antũ bethagĩrwa nacio, itũritanaga bwegie Mũrungu.

4. Ũtũũro ka bwombĩrwe

Antũ bakumagua nĩ ũntũ bwa mantũ jarĩa bakoobagia kuumania na ũũmbi. Nũũ ũbuĩrĩte gũkumwa nĩ ũntũ bwa ũũmbi bũu bakoobagia? Tega VIDIO, rĩu bwarĩĩrie biũria birĩa bithingatĩte.

VIDIO: Ĩtĩkia Mũrungu (2:43)

• Nĩmbi antũ barĩa bathithagia into, bakoobetie kuumania na ũũmbi?

O nyomba yonthe ĩthũgaanagĩrua na ĩgaakwa nĩ muntũ mũnna. Ĩndĩ, nũũ wathũgaanĩrie na arathithia into birĩa birĩ kĩrĩ ũũmbi? Thooma Ahibirania 3:4, rĩu bwarĩĩrie biũria bibi:

• Kĩrĩ into birĩa twonaga kĩrĩ ũũmbi, nĩmbi bigũkucagĩĩria?

• Rĩ, nĩ ũntũ bũkũgwatanĩra na mathũgaanio gwĩtĩkia atĩ into bionthe birĩa birĩ ĩgũrũ na nthĩgũrũ ka biombĩrwe? Nĩkĩ?

Ũramenya?

No wone mantũ ja kũthooma na vidio cĩegie kĩongo gĩkĩ kĩrĩ jw.org, kĩrĩ mũthingatano “Neka Yoombĩrwe?” na “Maoni Mwanya Mwanya Jegie Kaumo ka Ũtũũro.”

“Tontu-ri, nyomba kinya iriku iri mwaki wayo; indi uria woombire into bionthe ni Murungu”

5. Jarĩa Bibiria yugĩte jegie ũũmbi nĩ ja mma

VIDIO: Ĩgũrũ na Nthĩ-rĩ, ka Biombĩrwe?—Gĩcuncĩ (3:51)

• Rĩ, Bibiria neka ĩritanaga atĩ nthĩgũrũ na birĩa bitũũraga ku, ka biombĩrwe ntukũ itantatũ cia mathaa 24?

• Rĩ, nũkwona teka jarĩa Bibiria yugĩte jegie ũũmbi jakũgwatanĩra na mathũgaanio, na jarĩ ja mma? Nĩkĩ, kana nĩkĩ tĩu?

Thooma Kiambiriria 1:1, rĩu bwarĩĩrie kĩũria gĩkĩ:

• Anasayansi baugaga atĩ ĩgũrũ na nthĩ nĩ biarĩ na kĩambĩrĩria. Nĩatĩa ũntũ bũu baugaga bũkũngˈuanana na jarĩa warĩĩkia kũthooma Bibiriene?

Antũ bamwe nĩbaciũragia kethĩra Mũrungu oombĩre into birĩa birĩ mwoyo agĩtumagĩra kũgarũka kwa into. Thooma Kiambiriria 1:21, 25, 27, rĩu bwarĩĩrie biũria bibi:

• Neka Bibiria ĩritanaga atĩ Mũrungu athithĩrie twinto tũtũ- niini tũrĩa tũrĩ mwoyo, na aratũrekeeria tũgarũka tũraa makũyũ, nyomoo ingĩ, na antũ? Kana neka oombĩre “mithemba” yonthe ya into birĩa birĩ mwoyo?b

6. Antũ nĩ ũũmbi bwa Mũrungu bwa mwanya

Batuĩ tũrĩ mwanya na nyomoo irĩa Jehova oombĩre. Thooma Kiambiriria 1:26, rĩu bwarĩĩrie kĩũria gĩkĩ:

• Tontũ tũũmbi tũri mũngˈuanano jwa Mũrungu-rĩ, nĩatĩa ũũmbi bwetũ bwa kwonania wendo na kĩao, bũgũtũritana bwegie ũrĩa Mũrungu akari?

NA NJĨRA ĨNKUĨ

Jehova oombĩre ĩgũrũ na nthĩ na bionthe birĩa birĩ mwoyo.

Gũcookera

• Nĩatĩa Bibiria ĩritanaga bwegie kaumo ka ĩgũrũ na nthĩ?

• Neka Mũrungu aatumĩĩre kũgarũka kwa into kuumĩria into bionthe birĩa birĩ mwoyo, kana neka abiũmbĩre bionthe?

• Nĩmbi bitũmaga antũ bethĩrwa barĩ ba mwanya?

CŨNKŨŨNA

Ona ngerekano cia into birĩa birikithagia atĩ kũrĩ na Mũũmbi.

“Nĩatĩa Into Birĩa Bitũthiũrũkĩrĩte Bitũritanaga?” (Amkeni!, Septemba 2006)

Ona ũrĩa mũciari oomba gũtaarĩĩria mwana waawe ũmũniini, ũritani bwa Bibiria bwegie kũũmbwa kwa into.

“Jehova . . . Nĩwe Woombĩre into bionthe” (2:37)

Ona kethĩra ũritani bwa kũgarũka kwa into nĩ bũgwatanagĩra na Bibiria.

“Mũrungu-rĩ, ka Aatumĩĩre Kũgarũka kwa Into Kũũmba Mĩthemba Mwanya Mwanya ya Into Birĩa birĩ Mwoyo?” (Thooma Intanetine)

Cũnkũũna kethĩra matigari ja into bia karaaja, kana ũcũũnkũni bwa gĩsayansi nĩ bionanagia atĩ into birĩa bĩrĩ mwoyo ka biombĩrwe, kana ka biaumĩĩre biongwa.

Biũria Bitano bia Gĩtũmi Biegie—Kaumo ka Ũtũũro (broshua)