KĨTHOOMO KĨA 17

Jesũ Aarĩ na Nkuma Irĩkũ?

Printed Edition

O ũrĩa tũkairitana mantũ jarĩa Jesũ augĩre na kũthithia rĩrĩa aarĩ nthĩgũrũne, tũkona nkuma irĩa igatũreta akũĩ nawe, na Ĩthe, Jehova. Nĩ irĩkũ imwe cia nkuma ciawe inthongi? Na nĩatĩa tũũmba kwigerekania na Jesũ ũtũũrone bwetũ?

1. Nĩ na njĩra irĩkũ Jesũ angˈuanene na Ĩthe?

Arĩ ĩgũrũ, Jesũ naategete Ĩthe waawe ũrĩa ũrĩ wendo, na arairitana kuumania nawe mĩaka mbirioni inyingĩ. Ta maumĩĩra, nathũgaanagia, akaigua, na kũthithia o tawe. (Thooma Johana 5:19.) Kamma, Jesũ noonanagia nkuma ta cia Ĩthe na njĩra ĩmbũjũru, nĩkĩo augĩre: “Uria umbonete ni noonete Baaba.” (Johana 14:9) O ũrĩa ũkairitana nkuma cia Jesũ, nou ũkamenya Jehova nkũrũki. Kwou, kwiritana ũrĩa Jesũ oonagia antũ kĩao, gũgagũtethia kũmenya ũrĩa Jehova aigagua bũkwegie.

2. Nĩatĩa Jesũ onanĩtie nendeete Jehova?

Jesũ augĩre: “Nikenda baria bari ba nthiguru iji bamenye ati nimpendaga Baaba, na bamenya uria Baaba aambathire, o uu no u nthithagia.” (Johana 14:31) Rĩrĩa aarĩ nthĩgũrũne, Jesũ noonanĩrie wendo bũũnene kwerekera Ĩthe na njĩra ya kũmwathĩkĩra, kinya rĩrĩa bwarĩ bũbũũmũ kũthithia ũu. Jesũ kinya neendete kwaria bwegie Ĩthe na gũtetheeria bangĩ gũtuma ũcoore Nawe.—Johana 14:23.

3. Nĩatĩa Jesũ onanĩtie atĩ nendete antũ

Bibiria yugaga atĩ Jesũ neendete “atana ba antu” mono. (Njuno 8:31) Noonanĩrie wendo bũu na njĩra ya gwĩkĩra antũ inya na kũbatethia na nkoro yonthe. Gũkũrũkĩĩra biama birĩa aaringĩre, noonanĩrie inya yaawe na kinya kĩao kĩawe. (Mariko 1:40-42) Naathithagĩria antũ na njĩra ya kĩao na atĩkwathũra. Biugo biawe nĩbiaboragĩĩria na kwaa antũ bonthe barĩa baarĩ na nkoro injega wĩrĩgĩĩro, barĩa baamũthikagĩĩra. Jesũ neetĩkĩrĩrie kũthangĩka na gũkua tontũ bwa wendo bwawe kĩrĩ antũ bonthe. Ĩndĩ barĩa eendete mono nĩ barĩa baathingataga moritani jaawe.—Thooma Johana 15:13, 14.

ĨNJA NKŨRŨKI

Iritane nkũrũki bwegie nkuma cia Jesũ. Ona ũrĩa kinya ũũmba kwonania wendo na ũgwatani ũgeni ota ũrĩa aathithagia.

4. Jesũ neendete Ĩthe

Ngerekano ya Jesũ nĩtũritanaga ũrĩa tũũmba kwonania wendo bwetũ kĩrĩ Mũrungu. Thooma Luka 6:12 na Johana 15:10; 17:26. Warĩĩkia kũthooma o ĩandĩko arĩĩrieni kĩũria gĩkĩ:

Nĩatĩa tũũmba kwonania nĩtwendete Jehova.

Jesũ akĩrombaga. — Jesũ neendete Ĩthe waawe wa ĩgũrũ, na naaranagĩria nawe kaingĩ gũkũrũkĩĩra maromba

5. Jesũ namakagĩra antũ barĩa barĩ na ũbatu

Jesũ naamakagĩra moobatu ja antũ bangĩ nkũrũki ya jaawe. Kinya rĩrĩa eethagĩrwa anogi, naatumagĩra ĩgiita na inya yaawe gũtethia antũ. Thooma Mariko 6:30-44, rĩu bwarĩĩrie biũria bibi:

Kũringana na mĩstaarĩ ĩu, nĩ njĩra irĩkũ imwe Jesũ oonanĩrie atĩ naamakagĩra bangĩ?—Tega mũstaarĩ jwa 31, 34, 41, na 42.
Nĩmbi biekagĩra Jesũ inya gũtethia antũ?—Tega mũstaarĩ jwa 34.
Tontũ Jesũ oonanagia nkuma ta cia Ĩthe, nĩatĩa mantũ jau jonthe jagũkũritana bwegie Jehova?
Nĩ na njĩra irĩkũ imwe tũũmba kwonania nĩtũkũmakĩra bangĩ ta Jesũ?

Na njĩra ya kĩama, Jesũ akĩreraga mangiri ja antũ na njĩra ya kuugĩthia mainda mĩgate ĩtano na tũkũyũ twĩrĩ tũnini. Aritwa bakĩgaa biakũrĩa kĩrĩ antũ arũme, ekũrũ, na twana.

6. Jesũ nĩ mũtugani

Jesũ naarĩ mũtugani kinya kethĩra ataarĩ na into bibingĩ, na neekagĩra antũ bonthe inya kwĩthĩrwa barĩ atugani. Thooma Mathithio 20:35, rĩu bwarĩĩrie kĩũria gĩkĩ:

Kũringana na Jesũ, nĩatĩa tũũmba kwĩthĩrwa na kũgwĩrua?

Tega VIDIO, rĩu bwarĩĩrie kĩũria gĩkĩ kĩthingatĩte.

VIDIO: “Kũrĩ Na Kũgwĩrua Nkũrũki Kĩrĩ Kwejana”—Gĩcuncĩ (4:00)

Nĩ na njĩra irĩkũ tũũmba kwonania ũtugani, kinya kethĩra tũtĩ na into bibingĩ?

Ũramenya?

Bibiria ĩtũritanaga kũromba Jehova gũkũrũkĩĩra riĩtwa rĩa Jesũ. (Thooma Johana 16:23, 24.) Rĩrĩa twaromba na njĩra ĩu, nĩtwonanagia atĩ nĩtũgũciũkĩrwa nĩ jarĩa Jesũ athithĩtie nĩkenda atũtethia kwaa acoore ba Jehova.

ANTŨ BAMWE BAUGAGA: “Mũrungu atĩtũmakagĩra rĩrĩa tũkũthangĩka.”