Thuura Mantũ ja Kwigwĩria Jarĩa Jagwĩragia Jehova

Jehova nĩ “Mũrungu wa kũgwĩrua.” (1 Timotheo 1:11 NWT) Nendaga twĩthĩrwa na kũgwĩrua na tũgwĩrĩrua ũtũũro bwetu. Nagwĩragua rĩrĩa twethĩrwa na kaanya kanna ga kũnogoka. Kĩthoomone gĩkĩ, tũkoona ũrĩa tũũmba gũtumĩra ĩgiita rĩetũ rĩa kũnogoka na njĩra ĩrĩa yũũmba gũtũma twĩthĩrwa na kũgwĩrua na tũngˈanĩrwa—kinya bũu nĩbũgwĩragia Jehova.

1. Nĩmbi tũbuĩrĩte kũriikana rĩrĩa tũkũthuura mantũ ja kwigwĩria?

Nĩmbi wendete kũthithia rĩrĩa ũnogoki? Bamwe bendete gũtumĩra ĩgiita rĩa kũnogoka bakirĩĩrĩtie nja ciao—bakĩthoomaga mauku, kũthikĩĩra ndwĩmbo, kwona cinema, kana gũtega mantũ intanetine. Bangĩ nĩbagwĩragĩrua gũtumĩra ĩgiita rĩao amwe na acoore—gwitia irĩmene, kũthambĩra na gũceetha mĩceetho mwanya mwanya. O mantũ jonthe ja kwigwĩria jarĩa tũkathuura, nĩjabuĩrĩte kwĩthĩrwa jarĩ jarĩa “Mwathani agwiragua nijo.” (Aefeso 5:10) Nĩbwega tũciũkĩrwe nĩ ũntũ bũbũ tontũ mantũ jamaingĩ ja kwigwĩria ntukũne cietũ, jethagĩrwa na mantũ jarĩa Jehova athwĩre ta, thanga, ũthũngĩĩri kana kwaranĩria na irindu bibithũku. (Thooma Zaburi 11:5.) Nĩmbi bigatũtetheeria kũthuura na njĩra ya ũũme mantũ ja kwigwĩria?

Kethĩra tũkathuura acoore barĩa bendete Jehova, gũkethĩrwa na maumĩĩra jameega na bagatũtethia kũthuura mantũ jameega ja kwigwĩria. O ta ũrĩa twairitanĩre kĩthoomone kĩa 48, “uria witanagia na antu bari na uume akagita uume.” Nkũrani na ũu, kethĩra tũkamenyeria kũgwatanĩra na antũ barĩa batĩendete mawaatho ja Mũrungu, ‘tukoona ukia.’—Njuno 13:20.

2. Nĩkĩ tũtĩbuĩrĩte gũtumĩra ĩgiita rĩringĩ mantũne ja kwigwĩria?

Kinya kethĩra mantũ ja kwigwĩria jarĩa tũkũthuura nĩ jameega, nĩtũkũbatara kwimenyeera tũtĩgatumĩre ĩgiita rĩringĩ kĩrĩjo. Twarega kũthithia ũu, twomba kwĩthĩrwa tũtĩ na ĩgiita rĩa kũngˈana rĩa kũthithia mantũ ja gĩtũmi nkũrũki. Bibiria ĩtwĩkagĩra inya tũtumĩre ĩgiita rĩetũ bwega kana ‘tutigate igiita rietu riria riagirite.’—Thooma Aefeso 5:15, 16.

ĨNJA NKŨRŨKI

Iritane ũrĩa ũũmba gũtua matua jameega jegie mantũ ja kwigwĩria.

3. Regana na mantũ ja kwigwĩria jarĩa jatĩagĩrĩte

Nĩkĩ tũbuĩrĩte kwimenyeera rĩrĩa tũkũthuura mantũ ja kwigwĩria? Tega VIDIO, rĩu bwarĩĩrie biũria bibi bithingatĩte.

VIDIO: Nĩ Mantũ Jarĩkũ Ja Kwigwĩria Mbuĩrĩte Kũthuura? (4:39)

• Nĩatĩa mĩceetho ĩrĩa Aroma ba karaaja baaceethaga ĩkũngˈuanana na mantũ ja kwigwĩria ja ntukũ cietũ?

• Kĩrĩ vidio, nĩatĩa Danny airitanĩre bwegie mantũ ja kwigwĩria?

Thooma Aroma 12:9, rĩu bwarĩĩrie kĩũria gĩkĩ:

• Nĩatĩa mĩstaarĩ ĩjĩ ĩgũntetheeria rĩrĩa nkũthuura mantũ ja kwigwĩria?

Nĩ mantũ jarĩkũ jamwe Jehova athwĩre? Thooma Njuno 6:16, 17 na Agalatia 5:19-21. Nyuma ya kũthooma o ĩandĩko, arĩĩrieni kĩũria gĩkĩ:

• Nĩ mantũ jarĩkũ jarĩa jagweti kĩrĩ mĩstaarĩ ĩu, jonekaga mono mantũne ja kwigwĩria ntukũne cietũ?

Ũrĩa ũũmba kũthuura mantũ ja kwigwĩria na njĩra ya ũũme

Ciũrie:

• Nĩatĩa nkathithia? Rĩ, ũntũ bũbũ bũrĩ na mantũ jarĩa Jehova athwĩre?

• Nĩrĩ nkabũthithia? Rĩ, nĩbũkwangaratania mantũ jakwa jarĩa jarĩ ja gĩtũmi nkũrũki?

• Nũũ kana nĩ baau nkagwatanĩra nabo? Ũntũ bũbũ nĩbũgũtũma mbĩthĩrwa na ngwatanĩro ya akuĩ mono na antũ barĩa batĩendete Jehova, kana menyeria kũgwatanĩra nabo?

Nĩ ũntũ bũbwega nkũrũki gũkara kũraaja buru na ũgwati. Kĩu nĩkĩo gĩtũmi tũbuĩrĩte gũciebania buru na mantũ ja kwigwĩria jarĩa tũkũthũgaania jomba kwĩthĩrwa jatĩagĩrĩte

4. Tumĩra ĩgiita rĩaku na njĩra ya ũũme

VIDIO: Nĩatĩa Ũtumagĩra Ĩgiita Rĩaku? (2:45)

• Kinya kethĩra mũtaana-wa-baaba ũrĩa twona vidione atategagĩĩra ũntũ bũũthũũku, nĩ thĩĩna ĩrĩkũ aarĩ nayo?

Thooma Afilipi 1:10, rĩu bwarĩĩrie kĩũria gĩkĩ:

• Nĩatĩa mũstaarĩ jũu jũũmba gũtũtethia kũthuura nĩ ĩgiita rĩngˈana tũgatumĩra mantũne ja kwigwĩria?

5. Thuura mantũ jameega ja kwigwĩria

Kinya kethĩra mantũ jamwe ja kwigwĩria jatĩgwĩragia Jehova, kũrĩ na mantũ jamaingĩ ja kũgwĩrĩrua jarĩa jatĩmũthũragia. Thooma Mutumiiria 8:15 na Afilipi 4:8, rĩu bwarĩĩrie kĩũria gĩkĩ:

• Nĩ mantũ jarĩkũ jameega ja kwigwĩria wendete?

NA NJĨRA ĨNKUĨ

Jehova arĩenda tũthuure mantũ jameega na tũjagwĩrĩrue.

Gũcookera

• Nĩ mantũ jarĩkũ ja kwigwĩria Akristũ babuĩrĩte gũciebania najo?

• Nĩkĩ tũbuĩrĩte kwimenyeera ũntũne bwegie ĩgiita rĩrĩa tũgũtumĩra mantũne ja kwigwĩria?

• Nĩkĩ ũkwenda kũthuura mantũ ja kwigwĩria jarĩa jagwĩragia Jehova?

CŨNKŨŨNA

Cũnkũũna nũũ ũbuĩrĩte gũtũthuurĩra mantũ ja kwigwĩria.

“Rĩ, Akuuji ba Jehova Kabakanĩtie Athingati Baao Cinema, Mauku, na Ndwĩmbo Imwe?” (Thooma Intanetine)

Ona ũrĩa ũũmba gũtua matua jameega ũntũne bwegie mantũ ja kwigwĩria na ĩgiita rĩaku rĩa kũnogoka.

“Rĩ, Mantũ Jarĩa Wigwĩragia Najo Nĩjagũtethagia?” (Mnara wa Mlinzi, Oktoba 15, 2011)

Kĩrĩ rũgono “Kinya Nindacindĩre Mantũ ja Kũmena Bangĩ,” ona nĩkĩ muntũ mũrũme ũmwe aagarũrĩre mantũ jarĩa aagwĩragia.

“Bibiria Nĩgarũraga Ũtũũro” (Mnara wa Mlinzi, Februarĩ 1, 2010)

Ona ũrĩa mwekũrũ ũmwe akũthithia matua ja ũũme jegie mantũ ja kwigwĩria, jarĩa jakwonania ngono cia mantũ jegie irundu biithũũku.

Ciebanie na Mantũ ja kwigwĩria Jarĩa Jakwonania Mantũ Jegie Irundu Biithũũku (2:02)