Kĩrĩ kũriũkua kwa ĩgiita rĩĩjĩte, antũ bakĩgwataga ũgeni eendwa na acoore baao kĩrĩ paradiso aja nthĩgũrũne

Kũrĩũkua Nĩmbi?

Ũrĩa Bibiria yugaga

Bibiriene kiugo “kũriũkua” kiumanĩtie na kiugo kia Kĩgiriki a·naʹsta·sis, kĩrĩa kĩonanagia “gũũkĩĩria” kana “kũrũngama kaĩrĩ.” Muntũ ũrĩa ũriũkĩtue kuuma kĩrĩ akuũ, okagĩĩrua na agacookerua mwoyo jwawe na ageeta na mbere gũtũũra kaĩrĩ o ta au mberene.—1 Akorintho 15:12, 13.

Kinya kethĩra kiugo “kũriũkua” gĩtĩ maandĩkone ja Kĩhĩbirania jarĩa kaingĩ jetagwa Kĩrĩkanĩro Gĩkũrũ, ũritani bũu nĩbwĩthagĩrwa maandĩkone jau. Ngerekano, Mũrungu eeranĩre ũjũ gũkũrũkĩĩra kĩroria Hosea: “Ka mbatunyukie bauma inyene ya mbirira, mboonokie gikuune?”—Hosea 13:14; Ayubu 14:13-15; Isaya 26:19; Danieli 12:2, 13.

Nĩkũ antũ bagatũũra nyuma ya kũriũkua? Antũ bamwe bariũkagua na bageeta ĩgũrũ bageeta kwathana na Kristũ barĩ anene. (2 Akorintho 5:1; Kugwurirwa 5:9, 10) Biugo “kuriuka kwa mbere” na “kũriũkua gwa kwambĩrĩria,” bionanagia kũrĩna kũriũkua kũngĩ gũkathingata. (Kugwurirwa 20:6; Afilipi 3:11) Kũriũkua gũkũ kũngĩ gũgakarĩka aja nthĩgũrũne arĩa antũ babaingĩ bakariũkua bagwĩrĩrue ũtũũro kenya na kenya.—Zaburi 37:29.

Nĩatĩa antũ bakariũkua? Mũrungu naete Jesũ inya ya kũriũkia akuũ. (Johana 11:25) Jesũ akariũkia “antu bonthe baria bari mbirirene” na muntũ akari o ũrĩa aari mbere akua, arĩna nkuma o irĩa aarĩ nacio na akĩrikanaga mantũ bwega. (Johana 5:28, 29) Barĩa bariũkagua gwĩta ĩgũrũ bethagĩrwa na mwĩrĩ jwa gĩkĩrundu, na barĩa bakariũkua nĩkenda batũũra aja nthĩgũrũne bakethĩrwa na mwĩrĩ jũmũjũru jũtĩna mathĩna.—Isaya 33:24; 35:5, 6; 1 Akorintho 15:42-44, 50.

Nĩ baaũ bakariũkua? Bibiria yugaga gũkethĩrwa na “kuriukua kwa antu baria beega o na baria baai.” (Mathithio 24:15) Antũ barĩa beega nĩ ta Nuhu, Sara na Iburahimu. (Kiambiriria 6:9; Ahibirania 11:11; Jakubu 2:21) Mũstaarĩ jũjũ jũrĩarĩĩria antũ barĩa baaĩ barĩa baaremerwe nĩ kũthingata ithimi bia Jehova bia wagĩru, tontũ batoona kaanya ga kwiritana na kũthingata njĩra ciawe.

Ĩndĩ antũ barĩa bathũũku barĩa bathithagia mantũ jatĩagĩrĩte na ũgĩti, batĩriũkua buru. Rĩrĩa bakua, bathiragua buru batĩna wĩrĩgĩro bwa kũriũkua.—Mathayo 23:33; Ahibirania 10:26, 27.

Nĩrĩ antũ bakariũkua? Bibiria nĩ yugaga atĩ kũriũkua kwa barĩa bageeta ĩgũrũ kurĩngĩkarĩka ĩgiitene rĩa wathani bwa Jesũ, bũrĩa bwambĩrĩrie mwakene jwa 1914. (1 Akorintho 15:21-23) Kũriũkua kwa barĩa bagatũũra aja nthĩgũrũne, gũgakarĩka ĩgiitene rĩa mĩaka ngiri ya wathani bwa Jesũ rĩrĩa nthĩgũrũ ĩkaa paradiso.—Luka 23:43; Kugwurirwa 20:6, 12, 13.

Nĩkĩ wĩtĩkio bwegie kũriũkua bũrĩ bwa mma? Kũrĩna ngerekano kenda cia kũriũkua irĩa ĩgweti Bibiriene, na kĩrĩ cionthe nĩkwarĩ na akũũjĩ baacioneere mantũ jau. (1 Anene 17:17-24; 2 Anene 4:32-37; 13:20, 21; Luka 7:11-17; 8:40-56; Johana 11:38-44; Mathithio 9:36-42; 20:7-12; 1 Akorintho 15:3-6) Jesũ kũriũkia Lazarũ bwarĩ ũntũ bwa mwanya mono, tontũ Lazarũ aakuĩte ntukũ inya na Jesũ aaringĩre kĩama kĩu mbere ya kĩrĩndĩ. (Johana 11:39, 42) Kinya barĩa baareganaga na Jesũ batĩngĩũmba gũkana ũũma bũu, kwou neka babangĩre kũũraga Jesũ na kinya Lazarũ.—Johana 11:47, 53; 12:9-11.

Ngerekano ithatũ cia kũriũkua irĩa ĩgweti Bibiriene: mwana wa mwekũrũ ntĩgwa, mwekũrũ ũrĩa waarĩ Mũkristũ, na Lazaro mũcoore wa Jesũ

Bibiria yonanagia atĩ Mũrungu arĩna ũũmbi na wendi bwa kũriũkia barĩa bakuĩte. Nakũrikana mantũ jonthe ja o muntũ na akabariũkia gũkũrũkĩĩra inya yaawe. (Ayubu 37:23; Mathayo 10:30; Luka 20:37, 38) Mũrungu arĩ na inya na ũũmbi bwa kũriũkia akuũ. Bibiria ĩgĩtarĩĩria kũriũkua, yugaga ũjũ bwegie Mũrungu: “Nagwe ukeethirwa ukiiriraiiria mono ngugi ya njara ciaku.”—Ayubu 14:15.

Mantũ jatĩ ja mma jegie kũriũkua

Ũrongo: Kũriũkua nĩ rĩrĩa mwoyo jwagwatanĩra kaĩrĩ na mwĩrĩ.

Ũmma: Bibiria ĩritanaga atĩ mwoyo nĩ mũntũ wonthe, ĩndĩ tĩ gacuunci karĩa geetaga na mbere gũtũũra mũntũ aakua. (Kiambiriria 2:7; Ezekieli 18:4) Muntũ ũrĩa ũriũkĩtue teka agwatanagĩra kaĩrĩ na mwĩrĩ jwawe; ĩndĩ neeka ombagwa ari mũntũ ũrĩ mwoyo.

Ũrongo: Antũ bamwe babaaĩ bariũkagua na bakathĩrua buru o rĩo.

Ũmma: Bibiria yugaga “baria bathithagia bubui baumire bakinye kuriukene gwa kugambithua.” (Johana 5:29) Kwou, bakagambithua kũringana na jarĩa bakathithia nyuma ya kũriũkua. Kinya yugaga ũjũ: “akuu bakaigua kaju ka Mutana wa Murungu, na baria bakaigua bakagita mwoyo.” (Johana 5:25) Barĩa bakaathĩka na bathingate jarĩa bakairitana nyuma ya kũriũkua, mariĩtwa jao jakaandĩkwa kĩrĩ “iuku ria mwoyo.”—Kugwurirwa 20:12, 13.

Ũrongo: Rĩrĩa muntũ ariũkua, aejagwa mwĩrĩ jũngʼuanene na jũrĩa aarĩ naju mbere ya akua.

Ũmma: Nyuma ya muntũ gũkua, mwĩrĩ jwawe jũgitũkangaga na jũkoora.—Mutumiiria 3:19, 20.