November

Iehova baita hesiai heniamu neganai, Iehova ese Adam bona Heva e haboio ḡaudia iboudiai, mauri hanaihanai danu, be henidamu. Adam bona Heva edia lalokau Iehova enai na asie hagoadaia dainai, Ia na asie badinaia. Iehova ese maoromaoro se hamasedia dainai, e mauri daudau bona natudia e havara bona sibodia ese natudia bae naridia daladia e abi hidi. Adam bona Heva edia abi hidi amo e vara ḡaudia ese e hahedinaraia, Iehova e dadaraia na kavakava karana. Natudia roboana ese tadina e alaia mase, una nega amo taunimanima na e daḡedaḡeva bona sibodia edia namo e lalova. (Gen. 4:8; 6:​11-13) To Iehova na dala ma ta ai, Adam bona Heva natudia​​—e urava Ia bae hesiai henia taudia​​—e hamauridia. (Ioa. 6:​38-40, 57) Iehova ena haheauka bona lalokau bo dibamu neganai, emu lalokau ia enai na be goadamu. Bona basio uramu Adam bona Heva edia kara ba tohotoho, to Iehova enai emu mauri bo gwauhamatalaiamu. w19.03 2 par. 3; 4 par. 9

Haida edia hemami baita lalo bada totona, namona na eda ruma bese taudia bona tadikaka taihu edia hekwakwanai baita lalopararalai toho. Kongrigeisin ai matamata taudia, gorere taudia, burukadia bona edia lalokau taudia e mase dainai e lalohisihisimu taudia baita lalodia bada. Baita sekedia idia nanamo eiava. Edia hemami e herevalaimu neganai baita hakala namonamo. Bona dala idauidau ai baita durudia bae laloparara edia hisihisi na ta mamimu. Unu baita kara tomamu neganai, ita na lalokau korikorina ta hahedinaraiamu. (1 Ioa. 3:18) Haida ta durudiamu neganai, namona na edia hemami baita lalo danu. Dahaka dainai? Badina taunimanima ese edia hekwakwanai e haheaukalaimu daladia na idauidau. Haida be e uramu edia hekwakwanai bae herevalai, a haida na asie uramu bae herevalai. Una dainai ta uramu baita durudia, to idia ihahemaraidia henanadaidia na basita gwaurai. (1 Tes. 4:11) Haida ese edia hemami e herevalaimu neganai, reana e gwauraimu ḡaudia haida na basita abi daemu. To, namona na baita laloparara una na edia hemami e gwaurai hedinaraimu. Hereva ikamonaina ai baita haraḡa to hereva igwauraina ai basita haraḡa.​​—Mat. 7:1; Iak. 1:19. w19.03 19 par. 18-​19

Taunimanima vairadiai hereva momokani o uramu ba gwauraia neganai o garimu, a? Nehemia ba laloa. Ia na king ta ena ruma ai e ḡaukarava. Nehemia toana na e lalohisihisiva badina e kamonai Ierusalem maḡudia bona ikoukoudia na didika. (Neh. 1:​1-4) King ese e nanadaia se moalemu badina baine gwauraia neganai, ena gari mamina mani a laloa. Nehemia na maoromaoro e ḡuriḡuri bena king e haere henia. Una dainai, king ese Dirava ena taunimanima e durudia. (Neh. 2:​1-8) Danu Iona ba laloa. Iehova ese e noia Nineve taudia baine haroro henidia, to Iona na e gari dainai hanua idauna ta ela. (Iona 1:​1-3) To Iehova ese e durua dainai, Iona na ena ḡaukara e haḡuḡurua. Bona e gwaurai herevadia ese Nineve taudia na e durudia. (Iona 3:​5-10) Nehemia sivaraina ese e hadibadamu, do asita haere neganai baita ḡuriḡuri na mai anina bada. Bona Iona sivaraina ese e hadibadamu, Iehova ese baine duruda diba ia baita hesiai henia totona, herevana gari ese baine butuda tao. w19.01 11 par. 12

Eda mauri lalonai Baibul ena hereva momokani ta badinaiamu neganai, eda hebamo karana turada bona varavarada ida danu e idaumu. Dahaka dainai? Iesu na ena hahediba daidiai e ḡuri­ḡuri neganai, eto: “Hereva momokani ai ba hahelaḡadia: emu hereva na hereva momokani.” (Ioa. 17:17) “Ba hahelaḡadia” anina ma ta na “ba idau.” Hereva momokani ta abia daemu neganai, eda lalohadai bona kara na e idaumu ina tanobada taudia edia amo. Ta abi daemu ḡaudia na idau dainai nega haida e laloda kereremu. Baibul ena taravatu ta badinamu. Ena be asita uramu baita heiriheiri, to turada haida bona varavarada ese basie bamodamu bona eda abidadama dainai be inai henidamu. Asita daradaramu, badina Iesu na eto: “Ruma taudia ese ruma biaguna bae inai henia.” (Mat. 10:36) To ma eto, baita davari hahenamodia ese baita haboio ḡaudia na be hereadiamu. w18.11 6 par. 11

Aposetolo Paulo ese tadikakana e hanamodia dalana na edia kara e herevalai. Dirava e ḡuriḡuri heniava neganai idia daidiai e tenkiuva. Danu e tore henidia neganai ena hahenamo herevadia e gwaurai. Roma 16:​1-15 ai Paulo ese Kristen tadikakadia 27 ladadia e gwaurai. Paulo ese Priskila bona Akula e herevalaidia neganai e gwa, idia na ia dainai “mokona e mase,” bona Foibe e herevalaia eto, ia ese “hutuma vada e durudia,” Paulo danu. Ia ese e ḡaukara goadagoadava tadikakadia bona taihudia na e hanamodia. (Roma 16:​1-​15) Paulo na mai dibana tadikakana bona taihuna na dia ḡoḡoevadae, to ia ese edia kara namodia e herevalai. Mani a laloa, ena revareva na kongrigeisin ai e duahia neganai, unu tadikaka bona taihu na e hagoadadia. Una dainai, ta dibamu edia hetura karana Paulo ida na e goada. Emu kongrigeisin taudia edia hereva eiava kara namodia dainai, hanaihanai o hanamodiamu, a? w19.02 16 par. 8-9

Dirava baita badinaia totona baita ḡoevadae be namo, a? Ita na dia ḡoevadae tauda bona nega momo ta kereremu. Basita lalohekwarahi, badina Iehova ese eda dika na se lalotaomu. Baibul na e gwaumu: “Iehova e, kara dika boma lalo tao, Ḡaubada e, daika bema gini?” (Sal. 130:3) Ia na mai dibana ita na dia ḡoḡoevadae, bona eda dika na e gwautaomu. (Sal. 86:5) Danu, Iehova na mai dibana eda goada na mai hetoadia, bona se doridamu basita kara diba ḡaudia baita kara. (Sal. 103:​12-14) Iehova ena hesiai taudia ese ia bae badinaia totona lalokau na mai anina bada. Namona na mai kudouda idoinai ida Tamada guba ai baita lalokau henia bona ia sibona baita tomadiho henia. Bema unu baita kara tomamu, hahetoho negadiai danu Dirava baita badinaiamu. (1 Sis. 28:9; Mat. 22:37) Mai dibada Iehova ena taravatu na mamaoro, bona laloda vada ta hadai Tamada guba ai baita hamoalea. Ia ta lalokau heniamu dainai, abi hidi ta uramu baita kara neganai iena ura baita atoa guna. Unu amo baita hahedinaraia ita na Dirava ta badinaiamu. w19.02 3 par. 4-5.

Kara maoromaoro ibadinana ena namo ta itaiamu neganai, eda abidadama na e goadamu. (Iak. 1:​2, 3) Iehova lalona ta hamoaleamu dainai e gwauraidamu natuna neganai, ita danu ta ura dikadikamu ia baita hamoalea. (Her. 27:11) Hahetoho negadiai baita hahedinaraia ita na dia lalo-rua ai Tamada lalokauna ta hesiai heniamu. (Sal. 119:113) To, mai kudouda ibounai ida baita hahedinaraia ita na Iehova ta lalokau heniamu, ena taravatu ta badinamu bona iena ura ta karaiamu. (1 Han. 8:61) Nega haida baita kereremu, a? Oibe, badina ita na dia ḡoevadae. Bema ta morumu, King Hesekia ena haheitalai baita laloa. Ia na kerere haida e kara. To e helalo-kerehai bona mai ‘lalona idoinai ida’ Iehova e hesiai henia. (Isa. 38:​3-6; 2 Sis. 29:​1, 2; 32:​25, 26) Namona na Satana ena lalohadai iboudiai baita dadarai. Iehova baita noia ‘lalo-parara baine henida,’ bona Iehova baita badinaia hanaihanai.​—1 Han. 3:9; Sal. 139:​23, 24. w19.01 18-​19 par. 17-​18

Hebou ai ta haeremu neganai ita siboda danu heduru ta abimu. (Isa. 48:17) Edena dala ai? Ḡau ginigunana na, bema ta uramu haere ta baita heni, baita heḡaeḡae namonamo. Baita heḡaeḡae namonamomu neganai, Dirava ena Hereva baita lalopararalaia namonamomu. Unu amo ta dibamu ḡaudia na baita badinamu. Ḡau iharuana na, hebou ai ta haeremu dainai hebou na baita moalelaiamu. Ḡau ihatoina na, ta hekwarahi haere ta heni dainai, eda haere na dounu baita lalotaomu. Danu, eda abidadama ta herevalaiamu neganai Iehova ta hamoaleamu. Ta diba momokanimu Iehova na hebou ai eda haere e hakala heniamu bona eda hekwarahi na e laloa badamu. (Mal. 3:16) Ia ihamoalena totona ta hekwarahimu neganai e hanamodamu, una ese e hahedinaraiamu ita na e laloda badamu. (Mal. 3:10) Momokani, hebou ai baita haere badidia namodia na momo. w19.01 8 par. 3; 9-​10 par. 7-9

Iehova na mai aonegana ida ena hesiai taudia e durudiamu. Ia na taravatu momo herea se henidamu, to e hadibadamu iena lalokau baita tohotohoa. Ia na e uramu iena hahekau herevadia baita badina bona dika baita inai henia. Iesu ese ena Ororo Harorona ai e gwaurai herevadia ese e durudamu taunimanima e kara dikamu badidia baita lalopararalai totona. (Mat. 5:​27, 28) Keriso na Dirava ena Basileia Pavapavana dainai, tanobada matamatana ai dounu be hadibadamu, unu amo ia heḡereḡerena kara maoromaoro bona taravatu ḡoevadia baita ura heni. (Heb. 1:9) Danu be durudamu tauanida bona darada bae ḡoevadae. Mani a laloa, kara dika ena hisihisi basio mamia loumu. Bena dokonai, Iehova ese e gwauhamatalaia “ura-kwalimu herea-daena” bo moalelaiamu. (Roma 12:9) Tanobada matamatana ai eda ura kwalimu na dounu mai hetoana. Una dainai bema Dirava ena lalokau baita tohotohoamu eda ura kwalimu baita moalelaiamu.​​—1 Ioa. 4:​7, 8. w18.12 23 par. 19-​20

Israel tauna ta ese ena headava baine hadokoa diba bema baine davaria adavana na “kara mirona ta” e karaia. Taravatu ese “kara mirona” edehetomana na se gwauraia. To reana una na hemarai bada baine havaraia karana ta. (Deu. 23:14) Iesu ena negai Iuda taudia momo na badi idauidau daidiai edia headava e hadokova. (Mat. 19:3) Asita uramu edia kara baita tohotoho. Peroveta tauna Malaki ese Dirava ena lalohadai headava ihadokona karana ai e herevalaia. Una negai, tatau haida na ‘eregabedia ai e adavadia hahinedia’ e rakatanidiava, bona kaivakuku e tomadiho henidiava kekenidia e adavadiava. Malaki ese Dirava ena lalohadai na ini e herevalaia toma: “Hahekoho na na inai heniamu.” (Mal. 2:​14-16) Dirava ese headava ginigunana e hamatamaia negana amo ena lalohadai na se idau, eto: “Tau ese . . . adavana baine badinaia, raruosi na anidia tamona ai baela.” (Gen. 2:24) Iesu ese Tamana ena lalohadai e abia dae, badina eto, “Dirava ese vada e hahekapudia taudia na taunimanima ese basie hapararadia.”​​—Mat. 19:6. w18.12 11 par. 7-8

Tadikaka bona taihu haida na edia noho daladia heḡereḡere dainai gabu daudaudia e laomu. Edia lalohadai na peroveta tauna Isaia heḡereḡerena. Iehova e henanadai, “Daika baina siaia? Daika na ai daimai ai bainela?” neganai, ia na eto: “Lau o ina, a siagu.” (Isa. 6:8) Emu noho dalana be heḡereḡere bona o uramu Dirava ena orea ba durua, a? Haroro bona hahediba ihalaodia ḡaukarana ai, Iesu na eto: “Uma biaguna ba noia, ia ese iutuna taudia haida ma baine siaidia, ena uit bae utua.” (Mat. 9:​38) Pablisa dia momo gabuna ta ai painia ḡaukarana ba karaia diba, a? Eiava ta ba hagoadaia diba unu baine kara toma, a? Tadikaka bona taihu momo na e laloamu, Dirava bona dekeda taudia ilalokau henidia karana baita hahedinaraia dalana namona ta na, pablisa dia momo gabudia eiava teritoridia ai painia ḡaukara baita karaia. Emu hesiai ḡaukara ba habadaia daladia haida o lalomu, a? Unu bo kara tomamu na mai moalena. w18.08 27 par. 14-​15

Evanelia Bukadia ese e sivarailai ḡaudia amo Iehova ena lalohadai kohu ai ta dibamu. Dirava sibona ese tanobada ai Natuna bae naria taudia e abidia hidi​​—idia na dia kohu momo taudia. (Lev. 12:8; Luka 2:24) Iesu e vara neganai, Maria ese “boromakau edia aniani patana ai e kurea, badina be henitao rumana lalonai asi gabuna.” (Luka 2:7) Iehova bema ura neganai, Natuna na noho gabuna namona ta ai bema vara. To, Iehova ena ura badana na, ia itoma diho henina karana e laloa bada ruma besena ese Iesu bae naria. Iesu e vara sivaraina amo Iehova ena lalohadai kohu ai ta dibamu. Tama sina haida na e uramu natudia na kohu namodia bae habou, ena be mai dibadia una ese natudia edia hetura karana Dirava ida na baine hadikaia diba. To Iehova ese ia baita hetura henia karana na e laloa badamu. Iehova ena lalohadai o abia daemu, eiava? Emu kara ese dahaka e hahedinaraiamu? w18.11 24 par. 7-8

Dirava na iseda moale badina, bona e uramu baita moale. (Deu. 12:7; Koh. 3:​12, 13) To, ina tanobada ai mauri na asita moalelaiamu. Dahaka dainai? Lalometau e havaramu ḡaudia, heḡereḡere eda lalokau tauna ta e masemu, ta orea amo e atoa sirimu, ta ena headava e dikamu eiava ena moni ḡaukara amo e hadokoamu neganai asita moalemu. Ruma bese lalonai heiriheiri bona hepapahuahu karadia ese noho namo baine hadikaia diba. Ḡaukara bona sikuli ai bamoda ese e kirikirilaidamu, eda abidadama dainai e hahisidamu, eiava dibura rumana ai e atodamu, bona eda gorere e badamu bona se namomu, eiava ta lalometaumu neganai asita moalemu. To, Iesu Keriso, “moale bona Siahu Bada Tauna,” ese taunimanima na tauhalo e henidiamu bona e hamoalediamu. (1 Tim. 6:​15, NWT; Mat. 11:​28-30) Baita moale badidia haida na Iesu ese ena Ororo Harorona ai e herevalai, ena be Satana ena tanobada dikana ai hekwakwanai idauidau ta davarimu. w18.09 17-18 par. 1-3

Hereva momokani dainai, Baibul ena taravatu e utumu kastom karadia idadaraidia na mai hekwarahina. (Her. 23:23) Haida ese unu bae dadarai na dia auka, to ma haida na e hekwarahimu badina edia ruma bese, e ḡaukara heboumu taudia, bona turadia e lalodiamu. Heḡereḡere, haida na varavaradia e masemu neganai, vaevae e karamu kastom karadia ai na asie vareaimu dainai edia bese ese e badu henidiamu. Lalogoada karana e hahedinaraiamu taudia edia haheitalai ese bae duruda diba ḡau haida baita haidau. Efeso ai Kristen taudia matamatadia be dahaka e kara babalau karadia bae rakatani bona hereva momokani bae badinaia totona? Baibul na eto: “Edia buka e habou, taunimanima iboudiai vairadiai e gabu. Buka davadia e hagau, davadia silver monidia gerebu ima.” (Apos. 19:​19, 20) Unu abidadama Kristen taudia na edia mauri e haidau dainai hahenamo momo e abi. w18.11 7 par. 15-​16

Israel taudia na Ioridane amo e raka hanai murinai, Iosua ese tau ta mai ena dare ida e hedavari henia. Una tau na “Iehova ena tuari oreana lohiana,” vada e heḡaeḡae Dirava ena taunimanima baine durudia. (Ios. 5:​13-15) Ieriko hanuana bae hadikaia herevana na aneru Igunalaidia Tauna ese Iosua e hamaorolaia. Matamanai, una hereva bae abia dae na auka. Heḡere­ḡere, Iehova ese Iosua e haḡania tatau iboudiai baine peritomedia, una anina na idia na dina haida lalodiai do basie tuari. Una be nega maorona unu tatau bae peritomedia, eiava? (Gen. 34:​24, 25; Ios. 5:​2, 8) Unu Israel tuari taudia na reana e lalova edia ruma bese be ede bae gimadia toma bema inaidia na edia kamepa ai bae vareai. To haraḡa herea, sivarai e kamonai Ieriko na “e hekou ahu, Israel taudia daidiai.” (Ios. 6:1) Una ese edia abidadama Dirava ena hahekau dalana ai na e hagoadaia. w18.10 23 par. 5-7

Edena dala ai Paulo ena manau karana baita tohotohoa? Ginigunana na, Iehova ena goada amo ta haḡuḡurumu ḡaudia daidiai haida ese bae imodaida urana baita dadaraia na namo. Siboda baita henanadai: ‘Na haroro henidiamu taudia be ede na lalodia tomamu? Lau ese taunimanima haida na inai henidia kavamu, a?’ Tanobada heḡeḡemadai Iehova ena Witnes na edia teritori ibounai lalonai sivarai namona bae kamonai kudou namo taudia e tahudiamu. Nega haida, e hekwarahimu taunimanima ese se lalodia badamu taudia edia gado bona mauri dalana bae dibaia. Unu Witnes taudia na se lalomu idia ese ma haida na e hereadia. To, e uramu taunimanima ta ta bae lalopararalaidia bena Basileia sivaraina amo kudoudia bae hamarere. w18.09 5 par. 9, 11

Roma taudia ese Iuda e hamasea. To, Iuda taudia ma haida na mai edia ura ida politikol Mesiana ta ena mai e nariava. E laloava una Mesia bainema neganai, edia bese baine hanamoa bona Roma edia iḡui amo baine ruhadia. (Luka 2:38; 3:15) Momo na e abia daeva Mesia ese tanobada ai basileia ta na Israel ai baine haginia. Una baine vara neganai, gabu idauidau ela Iuda taudia momo na bae lou edia hanua. Nega ta Ioane Bapatiso ese Iesu e nanadaia: “Be maimu tauna na oi, eiava idauna ta baita naria?” (Mat. 11:​2, 3) Reana Ioane na e urava baine diba ma ta ese Iuda taudia e larova ḡaudia baine haḡuḡuru diba eiava. E toreisi lou tauna Iesu ida Emausa dalana ai e hedavari hahediba rarua danu, e tomava Mesia ese hahemauri baine havaraia. (Luka 24:21) Gabeai, Iesu na ena aposetolo ese e nanadaia: “Lohiabada e, basileia vada ina nega ai Israel ba henia lou eiava?”​​—Apos. 1:6. w18.06 4 par. 3-4

Iehova ena taunimanima ihabadelaidia herevadia ta kamonaimu neganai, baita henahua toho na namo. Ba helalotao, Satana na Dirava ena hesiai taudia e habadelaidiamu tauna. (Apok. 12:10) Una dainai, Iesu na eto, inaida ese ita na ‘bae gwau dika henida koikoi.’ (Mat. 5:11) Bema una hereva baita laloa badamu, Iehova ena taunimanima ihadikadia herevadia baita kamonaimu neganai basita daradaramu. Turamu bona mai dibamu taudia ediai e-mail eiava teks meseij isiaidia karana o moalelaiamu, a? Bema oibe, nius ihalasina oreadia amo sivarai matamatana ta o itaiamu eiava ekspiriens ta o kamonaimu neganai, reana bo uramu oi ese una sivarai ba halasia guna, nius e gwauraimu tauna heḡereḡerena. To, e-mail eiava teks meseij ta do so siaia neganai, sibomu ba henanadai: ‘Lau be mai dibagu baina halasia herevana be momokani, a? Sivarai ibounai mai dibagu, a?’ Bema asi dibamu, tadikakada bogaraḡidiai hereva koikoidia bo halasi dibamu. Bema o daradaramu, basio siaia. w18.08 3 par. 3; 4 par. 6-7

Iesu na e uramu eda hariharibada karana amo moale baita davaria. Taunimanima momo ese hariharibada karana na e laloa badamu. Momokani, taunimanima iboudiai ese eda hariharibada karana na asie laloamu, to una kara bae laloa neganai, idia danu una kara bae hahedinaraia diba. Una dainai hariharibada karana na ba hahedinaraia hanaihanai, ena be taunimanima ese bae laloa bada eiava lasi. Emu hariharibada karana ese anina namona baine havaraia diba. Hariharibada taudia na se lalomu e henimu ḡaudia heḡereḡeredia bae abi. Iesu eto: “Aniani ba dabaraia negana ai, ogoḡami taudia bona anina-doko taudia bona ae-hedairike taudia bona mata-kepulu taudia ba vavedia; unu amo vada ba namo, badina be idia na asi edia kohu bena basie hadavaia.” (Luka 14:​13, 14) Baibul na eto: “Ani gaga-isi tauna na bae hanamoa.” Ma eto: “Ogoḡami taudia e lalodiamu tauna na namo [“e moalemu,” NWT].” (Her. 22:9; Sal. 41:1) Momokani, eda kohu amo haida ta durudiamu neganai ta moalemu. w18.08 21-​22 par. 15-​16

Hari ina negai, sivarai korikoridia idibadia bona ihaerodia namonamo karana na mai hekwarahina, badina sivarai na kahadia haida mo ta kamonaimu, bona ita na dia ḡoevadae tauda. To dahaka ese baine duruda diba? Namona na Baibul ena hahekau herevadia baita diba bona baita badina. Una hahekau herevana ta na, bema sivarai korikorina do asita kamonai neganai baita haere haraḡamu, una na kavakava karana bona mai hemaraina. (Her. 18:13) Baibul ena hahekau herevana ma ta ese e hadibadamu, hereva iboudiai na basita abi dae kava. (Her. 14:15) Bona, ena be laḡani momo Dirava ta hesiai henia, to baita henahua toho bona siboda eda laloparara basita abidadama henia. Baibul ena hahekau herevadia ese be gimadamu bema sivarai korikoridia baita dibamu amo lalohadai maorodia baita abimu bona abi hidi maorodia baita karamu. w18.08 7 par. 19

Ranu bapatisona amo, taunimanima vairadiai ta hahedinaraia ita na Iehova ena, bona mai eda ura ida ia baita badinaia. Iesu e bapatiso neganai unu e kara toma, vaitani Iehova e hamaoroa: “Egu Dirava e, oiemu ura ikarana na moalelaiamu.” (Sal. 40:​7, 8) Iesu e bapatiso neganai, Iehova ena hemami be ede bamona? Baibul na eto: “Iesu e bapatisoa; bena ranu amo e dae kau negana ai na guba e parara, bena ia ese Dirava ena Lauma e itaia, pune na heto e diho, ia tubuana ai e kau. Bona gado ta guba amo e boi dobi, eto, Lau Natugu binai, egu lalokau; lau ese ia na lalo namo heniamu.” (Mat. 3:​16, 17) Ena be Iesu na vada Iehova ena, to Iehova na e moale badina e itaia Natuna na mai ena ura ida Ia e badinaia. Iehova ese eda mauri ta gwauhamatalaia karana danu e moalelaiamu, bona baine hanamoda.​​—Sal. 149:4. w18.07 23 par. 4-5

Mose ese ina hereva “baia” e gwauraia neganai, ia na ia bona Aaron e hegwaurai. Mose ena hereva ese e hahedinaraia ia ese Iehova, una hoa karana e karaia Tauna korikorina, na se matauraia. Salamo 106:​32, 33 ena hereva ese una e hamomokania, eto: “Meriba ranudia badidiai idia ese e habadua, bona Mose na siriana e reaia, idia daidiai; badina be idia daidiai ia lalona e turiariki, bena hereva kavakavadia e gwaurai.” (Num. 27:14) Mose ese ena kara amo Iehova na se hanamoa. Iehova ese Mose bona Aaron e hereva henidia, eto: “Egu hereva o utua.” (Num. 20:24) Una na kara dika badana! Guna, Israel besena na edia gwau-edeede karana dainai Iehova ese e hamaorodia Kanaan tanona ai basie vareai. (Num. 14:​26-30, 34) Mose danu ena gwau-edeede karana dainai, Iehova ese unu e hahemaoro henia toma na maoro. Ia na Gwauhamata Tanona ai se vareai. w18.07 14 par. 9, 12; 15 par. 13

Bema o laloamu ba karaia ḡauna ta na maoro, to o dibamu una ese tadikaka ta baine hahekwakwanaia diba, oi be mai emu ura ida una ba dadaraia, a? Oibe. Tadikakada haida na hereva momokani do asie diba neganai kekero karana e manadalaia, to hari lalodia e hadai una bae dadaraia. Momokani, asita uramu baita karaia ḡauna ta dainai tadikakada ta ese ena kara gunana baine lou henia. (1 Kor. 6:​9, 10) Una dainai, bema tadikakada na basine ura kekero muramurana baine inua to baita doria, una na dia lalokau karana. Timoteo na laḡanina 20 heḡereḡerena ai e ura bae peritomea, unu amo baine haroro henidia Iuda taudia basine hahekwakwanaidia, herevana una na mai hisihisina. Iena kara na aposetolo Paulo heḡereḡerena. (Apos. 16:3; 1 Kor. 9:​19-23) Timoteo heḡereḡerena, mai emu ura ida ḡau haida o dadaraimu ma haida ba durudia totona, a? w18.06 18-​19 par. 12-​13

Iehova ese kudou maoro taudia na e veridia maimu, ia e tomadiho heniamu besena ai bae vareai totona. (Ioa. 6:44) Hereva momokani asi dibana tauna ta na nega ginigunana bo hedavari heniamu neganai, ia be mai dibamu namonamo, a? Reana ladana bona toana mo mai dibamu. A Iehova e dibaia bona e lalokau heniamu tauna na nega ginigunana bo hedavari heniamu na dia unuheto. Ena be ena mauri dalana, tano, iduhu eiava kastom na idau, to ia na vaitani idaunega o dibaia tauna​​—bona ia danu mai dibana oi! Heḡereḡere, ta ta emui “gado” na mai dibamui​​—una na hereva momokani ena “gado ḡoeva-daena.” Anina na umui raruosi na Dirava o abidadama heniamu, iena taravatu bona nega vaira helarona na mai dibamui. Ta ba dibaia totona unu ḡau ba diba na mai anidia bada, badina unu amo bo heabidadama hehenimu. Bona emui hetura karana danu be mia daudaumu. w18.12 21 par. 9-​10

Keriso ena hahekau henunai, gavanin bodi ese e hahedinaraia ḡoevaḡoeva idau bese Kristen taudia bae peritomedia na asi anina. (Apos. 15:​19, 20) To laḡani haida muridiai, Iuda taudia momo ese natudia na dounu e peritomediava. To, reana baita lalomu, ‘Dahaka dainai Iesu ese una hekwakwanai na se hamaoromaoroa haraḡa, ena be ena mase ese Mose ena Taravatu vada e hadokoa?’ (Kol. 2:​13, 14) Haida ese diba matamatadia na asie abi dae haraḡamu. Iuda Kristen taudia na nega e henidia edia lalohadai bae haidaua totona. (Ioa. 16:12) Idia haida na dounu e laloava peritome karana na Dirava ihetura henina toana ta. (Gen. 17:​9-12) A haida be asie urava edia lalohadai bae haidau, Iuda taudia ese bae daḡedaḡe henidia garina. (Gal. 6:12) To gabeai, Keriso ese Paulo ena revareva amo hahekau herevadia ma haida e heni.​​—Roma 2:​28, 29; Gal. 3:​23-25. w18.10 24-​25 par. 10-​12

Hanuaboi ai, Kaiafa ese tuari taudia haida e siaidia Iesu bae dabaia tao. Iesu na mai dibana ia na bae ḡuia dainai, ena aposetolo ida edia aniani hebou ginigabena e karaia neganai, e noidia dare eiava kaia haida bae abi kau. Dare rua hona na heḡereḡere, unu amo mai anina bada ḡauna ta baine hadibadia. (Luka 22:​36-38) Gabeai, Petro ese dare amo Iesu iḡuina tauna ta e haberoa. Ia na e badu badina idia ese Iesu e hahemaoro henia kerere. (Ioa. 18:10) To Iesu ese Petro e hamaoroa: “Emu dare na gabuna ai ba toia vareai lou; badina be dare e abia taudia iboudiai na dare amo do bae mase.” (Mat. 26:​52, 53) Unu amo hahediba na Iesu ese una hanuaboi ai e gwauraia ḡuriḡurina e lalopararalaia​—idia na dia tanobada ena. (Ioa. 17:16) Hahemaoro kereredia na Dirava sibona ese baine hamaoromaorodia. Una dainai, ita na maino bona lalotamona ai ta nohomu. Bona ina heiriheiri tanobadana ai, Iehova na e itaiamu ena taunimanima na lalotamona ai e nohomu dainai, e moalemu.​​—Sef. 3:17. w18.06 7 par. 13-​14, 16

Satana ena idoa ma ta na, e uramu baine hagarida bena Iehova basita badinaia. Heḡereḡere, ia ese gavamani lalodia e verimu eda haroro ḡaukarana bae taravatua. Eiava ḡaukara gabuna ai o sikuli ai turada lalodia baine veri diba bae hevasehalaida badina Baibul ena taravatu maoromaorodia ta badinamu. (1 Pet. 4:4) Danu, eda ruma bese taudia baine ḡaukaralaidia unu amo bae hamanokada bena hebou basitala. (Mat. 10:36) Edena dala ai baita haheauka diba? Ḡau ginigunana na, namona na baita abia dae unu hahetoho na baita davarimu, badina Satana na ita e tuari henidamu. (Apok. 2:10) Ḡau iharuana na, unu hahetoho e varamu badidia baita lalo na namo​​—Satana na e gwaumu namo ta davarimu negadia ai mo Iehova ta hesiai heniamu. Bona e gwaumu, bema hahetoho baita davarimu, Dirava baita dadaraiamu. (Iobu 1:​9-11; 2:​4, 5) Ḡau ihatoina na, Iehova ena goada ai baita tabekau na namo, unu amo hahetoho baita haheaukalai. Ba helalotao, Ia ese ita na basine rakatanidamu.​​—Heb. 13:5. w18.05 26 par. 14

Bema ta harorolaiamu Basileia sivaraina ese taunimanima kudoudia na se hamareremu, basita laloa eda ḡaukara na asi anina. Ena be taunimanima momo na asie kamonaimu, to eda kara na e itamu. Eda heḡoeva daladia, eda kara namodia, bona moale toana e itaiamu. Gabeai, eda kara ese haida baine durudia bena bae laloparara ita e laloda kereremu karana na dia maoro. Sergio bona Olinda, painia rarua, na eto: “Emai gorere dainai, nega taina daudau asi ala vaevae a giniva gabuna. Gabeai a lou lao neganai, raka hanai taudia na e henanadaiva, ‘Umui nanamo? A misimuimu.’” Momokani, Basileia uhena ihadona ai ‘basita hesikumu’ neganai, “bese iboudiai” baita haroro henidia dibamu. (Mat. 24:14) Mai anina bada ḡauna na, baita moale badina Iehova ese e lalonamo henidamu; ia ese “asie hesikumu ela bona huahuadia e dobimu” taudia na e lalokau henidiamu!​—Luka 8:​15. w18.05 16 par. 16-​18

Taunimanima e kara dika negana amo ema bona hari, Iehova ese e hahedinaraia ia na tauhalo e henimu Diravana. Eden ai gwau-edeede karana e vara murinai, Dirava ese Adam besena na tauhalo e henidia. Genese 3:15 ai e perovetalaia gwauhamatana ese taunimanima na helaro e henidia, e diba gabeai Satana Diabolo, “idau negai gaigaina,” bona ena kara dikadia iboudiai na bae ore vaitani. (Apok. 12:9; 1 Ioa. 3:8) Kara dika tanobadana ai Iehova ena hesiai tauna Noa bona ena ruma bese sibodia mo Iehova e tomadiho heniava. Daḡedaḡe bona matabodaḡa karadia na bada herea dainai, reana Noa na bema lalomanoka diba. (Gen. 6:​4, 5, 9, 11; Iuda 6) To Iehova ese Noa e hamaoroa Ia ese unu kara dika taudia na baine haoredia bona e hadibaia dahaka baine kara unu amo ena ruma bese baine hamauridia. (Gen. 6:​13-18) Iehova ese Noa enai e hamomokania ia na tauhalo e henimu Diravana. w18.04 15 par. 1-2

Bema ita na hemarai tauda dainai baita laloamu basita hahealo heheni diba, una na lalohadai kererena. Taunimanima taudia ihalodia daladia na dia auka​​—baita hedavari henidia negadiai baita kiri na namo. Bema idia na basie kiri, reana idia na mai edia hekwakwanai, bona edia hereva ikamonai henina karana ese taudia baine halodia diba. (Iak. 1:19) Tadikakada eiava taihuda ta darana e dokomu neganai tauna baita haloa. King Solomon eto: “Nega korikorina ai e gwauraiamu herevana be daka namo! Mata diaridia ese tau lalona e hamoaleamu, bona hari namodia ese turia e ha-aukadiamu.” (Her. 15:​23, 30) Paulo ese hahedinaraia Basileia anedia iabidia karana ese laloda baine hagoadaia diba. (Kol. 3:16; Apos. 16:25) Iehova ena dina “eme kahikahi” dainai, hahealo heheni karana baita habadaia na ḡau badana.​—Heb. 10:25. w18.04 23 par. 16; 24 par. 18-19