Antũ babaingĩ nĩbatigĩte gwĩta mantũne ja kĩndini nĩũntũ batĩboragĩĩrua kana boona ũtongeeria bwa gĩkĩrundu. Nĩkĩ ũbuĩrĩte gwĩta mĩcemanione ya Gĩkristũ ĩrĩa ĩthithagua nĩ Akũũjĩ ba Jehova? Nĩ mantũ jarĩkũ ũkoona ku?

Ũkoona nkerũ cia kwĩthĩrwa amwe na antũ barĩ na wendo na bagũkũmakĩra. Karine ya mbere, Akristũ nĩ baabangi na biũthũrano, na nĩbaacemanagia kũthaathayia Mũrungu, kwiritana Maandĩko, na gwĩkĩrana inya na bangĩ. (Ahibirania 10:24, 25) Rĩrĩa baũthũranaga amwe na antũ barĩ na wendo, nĩ baigagua barĩ kĩrĩ acoore ba mma—ataana na aarĩ ba baaba ba gĩkĩrundu. (2 Athesalonike 1:3; 3 Johana 14) Tũthingataga ngerekano o ĩu na tũkoona nkerũ o ta ciao.

Ũkagunĩka kwiritana ũrĩa ũũmba gũtumĩra mooritani ja Bibiria. Ta ũrĩa kwaarĩ ĩgiita rĩa Bibiria, kinya naarua, akũrũ, eekũrũ, na aana, bonthe batirimanaga amwe. Arimũ barĩa bakwagĩra, batumagĩra Bibiria gũtũteetheria ũrĩa tũũmba gũtumĩra mooritani jayo mũtũũrĩrene jwetũ jwa ntukũ cionthe. (Kuriikanithia Maathana 31:12; Nehemia 8:8) Twinthe no tũgwatanĩre kwina na gũcookia biũria kĩrĩ icuncĩ bia kwaranĩria, kũmenyithania wĩrĩgĩĩro bwetũ bwa Gĩkristũ.—Ahibirania 10:23.

Wĩtĩkio bwaku kĩrĩ Mũrungu bũgeekĩrwa inya. Mũtũmwa Paũlũ eerĩre kĩũthũrano kĩmwe atĩrĩ: “Nimpendaga kwonana nabwi mono, . . . twikanagire wiru ni untu bwa witikio bwa o muntu, bwakwa na kinya bwenu.” (Aroma 1:11, 12) Wĩthĩre bwetũ bwa kwonana na ataana na aarĩ ba baaba mĩcemanione, nĩ bwĩkagĩra wĩtĩkio bwetũ inya na wendi bwa gũtũũra mũtũũrĩre jwa Gĩkristũ.

To tũkũgwate ũgeni wĩje mĩcemanione yeetũ ũcionere mantũ jau wengwa? Ũkaamũkĩrwa bwega. Mĩcemanio yeetũ yonthe ĩtĩrĩaua—gũtĩ gwĩtua mĩũthi.

• Mĩcemanio yeetũ ya kĩũthũrano ĩthingataga ngerekano ĩrĩkũ?

• Nĩatĩa tũũmba kũgunĩka tweta mĩcemanione ya Gĩkristũ?

Kinya kethĩra nĩtuumaga kũraaja, kana gũkethĩrwa na magiita ja riũa kana mbura, rĩonthe nĩtwĩjaga mĩcemanione yeetũ ya Gĩkristũ. Amwe na kwĩthĩrwa na mantũ jamaũmũ ũtũũrone na mĩnoga nyuma ya gũtiinda ngũgĩne, nĩkĩ Akũũjĩ ba Jehova baciũmagia kũũthũrana amwe na eetĩkia bangĩ?

Nĩgũtũteethagia kũũmbana na mantũ jamaũmũ ũtũũrone. Paũlũ akĩarĩragia barĩa tũgwatanagĩra nabo kĩũthũranone aandĩkire ũjũ, “tuciurageni mantu jetu, tukiumanagiiria.” (Ahibirania 10:24) Biugo biu nĩ kuuga “kũthũgaananĩria bwega,” kwonania, tũciũmie kũmenyana twingwa. Kwou biugo bia Paũlũ birĩtwĩkĩra nkoro kũthũgaanĩria bangĩ. Rĩrĩa twamenyana na Akristũ bangĩ, nĩtũciũkagĩrwa atĩ bamwe bao nĩboombanĩte na mathĩĩna o ta jeetũ, na no batũteethie kinya twĩ kũũmbana.

Nĩ gũtũteethagia gwaka ũcoore bũũriku. Kĩrĩ mĩcemanio yeetũ, nĩ tũtirimanaga amwe na mũũrũ jwa acoore bamma. Magiita jangĩ, nĩ twĩthagĩrwa na mantũ jameega ja kũgwĩrĩrua tũrĩ amwe. Nĩ mpumi irĩkũ injega ciumanagia na ngwatanĩro ta iu? Nĩ twiritanaga kwona o ũmwe arĩ wa gĩtũmi nkũrũki, na bũu nĩbwĩkagĩra inya ngwatanĩro yeetũ ya wendo. Kwou, rĩrĩa bamwe ba mũũrũ jwetũ bagwatwa nĩ mathĩĩna, nĩ tũbateethagia na mpwĩ nĩ ũntũ nĩtũũmbĩte gũtuma ũcoore bũũriku. (Njuno 17:17) Rĩrĩa tũkũgwatanĩra na antũ bonthe ba kĩũthũrano gĩetũ, nĩtwonanagia atĩ ‘o kirungo o kirungo nikiithagirwa kiri na untu na kingi.’—1 Akorintho 12:25, 26.

Nĩtũgũkũũria ũthuure barĩa bakũthithia wendi bwa Mũrungu bae acoore baaku. Ũkoona acoore ta bau kĩrĩ Akũũjĩ ba Jehova. Itũ bu menya wĩtĩkĩĩria kinya mbi bikũrigĩĩria kũgwatanĩra naatwĩ.

• Nĩkĩ bũrĩ ũntũ bũbwega kũũthũrana amwe mĩcemanione?

• Nĩrĩ ũrĩngĩenda kwĩja mĩcemanione yeetũ na kũmenyana na antũ ba kĩũthũrano gĩetũ?

Mĩcemanio ya Akristũ ba mbere jeethagĩrwa na ndwĩmbo, maromba, kũthooma na kwaarĩĩria Maandĩko—gũteethagĩrwa na nkuagaya cia antũ. (1 Akorintho 14:26) No wĩrĩgĩĩre mantũ ta jau mĩcemanione yeetũ.

Mataaro jaumaga Bibiriene na nĩ jatumĩkaga. O mũthia jwa kiumia, o kĩũthũrano nĩ gĩcemanagia kũthikĩĩra rwaria rwa Bibiria rwa ndagĩka 30, rũkwarĩĩria ũrĩa Maandĩko jakũringithia ũtũũro bwetũ na matukũ jaja tũgũtũũra. Twinthe nĩtwĩkagĩrwa nkoro kũthingatana na mwaria tũgĩtumagĩra Bibiria cietũ. Nyuma ya rwaria rũu, nĩkwĩthagĩrwa na kwiritana “Mnara wa Mlinzi” ĩthaa rĩmwe, na barĩa barĩ kĩũthũranone nĩbagwatagwa ũgeni kwejana macookio kĩrĩ kĩthoomo kĩa ngacĩti ya kwiritana ya Mnara wa Mlinzi. Kaanya kau nĩ gatũteethagia gũtumĩra mataaro ja Bibiria ũtũũrone bwetũ. Biũthũrano nkũrũki ya 110,000 nthĩgũrũne yonthe nĩ biiritanaga kĩthoomo o kĩu.

Nĩtũteethagua kũthongomia ũtea bwetũ bwa kũritana. Kinya nĩtũtirimanaga gatĩgatĩ ga kiuma kĩrĩ mũcemanio jũrĩ na icuncĩ bithatũ, jwĩtagwa Ũtũũro Bwetũ bwa Gĩkristũ na Ũtungatĩri, jũrĩa jwĩthagĩrwa na mantũ kuuma kĩrĩ Gauku ka Mũcemanio jwa Ũtũũro na Ũtungatĩri, ka o mweri. Gĩcuncĩ kĩa mbere nĩ Mantũ ja Bata Kuuma Rũtetone rwa Mũrungu, kĩrĩa gĩtũteethagia gũciũkĩrwa bwega nĩ icuncĩ bia Bibiria birĩa kĩũthũrano kĩthagĩrwa kiithoomerete o mbere. Gĩcuncĩ kĩa biĩrĩ nĩ, Kwagĩrithia Nkũrũki Ũtungatĩri, kĩrĩa kĩthagĩrwa na bionanĩĩria bia ũrĩa tũũmba kwaranĩria na bangĩ mantũ jegiĩ Bibiria. Mwejani mataaro naejanaga kĩrĩra gĩa gũtũteethia kũthongomia ũtea bwetũ bwa kũthooma na kwaria. (1 Timotheo 4:13) Gĩcuncĩ kĩa mũthia nĩ Mũtũũrĩre jwa Gĩkristũ, kĩrĩa kiinyagĩĩria ũrĩa tũũmba gũtumĩra mooritani ja Bibiria mũtũũrĩrene jwetũ jwa o ntukũ o ntukũ. Kinya nĩkĩĩthagĩrwa na kaanya karĩ na biũria na macookio, karĩa kongagĩĩra ũmenyo bwetũ bwa Bibiria.

Rĩrĩa ũkeeja mĩcemanione yeetũ, gũtĩ nkaanja ũkagwĩrĩrua ũritani bũbwega bwa Bibiria bũrĩa ũkaewa.—Isaya 54:13.

• Nĩmbi ũũmba kwĩrĩgĩĩra kwigua mĩcemanione ya Akũũjĩ ba Jehova?

• Nĩ mũcemanio jũrĩkũ kĩrĩ ĩrĩa tũthithagia o kiumia ũrĩngĩenda kwĩja?

Rĩ, ũkwona mbica irĩa irĩ broshuene ĩjĩ, ũrĩa Akũũjĩ ba Jehova bekagĩra nguũ bwega rĩrĩa betĩte mĩcemanione yaao ya kĩũthũrano? Nĩkĩ tontũ tũthũgaanagĩria mwĩkĩĩre na mwigemerie jwetũ na njĩra ta ĩu?

Nĩkenda tũtĩĩa Mũrungu weetũ. Nĩ mma, Mũrungu ategaga nkũrũki ya mwonekanĩre jwetũ jwa oome. (1 Samueli 16:7) Amwe na bũu, rĩrĩa tũtirimanĩte kũmũthaathayia, wendi bwetũ bwa kuuma nkorone nĩ kũmũtĩĩa na gũtĩĩa athaathayia bangĩ. Tũkeeja kweewa kaanya ga kũriũngĩra mũnene wa nthĩgũrũ, tũrĩngĩthũgaanĩria ũrĩa tũkwonekana nĩũntũ bwa gũtĩĩa kaanya kaawe. O ũu, njĩra ĩrĩa twonekaga nayo mĩcemanione yeetũ, nĩyonanagia gĩtĩĩo kĩrĩ “Mugambi wa nthi yonthe,” Jehova Mũrungu, na antũ arĩa tũmũthaathagĩria.—Kiambiriria 18:25.

Nĩkenda twonania jarĩa tũthingatagĩra ũtũũrone. Bibiria ĩĩkagĩra Akristũ nkoro “beekagire nguu iria ciagirite na bakarage na nthoni, na uume bwa nkoro.” (1 Timotheo 2:9, 10) Gwĩkĩra nguũ “iria ciagirite” nĩ kuuga gũtiga gwĩkĩra nguũ irĩa ciũmba gũtũma antũ bathũgaania gatũgwikumia, cia kũbathũũria kana itĩkwitha mwĩrĩ. Kinya kwĩthĩrwa na “uume bwa nkoro” gũgatũteethia kũthuura nguũ inthongi itĩ cia ũmatha kana itĩkũrũkithĩtie kĩthimi. Mataaro jau nĩ jatwejaga kaanya gakanene ga kwithuurĩra twingwa. Mwĩkĩĩre na mwonekanĩre jwetũ jũmũthongi no ‘jukumithie uritani bwa Mwonokia wetu’ na ‘jukumithie Murungu.’ (Tito 2:10; 1 Petero 2:12) Kwou, gwĩkĩra nguũ bwega tũrĩ mĩcemanione yeetũ gũkaringithia ũrĩa bangĩ bonaga ũthaathayia bwa Jehova.

Menya ũreka nguũ ikũrigĩĩria kwĩja mĩcemanione, Nyomba ya Ũnene. Nguũ cietũ itĩkũbatara ciĩthĩrwa irĩ cia goro, ĩndĩ irĩbatara ciĩthĩrwe irĩ injega, intheru na ciagĩrĩte.

• Njĩra yeetũ ya gwĩkĩra rĩ, nĩ ya gĩtũmi atĩa rĩrĩa tũkũthaathayia Mũrungu?

• Nĩ ũritani bũrĩkũ bũtũtongagĩĩria rĩrĩa tũkũthuura mwĩkĩĩre na mwigemerie?

Kethĩra nĩ ũkwiritana Bibiria na ũmwe wa Akũũjĩ ba Jehova, mbuga nĩ ũgeragia kũthuranĩra arĩa bũkathooma o mbere bwiritana. Nĩkenda ũgunĩka nkũrũki, nĩbwega ũthithagie o ũu, mbere ya gwĩta mĩcemanione ya kĩũthũrano. Tũkoona maumĩĩra jameega twethĩrwa na rũmenyeria rũrwega.

Ona nĩ ĩgiita rĩrĩkũ na nĩkũ ũkairitanĩra. Nĩ ĩgiita rĩrĩkũ ũũmba gũkirĩĩria bwega? Nĩ rũũkĩĩrĩ mbere wambĩrĩria ngũgĩ ciaku cia ntukũ, kana nĩ ũtukũ aana baaku bamaama? Kinya kethĩra ũtĩũmba kwiritana ĩgiita rĩraaja, tua nĩ ĩgiita rĩng’ana atĩa ũgatumĩra kwiritana, na menya ũreka ũntũ kinya bũrĩkũ bũkũgitaria. Cwaa antũ atĩna gĩtuma, na weberie into bionthe bia gũkwangaratania, worie redio, tv, na thimũ. Kũromba mbere ya kwambĩrĩria kwiritana gũgagũteethia gwĩĩka mathũgaanio kĩrĩ Rũteto rwa Mũrungu, na gũtiga kũthũgaanĩria mĩthangĩko ya ntukũ ĩrĩa ũkũrũkĩĩrĩte.—Afilipi 4:6, 7.

Thuranĩra arĩa gũkathoomwa, na wĩthuranĩre gũcookia. Ambĩrĩria na njĩra ya kũmenya jarĩa jakaarĩrua kĩthoomone kĩonthe. Thũgaanĩria kĩongo gĩa kĩthoomo, ona ũrĩa biongo birĩa iniini bikũgwatanĩra na ũntũ bũrĩa bũkwarĩĩrua, na ũcũnkũũne mbica cionthe na biũria bia gũcookera birĩa bikwinyĩĩria mantũ jarĩa jaciumĩrĩtie. Rĩu thooma o gĩcuncĩ o gĩcuncĩ, na ũtege macookio ja biũria birĩa biandĩki. Tega na ũthoome maandĩko jarĩa jonanĩtue, na ũthũgaanĩrie ũrĩa jakũgwata mbaru ũntũ bũrĩa bwarĩĩrĩtue. (Mathithio 17:11) Rĩrĩa wona macookio ja biũria, ringĩra biugo biikai mũstarĩ, birĩa bigagũteethia kũriikana macookio ĩgiita rĩa mĩcemanio. Nyumene, ũrĩ mĩcemanione, weenda no ũkĩĩrie njara na weejane ĩcookio rĩĩkuĩ na biugo biaku wengwa.

Gũkũrũkĩĩra gũcũnkũũna mantũ mwanya mwanya jarĩa jakaarĩĩrua o kiumia o kiumia, ũkoongeera mathũgaanio jameerũ kĩrĩ mũthithũ jwaku jwa “into” bia ũmenyo bwa Bibiria.—Mathayo 13:51, 52.

• Nĩrũmenyeria rũrĩkũ ũbuĩri gũkũria rwa kũthuranĩra mĩcemanio?

• Nĩatĩa ũũmba kwithuranĩra gũcookia biũria mĩcemanione?

Kuuma karaaja, Jehova endaga o nja ĩtumĩra ĩgiita amwe gwĩkĩra inya ngwatanĩro yaao na Mũrungu, na amwe na antũ ba nja. (Kuriikanithia Maathana 6:6, 7) Nĩkĩo gĩtũmi Akũũjĩ ba Jehova bethagĩrwa na kaanya o kiumia o kiumia nĩũntũ bwa ũthaathayia bwa nja barĩ amwe—bakĩarĩragia na njĩra ĩmbooreru mantũ jegiĩ Mũrungu na moobatu jaao. Kinya kethĩra ũkaraga wenka, no ũtumĩre kaanya ja kau gũkuĩrĩĩria Mũrungu gũkũrũkĩĩra wiritani bwaku wengwa bwa Bibiria.

Ũthaathayia bwa nja nĩ ĩgiita rĩa kũthengeera Jehova. “Thengeereni Murungu, nawe akabuthengeera.” (Jakubu 4:8) Nĩtũmenyaga Jehova nkũrũki rĩrĩa twairitana mantũ joongwa jegiĩ ũrĩa akari na mathithio jaawe gũkũrũkĩĩra Rũteto rwawe Bibiria. Njĩra ĩmpũũthũ ya kwambĩrĩria ũthaathayia bwenu bwa nja nĩ gũtumĩra kagiita kanna kũthooma Bibiria na kaajũ bũrĩ amwe, mbuga bũkĩthingatagĩra mũtaratara jwa o kiumia jwa Mũcemanio jwa Ũtũũro na Ũtungatĩri. No ũgaĩre o muntũ wonthe wa nja gacuncĩ karĩa akathooma, na bwaarĩĩrie jarĩa bwairitana kuumania na Maandĩko.

Nĩ ĩgiita rĩa gũkuĩanĩĩria na bangĩ ndeene ya nja. Akũrũ na eekũrũ, ona kinya aciari na aana, nĩbaĩkagĩra ngwatanĩro yaao inya rĩrĩa bairitana Bibiria amwe ta nja. Ĩgiita rĩu rĩbuĩri kwĩthĩrwa rĩrĩ rĩa kũgwĩrĩrua, rĩrĩ na ũkiri na rĩa kwĩrĩgĩĩrwa nĩ muntũ wonthe o kiumia. Aciari babuĩri kũthuura jarĩa bakaarĩĩria kũringana na ũkũrũ bwa aana baao, mbuga mantũ kuuma kĩrĩ Mnara wa Mlinzi na Amkeni! kana kuuma kĩrĩ webusaĩti yeetũ, jw.org. No bwaarĩĩrie mathĩĩna jarĩa aana beenu bagũkũrũkĩĩra cukuru na ũrĩa bakoombana nayo. Rĩ, to bũtege programu ĩmwe kĩrĩ JW Broadcasting (tv.jw.org) na nyumene bũmĩarĩĩrie bũrĩ amwe? No bũgwĩrĩrue kwiritana ndwĩmbo irĩa ikainwa mĩcemanione na bwĩthĩrwe na twiinto tũũkai twa kũrĩa bwathiria ũthaathayia.

Kagiita gaka ka mwanya gatumĩrwa o kiumia kũthaathayia Jehova amwe ta nja, gagateethia nja yonthe kũgwĩrĩrua Rũteto rwa Mũrungu, na akatharima nkũrũki gwiciũmia kwenu.—Zaburi 1:1-3.

• Nĩkĩ twĩthagĩrwa na ĩgiita rĩa ũthaathayia bwa nja?

• Nĩatĩa aciari boomba kũthithia nĩkenda kaanya gaka kethĩrwa karĩ ga kũgwĩrĩrua nĩ bonthe ndeene ya nja?

Nĩkĩ antũ baba bakwonekana bagwĩrĩtue ũjũ? Nĩka barĩ kĩgomanone kĩmwe kĩa birĩa tũthithagia. O ta nthũũmba cia Mũrungu cia karaaja, irĩa cieri ciũthũranage maita jathatũ o mwaka, nĩtũgwĩragua gũtirimana amwe igomanone. (Kuriikanithia Maathana 16:16) O mwaka, nĩtwĩthagĩrwa na igomano bithatũ: igomano bia mũthiũrũnko biĩrĩ bia ntukũ ĩmwe, na kĩgomano kĩa gĩcigo gĩa ntukũ ithatũ. Nĩatĩa tũgunĩkaga kuumania na igomano biu?

Nĩbiĩkagĩra inya ngwatanĩro yeetũ ya Gĩkristũ. O ta ũrĩa Aisraeli baakenaga gũkumithia Jehova ‘micemanione’ ĩmĩnene, kinya twĩ nĩ tũgwĩragua kũmũthaathayia tũrĩ amwe igomanone. (Zaburi 26:12; 111:1) Igomano biu nĩ bitwejaga kaanya ga gũtirimana na kũgwatanĩra na Akũũjĩ ba Jehova kuuma biũthũranone bingĩ, kana kinya kuuma nthĩgũrũ ingĩ. Ĩgiita rĩa mũthenya, nĩtũgwĩragĩrua kũrĩjanĩria amwe arĩa tũũthũreene, na bũu bũgatwaa kaanya ga kũgwĩrĩrua ũcoore, kĩrĩ mambura jau ja gĩkĩrundu. (Mathithio 2:42) Igomanone biu, nĩtwonaga wendo bũrĩa bũgwatithanĩtie ataana na aarĩ “bonthe ba Baaba wetu” nthĩgũrũne yonthe.—1 Petero 2:17.

Nĩ bitũteethagia gwĩta na mbere mantũũne ja Mũrungu. Aisraeli kinya nĩ baagunĩkaga ‘guciukirwa’ nĩ nteto cia Maandĩko jarĩa baataraagĩĩrua. (Nehemia 8:8, 12) Kinya twĩ nĩ tũgwĩragĩrua mataaro ja Bibiria jarĩa twejagwa igomanone bietũ. O programu ĩthagĩrwa na kĩongo kiumanĩtie na Maandĩko. Gũkũrũkĩĩra ndwaria cia gũcancamũra, cia mĩthingatano, na bionanĩĩria bia mantũ jaakarĩka, nitũritanagwa ũrĩa tũũmba kũthithia wendi bwa Mũrungu ũtũũrone bwetũ. Nĩtwĩkagĩrwa inya rĩrĩa twaigua mantũ jarĩa jonetwe jegiĩ Akristũ barĩa bomĩĩrĩtie rĩrĩa bakũthangĩkua magiitene jaja maũmũ. Kĩrĩ igomano bia gĩcigo, drama nĩ itũmaga twona jarĩa jarĩĩrĩtue Bibiriene jarĩ o kamma na igatũritana kũjatumĩra. Kĩrĩ o kĩgomano, nĩkwĩthagĩrwa na ũbatithio bwa barĩa bakwenda kwonania kwirita kwao kĩrĩ Mũrungu.

• Nĩkĩ igomano biĩthagĩrwa birĩ magiita ja kũgwĩrua?

• Nĩatĩa ũũmba kũgunĩka kuumania na gwĩta kĩgomanone?

Ntukũ inkai mbere Jesũ akua, naugĩre ũjũ: “Na nkuma iji injega ya unene bwa Murungu igatumiirua nthiguru yonthe yee ukuuji kiri migongo yonthe; na igiita riu muthiro jugakinya.” (Mathayo 24:14) Ĩndĩ nĩatĩa ngũgĩ ĩjĩ ya gũtũmĩĩria nthĩgũrũ yonthe ĩrĩngĩũjũrua? Nĩ na njĩra ya kũthingata ngerekano ĩrĩa Jesũ eekĩre rĩrĩa aarĩ nthĩgũrũne.—Luka 8:1.

Nĩtũciũmagia gũkinyĩra antũ mĩciĩne kwao. Jesũ aaritanĩre aritwa baawe gũtũmĩĩria nkuma ĩnjega nyomba kwa nyomba. (Mathayo 10:11-13; Mathithio 5:42; 20:20) Atũmĩĩria bau ba karine ya mbere nĩ baagaĩri icigo bia gũtũmĩĩria. (Mathayo 10:5, 6; 2 Akorintho 10:13) O ũu naarua, ngũgĩ yeetũ ya gũtũmĩĩria nĩbaanganĩtue bwega, o kĩũthũrano nĩ kĩgaĩri gĩcigo gĩa gũtũmĩĩria. Bũu nĩ bũtũteethagia kũũjũria waatho bwa Jesũ atĩ “tutumagiirie antu nteto iu, na tukuujagiire” bwega.—Mathithio 10:42.

Nĩtũciũmagia gũkinyĩra antũ o naarĩa boomba kwonekana. Jesũ, kinya neekĩre ngerekano ya gũtũmĩrĩria antũ gũntũ kwa mwingĩ, ta nteere cia ĩria kana ithimeene bia rũũjĩ. (Mariko 4:1; Johana 4:5-15) Kinya twĩ, nĩ twaragia na antũ mantũ jegiĩ Bibiria o gũntũ kunthe—njĩreene, gũntũ kwa biacara, gũntũ gwa kuurũka kana gũkũrũkĩĩra thimũ. Kinya nĩtũtũmagĩĩria kĩrĩ atũũri beetũ, barĩa tũritaga ngũgĩ nabo, barĩa tũthoomaga nabo cukuru, na antũ ba ndũgũ rĩrĩa tũrĩ na kaanya gakwaagĩra. Gwiciũmia kũu kunthe nĩ gũtũmĩte antũ mirioni inyiingĩ nthĩgũrũ yonthe baigua nkuma ĩnjega ya “mantu ja kwonokania.”—Zaburi 96:2.

Rĩ, no ũthũgaanĩrie muntũ ũrĩa ũrĩngĩenda kwaranĩria nawe nkuma ĩnjega ya Ũnene bwa Mũrungu, na ũrĩa nkuma ĩu ĩkamũguna ĩgiita rĩĩjĩte? Menya ũrega kwĩra bangĩ nkũma ĩjĩ ya wĩrĩgĩĩro. Aranĩria na bangĩ na mpwĩ ũrĩa kũũmbĩka!

• Nĩ “nkuma ĩnjega” ĩrĩkũ ĩrĩa no mwanka ĩtũmĩĩrue?

• Nĩatĩa Akũũjĩ ba Jehova bathingataga ngerekano ya Jesũ ya gũtũmĩĩria?

Kĩugo “painia”, kaingĩ gĩtũmagĩrwa kwonania antũ barĩa bamenyaga gũntũ kũgeni barĩ ba mbere, na bagatemera bangĩ njĩra. Jesũ aarĩ ta painia, nĩũntũ aatũmĩrwe nthĩgũrũne kũrita ũtungatĩri bwa kwejana mwoyo, na kũrugũra njĩra ya wonokio. (Mathayo 20:28) Naarua, athingati ba Jesũ nĩbaigerekanagia nawe, bagĩtumagĩra ĩgiita rĩriingĩ ũrĩa kũũmbĩka kweethia antũ “aritwa” baawe. (Mathayo 28:19, 20) Bamwe nĩboombite gũtonya kĩrĩ bũrĩa twĩtaga ũtungatĩri bwa ũpainia.

Painia nĩ mũtũmĩĩria wa ĩgiita rĩonthe. Akũũjĩ ba Jehova bonthe nĩ atũmĩĩria ba nkuma ĩnjega. Ĩndĩ bamwe nĩ babaanganĩtie mũtũũrĩre jwao, bagatumĩka ta mapainia ba wĩthĩre, bagĩtumagĩra mathaa 70 o mweri ngũgĩne ya gũtũmĩĩria. Nĩkenda boomba ũpainia, babaingĩ nĩbaritaga ngũgĩ ĩtĩ ya ĩgiita rĩonthe. Bangĩ nĩbathuurĩte gũtumĩka ta mapainia ba mwanya icigone birĩa birĩ na ũbatu bwa atũmĩĩria ba Ũnene, bakiiritagĩra gũtũmĩĩria mathaa 130 kana nkũrũki o mweri. Mapainia nĩbang’anagĩrwa gũtũũra mũtũũrĩre jũmũũthũ, na bethagĩrwa na mma atĩ Jehova akabaingĩria moobatu jao ũtũũrone. (Mathayo 6:31-33; 1 Timotheo 6:6-8) Barĩa batĩũmba ũpainia bwa ĩgiita rĩonthe, no batumĩke ta mapainia ateetheria o rĩrĩa bakũũmba, bagĩtũmagĩĩria mathaa 30 kana 50 o mweri.

Painia atindĩkagwa nĩ wendo bwawe kĩrĩ Mũrungu na antũ. O ta Jesũ, nĩtũkũmenya atĩ antũ babaingĩ barĩ na ũbatu bũũnene bwa kũmenya Mũrungu na mworoto jwawe. (Mariko 6:34) Ĩndĩ tũrĩ na ũmenyo bũrĩa bũũmba kũbateethia kinya nandĩ, na kũbaa wĩrĩgĩĩro bũũriku bwa ĩgiita rĩĩjĩte. Kwenda mũtũũri nĩgũtindĩkaga painia gũtumĩra ĩgiita na inya yaawe agĩciendagĩra, gũteethia bangĩ kũmenya nkuma ĩnjega. (Mathayo 22:39; 1 Athesalonike 2:8) Ta maumĩĩra, wĩtĩkio bwa painia nĩbwĩkagĩrwa inya, agakuĩrĩria Mũrungu, na akagĩa na kũgwĩrua gũkũnene.—Mathithio 20:35.

• Ũũmba gũtaarĩĩria painia nũũ?

• Nĩmbi bitindĩkaga bamwe kwaa painia ba ĩgiita rĩonthe?

Kĩthoomo gĩa kĩtheokracĩ kĩĩthĩrĩtwe kĩrĩ kĩmenyithania gĩa Akũũjĩ ba Jehova mĩaka ĩmiingĩ. Ũritani bwa mwanya nĩ bwejagwa barĩa bairitĩrĩte ĩgiita rĩonthe ngũgĩĩne ya gũtũmĩĩria Ũnene nĩkenda ‘bojuragia’ ũtungatĩri bwao bwega.—2 Timotheo 4:5.

Cukuru ya Ũtungatĩri ya Mapainia. Mũthiene jwa mwaka jũmwe, painia wa wĩthĩre naejagwa kaanya gwĩta cukuru ya ntukũ itantatũ, ĩrĩa yũũmba kũthithĩrua Nyomba ya Ũnene ĩrĩa ĩrĩ akuĩ. Mworoto jwayo nĩ gũteetheria painia gũkuĩĩria Jehova, aagĩrithia ũtea bwawe mantũne jonthe ja ũtungatĩri, na eeta na mbere arĩ mwĩtĩkua ũtungatĩrine.

Cukuru ya Atũmĩĩria ba Ũnene. Ĩjĩ nĩ cukuru ya mĩeri ĩĩrĩ ĩthithĩtue ya kũritana mapainia barĩa bamenyeretie ũpainia na bakwenda gũtiga nja ciao na kũthamĩra icigo birĩa birĩ na ũbatu. Baugaga ũjũ batĩkũthaa, “Ndi aja, ntuma” bakiigerekanagia na Jesũ Kristũ, Mũtũmĩĩria ũrĩa mũnene wanatũũra nthĩgũrũne. (Isaya 6:8; Johana 7:29) Gwĩta kũraaja na nja kwomba kwenda muntũ ambia ũtũũro bũtĩ na mantũ jamaingĩ. Wĩĩthĩre, rĩera, na biakũria biomba kwĩthĩrwa birĩ mwanya buru na birĩa muntũ aamenyeretie kwao. Kwomba kinya kwendekana muntũ airitana mũgaambo mũgeni. Cukuru ĩjĩ nĩteethagĩĩria ataana na aarĩ ba baaba barĩa batĩgũreene kana bagũrwa, na barĩa bagũreene ba mĩaka 23 gwĩta 65, gũkũria nkuma cia gĩkĩrundu irĩa bakũbatara ngũgĩĩne yao, na ũtea bũrĩa bũkaboombithia gũtumĩrwa bwega nkũrũki nĩ Jehova na ũthuranĩri bwawe.

Cukuru ya Bibiria ya Gileadi. Kĩrĩ Kĩhibirania kiugo “Gileadi” kĩonanagia “ũkũũjĩ bũbwingĩ.” Kuuma Gileadi ĩrĩkwambia mwaka jwa 1943, nkũrũki ya aritwa 8,000 kuuma cukuru ĩu nĩbatũmĩtwe barĩ amĩsonarĩ kwejana ũkũũjĩ “mwanka ituri bionthe bia nthiguru” na kwĩthĩrĩtwe na mpumi injega mono. (Mathithio 13:47) Rĩrĩa amĩsonarĩ baakinyĩre Peru rĩa mbere, gũtaarĩ na biũthũrano nthĩ ĩu. Nandĩ kũrĩ na biũthũrano nkũrũki ya 1,000. Rĩrĩa amĩsonarĩ baambĩrĩĩrie gũtũmĩĩria Japani, Akũũjĩ ba Jehova bataakinyi antũ ĩkũmi nthĩ ĩu. Nandĩ bakinyĩte nkũrũki ya 200,000. Ũritani bwa Gileadi bwa mĩeri ĩtano nĩ amwe na kwiritana Rũteto rwa Mũrungu kĩndeene. Barĩa bagũtumĩka ta mapainia ba mwanya, barĩa barĩ obicine cia ndwang’i, kana ngũgĩĩne ya kũthiũrũnka, nĩbetagwa cukuru ĩjĩ kũritanwa bwega nkũrũki kenda bomba gũteetheria ngũgĩ ya gũtũmĩĩria nthĩgũrũne yonthe, ĩrika na ĩgĩta inya.

• Mworoto jwa Cukuru ya Ũtungatĩri ya Mapainia nĩ jũrĩkũ?

• Nĩ baaũ bomba gwĩtwa Cukuru ya Atũmĩĩria ba Ũnene?