Nĩatĩa Bibiria Yugaga Bwegie Kũrita ĩu?

Ũrĩa Bibiria yugaga

Bibiria ĩtĩtumagĩra kiugo “kũrita ĩu” kwarĩĩria bwegie kũrita ĩu rĩa mwana atĩciari. Ĩndĩ, mĩstaarĩ ĩmiingĩ ya Bibiria nĩyonanagia mwonere jwa Mũrungu kwerekere mwoyo jwa muntũ, kinya jwa mwana ũtĩciari.

Mwoyo nĩ kĩewa kuuma kĩrĩ Mũrungu. (Kiambiriria 9:6; Zaburi 36:9) Onaga mĩoyo yonthe ĩrĩ ya gĩtũmi mono kinya ya kaana karĩa karĩ kĩune gatĩraciarwa. Kwou, muntũ akeeja kũũraga kaana gatĩciari akĩendaga, bũu bwonekaga ta kũũraga muntũ.

Watho bwa Mũrungu kĩrĩ Aisiraeli bwaugĩte ũjũ: “Ningi atiri, antu-arume bareeja guteta bathanganite, bakaringa muka uri umurito bakamutema ntame, akarita nda indi atikare ungi: no mwanka arite ntaikio, o ta uria murume wa muka uu akamwitia; na arite irii o ta uria aathurani batwiite. Indi gukeeja kwithirwa kuri uthuuku bungi bwonorete, indiu no mwanka mwoyo juriagwe na mwoyo.”—Kuuma 21:22, 23.a

• Nĩrĩ ũtũũro bwa muntũ bwambagia?

• Rĩ, Mũrungu akarekera muntũ ũrĩa wanarita ĩu?

• Rĩ, kũrita ĩu nĩ meyia kinya rĩrĩa ũtũũro bwa mwana na ng’ĩna bũrĩ ũgwatine?

Nĩrĩ ũtũũro bwa muntũ bwambagia?

Mũrungu onaga ũtũũro bwa muntũ bwambagĩĩria kuuma rĩrĩa ombwa ntukũ ya mbere kĩune kĩa ng’ĩna. Kĩrĩ Rũteto rwawe Bibiria, Mũrungu onaga kaana kau gatĩciari karĩ ka gĩtũmi. Cũnkũũna ngerekano ĩrĩa ĩkwonania atĩ Mũrungu onaga gũtĩ mwanya jwa mwoyo jwa mwana ũciari na ũrĩa ũtĩciari.

• Mũnene Daudi eerĩre Mũrungu ũjũ: “Metho jaku ijambonaga riria ndaari,” kĩune.(Zaburi 139:16) Mũrungu noonaga Daudi arĩ muntũ, kinya mbere ya aciarwa.

• Nkũrũki, Mũrungu naijĩ agatumĩra Jeremia kinya mbere ya aciarwa. Mũrungu aamwĩrĩre ũjũ: “O mbere ntirakuumbira kiu nindakwiji, na mbere utirauma kiu nindakutheretie; ndirakwethia kiroria wita kuroreria antu ba migongo.”—Jeremia 1:5.

• Mwandĩki wa Bibiria na ndagitarĩ Luka, naatumĩĩre kiugo kĩmwe akĩonanagia mwana atĩciari na kinya mwana ũrĩa ũciari.—Luka 1:41; 2:12, 16.

Rĩ, Mũrungu akarekera muntũ ũrĩa warita ĩu?

Barĩa banarita ĩu, no boone ũrekeri bwa Jehova. Gũkeja kwĩthĩrwa nandĩ nĩbetĩkĩĩrĩtie mwonere jwa Mũrungu jwegie ũtũũro, batĩbuĩrĩte kwigua ĩatia. “Mwathani ni wa kiao gikiingi na utugi bubwingi. . . O ta uria gaiti kari kuraja na ruguru, no u atweberetie irema rietu.”b (Zaburi 103:8-12) Jehova akarekera bonthe barĩa bairiraga meyia jaao ja ĩgiita rĩkũrũkĩte, o amwe na wĩyia bwa kũrita ĩu.—Zaburi 86:5.

Rĩ, kũrita ĩu nĩ meyia kinya rĩrĩa ũtũũro bwa mwana na ng’ĩna bũrĩ ũgwatine?

Ũrĩa Bibiria yugaga bwegie mwoyo jwa mwana ũtĩciari, gũtĩagĩrĩte kũrita ĩu rĩa mwana ũtĩciari, kinya gũkeeja kũthũgaanĩrua ũtũũro bwa mwana kana bwa ng’ina bũrĩ ũgwatine.

Rĩ, a gũkethĩrwa ĩgiita rĩa mwekũrũ ũmũrito kũgia mwana, ũntũ bũtĩrĩgĩĩri bũkaumĩra bũrĩa bũũmba gwĩkĩra ng’ina na mwana ũtĩciari ũgwatine? Kĩrĩ ũntũ ta bũu, barĩa ũntũ bũu bũbegie nĩbabuĩrĩte kũthithia ĩtua riao bwongwa rĩegie mwoyo jũrĩkũ bakonokia.