Levitiko

Hahelaḡa Taudia Taravatudia

21 Iehova ese Mose e hereva henia, eto, Hahelaḡa taudia, Aaron natuna, ba hamaorodia, idia ta ese ena hanua masena ta latanai e helaḡalaimu karadia ai basine dau kau; 2 varavarana mo latadiai: sinana, eiava tamana, eiava natuna, eiava tadikakana, 3 eiava taihuna hane-ulato rami-hebou latanai; badina be ia na varavarana, bona asi adavana, ia dainai baine dau kau. 4 A ena hanua masena ta latanai e helaḡalaimu karadia ai basine dau kau, badina be ia na ena bese lohiana. 5 Hahelaḡa taudia na kwaradia basie naudia, bona aukidia huidia basie utu heini, bona kopidia basie ivadia. 6 Edia Dirava enai bae helaḡa; edia Dirava ladana basie hahemaraia. Badina be boubou ḡaudia be idia ese lahi ai e hahelaḡadiamu, Iehova ena, bona edia Dirava ena flaoa idia ese e hahelaḡaiamu; taunabunai idia bae helaḡa. 7 Idia na ariara hahinedia eiava lebulebu hahinedia eiava diho hahinedia basie adavadia; badina be hahelaḡa tauna na helaḡa, ena Dirava enai. 8 Oi ese ia ba hahelaḡaia, badina be emu Dirava ena flaoa ia ese baine hahelaḡaia; bena emu ai baine helaḡa, badina be lau Iehova, umui ihahelaḡamui Diravana, na helaḡa.

9 Hahelaḡa tauna natuna hahinena baine lebulebu, bena ena lebulebu amo ia ese tamana baine hahemaraia, vada bae hamasea lahi ai.

10 Hahelaḡa tauna badana, tadikakana e biagudiamu tauna, dehoro helaḡana e horolaia tauna, e hahelaḡaia dabua helaḡadia baine dokilai tauna, ia ese huina basine ḡiḡi rohoroho, bona ena dabua basine dare. 11 Mase ta basine raka henia kahi; ena be tamana eiava sinana, to ia latanai e helaḡalaimu karadia ai basine dau kau. 12 Gabu helaḡana basine rakatania, ena Dirava ena gabu helaḡana basine hahemaraia; badina be ena Dirava ena dehoro helaḡana ese vada e hahelaḡaia. Lau binai Iehova.

13 Hane-ulato rami-hebou ta baine adavaia; 14 vabu eiava diho hahinena eiava vada e hamiroa hahinena eiava ariara hahinena basine adavaia. Hane-ulato rami-hebou ta, ena bese amo mo, baine adavaia; 15 unu amo natuna na basie hemarai ena bese taudia bogaragidiai; badina be lau Iehova ese vada na hahelaḡaia.

16 Iehova ese Mose ma e hereva henia, eto, 17 Aaron ini ba hamaoroa toma, baoto: Uru ta ai emu iduhu tauna ta bema mai bebeka-bebekana, ia na basine raka kahi mai, ena Dirava ena flaoa ihahelaḡana. 18 Badina be tau-anina mai bebeka-bebekana tauna na basine raka kahi mai: mata-kepulu tauna, eiava ae-hedairike tauna, eiava vairana eiava regena ta mai berona tauna, 19 eiava imana eiava aena e bero tauna, 20 eiava doru-laoho tauna, eiava tau kwadogi-herea eiava mata-gegeva tauna, eiava kopi-hemaihemai gorerena tauna, eiava kopina mai taohana tauna, eiava abona nadinadina e heala tauna. 21 Asi tauna ta Aaron ena iduhu amo mai bebeka-bebekana baine raka kahi mai, boubou ḡaudia lahi ai baine hahelaḡadia Iehova ena, eiava ena Dirava ena flaoa baine hahelaḡaia, totona. 22 Ena Dirava ena flaoa, helaḡa ḡauna bona helaḡa-herea ḡauna, baine ani diba; 23 a seseahu basine raka henia kahi, bona ihaboulaina patana basine raka henia kahi, badina be ia na mai bebeka-bebekana. Una dainai, ia na lauegu gabu helaḡadia basine hamirodia; badina be lau Iehova ese vada na hahelaḡadia.

24 Ini hereva iboudiai Mose ese Aaron mai natuna ida bona Israel taudia iboudiai e hamaorolaidia.