KĨTHOOMO KĨA 49
Nĩatĩa Nja Yaaku Yũũmba Kwĩthĩrwa na Kũgwĩrua?—Gĩcuncĩ kĩa 1
Antũ bagũrene orĩo, berĩgagĩĩra kũgwĩrua kũrĩa bethagĩrwa naku ntukũ yaao ya mũranũ gũgatũũra kenya na kenya. Na bũu nobũmbĩke. Akristũ barĩa bethĩrĩtwe bagũrene ĩgiita rĩraaja, na barĩa bethĩrĩtwe bagĩciũmagia gũtumĩra ũtaaro bwa Bibiria, nĩbaijĩ ũntũ bũu no bũmbĩke.
1. Nĩ ũtaaro bũrĩkũ Bibiria ĩejaga akũrũ?
Jehova naete mũkũrũ kaanya ga kwĩthĩrwa arĩ kĩongo kĩa nja. (Thooma Aefeso 5:23.) Jehova erĩgagĩĩra mũkũrũ atua matua jarĩa jakaguna nja yaawe. Bibiria ĩejaga akũrũ ũtaaro bũbũ: “Endageni aka benu.” (Aefeso 5:25) Kũu nĩkuuga atĩa? Mũkũrũ ũrĩna wendo athithagĩria mwekũrũ waawe na njĩra ya kĩao rĩrĩa barĩ nja, ona kinya rĩrĩa barĩ kĩrĩ mwingĩ. Namũkaragia kuumania na mogwati, na akathithia jonthe jarĩa akũũmba nĩkenda amwingĩria mobatu jaawe ja kĩmwĩrĩ, na ja kĩmathũgaanio. (1 Timotheo 5:8) Ũntu bwa gĩtũmi nkũrũki, natongagĩĩria kĩrĩ kwingia mobatu ja gĩkĩrundu ja mwekũrũ waawe. (Mathayo 4:4) Ngerekano, omba kũromba na kũthooma Bibiria amwe na mwekũrũ waawe. Rĩrĩa mũkũrũ athithĩria mwekũrũ waawe na njĩra ya wendo na kũmũmakĩra, ũcoore bwawe na Jehova nĩbwĩtaga na mbere.—Thooma 1 Petero 3:7.
2. Nĩ ũtaaro bũrĩkũ Bibiria ĩejaga ekũrũ?
Rũteto rwa Mũrungu rugaga atĩ o mũka “nakirage murumewe.” (Aefeso 5:33) Nĩatĩa omba kũthithia ũu? Omba kũthũgaanĩria bwegie nkuma injega cia mũkũrũ waawe na ũrĩa aciũmagia nĩkenda amũmenyeera, na amenyeera aana baao. Kinya omba kũmwonia gĩtĩĩo na njĩra ya kũgwata mbaru matua jarĩa akũthithia, na kinya kũmwarĩria na njĩra ya kĩao, na kwaria bwega bũmwegie, kinya ethĩrwa tĩ mũthathayia wa Jehova.
3. Nĩatĩa barĩa bagũrene bomba gwĩkĩra inya ngũrano yaao?
Bibiria yugaga ũjũ bwegie barĩa bagũrene: “Bo-bairi bakaa mwiri jumwe.” (Mathayo 19:5) Kũu nĩ kuuga babuĩrĩte kũrwa na ũntũ bunthe bũrĩa bũũmba gũtũma baathũkana. Bathigagia ũu na njĩra ya gũtumĩra kaanya amwe magiita jamaingĩ, na kwĩrana ũrĩa muntũ akwigua, na jarĩa jarĩ nkorone na mathũgaanione. Batĩrekagĩĩria muntũ kana gĩntũ kinya kĩrĩkũ kĩthĩrwa kĩrĩ kĩa gĩtũmi nkũrũki ya ũrĩa bagũrene nawe, tinga Jehova akĩ. Nĩbaimenyagĩĩra mono batĩgakũrie ũcoore bũtĩagĩrĩte na muntũ ũngĩ kinya ũrĩkũ.
ĨNJA NKŨRŨKI
Ona nĩ moritani jarĩkũ ja Bibiria jomba gwĩkĩra inya ngũrano yaaku.
4. Akũrũ—endeni ekũrũ benu na bũbamenyeere
Bibiria yugaga “arume babwirite kwendaga aka bao, o ta uria beendete miiri yao bongwa.” (Aefeso 5:28, 29) Ũu nĩ kuuga atĩa? Tega VIDIO, rĩu bwarĩĩrie kĩũria gĩkĩ kĩthingatĩte.
Nĩ na njĩra irĩkũ imwe mũkũrũ omba kwonania nendete na namakĩra mwekũrũ waawe?
Thooma Akolosai 3:12, rĩu bwarĩĩrie kĩũria gĩkĩ:
Nĩatĩa mũkũrũ omba kwonania nkuma iu kĩrĩ ngũrano yaawe?
5. Mwekũrũ—Enda na ũtĩĩe mũkũrũ waaku
Bibiria ĩĩraga mwekũrũ atĩĩe mũrũmewe kinya kethĩra tĩ mũtumĩkĩri wa Jehova. Thooma 1 Petero 3:1, 2, rĩu bwarĩĩrie bĩũria bibi:
Kethĩra mũkũrũ waaku atĩĩtĩkĩtie, no mwanka wĩthĩrwe nĩ wendaga mono athathayia Jehova. Ũrĩthũgaania nĩ njĩra ĩrĩku ĩnjega ya kũmũtethia—nĩ kũmũtũmĩrĩria rĩonthe kana nĩ kwĩthĩrwa ũrĩ mwekũrũ ũmwega, ũrĩna kĩao, na gĩtĩĩo? Nĩkĩ ũgũcookia ũu?
Mũkũrũ na mwekũrũ bomba gũtua matua jameega barĩ amwe. Amwe nou, magiita jamwe mwekũrũ no arege gwĩtĩkanĩĩria na mũkũrũ waawe. Ũntũne ta bũu, mwekũrũ no auge ũrĩa akũthũgaania na njĩra ya ũboreru na gĩtĩĩo, ĩndĩ no mwanka amenye atĩ Jehova naete mũkũrũ kaanya ka gũtua nĩ mantũ jarĩkũ jakwagĩra kĩrĩ nja yaao. Nabuĩrĩte gũciũmia ũrĩa akũũmba nĩkenda agwata mbaru matua ja mũkũrũ waawe. Rĩrĩa athithia ũu, natũmaga gũkethĩrwa na kũgwĩrua ndene ya nja. Thooma 1 Petero 3:3-5, rĩu bwarĩĩrie kĩũria gĩkĩ:
Nĩatĩa Jehova aigagua rĩrĩa mwekũrũ atĩĩa mũkũrũ waawe?
6. Womba gũcinda mathĩĩna ndene ya nja
Gũtĩ ngũrano kinya ĩmwe ĩrĩ ĩmbũjũru. Kwou, barĩa bagũrene no mwanka baciũmie barĩ amwe kũrwa na mantũ jamoomũ. Tega VIDIO, rĩu bwarĩĩrie biũria bibi bithingatĩte.
Kĩrĩ vidio, nĩ mantũ jarĩkũ jakwonania ngwatanĩro yaao nĩ yaarĩ ĩkwambĩrĩria kũthũũka?
Nĩ matagaaria jarĩkũ baajũkĩrie nĩkenda bekĩra inya ngũrano yaao?
Thooma 1 Akorintho 10:24 na Akolosai 3:13. Nyuma ya kũthooma o ĩandĩko, arĩĩrieni kĩũria gĩkĩ:
Nĩatĩa gũtumĩra ũtaaro bũu bwa Bibiria kũũmba gwĩkĩra inya ngũrano yaaku?
Bibiria yugaga nĩtũbuĩrĩte kwejana gĩtĩĩo. Twejaga muntũ gĩtĩĩo rĩrĩa twamũthithĩria na njĩra ya kĩao na twamwona arĩ wa gĩtũmi. Thooma Aroma 12:10, rĩu bwarĩĩrie biũria bibi:
Rĩ, mũkũrũ kana mwekũrũ nabuĩrĩte gweteera ũrĩa bagũrene nawe amwaa gĩtĩĩo arĩ wa mbere? Nĩkĩ kana nĩkĩ atĩbuĩrĩte gweteera?
ANTŨ BAMWE BAUGAGA: “Ũũni na ũrĩa tũgũrene nawe tũtĩ na ũcoore bwa akuĩ o ta ũrĩa gwakari mbere.”
Nĩatĩa ũũmba kũboonia atĩ Bibiria yoomba kũbatethia?
NA NJĨRA ĨNKUĨ
Mũkũrũ na mwekũrũ boomba kwĩthĩrwa na kũgwĩrua rĩrĩa bonania wendo, gĩtĩĩo, na batumĩra moritani ja Bibiria.
Gũcookera
Nĩatĩa mũkũrũ omba gũtũma ngũrano yaawe ĩthĩrwa na kũgwĩrua?
Nĩatĩa mwekũrũ omba gũtũma ngũrano yaawe ĩthĩrwa na kũgwĩrua?
Kethĩra ũrĩ ngũranone, nĩ moritani jarĩkũ ja Bibiria jomba gũgũtethia gwĩkĩra inya ngũrano yaaku?
CŨNKŨŨNA
Iritane bwegie mendekithia jarĩa ũũmba gũtumĩra jagũgũtethia wĩthĩrwa na mũtũũrĩre jwa nja jũrĩ na kũgwĩrua.
Tega rwĩmbo rwa vidio rũrĩa rũkwonania itharimo bia gũtumĩra ũtaaro bwa Bibiria ngũranone yaaku.
Cũnkũũna nĩ kuuga atĩa kwinyiia kĩrĩ mũkũrũ arĩ kĩongo kĩa nja.
“Ekũrũ, Nĩkĩ Bũbuĩrĩte Kwinyiia Kĩrĩ Akũrũ Barĩ Biongo Bia Nja?” (Mnara wa Mlinzi, Mĩi 15, 2010)
Nĩatĩa mũkũrũ na mwekũrũ barĩa baagũreene boombĩre gũciinda mathĩĩna jamarito jarĩa baarĩ najo—kinya ja kwathũkana kwa ngũrano yaao?
Nĩtwaakĩre Ngũrano Yeetũ Kaĩrĩ Tũgĩtethagua nĩ Mũrungu (5:14)