December

Iesu ena kara namo hereana ta na, ita ese ta davarimu hekwakwanaidia e lalopararalaimu. Tanobada ai e nohova neganai, ‘e moaleva taudia ida e moale’ bona ‘e taitaiva taudia ida e tai.’ (Roma 12:15) Heḡereḡere, ena hahediba 70 na edia haroro ḡaukara amo mai moaledia ida e lou neganai, “Iesu na Lauma Helaḡa bagunai e hisi dae.” (Luka 10:​17-​21) To danu, Lasaro ena mase dainai e taitaiva taudia e itadia neganai, “lalona e hisihisi bada, darana e doko.” (Ioa. 11:33) Ena be Iesu na tau ḡoevadaena, to dia ḡoevadae taudia edia hisihisi na e mami bona e bogadia hisi. Dahaka dainai? Mai anina bada ḡauna na, Iesu na taunimanima e lalokau henidiamu. (Her. 8:​31) Taunimanima e lalokau henidiamu dainai, edia lalohadai na mai dibana namonamo. Aposetolo Ioane na eto: “Taunimanima lalodia vada e diba vaitani.”​—Ioa. 2:​25. w19.03 20 par. 1-2

Satana ese Iobu ena ḡau iboudiai e abi oho, ena taḡa e haoredia, ena hesiai taudia e hamasedia, bona ia ladana namona e hadikaia. Danu Iobu ena ruma bese e hahisidia, natuna lalokaudia 10 e hamasedia. Bena Iobu na toto dika hereadia amo e hagorerea​—aena lalona amo ela bona kwarana tubuana na unu toto amo e honu. Iobu adavana na e lalometau bada herea dainai Iobu e hamaoroa Dirava baine uduguiraia bena baine mase. Iobu sibona danu e urava baine mase, to dounu Dirava e badinaiava. Bena Satana na dala ma ta amo Iobu e tohoa. Iobu turana tatoi e ḡaukaralaidia. Unu tatau na dina haida lalodiai Iobu e vadivadia to asie hagoadaia. A lalona ihahisina herevadia e gwaurai bona e gwau henia. E gwauva Dirava ese iena hekwakwanai e havarava bona ia na se laloava. Danu e gwauva Iobu na kara dika tauna dainai unu hekwakwanai na ienai e varava.​​—Iobu 1:​13-22; 2:​7-11; 15:​4, 5; 22:​3-6; 25:​4-6. w19.02 4 par. 7-8

Bema ita na Iehova ta gari heniamu eiava ta matauraiamu, basita uramu ia ihabaduna karana ta baita karaia. Bema Adam bona Heva ese una hemataurai karana bema hahedinaraia, Iehova na basiema gwau-edeede henia. To, e gwau-edeede murinai, e laloparara idia na vada e kerere. Idia ese kara dika bona mase na natudia e henidia hanai. Dirava ena taravatu e utua neganai, raruosi e laloparara idia na ḡaḡaedia mo, una dainai e hemarai bena e hehuni. (Gen. 3:​7, 21) Mase garina na basita gari. Iehova ese dala ta e kehoa mauri hanaihanai baita abia totona. Bema ta kereremu to mai kudouda idoinai ida baita helalo-kerehaimu neganai, Iehova ese eda dika na be gwautaomu. Natuna ese e heni mauri davana ta abidadama heniamu dainai eda dika na e gwautaomu. Abidadama baita hahedinaraia dalana badana na, eda mauri Dirava enai baita gwauhamatalaia bona baita bapatiso.​​—1 Pet. 3:21. w19.03 5-6 par. 12-​13

Israel taudia na badi momo daidiai tenkiu karana bae hahedinaraia. Iehova ese Hisihisi 10 amo Aigupto e hahisia murinai, idia na e ruhadia. Bena Dirava ese Aigupto ena tuari oreana na Davara Kakakakana ai e hamasedia, unu amo idia e hamauridia. Israel taudia na e moale dainai kwalimu anena ta amo Iehova e hanamoa. To idia ese unu kara namodia be e lalotao eiava? Israel taudia na hekwakwanai matamatadia e davari neganai, Iehova ese idia daidiai e kara kara namodia na e laloboio. Edia tenkiu karana na asie hahedinaraia. (Sal. 106:7) Edena dala ai? “Israel hegogona idoinai ese Mose bona Aaron e maumauraidia”​​—idia na Iehova e maumauraia. (Eso. 16:​2, 8) Edia kara dainai Iehova na e lalohisihisi. Gabeai e peroveta, Israel besena na tano ḡaḡaena ai do bae ore vaitani, a Iosua bona Kaleb be baine hamauridia.​—Num. 14:​22-24. w19.02 17 par. 12-​13

Iesu na ena mase ilalotaona totona se ura aria badana ta baine karaia sibona baine heimodai totona. Ena hahediba e hamaorodia laḡani ta ta ai una hebou amo ia bae laloatao. (Ioa. 13:15; 1 Kor. 11:​23-25) Una hebou ese e hahedinaraiamu Iesu na dia hekokoroku tauna. Ta moalemu badina manau karana na iseda guba Pavapavana ena kara badana ta. (Fili. 2:​5-8) Iesu ena manau karana be ede baita tohotohoa toma? Haida edia namo baita tahu guna, dia siboda eda. (Fili. 2:​3, 4) Iesu ena hanuaboi ginigabena mani aita laloa lou. Iesu na dibana ia na kahirakahira baine mase; to ia e badinaiava aposetolo taudia e lalodia bada, idia na ena mase dainai do bae daradoko. Una dainai ena hanuaboi ginigabena ai e hadibadia, e hagoadadia, bona e durudia. (Ioa. 14:​25-31) Iesu ese e hahedinaraia ia na sibona ena namo se laloa, a haida edia namo e lalo bada. Una na haheitalai namona ita edai! w19.01 21 par. 5-6

Haere ihenina totona imamu o uramu bavabia isi neganai o garimu, a? Bema oibe, dia oi mo unu o hemami tomamu. Hereva momokanina na, ita iboudai haere ta henimu neganai ta garimu. Gari unuhetomana ese e hahedinaraiamu oi na o manaumu bona o laloamu haida ese oi na e hereamu. Iehova ese manau karana na e ura heniamu. (Sal. 138:6; Fili. 2:3) To danu, Iehova na e uramu ia ba imodaia bona hebou ai tadikaka bona taihu ba hagoadadia. (1 Tes. 5:11) Ia ese e lalokau henimumu dainai lalogoada be henimumu. Mani Baibul ena hahekau herevadia haida aita lalo. Baibul na e gwaumu ita iboudai na eda hereva eiava hereva ta gwauraimu daladia ai ta kereremu. (Iak. 3:2) Iehova dibana ita na dia ḡoevadae, bona eda tadikaka taihu danu mai dibadia ita na dia ḡoevadae. (Sal. 103:​12-14) Lauma dalanai idia na eda ruma bese taudia bona e lalokau henidamu. (Mar. 10:​29, 30; Ioa. 13:35) E lalopararamu nega haida eda haere ai baita gwaurai ḡaudia na asita gwauraimu. w19.01 8 par. 3; 10-​11 par. 10-​11

Hari ina negai, nega haida una na mai hekwarahina. To, Iehova na e uramu emui mauri na ba moalelaia. Iena heduru amo ba kwalimu diba, dia emu matamata negana ai mo to emu mauri ibounai lalonai. Una baita lalopararalaia totona, Israel taudia ese Gwauhamata Tanona e abia sivaraina mani aita laloa. Israel taudia na kahirakahira Gwauhamata Tanona ai bae vareai neganai, Dirava ese na se haḡanidia tuari daladia bae diba eiava tuari totona bae heḡaeḡae. (Deu. 28:​1, 2) To, e hamaorodia iena haheḡani bae badina bona ia bae abidadama henia. (Ios. 1:​7-9) Reana taunimanima na be lalomu una na dia sisiba namona. To una na sisiba hereadaena, badina Iehova ese ena taunimanima na e durudia Kanaan taudia bae hadareredia. (Ios. 24:​11-13) Oibe, Dirava baita kamonai henia totona baita abidadama henia na namo, bona una abidadama dainai hanaihanai baita kwalimumu. Guna bona hari ina negai una na mai anina bada. w18.12 25 par. 3-4

Hari ina negai haida na Baibul ena hereva ta ai laloparara matamatana e lasimu neganai asie abia daemu. A haida ese aposteit taudia bona e sivarailaida koikoimu taudia edia hereva e abi dae. Una dainai, haida na lalodia e hadai Iehova bona kongrigeisin bae “rakatania.” (Heb. 3:​12-14) To Petro e kara heḡereḡerena, bema Iesu bema abidadama henia bona ena hereva bema badina, basiema hekwakwanai. Haida na se lalopararamu idia na taina ruana hereva momokani e rakataniamu. Unu e kara tomamu tauna na kone amo metairametaira e hure ohomu boutina na heto. Baibul ese e hadibadamu nahuada baita toho, hereva momokani baita huretania na garina. (Heb. 2:1) Ena be haida na dia mai lalodia idoidiai hereva momokani e rakataniamu, to edia hetura karana Iehova ida na dounu e hadikaiamu. w18.11 9 par. 5-6

O uramu diba ma haida bavabi unu amo emu hesiai ḡaukara helaḡana ba karaia namonamo, a? Bema oibe, Basileia Evanelia Sikulina baola diba. Una sikuli ai e hadibadiamu taudia na, lauma ḡaudia e lalo badamu tataudia bona hahinedia, idia na ful-taim hesiai ḡaukaradia e karamu unu amo edia hesiai ḡaukara bae habadaia diba. Una sikuli e laomu taudia na dahaka asainmen bae henidia neganai mai edia ura ida bae abia dae na namo. O uramu una sikuli amo emu hesiai ḡaukara ba habadaia, a? (1 Kor. 9:23) Ita na Iehova ena taunimanima dainai, hariharibada karadia​—unu na kara namodia, hebogahisi, bona lalokau​—baita hahedinarai, bona dina ta ta ai ma haida baita durudia. Unu baita kara tomamu neganai, baita moalemu bona maino ai baita nohomu. (Gal. 5:​22, 23) Ena be emu noho dalana na edeheto, to ba moale diba bema Iehova ena hariharibada karana ba tohotohoa bona Ia ida ba ḡaukara hebou!​—Her. 3:​9, 10. w18.08 27 par. 16-​18

Reana ta na be henanadaimu, ‘Kristen tauna ta be mai badina ta dainai ena headava baine hadokoa bena ma ta baine adavaia diba, a?’ Headava ihadokona karana ai Iesu na eto: “Adavana baine hadihoa bena hahine ta ma baine adavaia tauna hari heuda-hanai tauna; bona adavana baine dihotania bena tau ta baine adavaia hahinena danu heuda-hanai hahinena.” (Mar. 10:​11, 12; Luka 16:18) Una ese e hahedinaraiamu, Iesu na headava e matauraiava bona e urava haida danu unu bae kara toma. Bema tau ta ese adavana, ia e badinaiamu hahinena, (o hahine ta ese adavana, ia e badinaiamu tauna) baine dihotania kava bena ma ta baine adavaia, una na heudahanai karana. Una na momokani badina ena be edia headava na e hadokoa kava, to Dirava matana ai idia raruosi na dounu “tamona.” Danu Iesu eto, tau ta ese adavana, dia heuda-hanai hahinena, baine hadihoa ia ese heuda-hanai hahinena ai baine halaoa. Edena dala ai? Iesu ena negai, tau ese e dihotania hahinena na reana be uramu baine headava lou moni dalanai heduru baine abi totona. Unu be kara tomamu neganai, una na heudahanai karana. w18.12 11 par. 8-9

Habakuku na Iehova ida e herevahereva neganai lalomaino e abia. Una dainai lalona e hadaia Iehova baine naria kara ta baine karaia totona. Una na nega bada lalonai e lalohadailaia ḡauna, badina ena hereva ma ta ai, eto: “Asi reḡereḡegu hekwakwanai dinana baina naria.” (Hab. 3:16) Habakuku ese e karaia karana amo dahaka ta dibamu? Ḡau ginigunana na, Iehova iḡuriḡuri henina karana na basita hadokoa, ena be hahetoho idauidau baita davari. Ḡau iharuana na, Iehova ese ena Hereva bona orea amo e hamaorodamu ḡaudia baita kamonai na namo. Ḡau ihatoina be, mai eda haheauka ida Iehova baita naria, bona baita abidadama ia ese ena nega korikori ai eda hisihisi iboudiai baine haoredia. Bema ḡuriḡuri amo Iehova baita hereva heniamu bona baita kamonai heniamu, Habakuku heḡereḡerena lalomaino baita abiamu, una ese be durudamu baita haheauka totona. Eda helaro ese be durudamu baita haheaukamu bona baita moalemu, herevana dahaka hekwakwanai baita davarimu. Danu una helaro dainai baita abia daemu Tamada guba ai ese kara ta do baine karaia.​​—Roma 12:12. w18.11 15-​16 par. 11-​12

Dirava ena lalohadai haida ihahekwakwanaidia karana ai be dahaka? Iesu eto: “Ini e abiabiraigumu memero-memerodia ta baine hahekwakwanaia tauna na huro badana ta aiona ai bema mataia, davara ai bema negea dobi, bema namo.” (Mar. 9:42) Unu na hereva aukadia! Iesu na Tamana ena kara e tohotohodia ḡoevaḡoeva dainai, ta dibamu Iehova na se moalemu bema ta na ena kara amo Iesu e badinaiamu tauna ta e hahekwakwanaiamu. (Ioa. 14:9) Eda lalohadai be Iehova bona Iesu edia lalohadai heḡereḡerena, eiava? Eda kara amo una ta hahedinaraiamu, eiava? Heḡereḡere, reana ta ura heniamu dabuana eiava eda heḡoeva dalana ese kongrigeisin ai haida edia hemami baine hadikaia diba, eiava ura dikadia baine havara diba. Tadikakada ta lalokau henidiamu dainai, siboda eda namo na basita lalomu. w18.11 25 par. 9-​10

Dahaka dainai ita ta ta ese Dirava baita badinaia na namo? Badina Satana na Iehova e gwau-edeede henia, bona e uramu oi danu unu ba kara toma. Una gwau-edeede aneruna ese Iehova ladana namona e hadikaia, badina e gwauva Dirava na Lohia tauna dikana, sibona ena namo mo e lalomu, bona e koikoimu. Adam bona Heva ese Satana e badinaia bona Iehova e gwau-edeede henia. (Gen. 3:​1-6) Eden imeana ai idia ese edia lalokau Iehova enai bae hagoadaia daladia na momo. To Satana ese e tohodia neganai, idia ese mai kudoudia idoinai ida Dirava na se badinaia. Henanadai ma ta bina: Taunimanima be Iehova Dirava e lalokau heniamu dainai ia bae badinaia hanaihanai diba, eiava? Una henanadai na Iobu enai e vara ḡauna amo e hedinarai. (Iobu 1:​8-​11) Iobu danu ita heḡereḡereda, dia ḡoevadae bona e kerereva. To, Iehova ese Iobu e lalokau heniava badina Ia e badinaiava. w19.02 3-4 par. 6-7

Iesu na e urava baine hahedinaraia Dirava ena Basileia ena hereva momokani na mai anina bada, una dainai ena parabole ai eto, hoihoi tauna ta na aḡeva mai hairaidia e tahuva bena ta e davaria. Una aḡeva davana na bada herea dainai, ia na haraḡa herea ela “ena ḡau iboudiai eha hoi” bena una aḡeva e hoia. (Mat. 13:​45, 46) Una heḡereḡerena, ta diba hereva momokanidia​—Dirava ena Basileia sivaraina momokanina bona Baibul amo ta diba hereva momokanidia ma haida​—na dava bada ḡaudia dainai, mai eda ura ida ḡau haida ta dadarai. Bema hereva momokani baita laloa badamu basita ‘hoihoilaiamu.’ (Her. 23:23) To, Dirava ena taunimanima haida ese hereva momokani ena namo na asie laloa bada dainai e rakatania. Asita uramu ita edai una baine vara! Hereva momokani baita laloa bada bona basita hoihoilaia totona, namona na Baibul ena sisiba baita badinaia: ‘Hereva momokani dalanai baita raka.’ (3 Ioa. 2-4) Anina na ta diba hereva momokanidia na baita atodia guna bona baita badinadia. w18.11 9 par. 3

Israel taudia na e haḡanidia Ieriko basie tuari henia, to dina 6 lalodiai nega tamona hanua bae rakaia heḡeḡe, bona dina namba 7 ai nega 7 unu bae kara toma. Tuari taudia haida na e lalova, ‘Eda nega bona goada baita haorea kavamu!’ To Israel Igunalaidia Tauna, Iehova, na mai dibana ia be dahaka e karava. Israel taudia na unu hahediba herevadia e badina neganai edia abidadama e hagoadaia, bona Ieriko taudia ida se tuari. (Ios. 6:​2-5) Una sivarai amo dahaka ta dibamu? Orea ese dala matamatadia haida e herevalaimu neganai, reana nega haida asita lalopararalai namonamomu. Heḡereḡere reana matamanai ta lalova, siboda eda stadi negadiai, eiava haroro bona hebou ai eda mobael eiava tablet baita ḡaukaralaidia na dia lalohadai maorona. Hari unu ḡau iḡaukaralaidia edia namo ta lalopararalaimu. Matamanai ta daradaralaiva ḡaudia edia namo ta itamu neganai, eda abidadama e hagoadaiamu bona tadikaka taihu ida lalotamona ai ta nohomu. w18.10 23 par. 8-9

Hahediba ese Mesia unu e laloa tomava dainai, Galilea taudia na e urava Iesu na edia pavapava ai bae halaoa. Reana e laloava Iesu na hegunalai tauna namona ai bainela diba. Ia na mai hereva dibana; gorere taudia baine hanamodia diba; bona hitolo taudia edia aniani baine heni diba. Iesu ese tatau 5,000 mai kahana e ubudia neganai, taunimanima edia lalohadai na e diba. Baibul na eto: “Iesu dibana idia na baema, bae dabaia tao, edia hanua pavapavana ai bae halaoa eto; una dainai ia na sibona ororo ai ma eha dara dae lou.” (Ioa. 6:​10-15) Murina dinana ai, Galilea gohuna kahanai, reana taunimanima lalodia na e keru. Bena Iesu ese hutuma ediai ena ḡaukara badina korikorina e herevalaia. Ia ema badina na dia tauani idurulaina ḡaudia baine henidia, to Dirava ena basileia baine hadibadia. Eto: “Basio ḡaukara e oremu anianina iabina, a baine mia ela bona mauri hanaihanai anianina iabina ba ḡaukara.”​​—Ioa. 6:​25-27. w18.06 4 par. 4-5

Iesu ese lalometau bona daradoko taudia edia hemami na e lalopararalaidia badina idia na vaitani baine bodo gidana na heto. Una dainai e bogadia hisiva bona mai manauna ida e kara henidiava. (Mar. 10:14) Momokani, eda lalohadai bona hahediba daladia na dia Iesu e karava heḡereḡerena! To, namona na eda teritori ai e nohomu taudia edia namo baita lalo. Una anina na haroro negadiai ta hereva henidiamu dalana bona negana baita lalo. Hari, momo na “taudia e boera, bona e karoho” badina bisnes, gavamani taudia bona dubu igunalaina taudia ese se haerodiamu. (Mat. 9:36) Una dainai, se uramu ta ena hereva bae abi dae bona asi edia helaro. Mai anina bada ḡauna na aonega dalanai bona gado namo ai baita hereva henidia! Ita ese ta harorolaiamu herevana na be ura heniamu badina e dibamu ita na idia ta lalodia badamu. w18.09 31-​32 par. 13-​14

Edena dala ai baita hahedinaraia una sisiba ta laloa badamu? Dirava ena hereva baita stadilaia, ena haheḡani baita badina, bona moale Diravana itomadiho henina karana baita atoa guna. Unu baita kara tomamu neganai eda moale na be badamu. Eda abidadama, Iehova ese e gwauhamatalai ḡaudiai na be goadamu. (Tito 2:13) Baita moale hanaihanai totona, ḡau badana na eda hetura karana Iehova ida baine goada. Aposetolo Paulo na eto: “Nega idoidiai Lohiabada [Iehova] lalonai ba moale. Ma na gwau loumu: ba moale.” (Fili. 4:4) Iehova itura henina karana baita moalelaia totona, ia ese e henidamu aonegana baita tahua na namo. (Her. 3:​13, 18) To, eda moale baine mia hanaihanai totona, ḡau badana na Dirava ena hereva baita duahia bona baita badinaia. Unu baita kara toma ena namo na Iesu ese e herevalaia, eto: “Ina na boma diba bona boma kara, boma namo.” (Ioa. 13:17; Iak. 1:25) Una na mai anina bada bema ta uramu lauma dalanai baita goada bona eda moale baine mia hanaihanai. w18.09 18 par. 4-6

Epafra ese tadikaka na e dibadia namonamo, bona e lalodia badava. Ena be Paulo ida “iḡui ai” e nohova, to una ese se koua ma haida lauma dalanai baine durudia totona. (File. 23) Bona ia na kara ta e karaia idia baine durudia, unu amo sibona ena namo se laloa bada. Tadikakada daidiai baita ḡuri­ḡurimu bona ladadia baita gwauraimu neganai, una ḡuriḡuri na mai siahuna. (2 Kor. 1:11; Iak. 5:16) Emu ḡuriḡuri ai ladadia ba gwaurai diba taudia haida mani a lalodia. Epafra heḡereḡerena, eda tadikaka bona taihu momo na edia kongrigeisin bona ruma bese ai maduna badadia e huamu taudia, abi hidi badadia e karamu taudia, bona hahetoho e davarimu taudia daidiai e ḡuriḡurimu. Danu, edia lalokau taudia e mase, vanegai disasta bona tuari amo e roho mauri taudia, bona moni ena hekwakwanai e haheaukalaimu taudia daidiai baita ḡuriḡuri. Namona na tadikaka bona taihu daidiai baita ḡuriḡuri badina unu ḡuriḡuri amo heduru bae abi diba. w18.09 5-6 par. 12-​13

Paulo na dia kohu bona moni ihenina karana mo e herevalaia, to ma haida ihagoadadia, ihakaudia, bona idurudia karana danu e herevalaia. (Apos. 20:​31-35) Aposetolo Paulo ena hereva amo ta dibamu siboda baita heni na namo, anina na eda nega bona goada baita ḡaukaralai haida baita durudia bona baita lalokau henidia. Hetahu ḡaukarana e karaia taudia haida ese danu e davaria, harihari karana ese taunimanima e hamoalediamu. Atikol ta na ini e gwau toma, “taunimanima na e gwaumu ma haida e kara namo henidiamu neganai e moale dikadikamu.” Hetahu ḡaukarana e karaia taudia haida na e gwaumu, ma haida idurudia karana ese e hahedinaraiamu mauri na “mai anina bada” “badina taunimanima edia dabu ḡaudia e henimu.” Una dainai, diba bada taudia haida na e gwaumu, taunimanima haida na ma haida idurudia ḡaukaradia e karamu unu amo basie gorere momo bona bae moale. Momokani, edia hereva daidiai basita daradara, badina Ihavarada Tauna lalokauna, Iehova, na vada eto, hariharibada karana ese moale e havaraiamu.​​—2 Tim. 3:​16, 17. w18.08 22 par. 17-​18

Isaia ese eda Lohiabada Iesu Keriso e perovetalaia karana ese e hagoadadamu bona helaro e henidamu. Isaia na e peroveta Iesu na “basine hahemaoro, matana e itamu ḡaudia daidiai, bona lalona basine hadaia, taiana e kamonaimu herevadia daidiai.” To “mai kara maoromaorona ida ia ese ogoḡami taudia baine hahemaoro henidia.” (Isa. 11:​3, 4) Dahaka dainai una ese e hagoadadamu? Badina ina tanobada na heinai heheni karadia amo e honu. Ta ura dikadikamu Hahemaoro Tauna ḡoevadaena baine lohia, ia na dia ita oromada amo be hahemaoro henidamu! Dina ta ta ai ita ese taunimanima na toadiai ta hahemaoro henidiamu. To, ita na dia ḡoevadae tauda dainai, basita hahemaoro ḡoevaḡoevamu Iesu heḡereḡerena. Ita na ta itamu ḡaudia amo ta uramu taunimanima baita kara henidia. To, Iesu tanobada ai e nohova neganai, e haḡanida, ma haida na “oromadia” amo basita hahemaoro henidia, a baita “hahemaoro ḡoevaḡoeva.” E hahedinaraia ḡoevaḡoevamu, Iesu na e uramu ia baita tohotohoa bona ma haida na toadia amo basita hahemaoro henidia. w18.08 8 par. 1-2

Momokani, ita ese guba amo Dirava gadona na asita kamonaiamu. To, Ia ese ena Hereva, Baibul, e henida, unu amo ita baine hadibada. Danu, Iehova ena lauma helaḡa amo “kohu ireḡuna tauna mai ena kamonai” e hakauamu Iena hesiai taudia adia baine heni helaoreana. (Luka 12:42) Lauma aniani namodia na momo, heḡereḡere e printidia pablikeisen na idauidau, bona Intanet amo vidio bona audio pablikeisen momo ta abimu. Baibul ai, Dirava sibona ena hereva ese e hadibadamu Iehova na nega korikori ai ḡau iboudiai baine hamaoromaorodia, bena Satana bona ena tanobada dikana ese e hahisidamu ḡaudia iboudiai baine kokidia. Una dainai Iehova erena baita kamonai namonamo. Unu baita kara tomamu neganai, hari bona gabeai baita davari hekwakwanaidia baita haheaukalai diba. Baibul na e gwaumu: “Emui haheauka badina binai: Dirava ena ura ba karaia ḡuḡuru, bena gwauhamata anina do bavabia.”​​—Heb. 10:36. w19.03 13 par. 17-​18

Mose ese Israel taudia na laḡani daudau vada e gunalaidia dainai, reana Iosua na e daradarava Dirava ena taunimanima ese iena hegunalai karana be abia daemu eiava lasi. (Deu. 34:​8, 10-12) Baibul e herevalaia bukana ta ese Iosua 1:​1, 2 na ini e herevalaia toma: “Idaunegai bona hari ina negai, tano ta ai hegunalai taudia e idaumu neganai, gari bona daradara e varamu.” Iosua e gari na mai badina, to dina haida lalodiai, ia na haraḡa herea kara ta e karaia. (Ios. 1:​9-11) Ia na Dirava e abidadama henia momokani. Baibul ese e hahedinaraia, Iehova ese aneru ta amo Iosua bona Iena taunimanima e hakaudiava. Baita gwau dibamu una aneru na Hereva, Dirava Natuna roboana. (Eso. 23:​20-23; Ioa. 1:1) Iehova ena heduru dainai, Israel taudia ese Iosua, Mose gabuna e abia tauna, e badinaia. w18.10 22-​23 par. 1-4

Iehova na mai dibana daidia be mai edia ura ida ia e hesiai heniamu, bona ladadia na “ilalo-taodia bukana” ai e toremu. Iehova ese ladada na ena ‘helalotao bukana’ ai baine torea totona, ḡau haida baita kara na namo. Malaki na eto, ‘Iehova garina baita gari bona ia ladana baita helalolaia’ na namo. Ḡau ta eiava taunimanima ta baita tomadiho henia neganai, Iehova ese ladada na mauri bukana amo baine kokia. (Eso. 32:33; Sal. 69:28) Una dainai, Iehova ta gwauhamata henia anina na ena ura baita karaia bona ranu bapatisona baita abia, to dia una mo. Badina una na nega tamona ta karaiamu ḡauna. Ita na Iehova ena bese dainai, hanaihanai eda mauri lalonai baita hahedinaraia ita na iena kahai ta ginimu.​​—1 Pet. 4:​1, 2. w18.07 23-​24 par. 7-9

Una na se vara kavamu. Namona na baita hekwarahi eiava baita ḡaukara goada. Lo tauna ai baola anina na emu diba bona laloparara karana ba habadaia. Una dainai hanaihanai e hagoadadamu, dina ta ta ai Baibul baita duahia. (Sal. 1:​1-3) Oi be una o karaiamu, a? Unu bo kara tomamu neganai, Baibul ai Iehova ena taravatu bona hahekau herevadia bo lalopararalai namonamomu. Kristen taudia ediai taravatu hereadaena na, lalokau. Iesu ese ena hahediba e hamaorodia: “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Iesu tadikakana Iakobo na eto, lalokau na “haheḡani herea-daena.” (Iak. 2:8) Paulo na eto: “Lalokau na taravatu ihaḡuḡuruna.” (Roma 13:10) Una lalokau e herevalaia dalana dainai basita daradara, badina Baibul na eto: “Dirava na lalokau.”​​—1 Ioa. 4:8. w18.06 19 par. 14-​15

Ena be Israel taudia ese Iehova e habadua, to Mose na e turiariki eiava e badu dikadika. Ia na sibona se hebiagu dainai, se lalo namonamo bena e hereva. Mose na haida edia kara dainai e lalohisihisi bona Iehova na se laloa bada. Mose ese matamanai e vara hekwakwanaina na e hamaoromaoroa. (Eso. 7:6) To, Israel taudia na laḡani momo lalodiai e gwau-edeedeva dainai, ia na e hesiku bona e lalohisihisi. Mose be sibona ena hemami e laloa dainai Iehova iheatolaina daladia na se lalo, a? Bema abidadama peroveta tauna Mose, na ma haida edia kara daidiai kerere e kara, ita edai danu una na baine vara diba. Mose heḡereḡerena ita danu Iehova ese e gwauhamatalaia tanobada matamatana ai kahirakahira baita vareaimu. (2 Pet. 3:13) Asita uramu una hahenamo namona baita reaia. To baita vareai totona, namona na Iehova baita laloa bada, anina na hanaihanai ena ura baita karaia.​—1 Ioa. 2:17. w18.07 15 par. 14-​16

Satana ese taunimanima na basine doridia diba asie uramu bae kara ḡaudia bae kara totona. (Iak. 1:14) Momo na asie lalopararamu idia na Satana ena ura e badinaiamu. To hereva momokani e dibamu neganai, abi hidi e karamu daika bae hesiai henia totona. (Apos. 3:17; 17:30) Bema laloda baita hadaimu Dirava ena ura baita karaiamu, Satana ese Dirava ta badinaiamu karana na basine hadikaia dibamu. (Iobu 2:3; 27:5) Satana bona demoni ese ḡau ma haida na basie kara diba. Heḡereḡere, Baibul ese se hahedinaraia idia na taunimanima daradia bona kudoudia ai e miamu ḡaudia na mai dibadia. Iehova bona Iesu sibodia mo unu bae kara toma diba. (1 Sam. 16:7; Mar. 2:8) Bema baita ḡaukara goadamu eda hereva bona kara na Dirava ena ura ida bae he­ḡereḡere, baita diba momokanimu Iehova ese Diabolo na be kouamu basine hadikada totona. (Sal. 34:7) Inaida ena kara baita diba na namo, to garina na basita gari. Iehova ena heduru amo, dia ḡoevadae taudia ese Satana bae hadarerea diba. Bema baita dadaraiamu, eda amo be heau sirimu.​—Iak. 4:7; 1 Pet. 5:9. w18.05 26 par. 15-​17

Bema oi na palani o kara mai anina bada ḡauna ta dainai taoni daudauna ta baola, oi na basi amo una taoni bo laomu. Basi stopu ai, basi na momo. To namona na basi maoronai ba gui bo lao heniamu gabuna baola totona. Gabu idaudia e laomu basidia ta ai bo guimu neganai oi na dala kererena bo laomu. Una heḡereḡerena, hari memero kekeni edia mauri na vaitani gabu daudauna ta e uramu baela. Nega haida abi hidi na idauidau dainai e daradaramu. Memero kekeni e, abi hidi maorona ba karaia totona ba palani namonamo guna na namo. Oi be o uramu Iehova ba hamoalea? Anina na emu mauri ibounai lalonai​—edukeisen, moni ḡaukara, ruma bese inarina madunadia, bona ma ḡau haida ai​​—abi hidi o karamu neganai, Iehova ba badinaia. Bona Ia ihesiai henina ḡaukaradia ba ura heni. E uramu Iehova bae hesiai henia goadagoada matamata taudia na e dibamu Ia ese be hanamodiamu bona edia ḡaukara ai be kwalimumu. w18.04 25 par. 1-3

Iefeta na ena gwauhamata e badinaia bona natuna na e siaia Silo, unuseni ai ia na ena mauri ibounai lalonai dubu helaḡa ai e ḡaukarava. (Hah. 11:​30-35) Bema Iefeta enai una na auka, anina na natuna kekenina enai na da auka herea, to ia na mai ena ura ida tamana ena gwauhamata e badinaia. (Hah. 11:​36, 37) Una anina na ia na basine headava, natuna basine havara, bona ena bese ladana na basine hesiriu. Una dainai ia na tauhalo baine abi na namo. Baibul na eto: “Una dainai kara ta vada e vara Israel ai: laḡani ta ta amo Israel kekeni ese dina hani Iefeta, tau Gilead, natuna kekenina taina e taiva.” (Hah. 11:​39, 40) Do asie headava Kristen taudia ese edia nega bada e ḡaukaralaiamu “Lohiabada ena” ḡaukara bae karaia totona, idia danu baita hanamodia bona baita hagoadadia na namo.​​—1 Kor. 7:​32-35. w18.04 17 par. 10-11

Aneru momo ese Satana ena gwau-edeede karana e durua. Utu-utu do se kau neganai, Satana ese idia haida e koidia taunimanima natudia kekenidia ida bae mahuta hebou totona. Baibul ese laulau dalana ai e hahedinaraia, huala badana ese guba hisiudia toi toi amo ta ta na e veridia ia bae badinaia. (Gen. 6:​1-4; Apok. 12:​3, 4) Unu aneru ese Dirava ena ruma bese e dadaraia neganai, idia na Satana ese e biagudia. To, unu gwau-edeede taudia na dia dika mo e havaramu oreana ta. Satana na e ura Dirava ena Basileia baine tohotohoa dainai, sibona ena basileia ta e haginia, bona ia sibona ese e lohiaiamu. Ena be asi ta itadiamu, to Satana ese demoni e haboudia, siahu e henidia, bona tanobada lohiadia ai e halaodia. (Efe. 6:​12) Satana na ena lauma oreana amo taunimanima edia gavamani iboudiai e biagudiamu. w18.05 23 par. 5-6

Nega haida Dirava ena lalokau e hahedinaraiamu dalana ta na e sisiba henidamu, tama lalokauna ese natuna e sisiba heniamu heḡereḡerena. David ese Dirava ena sisiba na e abi dae. Ia ese Dirava ena lalohadai e lalo dobu, e abi dae bona e badina. Mai emu abidadama ida unu bo kara tomamu neganai, emu lalokau Dirava enai bo habadaiamu bona bo uramu ia ba badinaia. Danu lo Kristen tauna ai bo laomu. Taihu ta ladana Christin na eto: “Na duahimu ḡaudia na hetahulaimu bona na lalodia dobumu neganai, na mamiamu Iehova ese ini hereva na lau idurugu totona e tore!” Lauma ḡaudia ilalodia bada karana ese emu diba be habadaiamu, unu amo tanobada ai e varamu ḡaudia bo lalopararalaimu bona Dirava ena ura vaira negana totona bo dibamu. Dahaka dainai Dirava ese diba bona laloparara e henimumu? Ia na e uramu emu mauri ai mai anidia ḡaudia bavato guna, abi hidi namodia ba kara, bona mai moalemu ida vaira negana ba naria.​—Isa. 26:3. w18.12 26 9-​10