KĨTHOOMO KĨA 55
Tetheeria Kĩũthũrano Gĩaku
Nthĩgũrũne yonthe, antũ mirioni inyingĩ nĩbathathaagia Jehova bagwĩrĩtue biũthũranone mwanya mwanya. Nĩbagwĩragĩrua motaaro na ũtongeeria bũrĩa baejagwa na bakagwata mbaru kĩũthũrano na wĩru gũkũrũkĩĩra njĩra inyingĩ. Gwe-rĩ, ũu nĩu wigagua bwegie kĩũthũrano gĩaku?
1. Nĩ na njĩra irĩkũ imwe ũũmba gũtumĩra ĩgiita na inya yaaku kũgwata mbaru kĩũthũrano?
Twinthe twomba kũgwata mbaru kĩũthũrano. Ngerekano, rĩ, kĩũthũranone kĩenu kũrĩbo barĩ na ũkũrũ bũbũnene, kana barĩ na mawathe? Rĩ, no ũbatethie gũkinya mĩcemanione? Kana no ũbatetheerie ngũgĩne ingĩ ta, kũgũra into ndukene kana ngũgĩne cia nja? (Thooma Jakubu 1:27.) Kinya twomba kwiritĩra kũtheria na kũmenyeera Nyomba yeetũ ya Ũnene. Gũtĩwe ũtũkinyagĩĩria kũthithia mantũ jau. Wendo bwetũ kĩrĩ Mũrungu na kĩrĩ ataana-ba-baaba nĩbu bũtũmaga ‘tuciejana tutiiti’ kana na guciendera.—Zaburi 110:3.
Akũũjĩ ba Jehova barĩa babatithĩtue boomba kũgwata mbaru kĩũthũrano na njĩra ingĩ nkũrũki. Ataana-ba-baaba barĩa barĩ na nkuma injega cia gĩkĩrundu boomba gũtumĩka ta nthũmba cia ũtungatĩri, na nyumene ta akũrũ ba kĩũthũrano. Ataana ona kinya arĩ-ba-baaba boomba kũgwata mbaru na wĩru ngũgĩ ya gũtũmĩĩria bagĩtumĩkaga barĩ mapainia. Bamwe ba Akũũjĩ ba Jehova boomba gũtetheeria kĩrĩ waaki bwa gũntũ gwa kũthathayia, kana kũthamĩra icigone birĩa biũthũrano bikũbatara ũtethio na njĩra ingĩ.
2. Nĩatĩa tũũmba gũtumĩra mbeca cietũ na into bietũ gũtethia kĩũthũrano?
Twomba ‘gukumia Mwathani na into’ bietũ bia gĩtũmi. (Njuno 3:9) Nĩtwonaga bũrĩ wendeeri kũrita mbeca cietũ na into bingĩ bietũ gũtetheeria kĩũthũrano gĩetũ, na ngũgĩ ya gũtũmĩĩria nthĩgũrũne yonthe. (Thooma 2 Akorintho 9:7.) Mĩũthi yeetũ kinya nĩtumagĩrwa gũtethia naarĩa kũrĩ na mogwati. Antũ babaingĩ nĩbamenyeretie ‘gwikaga’ gĩntũ kĩnna kĩrĩ ta mũũthi. (Thooma 1 Akorintho 16:2.) Twomba kũrĩta mũũthi jwetũ na njĩra ya kũjwĩkĩra tũthandũkũne tũrĩa twĩthagĩrwa gũntũne gwetũ gwa kũthathaĩria kana, intanetine gũkũrũkĩĩra donate.jw.org. Jehova natwejaga kaanya ga kũmwonia nĩtũmwendete gũkũrũkĩĩra ũrĩa tũthuuraga gũtumĩra into bietũ.
ĨNJA NKŨRŨKI
Ona njĩra imwe irĩa ũũmba gũtumĩra nĩkenda ũtethia kĩũthũranio.
3. Twomba gũtumĩra into bietũ
Jehova na Jesũ nĩbendete antũ barĩa baritaga bagwĩrĩtue. Ngerekano, Jesũ noonere mwekũrũ ntigwa na ũrĩa aaciũmĩtie kũrita mũũthi. Thooma Luka 21:1-4, rĩu bwarĩĩrie biũria bibi:
Rĩ, nĩtũkũbatara kũrita mũũthi jũmũnene nĩkenda tũgwĩria Jehova?
Nĩatĩa Jehova na Jesũ baigagua rĩrĩa twarita mũũthi kuuma nkorone?
Nĩkenda wiritana ũrĩa mĩũthi yeetũ ĩtumagĩrwa, tega VIDIO. Rĩu bwarĩĩrie kĩũria gĩkĩ kĩthingatĩte.
Nĩatĩa mĩũthi ĩtumagĩrwa gũtetheeria biũthũrano nthĩgũrũne yonthe?
4. Twomba gũciejana gũtetheeria
Kagiita ga karaaja, athathayia ba Jehova nĩbaaritaga ngũgĩ na wĩru, nĩkenda bamenyeera gũntũ kwao gwa kũthathaĩria. Ĩndĩ nĩ baabataraga kũthithia mantũ jangĩ nkũrũki ya kũrita mbeca. Thooma 2 Mantu ja Karaja 34:9-11, rĩu bwarĩĩrie kĩũria gĩkĩ:
Nĩatĩa o Mwisraeli wonthe aatetheeragia kĩrĩ kũmenyeera Nyomba ya Jehova, kana gũntũ gwa kũthathaĩria?
Nĩkenda wona ũrĩa Akũũjĩ ba Jehova bathingataga ngerekano ĩu ya karaaja, tega VIDIO. Rĩu bwarĩĩrie biũria bibi bithingatĩte.
Nĩkĩ bũrĩ ũntũ bwa gĩtũmi kũmenyeera Nyomba yeetũ ya Ũnene na kũmĩtheria?
Nĩ na njĩra irĩkũ imwe ũgwe ũũmba gũtetheeria?
5. Ataana-ba-baaba bomba gũkinyĩra twanya nkũrũki
Maandĩko nĩjekagĩra antũ arũme Akristũ inya bathithie jonthe jarĩa bakũũmba nĩkenda batetheeria kĩũthũrano. Nĩkenda wona ngerekano, tega VIDIO. Rĩu ũcookie kĩũria gĩkĩ kĩthingatĩte.
Kĩrĩ vidio, nĩatĩa Ryan aaciũmĩrie nĩkenda atetheeria kĩũthũrano na njĩra ĩnjega nkũrũki?
Bibiria nĩtaaragĩĩria nkuma irĩa ataana-ba-baaba babuĩrĩte kwĩthĩrwa nacio, nĩkenda batumĩka barĩ nthũmba cia ũtungatĩri na akũrũ ba kĩũthũrano. Thooma 1 Timotheo 3:1-13, rĩu bwarĩĩrie biũria bibi:
Nĩ nkuma irĩkũ ataana-ba-baaba babuĩrĩte kwĩthĩrwa nacio, barĩa bakwenda gũtumĩka ta nthũmba cia ũtungatĩri na akũrũ bà kĩũthũrano?
Nĩ mantũ jarĩkũ antũ ba nja ciao babuĩrĩte kwingia?—Tega mũstaarĩ jwa 4 na 11.
Rĩrĩa ataana-ba-baaba baciũmia gũkinyĩra nkuma iu, nĩatĩa o ũmwe ndeene ya kĩũthũrano agunĩkaga?
MUNTŨ NO AŨRIE: “Nĩkũ Akũũjĩ ba Jehova baritaga mbeca cia kũrũngamĩĩra ngũgĩ yaao?”
Ũũmba gũcookia atĩa?
NA NJĨRA ĨNKUĨ
Jehova nagwĩragua mono rĩrĩa twatumĩra ĩgiita rĩetũ, inya, na into bietũ kũgwata mbaru kĩũthũrano.
Gũcookera
Nĩatĩa tũũmba gũtumĩra ĩgiita na inya yeetũ gũtetheeria kĩũthũrano?
Nĩatĩa tũũmba gũtumĩra into bietũ kũgwata mbaru kĩũthũrano?
Gwe-rĩ, nĩ njĩra irĩkũ ũrĩngĩenda gũtumĩra kũgwata mbaru kĩũthũrano?
CŨNKŨŨNA
Ona nĩkĩ Mũrungu atĩĩkĩrĩte athathayia baawe waatho bwa kũrita gĩcuncĩ kĩa ĩkũmi.
“Nĩatĩa Bibiria Yugaga Bwegie Gĩcuncĩ kĩa Ĩkũmi?” (Thoma intanetine)
Bibiria nĩyonanagia atĩ ngũgĩ imwe ibuĩrĩte kũthithua nĩ antũ arũme barĩa babatithĩtue. Rĩ, nĩatĩa mwarĩ wa baaba ũbatithĩtue abuĩrĩte kũthithia akeeja kũbatara kũthithia ngũgĩ iu?
“Gũciũkĩrwa nĩ Mantũ ja Ũtongeeria na Ũrũngamĩĩri Kĩũthũranone” (Mnara wa Mlinzi, Februarĩ 2021)
Ona ũrĩa bamwe ba Akũũjĩ ba Jehova bairitaga na wĩru gwikĩria athathayia bangĩ mauku.
Iritane ũrĩa ngũgĩ yeetũ ĩrũngamagĩĩrwa kĩmbeca mwanya na ndini ingĩ.
“Nĩatĩa Ngũgĩ ya Akũũjĩ ba Jehova Ĩrũngamagĩĩrwa Kĩmbeca?” (Thooma intanetine)