Ũbatithio—Nĩ Mworoto Jũmwega Gũkinyĩra!

Jesũ aaritanĩre no mwanka Akristũ babatithue. (Thooma Mathayo 28:19, 20.) Ĩndĩ ũbatithio nĩmbi? Na nĩatĩa muntũ abuĩrĩte kũthithia nĩkenda akinyĩra mworoto jũu?

1. Ũbatithio nĩmbi?

Kiugo “batithia” kiumanĩtie na riĩtwa rĩa kĩgiriki rĩrĩa riugaga “gũtombeka” rũũjĩne. Rĩrĩa Jesũ abatithirue, atombekerwe muurone jwa Jorodani, rĩu ‘araitia rugiri aumite ruujine.’ (Mariko 1:9, 10) Ũu nou, Akristũ ba mma babatithagua na njĩra ya gũtonyua buru rũũjĩne, kana gũtombekũa ndeene yaaru.

2. Nĩatĩa ũbatithio bwonanagia?

Rĩrĩa muntũ abatithua, nonanagia atĩ akwiritĩra wengwa kĩrĩ Jehova Mũrungu. Nĩatĩa muntũ airitaga kĩrĩ Mũrungu? Mbere ya ũbatithio, gũkũrũkĩĩra ĩromba muntũ arĩ wenka, neraga Jehova nakwenda ũmũtumĩkĩra kenya na kenya. Nekaga wĩrane atĩ akathathayia Jehova wenka, na gwĩka wendi bwa Mũrungu bũrĩ ũntũ bwa gĩtũmi nkũrũki ũtũũrone bwawe. Nathuuraga gwikana kana ‘gwitijira wengwa na . . . kuthingata’ moritani na ngerekano ya Jesũ magiita jonthe. (Mathayo 16:24) Rĩrĩa muntũ airita na abatithua, nĩkũũmbĩkaga akethĩrwa na ngwatanĩro ya akuĩ amwe na Jehova na athathayia bangĩ.

3. Nĩatĩa muntũ ombaga gũkinyĩra ũbatithio?

Woomba kwithuranĩra nĩkenda ũbatithua na njĩra ya kwiritana bwegie Jehova na gwaka wĩtĩkio bwaku kĩrĩwe. (Thooma Ahibirania 11:6.) O ũrĩa ũmenyo bwaku na wĩtĩkio bũkwongereka, nou wendo bwaku kĩrĩ Jehova bũkũraga. Gũtĩ nkanja ũkenda gũtũmĩĩria bũmwegie na gũtũũra kũringana na mawaatho jaawe. (2 Timotheo 4:2; 1 Johana 5:3) Orĩo muntũ aambĩrĩria ‘gwitaga na miitire iria agiri ni gwitaga nayo ni untu bwa Mwathani; atua kumugwiragia mantune jonthe,’ omba kũthuura kũrita ũtũũro bwawe kĩrĩ Mũrungu na akabatithua.—Akolosai 1:9, 10.a

ĨNJA NKŨRŨKI

4. Twomba kwiritana kuumania na ũbatithio bwa Jesũ

Thooma Mathayo 3:13-17 nĩkenda wiritana nkũrũki bwegie ũbatithio bwa Jesũ. Rĩu bwarĩĩrie biũria bibi:

• Rĩ, Jesũ aarĩ kaana kaniini rĩrĩa abatithirue?

• Nĩatĩa abatithirue? Neka aminyaminyĩĩrue rũũjĩ mũtwe?

Jesũ naambĩrĩrie ngũgĩ ya mwanya ĩrĩa Jehova aamwete nthĩgũrũne, rĩrĩa aabatithirue. Thooma Luka 3:21-23 na Johana 6:38, rĩu bwarĩĩrie kĩũria gĩkĩ:

• Nyuma ya Jesũ kũbatithua, nĩ ngũgĩ ĩrĩkũ ekĩre mbere ũtũũrone bwawe?

5. Ũbatithio nĩ mworoto jũkinyĩrĩka

Kũthũgaania kwirita na kũbatithua, nĩ ũntũ tũũmba kwigua bũgĩtũremeera mwambĩrĩrione. Amwe na bũu, womba gũ kinya antũ arĩa ũkaigua ũrĩna ũcamba bwa kwenda gũtua ĩtua rĩu rĩa gĩtũmi. Nĩkenda wona ngerekano ya antũ barĩa banathithia ũu, tega VIDIO.

VIDIO: Gũtuma Ũcoore Bwa Akuĩ Amwe na Jehova (1:11)

Thooma Johana 17:3 na Jakubu 1:5, rĩu bwarĩĩrie kĩũria gĩkĩ:

• Nĩmbi biũmba gũtetheeria muntũ kwithuranĩra tontũ bwa ũbatithio?

1. Twiritaga na njĩra ya kwĩra Jehova atĩ nĩtũkwenda kũmũtumĩkĩra kenya na kenya.

2. Ĩgiita rĩa ũbatithio bwetũ, nĩtwonanagia mbere ya mwingĩ atĩ nĩtwiritĩte kĩrĩ Mũrungu.

6. Kũbatithua kwonanagia ũkwaa ũmwe wa nja ya Jehova

Rĩrĩa twabatithua, twejaga gĩcuncĩ kĩa ũrũmwe bwa nja ya Jehova ya nthĩgũrũne yonthe. Kinya kethĩra tuumĩte gũntũ na kĩrĩ mĩrerere mwanya mwanya, twinthe nĩtwĩtĩkĩtie o ũmwe, na nĩtũtũũraga kũringana na mawaatho jamwe. Thooma Zaburi 25:14 na 1 Petero 2:17, rĩu bwarĩĩrie kĩũria gĩkĩ:

• Nĩatĩa gũkarĩkaga kĩrĩ ũcoore bwa muntũ na Jehova na athathayia bangĩ nyuma ya kũbatithua?

NA NJĨRA ĨNKUĨ

Jesũ aritanĩre atĩ Akristũ nĩbakũbatara kũbatithua. Nĩkenda muntũ akinyĩra mworoto jũu, nakũbatara kwĩthĩrwa na wĩtĩkio bũriku kĩrĩ Jehova, gũtũũra kũringana na mawaatho Jaawe, na kwirita kĩrĩwe.

Gũcookera

• Ũbatithio nĩmbi, na nĩkĩ bũrĩ ũntũ bwa gĩtũmi?

• Kũrĩna ngwatanĩro ĩrĩkũ kĩrĩ kwirita na kũbatithua?

• Nĩ matagaaria jarĩkũ jatongagĩĩria kĩrĩ kwirita na kũbatithua?

CŨNKŨŨNA

Iritane ũmma bwegie ũbatithio.

“Ũbatithio Nĩmbi?” (Thooma intanetine)

Cũnkũũna njĩra irĩa ciũmba gũtetheeria muntũ gũkinyĩra ũbatithio.

“Kwonania Wendo na Nkaatho Kĩrĩ Jehova Nĩgũtongagĩĩria Kĩrĩ Ũbatithio” (Mnara wa Mlinzi, Machi 2020)

Kinya kethĩra muntũ mũrũme ũmwe naigagua nakwenda kũbatithua, cũnkũũna nĩmbi mono mono biatũmĩre ajũkia ĩtagaaria rĩu.

“Nĩbendaga Ndirikithĩria Ũmma Ni Ningwa” (Mnara wa mlinzi, Februarĩ 1, 2013)

Cũnkũũna nĩkĩ ũbatithio bũrĩ mworoto ũkũbatara gũkinyĩra na ũrĩa ũũmba kwithuranĩra nĩ ũntũ bwaju.

“Mbatithue?” (Biũria Birĩa Antũ Babeethĩ Baciũragia—Macookio Jarĩa Jabatethagia, Iuku Rĩa 2, kĩthoomo kĩa 37)