KĨTHOOMO KĨA 22
Nĩatĩa Ũũmba Gũtũmĩrĩria Bangĩ Nkũma Ĩnjega?
O ũrĩa ũkwiritana Bibiria, womba gũciĩra, ‘Mũntũ wonthe nabuĩrĩte kũmĩmenya!’ Kamma, antũ bonthe nĩ babuĩrĩte kũmĩmenya! Amwe na bũu, no wigue ũrĩna ũguaa bwa kwĩra bangĩ jarĩa wĩritanĩte. Ka twarĩĩrie ũrĩa ũũmba gũcinda ũguaa bũu na ũkambĩrĩria kwĩra bangĩ nkuma ĩnjega ya Bibiria ũgwĩrĩtue.
1. Nĩatĩa ũũmba kwĩra antũ barĩa wijĩ jarĩa wiritanĩte?
Aritwa ba Jesũ baugĩre: “Tutiumba gutiga kwaria nteto cia mantu jaria twonete na jaria twigitue.” (Mathithio 4:20) Nĩboonaga mma ĩrĩ ya gĩtũmi na kwou nĩbeendaga kwaria na antũ babaingĩ o ũrĩa kũmbĩkĩka. Gwe-rĩ, nwigagua o ũu? Kethĩra nĩu, cwaa kaanya karĩa ũũmba kwĩra antũ ba nja na acoore jarĩa wiritanĩte na njĩra ya gĩtĩĩo.—Thooma Akolosai 4:6.
Ũrĩa ũũmba kwambĩrĩria
Rĩrĩa ũkwaria na antũ ba nja ũntũ bwegie Bibiria, ambia na njĩra ya kuuga: “Nĩndĩrairitanĩre ũntũ bũbũthongi kiumia gĩkĩ.”
Thoomera mũcoore ũrĩa wajĩtue kana ũrĩna mĩthangĩko ĩandĩko rĩa kũmwĩkĩra inya.
Ĩra ariti ngũgĩ bangĩ jarĩa ũrairitanĩre mĩcemanione ya kĩũthũrano kana kĩrĩ wiritani bwaku bwa Bibiria, barĩa bagakũũria ũrĩa ũratumĩĩre mũthia jwaku jwa kiumia.
Onia acoore baakũ webusaĩt ya jw.org/mer.
Gwata ũgeni bangĩ rĩrĩa ũkwiritana Bibiria, kana ũboonie ũrĩa bagatũma ĩromba kĩrĩ jw.org/mer.
2. Nĩkĩ nĩ bwega gũciũmia gũtũmĩĩria amwe na kĩũthũrano?
Aritwa ba Jesũ nĩbaathithĩrie jamaingĩ nkũrũki ya gũtũmĩĩria nkuma ĩnjega kĩrĩ antũ barĩa baijĩene nabo. Jesũ nabatũmĩre “bairi-bairi beete mbere yawe ntuurene cionthe” bagatũmĩĩrie. (Luka 10:1) Ngũgĩ ĩu ya gũtũmĩĩria ĩrĩa yabanganĩtue nĩyaere babaingĩ kaanya ga kũthikĩĩra nkuma ĩnjega. Kinya gũtũmĩĩria barĩ amwe nĩgwatũmĩre aritwa bethĩrwe na kũgwĩrua mono. (Luka 10:17) Rĩ, kinya gwe to ũciĩkĩre mworoto jwa gũtũmĩĩria amwe na kĩũthũrano?
ĨNJA NKŨRŨKĨ
Ona ũrĩa ũũmba gũcinda ũguaa na ũrĩa ũũmba kwona kũgwĩrua kũrĩa kũmanagia na gũtũmĩĩria nkuma ĩnjega.
3. Jehova akethĩrwa amwe nagwe
Bamwe barĩa beendaga gũtũmĩĩria no baigue ũguaa ũrĩa antũ bakaboona na ũrĩa bakabathithĩria.
Gwe-rĩ, nwigagua ũguaa kwaranĩria na bangĩ jarĩa wiritanĩte? Nĩkĩ, kana nĩkĩ ũtĩkĩraga?
Tega VIDIO, rĩu bwarĩĩrie kĩũria kĩrĩa kĩthingatĩte.
Nĩatĩa Akũũjĩ baba babeethĩ boombĩre gũcinda ũguaa bwao?
Thooma Isaya 41:10, rĩu bwarĩĩrie kĩũria gĩkĩ:
Rĩrĩa waigua ũgĩkĩra gũtũmĩĩria, nĩatĩa ĩromba rĩgũtethagia?
Ũramenya?
Akũũjĩ ba Jehova babaingĩ, kũrĩ ĩgiita baathũgaanagia batĩkoroomba gũtũmĩrĩria bangĩ nkuma ĩnjega. Ngere- kano, Sergey, aacionaga atĩ muntũ wa gĩtũmi na nonaga bũrĩ bũbũũmũ kwaranĩria na antũ. Ĩndĩ nyumene nairitanĩre Bibiria. Ariuga: “O amwe na ũguaa bũrĩa ndaarĩ nabu, nĩndambĩrĩĩrie kwaria na bangĩ jarĩa ndairitanaga. Ũntũ bwa kũrigarania, ndĩkwambia kwaranĩria na bangĩ bwegie Bibiria, nĩndagĩĩre ũcamba nkũrũki. Kinya nĩgwatũmĩre wĩtĩkio bũũ bwakwa bwerũ bũrika nkorone yakwa.”
4. Ĩthĩrwa na gĩtĩĩo
Rĩrĩa ũgũtũmĩĩria nkuma ĩnjega, menya ũthũgaanĩria akĩ jarĩa ũkauga, ĩndĩ ũthũgaanĩrie kinya ũrĩa ũkajauga. Thooma 2 Timotheo 2:24 na 1 Petero 3:15, rĩu bwarĩĩrie biũria bibi:
Nĩatĩa ũũmba gũtumĩra mĩstaarĩ ĩjĩ rĩrĩa ũkwaranĩria na bangĩ bwegie Bibiria?
Antũ bamwe ba nja kana acoore baaku nobarege gwĩtĩkanĩĩria nagwe. Nĩatĩa ũkathithia? Nĩatĩa ũtĩbuĩrĩte kũthithia?
Nĩkĩ bũrĩngĩthĩrwa bũrĩ ũntũ bũbwega kũũria biũria na njĩra ya ũũme, nkũrũki ya kwĩra antũ jarĩa babuĩrĩte gwĩtĩkia?
5. Gũtũmĩĩria nkuma ĩnjega nĩkuretaga kũgwĩrua
Jehova naaere Jesũ ngũgĩ ya gũtũmĩĩria nkuma ĩnjega. Nĩatĩa Jesũ oonaga ngũgĩ ĩu? Thooma Johana 4:34, na bwarĩĩrie biũria bibi:
Kũrĩa irio bibiega nĩkũgwatagĩĩra ũtũũro na kũgatũma twĩthĩrwa na kũgwĩrua. Nĩkĩ Jesũ aringithanagia kũthithia wendi bwa Mũrungu—bũrĩa nĩ amwe na gũtũmĩĩria nkuma ĩnjega—na kũrĩa biakũrĩa?
Nĩkũgwĩrua kũrĩkũ kuumanagia na gũtũmĩĩria nkuma ĩnjega?
Mendekethia
Ĩgiita rĩa mũcemanio jwa gatĩgatĩ, iritane njĩra irĩa ũũmba kwambĩrĩria nacio rwaria.
Aranĩria na mwarimũ waaku ũrĩa ũũmba gũciandĩkĩthia ũrĩ mũritwa kĩrĩ mũcemanio jwa gatĩgatĩ ga kiumia. Twanya twa aritwa tũgagũtethia kwigua withuranĩrĩte nkũrũki kwĩra bangĩ jarĩa ũkwiritana.
Tumĩra gĩcuncĩ kĩa “Antũ Bamwe Baugaga” kana “Muntũ No Aũrie” kĩrĩ iuku rĩrĩ kwiritana ũrĩa ũũmba gũcookia kĩrĩ maoni na biũria birĩa antũ booragia kaingĩ.
MUNTŨ NO AŨRIE: “Nĩ ũntũ bũrĩkũ bũbwerũ ũrĩ nabu?”
Nĩatĩa ũũmba gũtumĩra kaanya kau kwĩra muntũ jarĩa wiritanĩte kĩrĩ wiritani bwaku bwa Bibiria?
NA NJĨRA ĨNKUĨ
Gũtũmĩrĩria bangĩ nkuma ĩnjega nĩkũretaga kũgwĩrua, na bwomba kwĩthĩrwa bũrĩ ũntũ bũbũũthũ mono kwambia gũtũmĩĩria, nkũrũki ya ũrĩa ũũmba kwĩthĩrwa ũkĩthũgaanagia.
Gũcookera
Nĩkĩ tũbuĩrĩte gũtũmĩrĩria bangĩ nkuma ĩnjega?
Nĩatĩa ũũmba kũthithia ũu na njĩra ya gĩtĩĩo?
Nĩatĩa ũũmba gũcinda ũguaa bũnthe bũrĩa ũũmba kwĩthĩrwa nabu bwegie gũtũmĩĩria?
CŨNKŨŨNA
Ona njĩra inya impũũthũ iria ũũmba gũtumĩra gũtũmĩĩria nkuma ĩnjega ũgĩtumagira kadi ya jw.org.
Kĩonanĩĩria gĩa gũtumĩra kadi ya Kwaranĩria ya JW.ORG (1:43)
Iritane bwegie nkuma inya irĩa ciũmba gũgũtethia gũtũmĩĩria nkuma ĩnjega.
“Rĩ, Nwithuranĩrĩte Kwaa Mũgwatia wa Antũ?” (Mnara wa Mlinzi, Septemba 2020)
Ona ũrĩa ngerekano ya Bibiria yũũmba gũtũtethia kwĩthĩrwa na ũcamba bwa gũtũmĩĩria nkuma ĩnjega, kinya twethĩrwa tũrĩ aana babaniini.
Ona ũrĩa ũũmba kwaria bwegie Bibiria na antũ beenu ba nja barĩa batiiritanĩte bwegie Jehova.
“Gũkinyĩra Nkoro cia Antũ Ba Nja Barĩa Batĩĩtĩkĩtie” (Mnara wa Mlinzi, Machi 15, 2014)