KĨTHOOMO KĨA 59
Womba Kũmĩĩria Rĩrĩa Ũgũkũrũkĩĩra Mĩthangĩko
Kwĩthĩrwe nĩ nandĩ kana nĩ ĩgiita rĩjĩte, Akristũ bonthe bagakũrũkĩra mĩthangĩko kana antũ bagerie kũbarigĩĩria batĩgatumĩkĩre Jehova. Bũu nĩbũbuĩrĩte gũtũma twigua ũguaa?
1. Nĩkĩ tũbuĩrĩte kwĩrĩgĩĩra mĩthangĩko
Bibiria yugaga atĩ: “Antu baria beendaga kurumiira mantu ja Murungu, ndene ya Kristo Jesu, bonthe gutirio batitua kunyamaaragua.” (2 Timotheo 3:12) Jesũ naathangĩkĩrue tontũ aatarĩ gĩcuncĩ kĩa nthĩgũrũ ya Shaitani. Kinya tuĩ tũtĩ gĩcuncĩ kĩa nthĩgũrũ, na kwou tũtĩrigaraga rĩrĩa twathangĩkua nĩ thirikarĩ cia nthĩgũrũ ĩjĩ na ikundi bia kĩndini.—Johana 15:18, 19.
2. Nĩatĩa tũũmba kwithuranĩra nĩũntũ bwa mĩthangĩko?
Nĩtũkũbatara gwĩkĩra inya wĩrĩgĩĩro bwetũ kĩrĩ Jehova o nandĩ. Cwaa kaanya o ntukũ ga kũromba na kũthooma gĩcuncĩ kĩnna kĩa Rũteto rwawe. Menyeria gwĩta mĩcemanione ya kĩũthũrano. Mantũ jau jagakwa inya ĩrĩa ũkũbatara nĩkenda ũũmbana na mĩthangĩko ũũmĩrĩtie, kinya kethĩra ĩkauma kĩrĩ antũ beenu ba nja. Mũtũmwa Paũlũ ũrĩa wathangĩkagua kaingĩ, andĩkĩre ũjũ: “Mwathani o Uu niwe Munthethia ntikorokira.”—Ahibirania 13:6.
Kinya twomba gwĩkĩra inya ũcamba bwetũ na njĩra ya kũmenyeria gũtũmĩĩria. Gũtũmĩĩria nĩgũtũritanaga kwĩrĩgĩĩra Jehova, na gũcinda ũguaa bwa gũkĩra antũ. (Njuno 29:25) Kethĩra ũkagĩa ũcamba bwa gũtũmĩĩria nandĩ, ũkethĩrwa ũkithuranagĩra bwega gwĩta na mbere gũtũmĩĩria kinya rĩrĩa thirikarĩ ciarigĩĩria ngũgĩ yeetũ.—1 Athesalonike 2:2.
3. Nĩatĩa tũgunĩkaga twomĩĩria mĩthangĩko?
Kamma, tũtĩgwĩragua rĩrĩa tũgũkũrũkĩĩra mĩthangĩko, ĩndĩ rĩrĩa twomĩĩria mĩthangĩko buru, wĩtĩkio bwetũ nĩbũgĩtaga inya nkũrũki. Nĩtũthengagĩĩra Jehova nkũrũki, tontũ nĩtwonaga nagũtũtethia rĩrĩa tũkwigua tũtĩ na inya ya gwĩta na mbere kũmĩĩria. (Thooma Jakubu 1:2-4.) Jehova naigagua bũbũĩ rĩrĩa akwona tũkĩthangĩka, ĩndĩ nagwĩragua rĩrĩa akwona tũkĩũmĩĩria. Bibiria yugaga: “Bukathithia bubwega, na bukaurirwa wega buu, na bukoomiiria mpuurwene iu, Murungu noonaga buri untu bubwega.” (1 Petero 2:20) Kĩewa kĩrĩa Jehova akaa barĩa bakomĩĩria mwanka mũthia, nĩ mwoyo jwa kenya na kenya nthĩgũrũne ĩrĩa ĩkethĩrwa na antũ batĩkũregana na ũthathayia bwa mma.—Mathayo 24:13.
ĨNJA NKŨRŨKI
Ona nĩkĩ bũrĩ ũntũ bwa gĩtũmi na bũrĩ ũntũ bũmbĩkĩka, kũgwatĩĩra wĩtĩkĩkua bwetũ kĩrĩ Jehova rĩrĩa tũkũthangĩkua.
4. Womba kũmĩĩria rĩrĩa ũkũthangĩkua ndeene ya nja
Jesũ naamenyaga bwega atĩ antũ bamwe ba nja cietũ, batĩngĩgwata mbaru ĩtua rĩetũ rĩa kũthathayia Jehova. Thooma Mathayo 10:34-36, rĩu bwarĩĩrie kĩũria gĩkĩ:
Nĩatĩa kũũmba gũkarĩka rĩrĩa ũmwe ndeene ya nja athuura gũtumĩkĩra Jehova?
Kenda wona ngerekano ya ũntũ bũu, tega VIDIO, rĩu bwarĩĩrie kĩũria gĩkĩ kĩthingatĩte.
Nĩatĩa ũũmba kũthithia rĩrĩa muntũ wa nja kana mũcoore ageria gũkuuna nkoro ũtĩgatumĩkĩre Jehova?
Thooma Zaburi 27:10 na Mariko 10:29, 30. Nyuma ya kũthooma o ĩandĩko, arĩĩrieni kĩũria gĩkĩ:
Nĩatĩa wĩrane bũu bũũmba gũgũtethia kethĩra muntũ wa nja kana mũcoore akageria gũkũrigĩĩria ũtĩgatumĩkĩre Jehova?
5. Ĩta na mbere kũthathayia Jehova kinya kethĩra nũgũkũrũkĩĩra magerio
Nĩtũkũbatara ũcamba nĩkenda tũtumĩkĩra Jehova rĩrĩa bangĩ bagũtũrigĩĩria tũtĩkathithie ũu. Tega VIDIO, rĩu bwarĩĩrie kĩũria kĩrĩa kĩthingatĩte.
Nĩatĩa ngerekano irĩa irĩ kĩrĩ vidio ĩgũgwĩkĩra inya?
Thooma Mathithio 5:27-29 na Ahibirania 10:24, 25. Nyuma ya kũthooma o ĩandĩko, arĩĩrieni kĩũria gĩkĩ:
Nĩkĩ bũrĩ ũntũ bwa gĩtũmi gwĩta na mbere kũthathayia Jehova, kinya kethĩra ngũgĩ yeetũ ya gũtũmĩĩria kana mĩcemanio nĩrigĩrĩĩtue?
6. Jehova agagũtethia kũmĩĩria
Akũũjĩ ba Jehova baakũrũ ona baniini nthĩgũrũne yonthe, nĩbetĩte na mbere gũtumĩkĩra Jehova na wĩtĩkĩkua kinya rĩrĩa bakũthangĩkua. Nĩkenda wona nĩmbi bibatethetie, tega VIDIO. Rĩu bwarĩĩrie kĩũria gĩkĩ kĩthingatĩte.
Kĩrĩ vidio, nĩmbi biatetherie Akũũjĩ bau ba Jehova kũmĩĩria?
Thooma Aroma 8:35, 37-39 na Afilipi 4:13. Nyuma ya kũthooma o ĩandĩko, arĩĩrieni kĩũria gĩkĩ:
Nĩatĩa ĩandĩko rĩrĩ rĩgũkũrikithĩria atĩ no ũũmbe kũmĩĩria kĩgerio kinya kĩrĩkũ?
Thooma Mathayo 5:10-12, rĩu bwarĩĩrie kĩũria gĩkĩ:
Nĩkĩ ũũmba kwĩthĩrwa na kũgwĩrua kinya rĩrĩa ũgũkũrũkĩĩra mĩthangĩko?
Akũũjĩ babaingĩ ba Jehova nĩbetĩte na mbere gũtumĩkĩra Mũrungu na njĩra ya wĩtĩkĩkua kinya kethĩra nĩbakũrũkĩrĩĩte mĩthangĩko. Kinya gwe no ũũmbe kũmĩĩria!
ANTŨ BAMWE BAUGAGA: “Ntĩũmba kũmĩĩria rĩrĩa ngũkũrũkĩĩra magerio.”
Nĩ maandĩko jarĩkũ joomba kũbatethia bethĩrwa na ũcamba bũrĩa bakũbatara?
NA NJĨRA ĨNKUĨ
Jehova nagwĩragua rĩrĩa tũgũciũmia kũmũtumĩkĩra kinya rĩrĩa tũkũthangĩka. Gũkũrũkĩĩra ũtethio, bwawe tũkomba kũmĩĩria mĩthangĩko ĩu!
Gũcookera
Nĩkĩ Akristũ babuĩrĩte kwĩrĩgĩĩra mĩthangĩko?
Nĩatĩa ũũmba kũthithia nandĩ nĩkenda withuranĩra rĩrĩa mĩthangĩko ĩkaumĩra?
Nĩmbi biũmba gũgũtethia kwĩthĩrwa na ũcamba, atĩ womba gũtumĩkĩra Jehova wakũrũkĩĩra mĩthangĩko kinya ĩrĩkũ?
CŨNKŨŨNA
Tega vidio ya mũtaana-wa-baaba ũmwe ũmwĩthĩ, agĩtaarĩĩria ũrĩa Jehova aamũtetherie kũmĩĩria rĩrĩa aabungi nceera tontũ bwa kũrega kũgwata mbaru rũtere kinya rũrĩkũ.
Ona nĩmbi biatetherie antũ baĩrĩ bagũrene gũtumĩkĩra Jehova na njĩra ya wĩtĩkĩkua mĩaka ĩmingĩ, kinya kethĩra nĩbaakũrũkagĩĩra mĩthangĩko.
Iritane ũrĩa ũũmba kwĩthĩrwa na ũcamba rĩrĩa ũkũthangĩkua.
“Ithuranĩre Nandĩ Tontũ Bwa Mĩthangĩko” (Mnara wa Mlinzi, Julaĩ 2019)
Tũbuĩrĩte kwĩthĩrwa na mwonere jũrĩkũ rĩrĩa tũgũkũrũkĩĩra irigĩĩria ndeene ya nja, na nĩatĩa tũũmba kũthithia nĩkenda kwĩthĩrwa na thĩĩrĩ, na o ĩgiita o rĩu tũgwatĩĩra wĩtĩkĩkua bwetũ kĩrĩ Jehova?
“Ũmma Bũtĩretaga, ‘Thĩĩrĩ, Ĩndĩ nĩ Rũciũ’” (Mnara wa Mlinzi, Oktoba 2017)