KĨTHOOMO KĨA 36
Aria Mma Mantũne Jonthe
Gũtĩ muntũ ũtĩendete mũcoore ũkwaria mma. Jehova erĩgagĩĩra acoore baawe kinya bo barie mma. Ĩndĩ bũbũ tĩ bũbũũthũ nthĩgũrũne ĩjĩ yũũjũrĩte antũ batĩendete ũmma. Nĩatĩa tũgunĩkaga rĩrĩa tũkwaria mma mantũne jonthe?
1. Nĩ gĩtũmi kĩrĩkũ gĩkĩnene gĩa kwĩthĩrwa tũkĩaragia mma?
Rĩrĩa tũkwaria mma na antũ bangĩ, nĩtwonagia Jehova nĩtũmwendete na nĩtũmũtĩĩte. Riikana ũntũ bũbũ: Jehova naijĩ mantũ jonthe jarĩa tũthũgaanagia na kũthithia. (Ahibirania 4:13) Nonaga rĩrĩa twathuura kwaria mma, na akagwĩrĩrua ũntũ bũu. Rũteto rwawe rugaga: “Mumaramari nathuuragwa ni Mwathani, indi witho bwawe bugwurairwa baria baagirite.”—Njuno 3:32.
2. Nĩ na njĩra irĩkũ imwe tũũmba kwaria mma mũtũrĩrene jwetũ ntukũ o ntukũ?
Jehova endaga twaria na antũ bangĩ “mantu ja mma.” (Zekaria 8:16, 17) Kũu nĩ kuuga atĩa? Twĩthĩrwe tũrĩaria na antũ ba nja, ariti ngũgĩ bangĩ, ataana na arĩ-ba-baaba Akristũ, kana atongeeria ba thirikarĩ, tũtĩkwenda kwaria ũrongo kana kwejana nteto itĩ cia mma. Antũ endi ũmma batiiyaga kana bathithĩria antũ bangĩ mantũ ja wayia. (Thooma Njuno 24:28 na Aefeso 4:28.) Kinya nĩ barĩaga ũgoti bunthe bũrĩa bũkwendekana. (Aroma 13:5-7) Na njĩra iu na ingĩ inyingĩ, nĩtwendaga “gutuura turi na miitire imithongi mantune jonthe.”—Ahibirania 13:18.
3. Nĩatĩa tũgunĩkaga tontũ bwa kwaria mma?
Rĩrĩa twamenyeka nĩtwaragia mma, antũ bangĩ nĩbatwĩtĩkagia. Nĩ tũtethagia bangĩ kĩũthũranone kwigua barĩ na ũkaria, ta ũrĩa kwĩthagĩrwa gũkari kĩrĩ nja ĩrĩna wendo. Nĩtũgwĩragua kwĩthĩrwa na thamiri ĩnjega. Kwĩthĩrwa tũrĩ antũ bakwaria mma kinya kwomba ‘gukumithia uritani bwa Murungu, Mwonokia wetu,’ na gũgatũma antũ bangĩ benda gũtumĩkĩra Jehova.—Tito 2:10.
ĨNJA NKŨRŨKI
Ona ũrĩa Jehova aigagua rĩrĩa tũkwaria ũmma na ũrĩa tũgunĩkaga kuumania na ũntũ bũu, na wiritane ũrĩa ũũmba kwaria mma mantũne mwanya mwanya ũtũũrone bwaku.
4. Jehova nagwĩragua nĩ nkuma ya kwaria mma
Thooma Zaburi 44:21 na Malaki 3:16, rĩu bwarĩĩrie biũria bibi:
Kũringana na maoni jaaku, nĩkĩ tũtĩbuĩrĩte kũthũgaania twomba kwitha Jehova ũntũ kinya bũrĩkũ?
Ũrĩthũgaania Jehova aigagua atĩa rĩrĩa twathuura kwaria mma, kinya rĩrĩa bũrĩ ũntũ bũbũũmũ kũthithia ũu?
Rĩrĩa aana baria ũmma nĩbatũmaga aciari baao bakagwĩrua. Rĩrĩa kinya tuĩ twaria ũmma, nĩtũtũmaga Jehova akagwĩrua
5. Aria mma mantũne jonthe
Antũ babaingĩ bathũgaanagia gũtĩũmbĩka kwaria mma magiita jonthe. Ĩndĩ ona nĩkĩ tũbuĩrĩte kwaria mma magiita jonthe. Tega VIDIO.
Thooma Ahibirania 13:18, rĩu bwarĩĩrie ũrĩa tũũmba kwaria mma . . .
nja cietũ.
ngũgĩne kana cukuru.
mantũne jangĩ.
6. Nĩtũgunĩkaga rĩrĩa twaria ũmma
Magiita jamwe twomba kũgwatwa nĩ mathĩĩna tontũ bwa kwaria ũmma. Ĩndĩ ũmma nĩ atĩ, magiita jonthe nĩtũgunĩkaga rĩrĩa twaria ũmma. Thooma Zaburi 34:12-16, rĩu bwarĩĩrie kĩũria gĩkĩ:
Nĩatĩa kwaria ũmma gũtũmaga ũtũũro bwaku bwagĩra?
Akũrũ na ekũrũ barĩa bagũrene nĩbekagĩra inya ngũrano yaao nĩ ũntũ bwa kwaria ũmma
Ariti ngũgĩ barĩa baragia ũmma nĩbetĩkagua nĩ barĩa babandĩkĩte
Raia barĩa baragia ũmma nĩbethagĩrwa na riĩtwa rĩrĩega mbere ya atongeeria ba kĩthirikarĩ
ANTŨ BAMWE BAUGAGA: “Kaũrongo kaniini gatĩthũũki.”
Nĩkĩ ũgwĩtĩkia atĩ Jehova nathũũrĩte ũrongo bunthe?
NA NJĨRA ĨNKUĨ
Jehova arĩenda acoore baawe baarie ũmma mantũne jonthe jarĩa bakuuga na kũthithia.
Gũcookera
Nĩ na njĩra irĩkũ imwe tũũmba kwaria ũmma?
Kũringana na maoni jaaku, nĩkĩ tũtĩbuĩrĩte kũthũgaania atĩ twomba kwitha Jehova ũntũ kinya bũrĩkũ?
Nĩkĩ ũbuĩrĩte kwaria ũmma magiita jonthe?
CŨNKŨŨNA
Nĩatĩa aciari bomba kũritana aana baao kwaria ũmma?
Nĩatĩa tũgunĩkaga rĩrĩa twojũria mawĩrane jeetũ?
Ona kethĩra nĩtũbuĩrĩte kũgiita ũgoti kinya kethĩra bũtĩgũtumĩrwa bwega.
“Rĩ, No Mwanka Tũgiite Ũgoti?” (Mnara wa Mlinzi, Septemba 1, 2011)
Nĩmbi biatetherie muntũ mũrũme ũmwe ũrĩa ũtaaragia ũmma kũthithia ũgarũrũku ũtũũrone bwawe, na arambĩrĩria kũrita ngũgĩ itĩ cia wayia?
“Nĩndairitanĩre Atĩ Jehova Nĩwa Kĩao na Mũrekanĩri” (Mnara wa Mlinzi, Mĩi 1, 2015)