KĨTHOOMO KĨA 56
Ĩteni na Mbere Kwĩthĩrwa na Ũrũmwe Kĩũthũranone
Rĩrĩa tũrĩ amwe na barĩa tũthathaayia nabo, nĩtwigagua o ta Mũnene Daudi, augĩre ũjũ: “Ni untu bubwega atia, na ni atia buri nkeru, Antu baria bari amwe bagituuranira baigenue!” (Zaburi 133:1) O ũmwe wa cietũ nairitanagĩria nĩkenda twĩta na mbere kwĩthĩrwa na ũrũmwe.
1. Nĩ na njĩra ĩrĩkũ antũ ba Mũrungu bethagĩrwa barĩ mwanya?
Ũkeja gwĩta kĩrĩ mĩcemanio ya Akũũjĩ ba Jehova nthĩgũrũ ĩngĩ, womba kwĩthĩrwa ũtĩkwigua mũgambo jũrĩa bakwaria, ĩndĩ ũkaigua teka ũrĩ kĩũthũranone kĩenu. Nĩkĩ? Tontũ nĩtwiritanaga Bibiria tũgĩtumagĩra mauku o jarĩa gũntũ kunthe. Na nĩtũciumagia kwonania wendo kĩrĩ muntũ na ũngĩ. Ĩtĩkũmakania naarĩa tũtũũraga, twinthe ‘nitwikagiira riitwa ria Mwathani na tukamwathikira turi amwe.’—Zefania 3:9.
2. Nĩatĩa tũũmba kũthithia nĩkenda twĩtithia na mbere ũrũmwe?
“Endanageni mono na nkoro cienu.” (1 Petero 1:22) Nĩatĩa ũũmba gũtumĩra ũritani bũu? Antũa kũthingatĩĩra gũtaũkĩrwa kwa bangĩ, thingatĩĩra nkuma ciao injega. Antũa kũgwatanĩra na barĩa akĩ bũrĩ na mantũ jangˈuanene, ciũmie kũmenyana na ataana na arĩ-ba-baaba barĩa barĩ na mantũ mwanya na jaaku. Kinya nĩtũbuĩrĩte gũciũmia mono kweberia mantũ ja mpathũ jarĩa tũũmba kwĩthĩrwa tũrĩ najo.—Thooma 1 Petero 2:17.a
3. Nĩatĩa ũkathithia rĩrĩa bũtĩkũgwatanĩra na Mũkristũ ũngĩ?
Kinya kethĩra tũrĩ na ũrũmwe, tũrĩ antũ batĩ babojũru. Magiita jamwe nĩtũtũmaga bangĩ bakaigua bũbũĩ kana tũkabauna nkoro. Kwou, Rũteto rwa Mũrungu rũtwĩraga ‘turekanagire . . . o muntu na ungi,’ na rũkongeera: “O ta uria Mwathani aaburekeere bwi, kinya bwi nou bubwirite kuthithagia.” (Thooma Akolosai 3:13.) Nĩtwatagĩria Jehova maiita jamaingĩ na agatũrekera. Kwou, kinya wee nakwĩrĩgĩĩra tũrekera ataana-ba-baaba. Ũkeja kũmenya nwatĩrĩtie muntũ ũngĩ, jũkia ĩtagaaria nĩkenda bũtuma thĩĩrĩ.—Thooma Mathayo 5:23, 24.b
ĨNJA NKŨRŨKI
Cwaa njĩra irĩa ũũmba gũtetheeria kwĩthĩrwa na thĩĩrĩ na ũrũmwe kĩũthũranone.
Nĩatĩa ũkathithia nĩkenda ũtuma thĩĩrĩ?
4. Cinda mantũ ja mpathũ
Nĩtũbuĩrĩte kwenda ataana-ba-baaba bonthe. Ĩndĩ no twone bũrĩ bũbũũmũ kũgwatanĩra na muntũ ũrĩa tũkwona arĩ mwanya na batuĩ. Nĩmbi biũmba gũtũtethia? Thooma Mathithio 10:34, 35, rĩu bwarĩĩrie biũria bibi:
Jehova netĩkagĩĩria antũ ba mĩthemba yonthe baee Akũũjĩ baawe. Nĩatĩa ũbuĩrĩte kwigerekania na Jehova ũntũne bwegie mwonere jwaku kwerekera barĩa barĩ mwanya na ũgwe?
Nĩ mantũ jarĩkũ ja mpathũ wenda gũciebania najo jarĩa wonaga mono mono naarĩa ũkaraga?
Thooma 2 Akorintho 6:11-13, rĩu bwarĩĩrie kĩũria gĩkĩ:
Ũrĩthũgaania nĩatĩa ũũmba kũthithia nĩkenda ũtuma ũcoore na ataana na arĩ-ba-baaba barĩa barĩ na mantũ mwanya na jaaku?
5. Rekera kuuma nkorone na ũtume thĩĩrĩ
Jehova natũrekagĩra kuuma nkorone kinya kethĩra gũtĩrĩo akorobatara ũrekeri kuuma kĩrĩ tuĩ. Thooma Zaburi 86:5, rĩu bwarĩĩrie biũria bibi:
Nĩmbi tũkwiritana kuumania na mũstaarĩ jũjũ bwegie ũrĩa Jehova arekanagĩra?
Nĩ ũntũ bũrĩkũ bũgũkũgwĩria bwegie ũrĩa Jehova arekanagĩra?
Nĩ mantũ jarĩkũ jomba gũtũma bũkethĩrwa bũrĩ bũbũũmũ gũtuma thĩĩrĩ na antũ bangĩ?
Nĩatĩa tũũmba kwigerekania na Jehova na tũgeeta na mbere kwĩthĩrwa na ũrũmwe na ataana na arĩ-ba-baaba? Thooma Njuno 19:11, rĩu bwarĩĩrie kĩũria gĩkĩ:
Rĩrĩa muntũ mũnna akwigithia bũbũi kana akũthũũria, nĩatĩa ũũmba kũthithia nĩkenda bũcookia thĩĩrĩ?
Magiita jamwe nĩtwigithagia bangĩ bũbũĩ. Rĩrĩa ũntũ bũu bwakarĩka, nĩatĩa tũbuĩrĩte kũthithia? Tega VIDIO, rĩu bwarĩĩrie kĩũria gĩkĩ kĩthingatĩte.
Kĩrĩ vidio, nĩatĩa mwarĩ-wa-baaba aathithĩrie nĩkenda atuma thĩĩrĩ?
6. Tega nkuma injega kĩrĩ ataana na arĩ-ba-baaba
Rĩrĩa twakaranĩria mono na ataana na arĩ-ba-baaba, nĩtũmenyaga nkuma ciao injega ona kinya gũtaũkĩrwa kwao. Nĩatĩa tũũmba kũthingatĩĩra nkuma ciao injega? Tega VIDIO, rĩu bwarĩĩrie kĩũria gĩkĩ kĩthingatĩte.
Nĩmbi biũmba gũgũtethia nĩkenda wona nkuma injega cia ataana na arĩ-ba-baaba?
Jehova athingatagĩĩra nkuma ciaku injega. Thooma 2 Mantu ja Karaja 16:9a, riu bwarĩĩrie kĩũria gĩkĩ:
Nĩatĩa wigagua wamenya atĩ Jehova nathingatagĩĩra nkuma ciaku irĩa njega?
Kinya diamondi ĩnthongi nĩĩthagĩrwa na twinto tũtĩbui, ĩndĩ nĩ ya gĩtũmi. Ũũ nou, ataana na arĩ-ba-aaba batĩ babojũru, ĩndĩ nĩ ba gĩtũmi kĩrĩ Jehova
ANTŨ BAMWE BAUGAGA: “Mbere ndekera muntũ kinya ũrĩkũ, no mwanka andombe ũrekeri.”
Nĩkĩ tũbuĩrĩte kwĩthĩrwa na wendi bwa kũrekera bangĩ?
NA NJĨRA ĨNKUĨ
Womba gũtetheeria kĩũthũrano kwĩthĩrwa na thĩĩrĩ na njĩra ya kũrekera bangĩ na kwonia wendo ataana na arĩ-ba-baaba bonthe.
Gũcookera
Nĩatĩa ũũmba gũcinda mantũ ja kwathũra bangĩ?
Nĩatĩa ũkathithia wethĩrwa ũtĩkũgwatanĩra na Mũkrĩstũ ũngĩ?
Nĩkĩ ũkwenda kũthingata ngerekano ya Jehova ya kũrekera bangĩ?
CŨNKŨŨNA
Iritane ũrĩa ngerekano ĩmwe ĩrĩa Jesũ aejanĩre yũũmba gũgũtethia ũciebanie na ũntũ bwa kũgitĩra bangĩ ĩgamba bũbũĩ.
Rĩ, nĩtũkũbatara kũromba ũrekeri kinya kethĩra nĩtukwigua gũtĩ ĩatia tũthithĩtie?
“Kũromba Ũrekeri—Nĩru Rũbungũro rwa Gũtuma Thĩĩrĩ” (Mnara wa Mlinzi, Novemba 1, 2002)
Ona ũrĩa antũ bamwe bairitanĩte kũthithĩria bangĩ batĩkwonania mpathũ.
Menya Ũgitĩra Bangĩ Ĩgamba Kũringana na Ũrĩa Bakwoneka (5:06)
Iritane ũrĩa ũũmba kũthiria thĩĩna rĩrĩa yaumĩra gatĩgatĩ gaaku na Mũkristũ ũngĩ, mbere ĩthũũkia thĩĩrĩ kĩũthũranone.
“Thiria Kũrega Kũgwatanĩra na Njĩra ya Wendo” (Mnara wa Mlinzi, Mĩi 2016)
a Nteto cia mũthia 6 ona ũrĩa wendo bũtũmaga Akristũ batĩgatambie mĩrimo ya kũgwatithania kĩrĩ bangĩ.
b Nteto cia mũthia 7 nikwarĩĩria ũrĩa bũũmba kũthithia rĩrĩa kwaumĩra mantũ jegie biashara na mantũ ja kĩwaatho.