Metiu ese E Torea

24 Iesu na tempol amo e raka lasiva lalonai ena disaipol ese e hamaoroa tempol e haginia dalana baine itaia. 2 To ia ese e hamaorodia, eto: “Ini ḡau iboudiai o itamu, a? Na hamaoromui momokanimu, nadi ta na nadi ta latanai basine mia bona iboudiai bae heḡiḡi dobi.”

3 Iesu na Olive Ororona ai helaina ai, ena disaipol na ia dekena ela, e gwa: “Mani a hamaoromai, ini ḡau be edena nega ai bae vara? Edena toa ese baine hahedinaraia oi na vada o lou mai bona o nohomu?* Bona nega oromana dokona kahana toana be dahaka?”*

4 Iesu ese e haere henidia, eto: “Nahuamui ba toho, ta ese baine hakaumui kerere na garina, 5 badina be hutuma na lau ladagu ai baema, bona baeto: ‘Lau na Keriso,’ bena momo bae hakaudia kerere. 6 Umui ese tuari bona tuari sivaraidia bo kamonaimu. To basio gari, badina be ini ḡau do bae vara guna, a dokona be do vairai.

7 “Bona bese ta baine tore isi bese ta baine tuari henia bona gavamani ta ese gavamani ta baine tuari henia, bona gabu idauidau ai aniani na bae kwadoḡi* bona tano bae mareremarere. 8 Ini iboudiai na hisi matamana* mo.

9 “Taunimanima ese bae daḡedaḡe henimui bona bae alamui mase, bona lau ladagu dainai bese iboudiai ese bae inai henimui. 10 Danu, hutuma bae hekwakwanai, bona bae hetaotore* heheni bona bae heinai heheni. 11 Peroveta koikoi taudia momo danu bae tore isi bona hutuma bae hakaudia kerere. 12 Kara havara danu be badamu dainai, momo edia lalokau na be kerumu. 13 To baine haheauka ela bona dokona tauna na Dirava ese baine hamauria. 14 Bona Dirava ena Gavamani sivaraina namona na tanobada ibounai lalonai bae harorolaia, bese iboudiai ihadibalaidia, bena dokona vada baine kau.

15 “Una dainai, gabu helaḡana ai dika e havaraiamu ḡauna, peroveta tauna Daniel ese e gwauraia ḡauna na umui ese o itaiamu neganai, (Daniel ena hereva e duahiamu tauna baine laloparara na namo), 16 Judea ai e nohomu taudia na ororo bae heau lao. 17 Ruma guhina ai e nohomu tauna na basine diho ena ruma lalonai ena kohu baine abi helaoreana, 18 bona uma ai e ḡaukaramu tauna na ena ruma basine lou lao ena dabua iabina totona. 19 Unu negadiai, rogorogo hahinedia bona mara matamata hahinedia* madi ihabaidia! 20 Ba ḡuriḡuri loulou, emui laolao na keru negana eiava Sabati dinana ai basine vara, 21 badina be una nega ai hisihisi bada hereana baine vara, tanobada e hematama negana amo ema bona hari, hisi unuhetomana ta se vara, bona ma basine vara loumu. 22 Momokani, bema Dirava ese unu dina basinema hakwadoḡi, ta basinema roho mauri. To e abidia hidi taudia daidiai, unu dina na be hakwadoḡimu.

23 “Bema ta ese baine hamaoromui, ‘A itaia! Keriso na iniseniai,’ eiava, ‘Unuseniai!’ Basio abia dae. 24 Badina be Keriso koikoidia bona peroveta taudia koikoidia na bae tore isi, toa badadia bona hoa karadia bae hahedinarai, e abidia hidi taudia bae hakaudia kerere helaoreana. 25 Ba helalotao, lau ese umui vada na hadibamui. 26 Una dainai, bema taunimanima baeto, ‘A kamonai! Ia na taunimanima dia momo e nohomu gabuna ai,’ basiola. ‘A kamonai! Ia na daiutu lalonai,’ basio abia dae. 27 Kevaru na east kahana amo e maimu bona west kahana e hadiariamu heḡereḡerena, taunimanima Natuna baine lou mai bona baine noho* negana ai danu unu baine heto. 28 Mase tauanina e miamu gabuna ai, ugava na unuseniai e heboumu.

29 “Unu dinadia ai, hisihisi baine ore murinai, dina do baine dibura, hua danu basine diari, hisiu guba amo bae moru, bona guba ḡaudia na bae heude-heude. 30 Bena taunimanima Natuna toana na guba ai baine hedinarai; bona tanobada taudia iboudiai na mai lalohisihisidia ida kemedia bae pata, bona taunimanima Natuna bae itaia, mai siahuna bona mai hairaina ida guba oridia latadia amo bainema. 31 Bona ia ese ena aneru baine siaidia, mai kibi reḡena badana ida, bena idia ese e abidia hidi taudia na lai haniosi gabudia amo bae haboudia, guba dokona kahana amo bainela bona ma dokona kahana.

32 “Fig auna amo diba bavabi: Rigina matamatadia bona rauna e tubumu neganai, bo dibamu ḡau iboudiai bae tubu negana na vada kahirakahira. 33 Una heḡereḡerena, umui danu ini ḡau bae vara ba itadia neganai, ba diba ia na vada kahirakahira, iduara badinai gini. 34 Lau ese na hamaoromui momokanimu, ina uru do basine ore, ini ḡau iboudiai bae vara. 35 Guba bona tanobada bae ore, to lauegu hereva na basine ore.

36 “Una dina bona una hora na ta asi dibana, guba anerudia asi dibadia, Natuna danu asi dibana, a Tamana mo mai dibana. 37 Noa ena nega ai e vara heḡereḡerena, taunimanima Natuna baine lou mai bona baine noho* negana ai danu unu baine heto. 38 Badina unu dinadia ai abata do se kau neganai, taunimanima na e anianiva, e inuinuva, e headavava, ela bona Noa na bouti* ai e vareai dinana, 39 bona e varava ḡaudia na se lalodia ela bona Abata e kau bona iboudiai e hamasedia, taunimanima Natuna baine lou mai bona baine noho* negana ai danu unu baine heto. 40 Tatau rarua na uma ai bae ḡaukara, ta baine laohaia bona ma ta be baine rakatania. 41 Hahine rarua na witi ihamakohina nadina bae giroa, ta baine laohaia bona ma ta be baine rakatania. 42 Una dainai hanaihanai ba gima, badina be emui Lohiabada bainema dinana na asi dibamui.

43 “To ina na ba diba: Bema ruma tauna na mai dibana, hanuaboi ai henaohenao tauna be edena hora ai* bainema, ia na basine mahuta unu amo iena ruma ai henaohenao tauna na basine vareai. 44 Una dainai, umui danu ba heḡaeḡae, badina be asio laloamu horana ai taunimanima Natuna bainema.

45 “Hesiai tauna mai ena kamonai bona aonega, biaguna ese e abia hidi, nega korikori ai ena hesiai taudia adia aniani baine heni tauna be daika? 46 Bema biaguna na bainema bona baine itaia ia na unu e kara tomamu, una hesiai tauna na baine moale! 47 Lau ese na hamaoromui momokanimu, ia na biaguna ese baine abia hidi ena kohu iboudiai baine reḡudia.

48 “To bema una hesiai tauna na baine hahedinaraia ia na hesiai tauna dikana bona kudouna ai baineto: ‘Biagugu na se mai haraḡamu,’ 49 bena ia ida e ḡaukara heboumu hesiai taudia baine dadabadia bona kekero taudia ida baine aniani bona baine inuinu, 50 una hesiai tauna ese se laloamu dinana bona asi dibana horana ai biaguna bainema, 51 bena baine panisia dikadika bona koikoi taudia bogaraḡidiai baine atoa. Unuseniai ia na baine tai bona gadigadina baine hahedai.