Tumĩra Pĩnji ya Kĩambĩrĩria ya JW.ORG Ũtungatĩrine Bwaku

Pĩnji ya kĩambĩrĩria ya webusaĩti yeetũ nĩthagĩrwa na mantũ ja kũthooma na vidio irĩa mworoto jwacio nĩ gũkucĩĩria barĩa barĩ na nkoro injega kuuma gũntũ kunthe. (Math 13:48) Pĩnji ĩjĩ kaingĩ nĩyonanagia mantũ jarĩa jakwarĩĩrua nĩ nyomba cia nteto kana jarĩa antũ bakũthũgaanĩria na jarĩa bakwarĩĩria.

Nĩatĩa ũũmba gũtumĩra pĩnji ya kĩambĩrĩria ũtungatĩrine bwaku?

• Menyeria gũtonya webusaĩtine ĩjĩ. Ona nĩ mantũ jarĩkũ ja rua jarĩku, na ũthũgaanĩrie ũrĩa ũũmba kũjatumĩra gũtetheeria muntũ ũrĩa ũrĩ na wendi bwa kũthikĩĩra. (Kenda wona nĩmbi bingĩ bireekĩri rua kĩrĩ pĩnji ya kĩambĩrĩria, iinya “Tega Mantũ Nkũrũki.”) Kwĩthĩrwa ũkĩmenyaga mantũ ja rua jarĩa jarĩ webusaĩtine ĩjĩ, gũgagũtethia kwĩthĩrwa ũrĩ na mantũ jameerũ ja kwarĩĩria ũtungatĩrine.

• Tumĩra mantũ ja kũthooma na vidio irĩa cionanĩtue kĩrĩ pĩnji ya kĩambĩrĩria kwambia rwaria. Vidio iu na mantũ jau ja kũthooma joomba gũtũtethia kũmenya jarĩa antũ gĩcigone gĩetũ boomba kwĩthĩrwa bakĩthũgaanagĩria.

• Onia antũ pĩnji ya kĩambĩrĩria. Onia muntũ ũrĩa ũkwaria nawe biongo binna, na ũmwonie ũrĩa oomba gũcwaa mantũ kĩrĩ webusaĩti yeetũ.

• Tũmĩra muntũ linki. Antũ bamwe batĩendete kwaranĩria natuĩ ũthiũ kwa ũthiũ, ĩndĩ nĩbethagĩrwa na wendi bwa gũtonya webusaĩtine yeetũ. Kwou menya ũthaa gũtũmĩra barĩa bakwonania wendi ta bũu linki ya gũtonya kĩrĩ pĩnji ya kĩambĩrĩria kana ya kwona ũntũ bwa kũthooma kana vidio ĩrĩa yaarĩrĩĩtue ku.