Iobu

 2 Egu hereva a kamonaidia namonamo,

bona taumui ihalodia ḡaudia ai ba halaodia.

 3 Ba haheauka henigu, bena baina hereva;

egu hereva baina hadokoa murinai ma ba ḡonaḡonalaigu.

 4 A lau be taunimanima na maumauraidiamu a?

Dahaka dainai baina haheauka?

 5 A itagu, bena ba gari taku,

bona imamui amo udumui ba kou.

 6 Na haeromu negana ai daragu e dokomu,

bona tau-anigu e heude-heudemu.

 7 Dahaka dainai kara dika taudia na e maurimu ela bona e burukamu,

bona edia siahu na e bada e laomu?

 8 Natudia na vairadiai e gini tutuka-tutukamu,

bona e havaradia taudia danu idia matadiai.

 9 Gari na se miamu edia ruma ai,

bona Dirava ena hekwadi auna ta na latadiai se kaumu.

10 Edia boromakau maruanena ese nega iboudiai natuna e havaradiamu;

bona edia boromakau hahinena ese natuna e abidiamu, nega ta se mara dikamu.

11 Natudia karukarudia na e siaidia lasimu, mamoe serina na heto;

natudia na e mavarumu.

12 Tareko bona gitara anedia e abimu,

bona ivilikou reḡena e moalelaiamu.

13 Taḡa ai edia dina e ha-orediamu,

bona mai mainodia ida mase gabuna ai e dihomu.

14 Idia ese Dirava e hereva heniamu, e tomu: A rakatanimai,

asia uramu emu dala baia dibadia.

15 Siahu-idoinai Diravana be daika, bena ai ese ia isiaina baia lao heni?

Baia ḡuria be davana dahaka baia abia?

16 A itaia, edia taḡa na dia imadia ai a?

Kara dika taudia edia hahealo lauegu amo na dauha verevai.

17 Nega hida kara dika taudia edia lamepa e habodoamu,

eiava hahehisi na ediai e kaumu?

Nega hida Dirava ese ena badu ai e hahisidiamu?

18 Nega hida idia na rei kakoro lai ese e hodaia ohomu na heto,

eiava uit momona lai gubana ese e laohaiamu na heto?

19 Umui na o tomu “Dirava ese dika e habouamu, natudia edia”.

Benaini, davadia do baine henidia, lalodia na bae parara totona,

20 Sibodia matadia ese ihabua-taridia bae itaia;

Siahu-idoinai Diravana ena badu-ḡaraḡara do bae inua.

21 Edia helalo be dahaka, besedia edia,

edia mauri huadia bae ore negana ai?

22 Tau ta ese Dirava baine ha-aonegaia a?

Be, ia ese atai taudia na e hahemaoro henidiamu.

23 Tau ta na taḡa ai e masemu,

ena noho namo ai bona asi garina ai;

24 tau-anina na digara ese e hahonuamu,

bona turiana hidorona na se kaukaumu.

25 Ma ta be e masemu mai lauma-iditana ida;

nega ta namo se mamia toho.

26 Ḡau ai e hekure dihomu negana ai, raruosi na heḡereḡere,

bona uloulo ese e tahunidiamu.

27 A itaia, emui lalo-hadai na dibagu,

lau ihadikagu o lalo-hadailaimu ḡaudia.

28 Badina be umui na o tomu:

Lohia ena ruma be edeseni ai?

Kara dika tauna ena noho kalagana be edeseni ai?

29 Dala ai e laolaomu taudia na asio nanadaidia,

bona edia hereva asio abi dae a?

30 Idia na e tomu kara dika tauna na hahehisi dinana ai e maurimu,

bona badu dinana ai e roho maurimu.

31 Daika ese ia vairanai ena dala e gwauraia hedinaraiamu,

bona ena kara davana e heniamu?

32 Gara e huaia laomu negana ai

ena guri na bae gimaia.

33 Koura tanona mamina na namo ienai;

taunimanima iboudiai na ia murina amo e laomu,

e gunalaiamu taudia danu na diaḡau duahi-duahi.

34 Hereva asi anidia amo taugu ede bae haloa toma?

Emui haere ai ḡau ta se miamu, a koikoi mo.