Kwombĩka Ũkaa Mũcoore wa Jehova

Jehova arĩenda ũmũmenya bwega. Nĩkĩ? Nakwĩrĩgĩĩra ũrĩa ũkairitana nkũrũki bwegie nkuma ciawe, njĩra ciawe, na mworoto jwawe, nou ũgakucĩĩrua nkũrũki kwaa mũcoore waawe. Kamma no kũũmbĩke, ũkaa mũcoore wa Mũrungu? (Thooma Zaburi 25:14.) Nĩatĩa ũũmba kũthithia nĩkenda waa mũcoore wa Mũrungu? Bibiria nĩ ĩcookagia bĩũria biu na ĩkoonania nĩkĩ ũcoore na Jehova nĩyo ngwatanĩro ĩrĩa njega nkũrũki ũũmba kwĩthĩrwa nayo.

1. Jehova arĩkũgwata ũgeni ũthithia atĩa?

“Thengereeni Murungu, nawe akabuthengeera.” (Jakubu 4:8) Ũu nĩ kuuga atĩa? Jehova arĩkũgwata ũgeni waa mũcoore waawe. Bamwe no boone bũri ũntũ bũbũũmũ gwĩtĩkia atĩ no bae acoore ba Mũrungu tontũ batĩũmba kũmwona. Amwe na bũu, rutetone rwawe Bibiria, Jehova nagwuũrĩte jonthe jarĩa tũkũbatara kũmenya bwegie nkuma ciawe nĩkenda tũmũthengeera. Rĩria twathoma rũteto rwawe Bibiriene, ũcoore bwetũ amwe na Jehova nĩ bũkũraga kinya kethĩra gũtĩĩrĩo twamwona.

2. Nĩkĩ Jehova nĩwe Mũcoore ũrĩa mwega nkũrũki ũũmba kwĩthĩrwa nawe?

Gũtĩ muntũ ũũmba gũkwenda nkũrũki ya Jehova. Arĩenda wĩthĩrwa na kũgwĩrua na ũmũromba rĩonthe rĩrĩa ũkwenda ũtethio. Woomba ‘kugerera Murungu mantu jonthe jaria jakuthangikagia, nikwithirwa niwe wenka ukumenyagiira.’ (1 Petero 5:7) Rĩonthe Jehova nethagĩrwa na wendi bwa kwigĩka acoore baawe, kũbaboreeria, na kũbathikĩĩra.—Thooma Zaburi 94:18, 19.

3. Nĩmbi Jehova erĩgagĩĩra kuumania na acoore baawe?

Jehova nendeete antũ bonthe, ĩndĩ atumaga ũcoore bwa akuĩ na “baria baagirite.” (Njuno 3:32) Jehova erĩgagĩĩra acoore baawe baciũmie kũthithia mantũ jarĩa oonaga jarĩ jameega, na baciebania na mantũ jarĩa oonaga jarĩ jamathũũku. Antũ bamwe boomba kwona teka batĩũmba kũthithia mantũ jonthe jameega jarĩa Jehova endaga bathithia, na gũciebania na mantũ jonthe jamathũũku. Ĩndĩ, Jehova natwijiĩ nkũrũki. Netĩkagĩĩria muntũ wonthe ũrĩa ũmwendaga kuuma nkorone, na ũrĩa ũciũmagia kũthithia jonthe jarĩa akũũmba, nĩkenda amũgwĩria.—Zaburi 147:11; Mathithio 10:34, 35.

ĨNJA NKŨRŨKI

4. Iburahimu aarĩ mũcoore wa Jehova

Jarĩa Bibiria ĩtwĩrĩte jegie Iburahimu (kinya neetagwa Abramu) nĩjatũtethagia kũmenya bwegie gũtuma ũcoore na Mũrungu. Thooma bwegie Iburahimu kĩrĩ Kiambiriria 12:1-4. Rĩu bwarĩĩrie biũria bibi:

• Nĩatĩa Jehova erĩre Iburahimu athithie?

• Nĩ wĩrane bũrĩkũ Jehova erĩre Iburahimu?

• Nĩatĩa Iburahimu aathithĩrie kĩrĩ mantũ jarĩa Jehova aamwĩrĩte?

5. Nĩmbi Jehova erĩgagĩĩra kuumania na acoore baawe

Nĩ ũntũ bwa wĩthĩre kwĩrĩgĩĩra mantũ manna kuumania na acoore beetu.

• Nĩ mantũ jarĩkũ jamwe wendaga acoore baaku bakũthithĩria?

Thooma 1 Johana 5:3, rĩu bwarĩĩrie kĩũria gĩkĩ:

• Nĩmbi Jehova erĩgagĩĩra kuumania na acoore baawe?

Nĩkenda tũgwĩria Jehova, twomba kũbatara kũgarũra mĩtugo yeetũ, kana mĩkarie yeetũ. Thooma Isaya 48:17, 18, rĩu bwarĩĩrie kĩuria gĩkĩ:

• Nĩkĩ Jehova endaga acoore baawe bathithia ũgarũrũku?

6. Jarĩa Jehova athithagĩria acoore baawe

VIDIO: Jehova Nanthithĩrĩtie Mantũ Jamaingĩ (3:20)

• Nĩatĩa Jehova aatetherie mwekũrũ ũrĩa ũkwarĩĩrua vidione, kũrwa na ũntũ bwa kwigua bũbũĩ nkorone na mathũgaanio jatĩagĩri?

Thooma Isaya 41:10, 13, rĩu bwarĩĩrie biũria bibi:

• Nĩatĩa Jehova augĩte akathithĩria acoore baawe bonthe?

• Nũkwona teka Jehova omba kwaa Mũcoore ũmwega? Nĩkĩ?

7. Nĩkenda twaa acoore ba Jehova nĩtũkũbatara kwaranĩria nawe na kũmũthikĩĩra

Kwaranĩria nĩgwĩkagĩra ũcoore inya. Thooma Zaburi 86:6, 11, rĩu bwarĩĩrie biũria bibi:

• Nĩ na njĩra ĩrĩkũ tũũmba kwaranĩria na Jehova?

• Nĩ njĩra ĩrĩkũ Jehova atumagĩra kwaranĩria natuĩ?

NA NJĨRA ĨNKUĨ

Jehova nakwenda kwaa mũcoore waaku, na agagũtetheeria ũmũ- thengeera.

Gũcookera

• Nĩatĩa Jehova atethagia acoore baawe?

• Nĩkĩ Jehova endaga acoore baawe bathithia mogarũrũku?

• Nũkwona teka bũrĩ ũntũ bũbũũmũ mono kwaa mũcoore wa Jehova? Nĩkĩ, kana nĩkĩ tĩu?

CŨNKŨŨNA

Nĩatĩa ũcoore na Mũrungu bũũmba kũgarũra ũtũũro bwaku?

“Jehova—Mũrungu Ũrĩa Tũbuĩrĩte Kũmenya” (Mnara wa Mlinzi, Februari 15, 2003)

Iritane ũrĩa ũũmba kwaa mũcoore wa Mũrungu.

“Nĩatĩa Mpũmba Kwaa Mũcoore wa Mũrungu?” (Maswali Ambayo Vijana Huuliza—Majibu Yafanyayo Kazi, Buku la 2, sura ya 35)

Cũnkũũna nĩkĩ mwekũrũ ũmwe akuuga atĩ, gũtuma ũcoore na Jehova nĩgwatũmĩre ũtũũro bwawe bwagĩra nkũrũki.

“Ntendaga Gũkua!” (Mnara wa Mlinzi Na. 1 2017)

Thikĩĩra antũ babeethĩ bagĩtaarĩĩria ũrĩa baigagua bwegie Jehova.

Nĩ Kuuga Atĩa Kwaa Mũcoore wa Mũrungu? (1:46)