DAHAKA BAITA KARA BEMA KOHU DAVADIA E DAEMU?
Harihari Bada Karana Ba Hahedinaraia
Bema kohu davadia e daemu dainai o hekwarahimu, reana bo mamiamu harihari bada karana ba hahedinaraia na auka. To, harihari bada karana ese be durumumu nega unu bamodia bo haheaukalaimu. Ena be harihari bada karana bo hahedinaraiamu, to moni taina bavatoa tabe diba.
DAHAKA DAINAI UNA NA MAI ANINA BADA?
Dala idauidau ai harihari bada karana ta hahedinaraiamu neganai, ta moalemu ena be ta henimu ḡauna na maraḡi. Diba bada taudia haida na e gwaumu, harihari bada karana ese tauanida bona eda lalohadai na be duruamu. Heḡereḡere, lalohekwarahi, blood pressure, bona tauani hisidia ma haida be hamaraḡidiamu. Danu, bo mahuta namonamomu.
Bema haida ta durudiamu, moni eiava ḡau ma haida ai, ita baita dabumu negadiai heduru na baita davari dibamu. Howard, England ai e nohomu tauna ta na e gwa: “Haida idurudia bona harihari bada karana na dala idauidau ai a hahedinaraiamu dainai, adavagu ida a dabumu neganai heduru na a abi haraḡamu.” Momokani, mai kudoudia idoinai ida harihari bada karana e hahedinaraiamu taudia ese edia kara davadia na se lalomu. To, e laloamu ḡauna na tura korikoridia, dabu negadiai mai edia ura bada ida e hedurumu.
BA KARAIA DIBA ḠAUNA
Dekemu ai miadia ḡaudia na ba hari. Bema dekemu ai miana ḡauna na dia bada, to dounu ḡau ta na bo hariharilaia dibamu, ena be una na tea kavakava. Duncan mai ena ruma bese ida na Uganda ai e nohomu. Idia na ogoḡami taudia, to idia ese harihari bada karana na e laloa badamu. Duncan na e gwa: “Sunday iboudiai, adavagu ida ta a boiriamu emai ruma ai tea kavakava a inumu. Haida ida a hebamomu karana na a moalelaiamu.”
Momokani, ba lalo namonamo guna, gabe amo haida ba harihari henidia. Dia namo emu femli asi edia ḡaudia ba hariharilai.—Job 17:5.
Ina ba tohoa: Ta ba boiria tea kavakava taina baine inua. Bema kohu haida na so ḡaukaralaimu, namona na bae ḡaukaralai diba taudia ba henidia.
Dala ma haida ai ba harihari. Harihari ḡaudia haida na basio hoidiamu. Heḡereḡere, eda nega bona goada baita heni, haida baita durudia totona. Hahegoada herevadia danu harihari ḡauna ta. Una dainai, haida ba hamaorodia oi ese idia na o lalodiamu bona o lalokau henidiamu.
Ina ba tohoa: Haida ba durudia edia ruma ḡaudia ba kara eiava stoa lao ai ba durudia. Turamu ta enai kadi ta ba torea eiava teks meseij ba siai, ena be hereva kwadoḡina ta mo ba gwauraia.
Bema dala idauidau ai harihari bada karana bo hahedinaraimu, emu mauri na bo moalelaiamu.