KĨTHOOMO KĨA 10
Nĩatĩa Mĩcemanio ya Akũũjĩ ba Jehova Yũũmba Gũgũtethia?
Ũragwatwa ugeni kĩrĩ mĩcemanio ya Akũũjĩ ba Jehova? Ũkethĩrwa ũtariũnga, no wigue ũgĩkĩra gwĩta ntukũ ya mbere. No ũrigare: ‘Nĩatĩa gũkarĩkaga kĩrĩ mĩcemanio ĩu? Nĩkĩ tontũ ĩrĩ ya gĩtũmi? Nĩkĩ mbuĩrĩte gwĩta?’ Kĩrĩ kĩthoomo gĩkĩ, ũkairitana ũrĩa gũcemania na bangĩ kũũmba gũkũreta akuĩ na Mũrungu, na kũgagũtethia ũrĩ muntũ kĩũmbe.
1. Nĩ gĩtũmi kĩrĩkũ gĩkĩnene kĩa gũcemania amwe?
Ona ũrĩa mwandĩki wa Bibiria aatarĩĩrie gĩtũmi kĩrĩa kĩnene gĩa gũtirimana amwe na bangĩ: “Naani ngaakumagia MWATHANI, ndĩ kĩũthũranoone kĩa antũ baawe.” (Zaburi 26:12, Kimeru Bible, 2010) O ũu, Akũũjĩ ba Jehova nĩboonaga kũgwĩrua gũkũnene rĩrĩa bacemeenie. Nthĩgũrũne yonthe, nĩbacemanagia o kiumia gũkumia Mũrungu, kwina, na kinya kũromba. Na magiita jamakai o mwaka, nĩ bacemanagia kĩrĩ biũthũrano bibinene nĩ ũntũ bwa kũthathayia.
2. Nĩmbi ũkairitana kĩrĩ mĩcemanio yeetũ?
Mĩcemanione, tũritanaga rũteto rwa Mũrungu, “tukionanagiria nteto kenda antu bamenya bwega gitumi giacio.” (Thooma Nehemia 8:8.) Mĩcemanione yeetũ, ũkairitana bwegie Jehova na nkuma ciawe injega. O ũrĩa ũgeeta na mbere kũmenya jamaingĩ jegie wendo bwawe kĩrĩ gwe, ũkamũkuĩrĩria nkũrũki. Kinya ũkairitana ũrĩa omba gũgũtethia kwĩthĩrwa na ũtũũro bũbwega.—Isaya 48:17, 18.
3. Nĩatĩa ũũmba gũtetheka wagwatanĩra na bangĩ kĩrĩ mĩcemanio yeetũ?
Jehova atwĩraga “tuciurageni mantu jetu, tukiumanagiiria, tukiendaga antu, tukithithagia mantu jaria jaagirite; na tugatigeni gutirimanaga amwe.” (Ahibirania 10:24, 25) Kĩrĩ mĩcemanio yeetũ ũgatirimana na antũ barĩa bendeene kamma, na barĩa bendaga kwiritana bwegie Murungu tagwe. Ũkaigua bagĩĩkanĩra inya na biugo kuuma Bibiriene. (Thooma Aroma 1:11, 12.) Kinya ũgatirimana na antũ bangĩ barĩa boombanĩte kũrwa na mathĩĩna jaao. Biu nĩ bimwe bia ĩtũmi birĩa bitũmaga Jehova enda tũcemania amwe na wĩthĩre!
ĨNJA NKŨRŨKI
Cũnkũũna nĩatĩa mĩcemanio ya Akũũjĩ ba Jehova ĩthithagua na nĩkĩ bũrĩ ũntũ bwa gĩtũmi gwĩta kĩrĩ yo.
4. Mĩcemanio ya Akũũjĩ ba Jehova
Karine ya mbere, Akristũ nĩbaarĩ na wĩthĩre bwa gũtirimanaga amwe nĩkenda baathathaayia Jehova. (Aroma 16:3-5) Thooma Akolosai 3:16, rĩu bwarĩĩrie kĩũria gĩkĩ:
Nĩatĩa Akristũ ba mbere bathathaayia Jehova?
Kinya naarua, Akũũjĩ ba Jehova barĩ wĩthĩre bwa gũcemanagia amwe Nyomba cia Ũnene. Nĩkenda wona ũrĩa mĩcemanio yaao ĩĩthagĩrwa ĩkari, tega VIDIO. Rĩu, ũtege mbica ya antũ barĩ mũcemanione jwa kĩũthũrano, na bwarĩĩrie biũria birĩa bithingatĩte
Nĩ mantũ jarĩkũ jakungˈuanana wacionera kĩrĩ jarĩa jathithagua nyomba ya Ũnene na jarĩa wathooma kĩrĩ Akolosai 3:16?
Kĩrĩ vidio kana kĩrĩ mbica, kũrĩ ũntũ bũngĩ ũroona bwa gũkũgwĩria bwegie mĩcemanio?
Thooma 2 Akorintho 9:7, rĩu bwarĩĩrie kĩuria gĩkĩ:
Nĩkĩ mĩcemanio ya Akũũjĩ ba Jehova ĩtĩrĩagua?
Bũrĩ amwe na mũritani waaku, tegeni birĩa bikaarĩĩrua kĩrĩ jũmwe jwa mũcemanio jũrĩa jũthingatĩte.
Nĩ gĩcuncĩ kĩrĩkũ kĩa mũcemanio kĩgũgũkucĩĩria nkũrũki kana gĩgagũtethia?
Ũramenya?
Kĩrĩ jw.org, woomba kwona nĩkũ na nĩrĩ mĩcemanio ĩthithagua nthĩgũrũne yonthe.
Mĩcemanio yeetũ ĩĩthagĩrwa na ndwaria, bionanĩĩria, na vidio. Mĩcemanio yambagia na ĩkathiria na rwĩmbo na maromba
Kĩrĩ twanya tũmwe twa mũcemanio, athikĩĩri nĩ bagwatagwa ũgeni gũcookia
Antũ bonthe nĩ bagwatagwa ũgeni—antũ ba nja, barĩa batĩgũri kana bagũrana, antũ baakũrũ na twana
Kĩrĩ mĩcemanio yeetũ ya Akũũjĩ ba Jehova gũtĩkĩo kĩrĩagua. Akũũjĩ ba Jehova batĩĩtagia mbia cia gũtonya kana boothũrania mũũthi
5. Nĩkenda twĩta mĩcemanione nĩ tũkũbatara gũciũmia mono
Thũgaanĩria ngerekano ya nja ya ba Jesũ. Nĩkenda beeta ũntũne bũrĩa bwathithagua o rĩmwe mwaka, nĩ baabataraga gwĩta rũgendo rwa kilomita ta 100, bagĩkũrũkagĩĩra gũntũ kũrĩ na irĩma, kuuma Nazarethi gwĩta Jerusalemu. Thooma Luka 2:39-42, rĩu bwarĩĩrie biũria bibi:
Ũrĩthũgaania rũgendo rũrũ rwa gwĩta Jerusalemu nĩ rwabataraga kwiritanĩria?
Ũrĩthũgaania nĩkĩ ũkũbatara gũciũmia mono nĩkenda wĩta mĩcemanione?
Ũrĩthũgaania nĩbũbwega gwĩta mĩcemanione kĩnya kethĩra ũntũ bũu nĩ bũbũũmo kĩrĩ gwe? Nĩkĩ?
Bibiria yugaga gũcemania amwe tontũ bwa kũthathaayia nĩ ũntũ bwa gĩtũmi mono. Thooma Ahibirania 10:24, 25, rĩu bwarĩĩrie kĩũria gĩkĩ:
Nĩkĩ tũbuĩri kwĩthĩrwa na wĩthĩre bwa gwĩta mĩcemanione?
ANTŨ BAMWE BAUGAGA: “Ũtĩkũbatara gũcemania na bangĩ. Nĩbũngˈani akĩ kũthooma Bibiria ũrĩ nja.”
Nĩ ĩandĩko rĩrĩkũ kana ngerekano ĩrĩkũ ya Bibiria ĩgwũraga ũrĩa Jehova endaga?
NA NJĨRA ĨNKUĨ
Kwĩja mĩcemanione gũgagũtethia kwiritana mantũ jamaingĩ jegie Jehova, kwongeera ũcoore bwaku amwe nawe, na kũthathayia Jehova amwe na bangĩ.
Gũcookera
Nĩkĩ Jehova atwĩkagĩra inya tũcemanie amwe?
Nĩmbi ũkairitana kĩrĩ mĩcemanio ya Akũũjĩ ba Jehova?
Ũrĩthũgaania nĩ na njĩra ĩrĩkũ ĩngĩ ũũmba kũgunĩka kuumania na mĩcemanio ya Akũũjĩ ba Jehova?
CŨNKŨŨNA
Rĩ, a ũkeja kwĩthĩrwa nũgũkĩra kwĩja mĩcemanione? Ona ũrĩa muntũ mũrũme ũmwe ũrĩa waigagua tagwe, ũrĩa ejĩre kwenda mĩcemanio.
Ona ũrĩa muntũ ũmwe ũmwĩthĩ agwĩrĩĩrue mĩcemanio, na ũrĩa aathithĩrie nĩkenda atĩgatigane nayo.
Iritane ũrĩa bangĩ baigĩtue tontũ bwa gwĩta mĩcemanione.
“Nĩkĩ Wĩte Mĩcemanione Nyomba ya Ũnene?” (Thooma intanetine)
Cũnkũũna ũrĩa ũtũũro bwa muntũ mũrume ũmwe, wa gĩkundi kĩrĩa kĩendeete ndwa bwagarũkĩre arĩgwĩta mĩcemanione ya Akũũjĩ ba Jehova.
“Ndeetaga na Mũsinka Magiita Jonthe” (Mnara wa Mlinzi, Julai 1, 2014)