KĨTHOOMO KĨA 46
Nĩkĩ Ũbuĩrĩte Kwirita Kĩrĩ Jehova na Kũbatithua?
Wiritaga kĩrĩ Jehova na njĩra ya gwĩka wĩrane gũkũrũkĩĩra ĩromba atĩ ũkamũthathayia we wenka, na ũgeeka wendi bwawe bũrĩ bwa mbere ũtũũrone bwaku. (Zaburi 40:8) Nyuma ya ũu, nũbatithagua. Rĩrĩa wathithia ũu, nwonagia bangĩ atĩ nwiritĩte kĩrĩ Jehova. Ĩtua rĩa kwirita kĩrĩ Jehova nĩrĩo rĩa gĩtũmi nkũrũki ũũmba kũthithia. Nĩmbi bigagũtetheeria gũtua ĩtua rĩu rĩa gĩtũmi mono, na rĩa kũgarũra ũtũũro bwaku?
1. Nĩmbi bitũmaga muntũ airita kĩrĩ Jehova?
Twiritagĩra kĩrĩ Jehova tontũ bwa wendo. (1 Johana 4:10, 19) Bibiria ĩtwĩkagĩra inya ũjũ: “Endaga Mwathani Murungu waku na nkoro yaku yonthe, o na mwoyo jwaku junthe, o na mathuganio jaku jonthe, o na inya yaku yonthe.” (Mariko 12:30) Nĩtwonagia Mũrungu nĩtũmwendete gũkũrũkĩĩra jarĩa tuugaga, ona kĩnya gũkũrũkĩĩra jarĩa tũthithagia. O ta ũrĩa antũ baĩrĩ bendene mũthiene bagũranaga, nou wendo bwetũ kĩrĩ Jehova bũtũtethagia kwirita kĩrĩwe na kũbatihua.
2. Nĩ itharimo birĩkũ Jehova aejaga Akũũjĩ barĩa babatithĩtue?
Rĩrĩa wabatithua, nwejaga ũmwe wa nja ya Jehova ĩrĩna kũgwĩrua. Rĩu ũgacionera wendo bwawe gũkũrũkĩĩra njĩra inyingĩ, na kinya ũkamũkuĩĩria nkũrũki. (Thooma Malaki 3:16-18.) O amwe na kwĩthĩrwa Jehova arĩ Baaba waaku, ũkethĩrwa na nja ya ataana na arĩ-ba-baaba ba nthĩgũrũne yonthe barĩa bendete Mũrungu, na bakwendete kinya gwe. (Thooma Mariko 10:29, 30.) Nĩ mma no mwanka ũjũkie matagaaria manna mbere ũbatithua. Nũbuĩrĩte kwiritana bwegie Jehova, ũmwende na wĩthĩrwe na wĩtĩkio kĩrĩ Mũtaanowe. Mũthiene no mwanka ũrite ũtũũro bwaku kĩrĩ Jehova. Kethĩra ũkajũkia matagaaria jau na ũbatithue, ũkethĩrwa ũrĩ njĩrene ĩrĩa ĩtongagĩĩria kĩrĩ mwoyo jwa kenya na kenya. Rũteto rwa Mũrungu rugaga: ‘Ubatithio . . . nibu bukwonokagia igiitene riri.’—1 Petero 3:21.
ĨNJA NKŨRŨKI
Cũnkũũna nĩkĩ bũrĩ ũntũ bwa gĩtũmi kwirita kĩrĩ Jehova na kũbatithua.
3. No mwanka twinthe tũthuure nũũ tũgatumĩkĩra
Kĩrĩ mũgongo jwa Israeli karaaja, antũ bamwe baathũgaanagia atĩ barĩngĩthathayia Jehova na mũrungu jwa ũrongo Baali. Ĩndĩ Jehova naatũmĩre kĩroria Elija nĩkenda abatethia kũgarũra mathũgaanio jau jaao jataabui. Thooma 1 Anene 18:21, rĩu bwarĩĩrie kĩũria gĩkĩ:
Nĩ ĩtua rĩrĩkũ Aisraeli baabataraga gũtua?
O ta Aisraeli, kinya batuĩ no mwanka tũthuure nũũ tũgatumĩkĩra. Thooma Luka 16:13, rĩu bwarĩĩrie biũria bibi:
Nĩkĩ gũtĩũmbĩka tũthathayia Jehova na muntũ ũngĩ kana gĩntũ kĩngĩ?
Nĩatĩa twonagia Jehova atĩ nĩtũthuurĩte kũmũthathayia?
4. Thũgaanĩria wendo bũrĩa Jehova akwonetie
Jehova natwete biewa bibingĩ bibiega. Nĩmbi tũũmba kũmwaa? Tega VIDIO.
Nĩ na njĩra irĩkũ imwe Jehova akwonetie wendo? Thooma Zaburi 104:14, 15 na 1 Johana 4:9, 10, rĩu bwarĩĩrie biũria bibi bithingatĩte:
Kĩrĩ biewa birĩa Jehova akwete, nĩ kĩrĩkũ ũgwĩragĩrua nkũrũki?
Nĩatĩa biewa biu bitũmaga wigua bũmwegie?
Rĩrĩa twaewa kĩewa kĩrĩa twendete, nĩtwigagua tũrĩ na wendi bwa gũcookeria nkaatho ũrĩa ũtwete kĩewa kĩu. Thooma Kuriikanithia Maathana 16:17, rĩu bwarĩĩrie kĩũria gĩkĩ:
Rĩrĩa wathũgaanĩria mantũ jonthe jarĩa Jehova akũthithĩrĩtie, ũntũ bũbũ bũtũmaga wenda kũmwaa mbi?
5. Kwirita kĩrĩ Jehova nĩkũretaga itharimo bibingĩ
Antũ babaingĩ betĩkĩtie atĩ kwĩthĩrwa ũrĩna ĩgweta, ngũgĩ ĩnjega, na mbeca no bitũme bethĩrwa na kũgwĩrua. Ĩndĩ-rĩ, bũu nĩ mma? Tega VIDIO, rĩu bwarĩĩrie biũria bibi bithingatĩte.
Kinya kethĩra mũceethi ũu kĩrĩ vidio neendete gũceetha mũbiira, nĩkĩ aatiganĩre na ngũgĩ ĩu?
Naathuurĩre kwirita kĩrĩ Jehova, na tĩ kĩrĩ gũceetha mũbiira. Ũrĩthũgaania naatuĩre ĩtua rĩrĩega? Nĩkĩ ũgũcookia ũu?
Mbere mũtũmwa Paũlũ aa Mũkristũ, naarĩ na ngũgĩ ĩnjega mono. Aathoomerete waatho bwa Ayahudi, aritani nĩ mwarimũ waarĩ na ĩgweta. Ĩndĩ naatiganĩre na mantũ jau jonthe nĩkenda aa Mũkristũ. Rĩ, Paũlũ nairirĩre nĩ ũntũ bwa ĩtua rĩu? Thooma Afilipi 3:8, rĩu bwarĩĩrie biũria bibi:
Nĩkĩ Paũlũ augĩre atĩ mantũ jarĩa aathithagia mbere ya kwaa Mũkristũ jaari “nkorogonca iria itei,” kana rũko?
Arĩgũtiganĩria mantũ jau jonthe nĩmbi oonere?
Ũrĩthũgaania nĩmbi biũmba gũtũma wĩthĩrwa na ũtũũro bũbwega nkũrũki, nĩgũtumĩkĩra Jehova kana nĩkũthĩngatĩĩra mantũ jangĩ ũtũũrone bwaku?
Rĩrĩa Paũlũ aaere Mũkristũ noonere baita inyingĩ nkũrũki ya mantũ jarĩa aatiganĩre najo
ANTŨ BAMWE BAUGAGA: “To mwanka ũtumĩkĩre Mũrungu nĩkenda ũgwĩrĩrua ũtũũro.”
Ũrĩthũgaania nĩũntũ bũkũgwatanĩra na mathũgaanio kwirita kĩrĩ Jehova?
NA NJĨRA ĨNKUĨ
Wendo nĩbu bũtũmaga twirita kĩrĩ Jehova na tũkabatithua.
Gũcookera
Nĩkĩ tũbuĩrĩte kwenda Jehova na nkoro yonthe na kũmũthathayia we wenka?
Nĩ itharimo birĩkũ Jehova aejaga Akũũjĩ baawe barĩa babatithĩtue?
Gwe-rĩ, no wende kwirita kĩrĩ Jehova?
CŨNKŨŨNA
Ona nĩkĩ mwini wa ndwĩmbo, na mũceethi wa mũbiira, baathuurĩre kwirita kĩrĩ Jehova.
Antũ Babeethĩ Baciuragia—Nĩatĩa Ngatumĩra Ũtũũro Bwakwa?—Kũriikana Mantũ Jarĩa Jakũrũkĩte (6:54)
Cũnkũũna itũmi bingĩ bia kwonania nĩkĩ ũbuĩrĩte kwirita kĩrĩ Jehova.
“Nĩkĩ Ũbuĩrĩte Kwirita Kĩrĩ Jehova?” (Mnara wa Mlinzi, Januarĩ 15, 2010)
Kĩrĩ vidio ĩjĩ ya rwĩmbo, ona kũgwĩrua kũrĩa barĩa bairitĩte kĩrĩ Jehova bonaga.
Kĩrĩ rũgono “Mĩaka Ĩmingĩ Nĩndaciũragia, ‘Nĩkĩ Tũrĩ Mwoyo?’” ona nĩmbi biatũmĩre mwekũrũ ũmwe acũnkũũna nĩ mantũ jarĩkũ oonaga jarĩ ja gĩtũmi nkũrũki ũtũũrone bwawe.
“Bibiria Nĩgarũraga Ũtũũro” (Mnara wa Mlinzi, Novemba 1, 2012)