KĨTHOOMO KĨA 15
Nĩkĩ Ũbuĩrĩte Gwĩta na Mbere Kwiritana Mantũ Jegiĩ Jehova?
1. Nĩatĩa ũgateetheka weeta na mbere kwiritana Bibiria?
Gũtĩ nkaanja, mooritani jau ja mũsingi ja Bibĩria nĩjeekĩrĩte inya wendo bwaku kĩrĩ Jehova. Wendo bũũ bũbuĩrĩte gwĩta na mbere gũkũrua. (1 Petero 2:2) Kenda ũkoona mwoyo jwa kenya na kenya, ũbuĩrĩte gwĩta na mbere kũthengeera Mũrungu na kwiritana Bibiria.—Thooma Johana 17:3; Juda 21.
O ũrĩa ũgeeta na mbere kũmenya Mũrungu, no u wĩtĩkio bwaku bũkagĩa inya. Wĩtĩkio bũgagũteethia kũgwĩria Mũrungu. (Ahibirania 11:1, 6) Bũgagũteethia kwirira na kũthithia moogarũrũku jarĩa jagagũteethia mũtũũrĩrene jwaku.—Thooma Mathithio 3:19.
2. Nĩatĩa ũmenyo bwaku bwĩgiĩ Mũrungu bũũmba gũteethia bangĩ?
No wĩthĩrwe na ngwatanĩro ya mwanya mono amwe na Jehova
No wende kwĩra bangĩ jarĩa wiritanĩte—twinthe nĩtũgwĩragĩrua kwĩra bangĩ nteto injega. O ũrĩa ũgwĩta na mbere kwiritana Bibiria, ũkamenya kũmĩtumĩra gũtaarĩria bangĩ ũrĩa wĩtĩkĩtie Jehova na nkuma ĩnjega.—Thooma Aroma 10:13-15.
Antũ babaingĩ bambagĩĩria kwaria na acoore kana antũ bao mantũ ja nkuma ĩnjega. Ĩndĩ, ĩthĩrwa na ũũme. Antũ a kũbeera wĩtĩkio bwao nĩbwatĩtie, bateetheerie kũmenya mawĩrane ja Mũrungu. Riikana, antũ babaingĩ bakagucĩĩrua mono nĩ mwĩtĩre jwaku jũmwega nkũrũki ya mantũ jarĩa ũkũbeera. —Thooma 2 Timotheo 2:24, 25.
3. Nĩ ngwatanĩro ĩrĩkũ ũũmba kũgwĩrĩrua amwe na Mũrungu?
Kwiritana Rũteto rwa Mũrungu kũgagũteethia gũkũria ngwatanĩro amwe na Mũrungu. Mũthiene, womba kũgĩa ngwatanĩro ya mwanya mono amwe na Jehova. Nĩ mma, no ũtuĩke ũmwe wa nja yaawe.—Thooma 2 Akorintho 6:18.
4. Nĩatĩa ũũmba gwĩta na mbere gũkũria ngwatanĩro yaaku na Mũrungu?
Ũgakũria ngwatanĩro yaaku na Mũrungu, weeta na mbere kwiritana Rũteto rwawe. (Ahibirania 5:13, 14) Ũũria ũmwe wa Akũũjĩ ba Jehova akũritane Bibiria agĩtũmagĩra iuku Biblia Inafundisha Nini Hasa? O ũrĩa ũgwĩta na mbere kwiritana nkũrũki Rũteto rwa Mũrungu, no u mũtũũrĩre jwaku jũgeeta na mbere kwagĩra.—Thooma Zaburi 1:1-3; 73:27, 28.
Nkuma ĩnjega yuumaga kĩrĩ Jehova, Mũrungu wa kũgwĩrua. Womba kũmũthengeera nkũrũki na njĩra ya kũgwatanĩra na antũ baawe. (Ahibirania 10:24, 25) Weeta na mbere gũciũmia kũthithia ũrĩa Jehova endaga, ũkeethĩrwa ũgiiciũmia gũkinyĩra ũtũũro bwa mma— mwoyo jwa kenya na kenya. Kũthengeera Mũrungu nĩbu ũntũ bwa bata mono bũrĩa ũũmba kũthithia.—Thooma 1 Timotheo 1:11; 6:19.