Kĩongo kĩrĩa kĩnene gĩciumĩrĩtie ndene ya Bibiria nĩ mantũ jegie Ũnene bwa Mũrungu. Jehova agatumĩra Ũnene bũu kũũjũria mworoto jwawe kwerekera nthĩgũrũ. Ũnene bwa Mũrung nĩmbi? Nĩatĩa tũkũmenya nĩbũkwathana nandĩ? Nĩ mantũ jarĩkũ bũrĩkĩtie kũũjũria? Na nĩatĩa bũkathithia ĩgiita rĩjĩte? Kĩthoomone gĩkĩ na biĩrĩ birĩa bithingatĩte tũkoona macookio ja biũria biu.

1. Ũnene bwa Mũrungu nĩmbi, na nũũ Mũnene waabu?

Ũnene bwa Mũrungu nĩ thirikarĩ ĩrĩa yĩĩki nĩ Jehova Mũrungu. Mũnene waayo, Jesũ, arĩathana kuuma ĩgũrũ. (Mathayo 4:17; Johana 18:36) Bibiria yugaga bwegie Jesũ: ‘Akaa Munene . . . kenya na kenya.’ (Luka 1:32, 33) Arĩ Mũnene wa Ũnene bwa Mũrungu, Jesũ akaatha antũ bonthe nthĩgũrũne.

2. Nĩbaũ bakathana amwe na Jesũ?

Jesũ atĩathana arĩ wenka. Antũ ba kuuma ‘miiriga yonthe, na migambo yonthe, na ba mithemba yonthe na migongo yonthe . . . bakathana’ barĩ anene amwe nawe. (Kugwurirwa 5:9, 10) Nĩ antũ bangˈana bakaathana amwe na Kristũ? Kuuma Jesũ arĩkwĩja nthĩgũrũne, Akristũ babaingĩ nĩbaete athingati baawe. Ĩndĩ antũ 144,000, nĩbo akĩ bageeta ĩgũrũ kwathana amwe nawe. (Thooma Kugwurirwa 14:1-4.) Akristũ bangĩ bonthe barĩa barĩ nthĩgũrũne bakaa raia ba Ũnene bũu.—Zaburi 37:29.

3. Nĩkĩ Ũnene bwa Mũrungu bũrĩ bũbwega nkũrũki ya thirikarĩ cia antũ?

Kinya rĩrĩa antũ barĩa bakwathana bageria kũthithia mantũ jameega, batĩĩthagĩrwa na inya ya kũthithia jonthe jarĩa bakwenda. Mũthiene kaanya kaao komba kũjũkua nĩ barĩa bomba kwĩthĩrwa batĩkwendera raia baao mantũ jameega. Ĩndĩ kaanya ka Jesũ arĩ Mũnene wa Ũnene bwa Mũrungu, gatĩkorojũkua nĩ muntũ ũngĩ. Mũrungu ‘narikitie Unene buria butikaritharua kinya ri.’ (Danieli 2:44) Jesũ akaathana nthĩgũrũne yonthe na atĩkoroathũra muntũ kinya ũrĩkũ. Arĩ wendo, kĩao, na ĩota, na akaritana antũ kũthithĩria bangĩ ona njĩra o ta ĩu—ya wendo, kĩao, na ĩota.—Thooma Isaya 11:9.

4. Ũnene bwa Mũrungu bũkaatha nthĩgũrũ yonthe

Jesũ Kristũ arĩna inya ĩnyingĩ ya kwathana nkũrũki ya Mũnene kĩnya ũrĩkũ ũrĩa wanaathana. Thooma Mathayo 28:18, rĩu bwarĩĩrie kĩũria gĩkĩ:

• Nĩatĩa wathani bwa Jesũ bũrĩ bũbwega nkũrũki ya wathani bunthe bwa antũ?

Thirikarĩ cia antũ nigarũkaga o ĩgiita kwa ĩgiita, na mũnene athaga gĩcuncĩ kĩnna kĩa nthĩgũrũ. Nou gũgakarĩka kĩrĩ Ũnene bwa Mũrungu? Thooma Danieli 7:14, rĩu bwarĩĩrie biũria bibi:

• Nĩkĩ bũrĩ ũntũ bũbwega kũmenya atĩ “Unene bwa Murungu butikaritharua”?

• Nĩkĩ bũrĩ ũntũ bũbwega kũmenya atĩ bũkaathana nthĩgũrũne yonthe?

5. No mwanka thirikarĩ cia antũ ciebue

Nĩkĩ no mwanka Ũnene bwa Mũrungu bũjũkie kaanya ka thirikarĩ cia antũ? Tega VIDIO, rĩu bwarĩĩrie kĩũria kĩrĩa kĩthingatĩte.

VIDIO: Ũnene Bwa Mũrungu Nĩmbi?​—Gĩcuncĩ (1:41)

• Kwĩthĩrĩtwe na maumĩĩra jarĩkũ kĩrĩ wathani bwa antũ?

Thooma Mutumiiria 8:9, rĩu bwarĩĩrie biũria bibi:

• Nũkwona teka Ũnene bwa Mũrungu bũbuĩrĩte kũjũkia kaanya ka thirikarĩ cia antũ? Nĩkĩ?

6. Ũnene bwa Mũrungu bũrĩ na aathani barĩa baijĩ mantũ jarĩa tũgũkũrũkĩĩra

Tontũ Mũnene weetũ Jesũ naatũraga arĩ muntũ, no ombe “gutwigiirua kiao.” (Ahibirania 4:15) Antũ arũme na ekũrũ 144,000 etĩkua barĩa bakaathana amwe na Jesũ bathuuri nĩ Jehova kuuma “miiriga yonthe, na migambo yonthe, na ba mithemba yonthe na migongo yonthe.”​—Kugwurirwa 5:9.

• Nũkwigua ũkĩborerua kũmenya atĩ Jesũ na bonthe barĩa akaathana amwe nabo, nĩbaijĩ ũrĩa twigagua na mathĩĩna jeetũ tũrĩ antũ? Nĩkĩ ũgũcookia ũu?

7. Ũnene bwa Mũrungu bũrĩ na mawaatho jameega nkũrũki

Thirikarĩ ciĩkaga mawaatho jarĩa joomba kũguna na gũkaria raia bacio. Kinya Ũnene bwa Mũrungu bũrĩ na mawaatho jarĩa raia ba ũnene bũu babuĩrĩte kũthingata. Thooma 1 Akorintho 6:9-11, rĩu bwarĩĩrie biũria bibi:

• Ũrĩthũgaania nthĩgũrũ ĩkethĩrwa ĩkari atĩa rĩrĩa antũ bonthe bakathingata mawaatho ja Mũrungu?a

• Nũkwona teka bũrĩ ũntũ bũkũgwatanĩra na mathũgaanio kĩrĩ Jehova kwĩrĩgĩĩra raia ba Ũnene bwawe batĩĩa mawaatho jau? Nĩkĩ?

• Nĩmbi bikwonania antũ barĩa batĩathĩkagĩra mawaatho jau bomba kũgarũka?​—Tega mũstaarĩ jwa 11.

NA NJĨRA ĨNKUĨ

Ũnene bwa Mũrungu nĩ thirikarĩ yongwa ĩrĩa ĩrĩ ĩgũrũ, ĩrĩa ĩkaatha nthĩgũrũ yonthe.

Gũcookera

• Nĩbaũ bakaathana Ũnenene bwa Mũrungu?

• Nĩatĩa Ũnene bwa Mũrungu bũrĩ bũbwega nkũrũki ya thirikarĩ cia antũ?

• Nĩ jamwe ja mantũ jarĩkũ Jehova akwĩrĩgĩĩra kĩrĩ raia ba Ũnene bwawe?

CŨNKŨŨNA

Cũnkũũna wone Jesũ aritanĩre wathani bwa Mũrungu bũrĩngĩathana bũkiumaga kũ.

“Rĩ, Ũnene bwa Mũrungu nĩ Nkorone Yaaku Bũrĩ?” (Thooma intanetine)

Nĩkĩ Akũũjĩ ba Jehova bathuuraga kwaa etĩkĩkua kĩrĩ Ũnene bwa Mũrungu, nkũrũki ya kwaa etĩkĩkua kĩrĩ wathani bwa antũ?

Kwiritanĩria Kĩrĩ Ũnene bwa Mũrungu (1:43)

Cũnkũũna jarĩa Bibiria ĩgwũrĩte bwegie antũ 144,000 barĩa Jehova athuurĩte baathana amwe na Jesũ.

“Nĩbaũ bageeta Ĩgũrũ?” (Thooma intanetine)

Nĩmbi biarikithĩĩrie mwekũrũ ũmwe ũrĩa waingĩri nceera atĩ Mũrungu wenka nĩwe ũũmba kũreta ĩota nthĩgũrũne?

“Ũrĩa Ndonere Macookio Jegie Ĩota” (Amkeni!, Novemba 2011)

Ũnene bwa Mũrungu bwambĩrĩĩrie kwathana ĩgũrũ mwaka jwa 1914. Rĩu norĩo kinya ntukũ cia mũthia cia wathani bwa antũ ciambĩrĩĩrie. Nĩmbi bigũtũtethia kũmenya ũu? Ona ũroria bwa Bibiria na mantũ jarĩa jagũkarĩka, na mĩtugo ĩrĩa antũ bethĩrĩtwe nayo kuuma 1914.

1. Nĩatĩa ũroria bwa Bibiria bũkwonania?

Iuku rĩa Danieli Bibiriene nĩrĩonanĩtie atĩ Ũnene bwa Mũrungu bũrĩngĩambia kwathana mũthiene jwa ĩgiita rĩrĩa rĩgwĩtwa “biingo mugwanja.” (Danieli 4:16, 17) Karine inyingĩ nyumene, akĩarĩĩria o ĩgiita rĩu Jesũ naarĩtĩre ĩgiita rĩa “antu baria bati Ayahudi,” na araritana atĩ rĩtaarĩ rĩgũkinya mũthia jwarĩo ĩgiitene rĩu. (Luka 21:24) O ta ũrĩa tũkairitana nyumene, biingo mũgwanja biathirĩre mwakene jwa 1914.

2. Nĩ mantũ jarĩkũ na mĩtugo ĩrĩkũ tũcionerete kuuma 1914?

Aritwa ba Jesũ baramũũria: ‘Twire mantu jaja jagakinya ri, o na rwano ruria rugakara o ni ruriku ndiiria ugatua kwija, na rwa muthiro jwa nthiguru?’ (Mathayo 24:3) Akĩbacookeria, Jesũ neeranĩre mantũ jamaingĩ jarĩa jarĩngĩkarĩka nyuma ya kwambĩrĩria kwathana ĩgũrũ arĩ Mũnene wa Ũnene bwa Mũrungu. Jamwe ja mantũ jau nĩ ndwa, mpara, na ithingithia bia nthĩgũru. (Thooma Mathayo 24:7.) Bibiria kinya nĩyeranĩte atĩ mĩtugo ya antũ “matukune ja muthiro” ĩrĩngĩtuma ũtũũro bwĩthĩrwa na “magiita ja kieba” kana bũrĩ bũbũũmũ. (2 Timotheo 3:1-5) Mantũ jau na mĩtugo ĩu nĩĩthĩrĩtwe ĩkĩonekana mono mono kuuma mwaka jwa 1914.

3. Nĩkĩ mantũ jathũũkĩte mono kuuma Ũnene bwa Mũrungu bũrĩ kwambia kwathana?

Kagiita gaakai nyuma ya Jesũ kwambia kwathana arĩ Mũnene wa ũnene bwa Mũrungu, arĩ naarĩa ĩgũrũ naarwĩre na Nkoma na irundu biawe bithũũku. Shaitani naacindĩrwe ndwene ĩu. Bibiria yugaga ‘nagwithirue o nthi buru, na araika bawe baraarukanirua amwe nawe.’ (Kugwurirwa 12:9, 10, 12) Shaitani arĩna mũthũũro jũmũnene tontũ nakũmenya akathirua. Kwou, nĩwe ũgũtũma kwĩthĩrwa na ũrũrũ na mĩthangĩko nthĩgũrũne yonthe. Bũu nĩbũgũtũtethia kũmenya nĩkĩ mantũ jathũũki mono nthĩgũrũne! Ũnene bwa Mũrungu bũkathiria mathĩĩna jau jonthe.

ĨNJA NKŨRŨKI

4. Ũtari kĩrĩ ũroria bwa Bibiria bũrĩonania Ũnene bwa Mũrungu bwambĩrĩĩrie kwathana 1914

VIDIO: Ũnene Bwa Mũrungu Bwambĩrĩĩrie Kwathana 1914 (5:02)

Mũrungu naatũmĩre Mũnene Nebukadinezarũ wa Babiloni ya karaaja, ethĩrwa na kĩroto kĩrĩa amwonerie mantũ jarĩa jarĩngĩkarĩka nyumene. Kĩroto kĩu na ũtaũri bwakĩo bũrĩa Danieli aejanĩre, bwaraĩĩria wathani bwa Nebukadinezarũ, o na kinya Ũnene bwa Mũrungu.—Thooma Danieli 4:17.a

Thooma Danieli 4:20-26, rĩu bũtumĩre chati ĩrĩa yonanĩtue, gũcookia biũria bibi bithingatĩte:

• (A) Nĩmbi Nebukadinezarũ oonere kĩrĩ kĩroto kĩawe?​—Tega mũstaarĩ jwa 20 na jwa 21.

• (B) Nĩatĩa kũrĩngĩkarĩka kĩrĩ mũtĩ?​—Tega mũstaarĩ jwa 23.

• (C) Nĩatĩa kũrĩngĩkarĩka mũthiene jwa “biingo mugwanja”?​—Tega mũstaarĩ jwa 26.

Kũrĩ na ngwatanĩro ĩrĩkũ ya kĩroto kĩegie mũtĩ na Ũnene bwa Mũrungu?

ŨRORIA (Danieli 4:20-36)

Wathani

(A) Mũtĩ jũmũnene

Kũgitarua kwa wathani

(B) “Temeni muti,” na bũreke “biingo mugwanja bikuruke”

Gũcookua kwa wathani

(C) “Unene bwaku bukamenyagirwa nikenda bucokeerue kirigwe”

Kĩrĩ kũũjũrua kwa mbere kwa ũroria bũu . . .

• (D) Nũũ warũngamagĩĩrwa nĩ mũtĩ?​—Tega mũstaarĩ jwa 22.

• (E) Nĩatĩa wathani bwawe bwagitarĩrue?​—Thooma Danieli 4:29-33.

• (F) Nĩatĩa gwakarĩkĩre kĩrĩ Nebukadinezarũ mũthiene jwa “biingo mugwanja”?​—Thooma Danieli 4:34-36.

KŨŨJŨRUA KWA MBERE

Wathani

(D) Nebukadinezarũ, Mũnene wa Babiloni

Kũgitarua kwa wathani

(E) Nyuma ya mwaka jwa 606 M.M.J., Nebukadinezarũ auma nthũ na aremwa kwathana mĩaka mũgwanja

Gũcookua kwa wathani

(F) Nebukadinezarũ acookerwa nĩ mathũgaanio na ambia kwathana kaĩrĩ

Kĩrĩ kũũjũrua kwa jaĩrĩ kwa ũroria bũu . . .

• (G) Nũũ warũngamagĩĩrwa nĩ mũtĩ?​—Thooma 1 Mantu ja Karaja 29:23.

• (H) Nĩatĩa wathani bwao bwagitarĩrue? Nĩatĩa tũkũmenya atĩ no bwagitarĩtue rĩrĩa Jesũ aarĩ nthĩgũrũne?​—Thooma Luka 21:24.

• (I) Nĩkũ na nĩ ĩgiita rĩrĩkũ wathani bũu bwacookerue?

KŨŨJŨRUA KWA JAĨRĨ

Wathani

(G) Anene ba Israeli barĩa barũngamĩrĩĩte Ũnene bwa Mũrungu

Kũgitarua kwa wathani

(H) Jerusalemu kwĩnyangua, na gũtĩ mũnene wa Israeli wathana ĩgiita rĩa mĩaka 2,520

Gũcookua kwa wathani

(I) Jesũ kwambĩrĩria kwathana ĩgũrũ arĩ Mũnene wa Ũnene bwa Mũrungu

5. Nthĩgũrũ nĩgarũkĩte kuuma mwaka jwa 1914

Tega VIDIO.

VIDIO: Nthĩgũrũ Nĩgarũkĩte Kuuma Mwaka Jwa 1914 (1:10)

Jesũ neeranĩte mantũ jarĩa jarĩngĩkarĩka nthĩgũrũne nyuma yaawe kwaa Mũnene. Thooma Luka 21:9-11, rĩu bwarĩĩrie kĩũria gĩkĩ:

• Nĩ mantũ jarĩkũ ũcionerete kana wigĩtue kĩrĩ jau?

Mũtũmwa Paũlũ naatarĩrĩĩtie ũrĩa antũ barĩngĩthĩrwa bakari ntukũne cia mũthiro cia wathani bwa antũ. Thooma 2 Timotheo 3:1-5, rĩu bwarĩĩrie kĩũria gĩkĩ:

• Kĩrĩ mĩtugo ĩu yagwetwa, nĩ ĩrĩku ũcionerete kĩrĩ antũ ntukũne cietũ?

6. Onania atĩ nũgwĩtĩkia Ũnene nĩbũkwathana nandĩ

Thooma Mathayo 24:3, 14, rĩu bwarĩĩrie kĩũria gĩkĩ:

• Nĩ ngũgĩ ĩrĩkũ ya gĩtũmi ĩkwonania atĩ Ũnene bwa Mũrungu nĩbũkwathana nandĩ?

• Nĩatĩa ũũmba kũgwata mbaru ngũgĩ ĩu?

Ũnene bwa Mũrungu nĩbũkwathana nandĩ na ĩgiita rĩtĩ kũraaja bũkathana nthĩgũrũne yonthe. Thooma Ahibirania 10:24, 25, rĩu bwarĩĩrie kĩũria gĩkĩ:

• Nĩatĩa o ũmwe weetũ abuĩrĩte kũthithia ‘o uria tukwona ati ntuku iu ikuthengeera?’

NA NJĨRA ĨNKUĨ

Ũroria bwa Bibiria, na mantũ jarĩa jagũkarĩka nthĩgũrũne, nĩjakũrikithia atĩ Ũnene bwa Mũrungu nĩbũkwathana nandĩ. Nĩtwonanagia atĩ nĩtũgwĩtĩkia ũntũ bũu, na njĩra ya gũtũmĩĩria bwegie Ũnene bũu, na gwĩta mĩcemanione ya kĩũthũrano.

Gũcookera

• Nĩatĩa gwakarĩkĩre mũthiene jwa biingo mũgwanja birĩa biaroretue Bibiriene kĩrĩ iuku rĩa Danieli?

• Nĩmbi bigũkũrikithĩria atĩ Ũnene bwa Mũrungu nĩbwambĩrĩĩrie kwathana 1914?

• Nĩatĩa ũũmba kwonania atĩ nũgwĩtĩkia Ũnene bwa Mũrungu nĩbũkwathana nandĩ?

CŨNKŨŨNA

Iritane ũrĩa anahistoria na antũ bangĩ baugaga bwegie mogarũrũku jarĩa jaakarĩkĩre nthĩgũrũne kuuma mwaka jwa 1914.

“Ũrĩa Mĩtugo ya Antũ Yaathũũkĩre O Rĩmwe” (Amkeni!, Ĩpurũ 2007)

Thooma ũrĩa ũroria bũrĩa bũkwonekana kĩrĩ Mathayo 24:14 bwaringithĩrie ũtũũro bwa muntũ mũrũme ũmwe.

“Nĩndendeete Gũceetha Mũbiira Nkũrũki ya Gĩntũ Kĩngĩ Kinya Kĩrĩkũ!” (Mnara wa Mlinzi Na. 3 2017)

Nĩatĩa tũkũmenya ũroria bũrĩa bwandĩkĩ kĩrĩ Danieli 4 bũrĩarĩĩria Ũnene bwa Mũrungu?

“Nĩrĩ Ũnene Bwa Mũrungu Bwambĩrĩĩrie Kwathana? (Gĩcuncĩ kĩa 1)” (Mnara wa Mlinzi, Oktoba 1, 2014)

Nĩmbi bikwonania atĩ “biingo mugwanja” birĩa bigweti kĩrĩ Danieli 4 biathirĩre 1914?

“Nĩrĩ Ũnene Bwa Mũrungu Bwambĩrĩĩrie Kwathana? (Gĩcuncĩ kĩa 2)” (Mnara wa Mlinzi, Novemba 1, 2014)

Ũnene bwa Mũrungu nĩbũkwathana nandĩ. Ĩgiita rĩtĩ kũraaja bũkathithia mogarũrũku jamanene nthĩgũrũne. Ka twarĩĩrie jamwe ja mantũ jameega jarĩa ũũmba kwĩrĩgĩĩra ĩgiita rĩa wathani bwa Ũnene bwa Mũrungu.

1. Nĩatĩa Ũnene bwa Mũrungu bũgacookia thĩĩrĩ na ĩota nthĩgũrũne?

Jesũ, Mũnene wa Ũnene bwa Mũrungu, akathiria antũ baathũũku na thirikarĩ cia antũ ndwene ya Amagedoni. (Kugwurirwa 16:14, 16) Ĩgiita rĩu, mawĩrane jonthe ja Bibiria jakoojũrua buru: “gatigi kagita kaniini uria mumaramari arege kwonora.” (Zaburi 37:10) Gũkũrũkĩĩra Ũnene bwa Mũrungu, Jesũ agatigĩĩra thĩĩrĩ na ĩota bikũũjũra nthĩgũrũne.—Thooma Isaya 11:4.

2. Nĩatĩa ũtũũro bũgakara wendi bwa Mũrungu bwambia kũthithĩka nthĩgũrũne?

Ĩgiita rĩa wathani bwa Ũnene bwa Mũrungu, ‘baria aagiru nibo bakaa eene rugai rwa nthi, na batuurage ku magita jonthe.’ (Zaburi 37:29) Ũthũgaania ũgĩtũũraga nthĩgũrũ ĩrĩa antũ bonthe barĩ babaagĩru, bendeete Jehova na bendeene bongwa! Gũtĩwe ũkaajua na antũ bonthe bagatũũra kenya na kenya.

3. Nĩmbi Ũnene bwa Mũrungu bũkoojũria nyuma ya antũ baathũũku kũthirua?

Antũ baathũũku barĩkia kũthirua, Jesũ akaathana arĩ Mũnene mĩaka 1,000. Ĩgiita rĩu, wee na barĩa akaathana nabo 144,000 bagatetheeria antũ nthĩgũrũne bae babaagĩru na batĩ na wĩyia. Mũthiene jwa ĩgiita rĩu, nthĩgũrũ ĩkagarũrwa yee paradiso ĩnthongi, yũũjũri antũ barĩ na kũgwĩrua barĩa bakagunĩka kuumania na kwathĩkĩra mawaatho ja Jehova. Rĩu Jesũ agacookia wathani kĩrĩ Ĩthe, Jehova. Nkũrũki ya ĩgiita rĩngĩ rĩonthe, ‘riitwa’ rĩa Jehova ‘rikathurwa.’ (Mathayo 6:9, 10) Ĩgiita rĩu gũkethĩrwa gwĩkũrikithua atĩ Jehova nĩwe Mwathani ũrĩa mwega na ũmakagĩra antũ baawe. Jehova akathiria Shaitani, irundu biithũũku, na muntũ ũngĩ kinya ũrĩkũ ũrĩa ũkathuura kũregana na wathani bwawe. (Kugwurirwa 20:7-10) Mantũ jameega jarĩa jakaretwa nĩ Ũnene bwa Mũrungu jagatũũra kenya na kenya.

ĨNJA NKŨRŨKI

4. Ũnene bwa Mũrungu bũkathiria thirikarĩ cia antũ

“Muntu agitaga na inya ya kwatha muntu ungi kenda amuthuukia.” (Mutumiiria 8:9) Jehova agatumĩra Ũnene bwawe kũthiria mothũũku jarĩa jareti nĩ waagi bũbũ bwa ĩota.

Thooma Danieli 2:44 na 2 Athesalonike 1:6-8, rĩu bwarĩĩrie biũria bibi:

• Nĩatĩa Jehova na Mũtaana waawe Jesũ, bakathithĩria thirikarĩ cia antũ na barĩa baigwataga mbaru?

• Nĩatĩa jarĩa wairitana jegie Jehova na Jesũ jagũkũrikithĩria atĩ, mathithio jaao jakethĩrwa jarĩ ja waagĩru na ĩota?

5. Jesũ nĩ Mũnene ũrĩa ũkwagĩra

Arĩ Mũnene wa Ũnene bwa Mũrungu, Jesũ akathithia mantũ jamaingĩ mono jarĩa jakaguna raia baawe nthĩgũrũne. Tega VIDIO nĩkenda wona ũrĩa Jesũ arĩĩkĩtie kwonania atĩ arĩna wendi na inya kuuma kĩrĩ Mũrungu ya gũtethia antũ.

VIDIO: Jesũ Noonanĩrĩe Jarĩa Ũnene Bwa Mũrungu Bũkoojũria (1:13)

Arĩ nthĩgũrũne, Jesũ noonanĩrie jarĩa Ũnene bwa Mũrungu bũrĩngĩũjũria. Nĩ itharimo birĩkũ kĩrĩ birĩa bigweti aja ũgwe wĩrĩgĩĩrĩte mono mono kwona bikĩũjũrua? Thooma Maandĩko jarĩa jaejani jarĩa jakwarĩĩria itharimo biu.

6. Ũnene bwa Mũrungu bũgatũretera ĩgiita rĩĩjĩte rĩrĩthongi mono

VIDIO: Mũcemo Jwa Ĩgiita Rĩĩjĩte Rĩĩthongi (4:38)

Thooma Zaburi 145:16, rĩu bwarĩĩrie kĩũria gĩkĩ:

• Nĩatĩa ũkwigua wamenya atĩ ĩgiita rĩĩjĩte Jehova akanyiria “into bionthe biria biri mwoyo . . . o kiria biendaga”?

NA NJĨRA ĨNKUĨ

Ũnene bwa Mũrungu bũkoojũria mworoto jwabu. Bũkagarũra nthĩgũrũ yonthe yee paradiso yũũjũri antũ babeega, barĩa bakathathayia Jehova kenya na kenya.

Gũcookera

• Nĩatĩa Ũnene bwa Mũrungu bũkatheria riĩtwa rĩa Jehova?

• Nĩkĩ tũũmba gwĩtĩkia atĩ Ũnenebwa Mũrungu bũkoojũria mawĩrane ja Bibiria?

• Nĩ mantũ jarĩkũ wĩrĩgĩĩrĩte mono kwona Ũnene bwa Mũrungu bũkĩũjũria?

CŨNKŨŨNA

Cũnkũũna Amagedoni nĩmbi.

“Ndwa ya Amagedoni Nĩmbi?” (Thooma intanetine)

Cũnkũũna mantũ jarĩa jagakarĩka ĩgiita rĩrĩa Jesũ aarĩĩtĩre “ukia bubwingi.”—Mathayo 24:21.

“Thĩĩna Ĩrĩa Nene Nĩmbi?” (Thooma intanetine)

Ona ũrĩa antũ ba nja bomba kũthũgaanĩria barĩ amwe itharimo bia ĩgiita rĩĩjĩte bia Ũnene bwa Mũrungu.

Ithũgaanĩrie Ũrĩ Paradiso (1:50)

Kĩrĩ rũgono, “Nĩndaciũragia Biũria Bibingĩ,” iritane ũrĩa mũregani wa gĩciaca oonere macookio ja biũria birĩa aaciũragia.

“Bibiria Nĩgarũraga Ũtũũro” (Mnara wa Mlinzi, Januarĩ 1, 2012)