Rĩ, Nĩ Biatho Bionthe Birĩa Bikũngũagĩrwa Bigwĩragia Mũrungu?

Jehova nendaga tũgwĩrĩrua ũtũũro na kinya magiita jamwe, nendaga twĩthĩrwa na mantũ jagũkũngũĩra. Ĩndĩ-rĩ, nĩ thĩgũnkũ cionthe na ntukũ cia gũkũngũĩrwa igwĩragia Mũrungu? Nĩatĩa tũũmba kwonania wendo bwetũ kĩrĩ Jehova mantũne ta jau?

1. Nĩkĩ biatho bibingĩ birĩa bikũngũagĩrwa bitĩgwĩragia Jehova?

Womba kũrigara mono kũmenya atĩ biatho bibingĩ bĩtiumanĩtie na moritani ja Bibiria ĩndĩ, biumanĩtie na mantũ ja ũpagani. Biatho ta biu biomba kwĩthĩrwa bikĩgwatanagĩra na ndini ya ũrongo. Kinya biomba kwĩthĩrwa bikĩgwatanagĩra na mantũ ja irundu biithũũku, kana bikĩgwataga mbaru wĩtĩkio bwa kwonania atĩ mwoyo jũtĩkujaga. Biatho bimwe biumanĩtie na mantũ ja morogi kana wĩtĩkio bwa mantũ jegie mbaati. (Isaya 65:11) Jehova naete athathayia baawe mũkaana jũjũ: “Buciathurane nabo . . . na ningi bugatongeni gantu gakathuuku.”—2 Akorintho 6:17.a

2. Nĩatĩa Jehova aigagua bwegie biatho birĩa bikumithagia antũ?

Jehova natũkanagia tũtĩgatonye mũtegone jwa kwĩrĩgĩĩra “muntu.” (Thooma Jeremia 17:5.) Thigũnkũ imwe nikumithagia aathani kana ncamba cia ndwa. Ingĩ nitumagĩrwa gũkũngũĩra ntukũ ĩrĩa nthĩgũrũ yoonere ũciathi, kana into ta bendera. (1 Johana 5:21) Ingĩ nacio nitũmagĩrwa gũkũngũĩra mantũ ja gĩciaca kana mantũ ja wĩti na mbere matũũrene. Nĩatĩa Jehova omba kwigua kethĩra tũgakumia muntũ kana gĩkundi kĩnna, mono mono kĩrĩa kĩgwĩtithia mbere mantũ jarĩa jarĩ giutatĩ na mworoto Jwawe?

3. Nĩ mantũ ta jarĩkũ joomba gũtũma kĩatho kĩĩthĩrwa kĩthũũki?

Bibiria nĩmenagĩĩria mantũ ja “wogiti, na ja unyui, na ja ndwimbo iria itiagirite na ja ncobi.” (1 Petero 4:3) Biathone bimwe antũ nĩbaremagwa kwirigĩĩria na bakethĩrwa na mĩtugo ĩmĩthũũku. Nĩkenda ũcoore bwetũ amwe na Jehova bwĩta na mbere, nĩtũkũbatara gũciebania buru na mĩtugo ĩu ĩtĩagĩrĩte.

ĨNJA NKŨRŨKI

4. Regana na biatho birĩa bitĩkumithagia Jehova

Thooma Aefeso 5:10, rĩu bwarĩĩrie biũria bibi:

• Nĩ mantũ jarĩkũ tũbuĩrĩte kwirikithĩria rĩrĩa tũgũtua kethĩra tũgakũngũĩra kĩatho kĩnna?

• Nĩ biatho birĩkũ bikũngũagĩrwa naarĩa ũtũũraga?

• Ũrĩthũgaania biatho biu nĩbigwĩragia Jehova?

Ngerekano, ũraciũria nĩatĩa Mũrungu onaga gũkũngũĩra ntukũ cia gũciarwa? Gũtĩo Bibiria yonanĩtie mũthathayia wa Jehova agĩkungũagĩra ntukũ ya gũciarwa, ĩndĩ nĩyonanĩtie biatho biĩrĩ birĩa biakũngũĩrwe nĩ antũ batatumĩkagĩra Jehova. Thooma Kiambiriria 40:20-22 na Mathayo 14:6-10. Rĩu bwarĩĩrie biũria bibi:

• Nĩ mantũ jarĩkũ jang’uanene jaathithĩkire kĩrĩ biatho biu bia gũciarwa?

• Kũringana na mantũ jau jagweti Bibiriene, ũrĩthũgaania nĩatĩa Jehova aigagua bwegie ntukũ cia gũciarwa?

Amwe nou, womba gũciũria ‘Rĩ, kamma Jehova namakaga mbithĩrwe ngakũngũĩra ntukũ cia gũciarwa, kana biatho bingĩ birĩa bitiumanĩtie na Maandĩko?’ Thooma Kuuma 32:1-8. Rĩu, ũtege VIDIO na bwarĩĩrie biũria bibi bithingatĩte.

VIDIO: Thigũnkũ na Biatho Birĩa Bitĩgwĩragia Mũrungu (5:07)

• Nĩkĩ tũkũbatara kwirikithĩria mantũ jarĩa jetĩkĩrĩkaga kĩrĩ Jehova?

• Nĩatĩa tũũmba kũthithia ũu?

Ũrĩa tũũmba kũmenya kethĩra kĩatho kĩnna gĩtĩgwĩragia Mũrungu

• Rĩ, nĩ kiumanĩtie na ũritani bũtĩ bwa Kĩmaandĩko? Kenda ũmenya, cũnkũũna kaumo gakĩo.

• Rĩ, nĩgĩtũmaga antũ, ikundi, kana into ta bendera bikaewa ũkumio burĩa bitĩkũbatara? Nĩtũkumithagia Jehova nkũrũki ya mantũ jangĩ jonthe na tũgetĩkia atĩ nĩwe ũkathiria mathĩĩna ja nthĩgũrũ.

• Rĩ, mantũ jarĩa jathithĩkaga kĩathone kĩu nĩjetaga giutatĩ na mawaatho ja Bibiria? Nĩtũkũbatara kwimenyeera tũtĩgaakwe rũko nĩ biatho biu.

5. Tetheeria bangĩ gũtĩĩa jarĩa wĩtĩkĩtie

VIDIO: Taarĩĩria Wĩtĩkio Bwaku na Njĩra ya Ũũme (2:01)

Thooma Mathayo 7:12, rĩu bwarĩĩrie biũria bibi:

• Kũringana na mũstaarĩ jũu-rĩ, nũbuĩrĩte kwĩra antũ beenu ba nja barĩa batĩtĩkĩtie atĩ batĩbuĩrĩte gũkũngũĩra kĩatho kĩnna?

• Nĩatĩa ũũmba kũthithia nĩkenda ũrikithĩria antũ baaku ba nja atĩ kinya kethĩra ũtĩgũkũngũĩra kĩatho amwe nabo, nũbendete na nũbonaga barĩ ba gĩtũmi?

6. Jehova arĩenda twĩthĩrwa na kũgwĩrua

Jehova nakwenda twĩthĩrwa turĩna ĩgiita rĩa kũgwĩrua amwe na antũ ba nja na acoore. Thooma Mutumiiria 8:15, rĩu bwarĩĩrie kĩũria gĩkĩ:

• Nĩatĩa mũstaarĩ jũu jũkwonania Jehova nendaga twĩthĩrwa na kũgwĩrua?

Jehova endaga antũ baawe bethĩrwa na magiita jameega na bagwĩrĩrua ũtũũro barĩ amwe. Tega VIDIO nĩkenda wona ũrĩa twĩthagĩrwa na kũgwĩrua tũrĩ igomanone bietũ bia kĩmanthĩgũrũ.

VIDIO: Kwonania Ũgwatani Ũgeni Igomanone Bietũ bia Kĩmathĩngũrũ (5:40)

Thooma Agalatia 6:10, rĩu bwarĩĩrie biũria bibi:

• Rĩ, nĩtũkũbatara gũkũngũĩra biatho birĩa bijĩkeene mono nĩkenda tũthithĩria antũ bangĩ “jaria jaagirite”?

• Rĩrĩa ũkwejana kĩewa, nĩ ĩgiita rĩrĩkũ ũũmba kũgwĩrua nkũrũki—nĩ rĩrĩa ũkwaa muntũ kĩewa tontũ nĩ ntukũ ya kĩatho, kana nĩ rĩrĩa ũkũthithia ũu na wendi bwaku?

• Akũũjĩ babaingĩ ba Jehova magiita jamwe nĩbathithagĩria aana baao ũntũ bwa mwanya na kinya bakabaa biewa batĩĩrĩgĩĩrĩte. Kethĩra ũrĩna aana, nĩ mantũ ta jarĩkũ ja mwanya ũũmba kũbathithĩria?

NA NJĨRA ĨNKUĨ

Jehova arĩenda tũgwĩrĩrua igĩĩta rĩetũ amwe na antũ ba nja na acoore. Ĩndĩ kinya nakwenda tũtĩgakũngũĩre biatho birĩa bitĩmũgwĩragia.

Gũcookera

• Nĩ biũria birĩkũ tũũmba gũciũria nĩkenda tũmenya kethĩra kĩatho kĩnna gĩtĩgwĩragia Jehova?

• Nĩatĩa tũũmba gũtetheeria antũ ba nja na acoore kũmenya mũrũngamo jwetũ jwegie ntukũ cia gũkũngũĩrwa?

• Nĩmbi bigũgũtethia kũmenya atĩ Jehova nendaga tũgwĩrua na twĩthĩrwa na magiita ja kwigwĩria?

CŨNKŨŨNA

Cũnkũũna bimwe bia biatho birĩa Akristũ batĩkũngũagĩra.

“Nĩkĩ Akũũjĩ ba Jehova Batĩkũngũagĩra Biatho Bimwe?” (Thooma intanetine)

Ona itũmi binna birĩa bikwonania nĩkĩ biatho bia ntukũ cia gũciarwa bitĩgwĩragia Mũrungu.

“Nĩkĩ Akũũjĩ ba Jehova Batĩkũngũagĩra Ntukũ cia Gũciarwa? (Thooma intanetine)

Tega wone ũrĩa aana baniini barĩa bendete Jehova bomba kũmũgwĩria ĩgiita rĩrĩa kũrĩ na biatho.

Ũrĩ wa Gĩtũmi Methone ja Jehova (11:35)

Akristũ babaingĩ nĩbathuurĩte batĩkũngũĩra Krisimasi. Nĩatĩa baigagua bwegie ĩtua rĩu bathithĩtie?

“Nĩbonete Ũntũ Bũbwega Nkũrũki ya Krisimasi” (Mnara wa Mlinzi, Dicemba 1, 2012)