January

Timoteo ena abidadama e hagoadaia badina na Baibul amo e dibadia hahediba herevadia na momokani dainai, e ura Iehova turana ai bainela. Namona na oi sibomu ese danu Baibul ba stadilaia bona ba hamomokania Iehova e herevalaiamu herevadia na momokani. Namona na sibomu ese ini hereva momokani badadia toi ba hamomokanidia. Ginigunana, ba hamomokania Iehova Dirava na ḡau iboudiai Ihavaradia Tauna. (Eso. 3:14, 15; Heb. 3:4; Apok. 4:11) Iharuana, ba hamomokania Baibul na Dirava ena hereva taunimanima ediai. (2 Tim. 3:16, 17) Bona ihatoina, ba hamomokania Iehova na mai ena orea, bona una orea taudia na Keriso ena hahekau henunai Dirava e toma henia dihomu, bona una orea ladana na Iehova ena Witnes. (Isa. 43:10-12; Ioa. 14:6; Apos. 15:14) Oi na dia Baibul ibounai ba dibaia ḡoevaḡoeva bena sibomu ese unu hereva momokani badadia ba hamomokanidia. To namona na o diba ḡaudia na ba haerodia namonamo unu amo ba hamomokania unu na hereva momokani.​—Roma 12:1. w20.07 rau 10 par. 8-9

Una peroveta herevana ese kwadi oreana ta e gwauraiamu, vairadia na taunimanima vairadia na heheto bona kwaradia ai “na e kara gold havava ḡaudia.” (Apok. 9:7) Idia ese “Dirava toana na bagudia ai asie abia taudia [Dirava inaina]” na hua faiv lalodiai e hahisidia, kwadi edia mauri ena daudau na una. (Apok. 9:4) Una na Iehova ena horoa hesiai taudia e gwauraidiamu. Idia na mai goadadia ida Dirava ese ina tanobada dikana baine hahemaoro henia herevana e harorolaiamu, una dainai ina tanobada taudia na e hisihisimu. Anina be Ioel 2:7-9 ese e herevalai kwadidia bona Apokalupo bukana ese e herevalai kwadidia be ḡau idaudia e laulaulaidiamu, a? Oibe. Baibul ai, nega haida laulau herevana ta na dala idaunai e heḡaukaralaimu neganai, anina danu e idaumu. Heḡereḡere, Apokalupo 5:5 ai, Iesu na e gwauraia “Iuda iduhuna ena leona” to 1 Petro 5:8 ai, Diabolo na e gwauraia ia na e loamu “mai ḡouna ida, leona na heto.” w20.04 rau 3 par. 8; rau 5 par. 10

Sarai ena hesiai hahinena Hagara, na Abram adavana ai ela murinai ena kara na e idau. Ia na e rogorogo neganai Sarai na se matauraiava, badina Sarai na asi natuna. Una kara ese Sarai bona Hagara edia hetura karana na e hadikaia bona Hagara na e heau. (Gen. 16:4-6) Ita na dia ḡoevadae dainai baita laloamu, Hagara na ena hekokoroku dainai bae panisia na maoro. To Iehova ese Hagara e laloa dalana na idau. Ia ese ena aneru na ia dekena e siaia lao. Aneru ese e davaria neganai, e durua ena kara baine haidaua bona e hanamoa. Hagara na e laloparara Iehova ese ia na e itaiava bona ienai e vara ḡaudia iboudiai Ia na mai dibana. Una dainai ia ese Iehova na ini e gwaraia toma: “O haḡeregumu Diravamu.” (Gen. 16:7-13) Hagara ena mauri lalonai Iehova be dahaka e ita? Ia na Hagara ena mauri lalonai e vara ḡaudia bona e haheaukalai ḡaudia iboudiai e ita. Iehova na mai dibana Hagara ese Sarai basine matauraia na kerere. To ia na Hagara ena hemami bona noho dalana na e lalopararalai, una dainai e bogaia hisi. w20.04 rau 16 par. 8-9

Aposetolo Paulo na e gwa Kristen taudia iboudiai na heau-helulu ta lalonai. (Heb. 12:1) Bona ita iboudai ena be matamata eiava buruka, goada eiava hesiku, bema ta uramu Iehova ese e henidamu ahuna baita abia namona na baita haheauka ela bona dokona. (Mat. 24:13) Paulo enai na se auka ita baine hagoadada badina be ia ese ena heau-helulu vada e haḡuḡurua. (2 Tim. 4:7, 8) To Paulo be edena heau-helulu e herevalaia? Gunaguna Greece ai e karava gadaradia haida na Paulo ese nega haida e ḡaukaralaiva mai anidia bada ḡaudia baine hahedinarai totona. (1 Kor. 9:25-27; 2 Tim. 2:5) Nega idauidau ai, ia ese Kristen mauri dalana na heau-helulu ta ida e haheḡereḡerea. (1 Kor. 9:24; Fili. 2:16) Ta na ena mauri e gwauhamatalaiamu bona e bapatisomu neganai ia na una “heau-helulu” lalonai e heau matamamu. (1 Pet. 3:21) Heau-helulu dokona ai baine heau kau neganai, Iehova ese mauri hanaihanai ahuna do baine henia.​—Mat. 25:31-34, 46; 2 Tim. 4:8. w20.04 rau 26 par. 1-3

Badina Dirava ena Hereva na e gwa: “Lohiabada na vada momokani; bena ia ese baine haginimui tutuka-tutuka, dika amo baine hamaurimui.” (2 Tes. 3:3) Edena dalai Iehova ese ita e hamauridamu o e gimadamu? Iehova ese tuari dabuana ta e heni unu amo Satana baita laoa ahu diba. (Efe. 6:13-17) Ina lauma tuari dabuana na goada bona namo herea! To una dabua ese baine gimada totona, namona na una dabua kahana iboudiai baita hahedokilai​—bona basita kokidia. Heḡereḡere hereva momokani beletana ese Dirava ena Hereva, Baibul, lalonai e miamu hereva momokanidia e laulaulaia. Dahaka dainai ina beleta baita karaia na namo? Badina Satana na “koikoi idoidiai tamadia.” (Ioa. 8:44) Laḡani tausen momo lalodiai koikoi karana e manadalaia bona ia ese “tanobada idoinai e koiamu”! (Apok. 12:9) To Baibul lalonai hereva momokanidia ese baine gimada, Satana ese basine koida totona. Una laulau dalanai e gwauraia beletana be ede baita karaia toma? Iehova sivaraina momokanidia baita diba, “lauma ai bona momokani ai” baita tomadiho henia, bona ḡau iboudiai mai momokanida ida baita kara.​—Ioa. 4:24; Efe. 4:25; Heb. 13:18. w21.03 rau 26-27 par. 3-5

Una tano e hahairaiava ḡauna na unuseni ai taunimanima ese Iehova e toma henia dihova. To, Pentekoste 33 C.E. amo, tanobada ai una “tano herea-daena” na dia gabu korikorina ta badina Iehova ena taunimanima na tanobada heḡeḡemadai ai e nohomu. To, hari ina negai una “tano herea-daena” na Iehova ena taunimanima edia ḡaukara e herevalaiamu, heḡereḡere edia hebou bona haroro ḡaukara amo Iehova e toma henia dihomu. Dina gabedia ai, not kahana pavapavana na “tano herea-daena” lalonai e vareai loulou. Heḡereḡere, tanobada tuarina iharuana e varava lalona Nazi Germany na not kahana pavapavana ai ela. Una negai ia na “tano herea-daena” lalonai e vareai, anina na Dirava ena taunimanima e daḡedaḡe henidia bona e hamasedia. Tanobada Tuarina Iharuana e ore murinai Soviet Union na not kahana pavapavana ai ela neganai, Dirava ena taunimanima e daḡedaḡe henidia bona e doridia edia gabu bae rakatania karana ese e hahedinaraia, una pavapava na “tano herea-daena” lalonai e vareai. w20.05 rau 13 par. 7-8

Iesu do sema tanobada ai neganai, Dirava turana ai ela abidadama taudia haida mani aita herevalaidia. Abraham na abidadama goadana e hahedinaraia tauna. Abraham e mase bena laḡani 1,000 mai kahana muridiai Iehova ese ia na e gwauraia “turagu.” (Isa. 41:8) Anina na ena be Iehova turana ai ela taudia na vada e mase, to Ia ese na dounu e lalodiamu. Abraham danu doini Iehova ese e laloataomu. (Luka 20:37, 38) Abidadama tauna ma ta na Iobu. Guba ai aneru iboudiai e hebou neganai, Iehova ese Iobu e herevalaia. Ia ese e gwauraia “kara maoromaoro tauna; Dirava garina e garimu, bona kara dika amo e raka ohomu.” (Iobu 1:6-8) Daniel na laḡani 80 heḡereḡerena Dirava asie badinaiava taudia edia gabu ai e nohova neganai, Iehova ese ia be ede e laloa toma? Aneru ese nega toi una tau burukana e hamaoroa Dirava ese “e lalokau henimu badamu.” (Dan. 9:23; 10:11, 19) Ta diba momokanimu Iehova na e uramu ia turana e mase taudia na baine hatoredia isi lou.​—Iobu 14:15. w20.05 rau 26-27 par. 3-4

Reana stiuden namona na Dirava ena taravatu be dibaiamu bona be ura heniamu. To, ia be lalokau dainai Iehova be kamonai heniamu, a? Ba helalotao, Heva na Dirava ena taravatu na mai dibana, to unu taravatu e heni Tauna na se lalokau henia, Adam danu unu e kara toma. (Gen. 3:1-6) Una dainai, Dirava e uramu karadia bona ena kara maoromaoro taravatudia mo baita hahedibalai na dia heḡereḡere. Iehova e uramu karadia bona ena taravatu na iseda namo dainai e ato. (Sal. 119:97, 111, 112) To eda stiuden ese una na basie abia daemu, bema basie lalopararamu Iehova na ita e lalokau henidamu dainai unu taravatu e ato. Una dainai, eda stiuden baita nanadaia: “Dahaka dainai o laloamu Dirava ese ena hesiai taudia e noidiamu ini bae kara toma eiava unu basie kara toma? Ia be Dirava ede bamona?” Bema eda stiuden baita durudiamu Iehova bae laloa bona ladana bae matauraia, idia kudoudiai una na be laloa badamu. Eda stiuden ese dia taravatu mo to taravatu e heni Tauna danu be lalokau heniamu. Edia abidadama na be goadamu bona be durudiamu hahetoho badadia bae haheaukalai totona.​—1 Kor. 3:12-15. w20.06 rau 10 par. 10-11

Namona na baita haheauka badina manoka tauna na taina ruana be goadamu. Guna e manoka taudia momo na e gwa elda taudia bona kongrigeisin taudia ma haida ese e vadivadidia loulou dainai idia na e lou. Asia ai taihu ta ladana Nancy na e gwa: “Kongrigeisin ai turagu namo hereana ta ese e durugu. Lau na ia kakana bamona e kara heniguva. Guna a kara hebouva ḡaudia a herevalaiva. Lau na herevava neganai ia na e hakala namonamova, bona e hagoadaguva danu. Ia na lau turagu korikorina, heduru na urava negadia iboudiai ia ese e duruguva.” Hebogahisi karana na muramura namona ta bamona, ta baine durua hemami namona baine abia totona. Manoka taudia haida na guna kongrigeisin ai ta ese lalodia e hahisi dainai doini e lalohisihisimu bona e badumu. Una dainai asie uramu Iehova bae lou henia. Haida na be hemamimu haida ese idia na asie kara namo henidia. Reana idia na be uramu e herevamu neganai ta baine hakala namonamo bona edia hemami baine lalopararalai. w20.06 rau 26 par. 10-11

Nega ta ta ai hahetoho bo hanaidiamu neganai, una ese be durumumu kara maorona ba karaia totona. Danu, ba helalotao, tanobada taudia ese mahuta hebou karana e laloamu dalana na Satana ena lalohadai heḡereḡerena. Una lalohadai bo dadaraiamu neganai, oi ese “dika tauna vada o hadarerea.” Ita na ta abia daemu Iehova na mai ena maoro baine gwa edena kara be kara dikana. Bona ta hekwarahimu kara dika ta basita karaia totona. To kara dika ta ta karaiamu neganai, ḡuriḡuri amo iseda dika na Iehova enai ta gwaurai hedinaraimu. (1 Ioa. 1:9) Bona bema kara dika badana ta ta karaiamu, namona na Iehova ese e abidia hidi elda taudia amo heduru baita abi. (Iak. 5:14-16) To, guna ta kara kara dikadia na basita lalodia loulou. Dahaka dainai? Badina Tamada lalokauna ese Natuna ena mauri davana amo iseda kara dikadia vada e gwautao. Iehova na e gwa helalo-kerehai taudia edia dika na baine gwautao, una na baine karaia momokani. Una dainai ḡau ta ese basine koudamu mai laloda ḡoevana ida Iehova baita hesiai henia totona.​—1 Ioa. 2:1, 2, 12; 3:19, 20. w20.07 rau 22-23 par. 9-10

Nega ta ai Iehova na sibona e nohova. To ia na dounu e moaleva. Ia daika ida baine noho na dia ḡau badana. To, ia na e ura ma haida danu bae noho bona bae moale. Oibe, lalokau dainai, Iehova ese mauri ḡaudia e havara. (1 Ioa. 4:19) Ginigunana be, Iehova ese Natuna, Iesu, e havaraia. Bena ia ese Iesu amo “ḡau iboudiai”​—heḡereḡere aneru iboudiai​—e karadia. (Kol. 1:16) Iesu na Tamana ida e ḡaukara hebou bona e moale dikadikava. (Her. 8:30) Bona aneru iboudiai danu e moaleva. Badina idia matadiai e itava, Iehova bona Iesu ese ḡau iboudiai guba ai bona tanobada ai e kara. Bena aneru be dahaka e kara? Idia ese Dirava e hanamoa badina Dirava ese tanobada e karaia, bona ma e hanamoa loulou badina ia ese e havara ḡaudia na matadiai e itava. (Iobu 38:7; Her. 8:31) Iehova ese e havara ḡaudia ta ta ese ena lalokau bona aonega e hahedinarai.​—Sal. 104:24; Roma 1:20. w20.08 rau 14 par. 1-2

Iehova ese e karada dalana na ita ese ma haida baita lalokau henidia, bona idia ese danu ita bae lalokau henida. Una dainai ta ese e inai henidamu neganai, ta lalohisihisimu bona ta garimu. Tadikaka ta na e gwa: “Tuari taudia ese e dadabaguva, e gwau heniguva, bona e hagariguva badina lau na Iehova ena Witnes neganai, na gariva bona idia ese e hahemaraiguva.” Inai karadia unu hetomadia na mai hisihisidia, to asita hoamu. Badina Iesu na e peroveta taunimanima ese ita na be inai henidamu. Dahaka dainai tanobada ese Iesu murinai e rakamu taudia na e inai henidiamu? Badina Iesu heḡereḡerena ita na “dia tanobada ena.” (Ioa. 15:17-19) Una dainai, ena be taunimanima edia gavamani na ta matauraidiamu, to idia bona edia hanua flaigadia na asita tomadiho henidiamu. Ita ese Iehova sibona mo ta toma henia dihomu. Ita na Iehova ena lohia siahuna ena maoro ta abia isimu​—una maoro na Satana bona “garana” ese e uramu bae abia. (Gen. 3:1-5, 15) Dirava ena Basileia ta harorolaiamu, badina una na taunimanima edia helaro tamona bona una Basileia ese kahirakahira e inai heniamu taudia iboudiai baine haoredia. (Dan. 2:44; Apok. 19:19-21) Una na sivarai namona manau taudia ediai, a sivarai dikana kara dika taudia ediai. w21.03 rau 20 par. 1-2

Iehova ese Kristen taihu na kongrigeisin lalonai ḡaukara e henidia. Idia na haheitalai namona badina be mai edia aonega, abidadama, ura, boga-auka, hariharibada, bona kara namodia. (Luka 8:2, 3; Apos. 16:14, 15; Roma 16:3, 6; Fili. 4:3; Heb. 11:11, 31, 35) Kongrigeisin lalonai iahudia na momo. Madi, momo na e burukamu bona e goreremu. Badina be idia ese haroro ḡaukarana na doini e laloa badamu, bona ma haida e hagoadadiamu bona treinin e henimu! Danu, idia edia ekspiriens ese e hagoadadamu. Oibe, Iehova bona ita vairadai iahudia o burukadia na mai hairaidia. (Her. 16:31) Natuda danu mani aita lalodia. Idia e badamu lalonai hekwakwanai momo e davarimu, badina ina tanobada na Satana Diabolo ese e biaguamu, bona lalohadai kavakavadia na e bada e laomu. To, bema natu na hebou lalodiai henanadai e haerelaimu, haroro ḡaukara e duruamu, bona edia abidadama dainai e gini goadamu sivaraina ta kamonaimu neganai, una ese ita na e hagoadadamu. Oibe, Iehova ena kongrigeisin lalonai natuda na mai edia ḡaukara danu!​—Sal. 8:2. w20.08 rau 21-22 par. 9-11

Haroro ḡaukara ta hamatamaia bona ma haida ta hadibadia ita na Iehova ena Witnes neganai, reana ruma bese na asie moale, o turada ese e kirikirilaida, bona iseda haroro herevana e dadaraia. Ededia dalai emu goada ba habadaia diba? Ginigunana be, oi ese bavabia dae Iesu ese guba amo haroro ḡaukara e gunalaiamu. (Ioa. 16:33; Apok. 14:14-16) Iharuana be, bavabia dae Iehova ena gwauhamata na be ḡuḡurumu, o dabumu ḡaudia iboudiai na be henimumu. (Mat. 6:32-34) Emu abidadama unu hetomana ese emu goada baine habadaia. Oi danu emu ruma taudia bona turamu o hadibadia oi na Iehova ena Witnes ida Baibul o stadilaiamu bona edia kongrigeisin heboudia o laomu neganai, oi ese o hahedinaraia emu abidadama na goada herea! Bona emu kara bona mauri o haidau, bena Iehova ena taravatu o badinamu. Una na abidadama bona goada taudia edia kara. Nega iboudiai emu goada ba habadaia, bona ba helalotao, “Iehova, emu Dirava, ese e bamomumu, emu laolao iboudiai lalodiai.”​—Ios. 1:7-9. w20.09 rau 5 par. 11-12

King Asa na haheitalai namona badina ia na Iehova enai e tabekauva. Nega dikadia ai bona maino negadia ai ia ese Iehova e hesiai heniava. Maraḡina negana amo bona ena mauri iboudiai lalodiai, Asa na mai lalona idoinai ida Iehova mo sibona e tomadiho heniava. (1 Han. 15:14) Asa ese una e hamomokania dalana ta binai: Ia ese Iuda ai tomadiho koikoi iboudiai e hadokoa. Baibul etomu: “Ia ese dirava idaudia edia ihaboulaina patadia bona atai gabudia helaḡadia e abidia oho, bona au-tubua e hagaridia, bona kaivakuku e utudia.” (2 Sis. 14:3, 5) Danu, ia ese tubuna hahinena, Maaka, ena kwini dagina e kokia. Dahaka dainai? Badina Maaka ese taunimanima e hagoadadiava kaivakuku ta bae tomadiho henia. (1 Han. 15:11-13) Asa ese e karaia ḡauna ma ta binai: Ia ese tomadiho momokani e haginia lou, oibe, ia ese Iuda taudia e durudia Iehova e lou henia. Iehova ese Asa bona Israel taudia e hanamodia dainai, idia na maino ai e nohova. Asa ena lohia laḡanidia 10 lalodiai, “tano na e laḡa aniva.”​—2 Sis. 14:1, 4, 6. w20.09 rau 14 par. 2-3

Nega momo iseda kohu badadia na ma haida imadia ai ta atodiamu. Heḡereḡere, reana eda moni na bank ai ta atomu. Unu ta kara tomamu, badina dibada eda moni na basine boiomu o ta ese basine henaoamu. Paulo ese Timoteo e hadibaia, ia ese e abia harihari ḡauna ginigunana binai: Ia na mai dibana Dirava ena gwauhamata taunimanima totodia be dahaka. Bona Timoteo e abia harihari ḡauna iharuana binai: Ia na ‘hereva baine harorolaia’ bona ‘evanelia tauna ena ḡaukara baine karaia.’ (2 Tim. 4:2, 5, NWT) Paulo ese ia e hamaoroa Dirava ese e heni harihari ḡaudia na baine gimadia. Timoteo heḡereḡerena, ita danu harihari ḡaudia haida ta abi. Iehova ese Baibul amo hereva momokanidia na ita e henida. Ini hereva momokani na harihari ḡaudia badina be ita e hadibadamu edena dalai Iehova turana ai baitala bona edena dalai baita moale. Unu hereva momokani baita abi dae bona baita badinadia neganai, ita ese hahediba koikoidia bona matabodaḡa karadia iboudiai baita dadaraidia.​—1 Kor. 6:9-11. w20.09 rau 26 par. 1-3

Namona na stiuden ese matanai baine itaia bona taiana ai baine kamonaia ḡauna binai: Oi na mai emu abidadama bona ura ida Baibul o hahedibalaiamu. Bena ia ese ena stadi na be moalelaiamu. Reana Baibul ese oi e durumu sivaraina ta ba herevalaia. Bona ia ese be itaiamu danu Baibul ena sisiba namodia ese ia na baine durua diba. Baibul stadi lalonai pablisa haida edia ekspiriens na stiuden ba hamaorolaia​—reana ia ese e davarimu hekwakwanai na pablisa ese danu e davari to e hanaidia. Eiava pablisa ta na stadi lalonai baine helai vareai, badina reana ena kara namona ese stiuden baine durua diba. Bema stiuden e headava, ia adavana danu e stadimu, a? Reana ia adavana ba noia stadi lalonai baine helai vareai. Emu stiuden ba hagoadaia, ia e dibamu ḡaudia na ena ruma bese bona turana baine hadibalaidia danu.​—Ioa. 1:40-45. w20.10 rau 16 par. 7-9

Iosef bona Maria ese Iesu na e durua namonamo, bona ia e bada neganai, ia na Dirava ese e lalonamo henia, badina una tama bona sina ese Iehova ena dala e badinaia. (Deu. 6:6, 7) Iosef bona Maria ese Iehova na e lalokau henia badava dainai, e urava natudia danu bae durudia Iehova bae lalokau henia totona. Iosef bona Maria ese e abia hidi ḡauna bina: Nega iboudiai idia bona natudia ese Iehova bae tomadiho henia na namo. Una dainai, wiki ta ta ai, Nasareta ai, idia na dubu o synagogue ai e ha hebouva, bona Pasova totona, laḡani ta ta ai, idia na Ierusalem e laova. (Luka 2:41; 4:16) Reana Ierusalem e laova bona e louva negadiai, idia na Baibul e gwaurai gabudia e vadivadiva, bena Iosef bona Maria ese Iesu bona tadina veridia ediai Iehova ena taunimanima sivaraidia e gwauraiva. Iosef bona Maria ese natudia ma haida e havaradia neganai, reana nega iboudiai tomadiho karadia bae goadalai na mai hekwarahina. To edia hekwarahi ahuna na e abia! Idia ese Iehova itomadiho henina karana e atoa guna dainai, ruma bese na lauma dalanai e goada bada. w20.10 rau 28 par. 8-9

Bema oi na Baibul stadi ta lalonai ba helai vareai, namona na bo stadilaiamu kahana ba heḡaeḡaelaia na namo. Dorin, spesol painia tadikakana ta, na e gwa: “Na moalemu, bema e bamogumu tauna na stadi totona e heḡaeḡaemu. Unu amo heduru hereva namodia baine gwaurai diba.” Danu, stadi tauna ese baine itaia diba umui raruosi na o heḡaeḡae namonamo, bona ienai una na haheitalai namona. Ena be ba stadilaia ḡauna ibounai na so heḡaeḡaelaia ḡoevaḡoeva, to namona na hereva badadia haida ba lalodia tao. Ḡuriḡuri na mai anina bada ḡauna ta. Una dainai stadi ikarana tauna ese be noimumu ḡuriḡuri ba gwauraia neganai, namona na bo gwauraimu herevadia ba lalo guna. Unu amo bo gwauraimu herevadia na mai anidia bada. (Sal. 141:2) Japan ai e nohomu hahinena, Hanae, na ena stadi lalonai e helai vareai taihuna ena ḡuriḡuri e laloataomu. E gwa: “Na itaia iena hetura karana Iehova ida na goada. Bona na uramu ia heḡereḡerena ai bainala. Na mamia e lalokau henigumu badina ena ḡuriḡuri ai ladagu danu e gwauraia.” w21.03 rau 9-10 par. 7-8

Iesu ese aposetolo Paulo e hamaoroa ia na Roma ai baine kau. To, Ierusalem ai e nohova Iuda taudia na palani ta e karaia Paulo bae hamasea totona. Roma tuari biaguna Klaudio Lusia ese una palani e dibaia neganai, ia na ema Paulo baine hamauria. Klaudio na haraga herea tauri orea badana ta e hadibadia Paulo bae gimaia bona Kaisarea bae laohaia. Kaisarea ai, Gavana Feliki na e gwa, Paulo na “Herod ena hahemaoro rumana ai do bae gimaia.” Unu amo Paulo e urava bae hamasea taudia ese ia na basie hahisia diba. (Apos. 23:12-35) To, Feliki gabuna na gavana matamatana Festo ese e abia. To Festo na e urava “Iuda taudia lalodia baine hamoaledia dainai, ia ese Paulo e nanadaia, eto, ‘O uramu Ierusalem ba ha dara dae, unuseniai ai baina hahemaoro henimu, a?’” Paulo na mai dibana Ierusalem ai, Iuda taudia na be uramu ia bae hamasea. Ia eto: “Kaisara ladana name hatoa.” Festo ese Paulo e hamaoroa, eto: “Kaisara ladana ome hatoa; Kaisara dekena do baola.” Gabeai, Paulo na Roma ela bona ia na bae hamasea Iuda taudia edia amo e daudau.​—Apos. 25:6-12. w20.11 rau 13 par. 4; rau 14 par. 8-10

Ita iboudai na nega haida ta lalohisihisimu. Heḡereḡere, haida na hereva momokani do asie dibaia neganai, edia kara gunadia e lalomu dainai e lalohisihisimu. Haida be bapatiso murinai e kara kereredia dainai e lalohisihisimu. (Roma 3:23) Oibe, ita na ta uramu kara maorona baita karaia. To “ita iboudai ta hekwakwanai louloumu.” (Iak. 3:2; Roma 7:21-23) Ena be lalohisihisi na dia moale ḡauna, to mai ena namo. Dahaka dainai? Badina una ese ita baine duruda eda mauri baita haidaua, bona ta kara kereredia basita kara lou. (Heb. 12:12, 13) Nega haida eda kerere dainai baita lalohisihisi badamu. Ena be ta helalo-kerehai bona ta hahedinaraia Iehova ese eda dika na e gwautao, to eda kerere dainai doini ta lalohisihisimu. Una lalohisihisi karana ese dika baine havaraia diba. (Sal. 31:10; 38:3, 4) To, namona na baita henahua toho asita uramu eda kerere daidiai baita lalohisihisi hanaihanai. Dahaka dainai? Badina ita ese Iehova ihesiai henina karana baita hadokoamu neganai, Satana na be moale dikadikamu​—ena be Iehova ese eda dika na vada e gwautao!​—2 Korinto 2:5-7, 11 ida ba haheḡereḡerea. w20.11 rau 27 par. 12-13

Salamo karoa 73 e torea Levi tauna ta na kara dika taudia bona hekokoroku taudia e badu henidia, dia edia kara dika daidiai, to mauri namona e moalelaiava dainai. (Sal. 73:2-9, 11-14) Idia na taḡa taudia bona toadia na ḡau ta asie lalohekwarahilaiava. Levi tauna na e laloparara kara dika taudia basine mama henidia bona basine lalohisihisi totona, ḡau badana na Iehova ena lalohadai baine abia. Unu e kara toma neganai, ia na e lalomaino, bona e moale. Ia na e gwa: “Tanobada ai ḡau ta asina ura heniamu, oi [Iehova] mo sibomu.” (Sal. 73:25) Una heḡereḡerena, mauri namona e moalelaiamu kara dika taudia daidiai basita mama na namo. Edia moale na basine daudaumu. (Koh. 8:12, 13) Baita mama henidiamu neganai, una ese lalohisihisi be havaraiamu, bona eda hetura karana Iehova ida be hadikaiamu. Bema emu hemami na Levi tauna ena heḡereḡerena, namona na ia ba tohotohoa. Dirava ena sisiba ba badinaia, bona Iehova ena ura e karaiamu taudia ba bamodia. Bema Iehova o lalokau heniamu bo moalemu. Bona “mauri korikori” e lao heniamu dalana ai bo rakamu.​—1 Tim. 6:19. w20.12 rau 19 par. 14-16

Ḡuriḡuri lalodiai dia emu lalohekwarahi mo Iehova enai ba taho kau, lasi, to ia ba tenkiu henia danu. Herevana hekwakwanai na momo, to iseda hahenamo idauidau baita lalodia na namo. To bema nega haida asi dibamu Iehova enai emu hemami ede ba gwauraia toma, dahaka ba kara diba? Ba laloatao, Iehova ese emu ḡuriḡuri na be haerelaiamu, herevana ḡuriḡuri na kwadoḡi, heḡereḡere bo gwaumu, ‘Mani a durugu!’ (2 Sis. 18:31) Iehova enai ba tabekau; sibomu emu aonega basio abidadama henia. Laḡani 732 B.C.E. ai, Iuda taudia na e gari badina Suria taudia ese idia bae tuari henidia. Una dainai, Iuda taudia na Egypt taudia e noidia idia bae durudia Suria taudia bae halusidia. (Isa. 30:1, 2) To, Iehova ese Iuda taudia e hamaorodia, idia na dika bae davaria badina Egypt taudia ediai e tabekau. (Isa. 30:7, 12, 13) Isaia amo, Iehova ese taunimanima e hamaorodia idia be ede bae noho namonamo toma. Peroveta tauna eto: “Maino ai bona heabidadama [eiava Iehova iabidadama henina] ai goada ba davaria.”​—Isa. 30:15b. w21.01 rau 3-4 par. 8-9

Edia abidadama dainai, horoa taudia na guba ai Keriso ena king bona hahelaḡa taudia ai be laomu. (Apok. 20:6) Guba ai horoa taudia 144,000 ese ahudia be abimu neganai, Iehova, Iesu bona aneru iboudiai na be moalemu. Bena aposetolo Ioane e roha lao, Aramagedono amo e roho mauri taudia “hutuma bada-herea” e itadia. Orea ginigunana taudia iboudiai be 144,000, to ina orea iharuana na hutuma herea bona ta ese basine duahidia diba. (Apok. 7:9, 10) “Edia dabua na kukuro-kukuro” anina na, idia na sibodia e hegima, badina asie uramu Satana ena tanobada mirona ese baine hamirodia, bona idia na Dirava bona Keriso e badinadiamu. (Iak. 1:27) Idia na e lolo badabada eto, Iehova bona Iesu, Dirava ena Mamoe Natuna, ese vada e hamauridia. Bona idia imadia na mai retadia anina na, idia na e moalemu badina dibadia Iehova ese Iesu na King ai vada e halaoa.​—Ioa. 12:12, 13 ida ba haheḡereḡerea. w21.01 rau 15-16 par. 6-7

Tau na ruma bese kwarana namona ai bainela diba, bema Iehova bona Iesu ese kwara dagina e ḡaukaralaiamu dalana baine tohotohoa. Heḡereḡere, manau karana. Iehova na aonega herea Tauna; to, ia na ena hesiai taudia edia lalohadai danu e kamonaimu. (Gen. 18:23, 24, 32) Ena heitatao henunai e nohomu taudia na e hagoadadiamu edia lalohadai bae gwaurai. Iehova na ḡoevadae, to ita na se doridamu baita ḡoevadae. (Sal. 113:6, 7) To Ia ese dia ḡoevadae taudia na e durudiamu ia ihesiai henina ai bae kwalimu. (Sal. 113:6, 7) Baibul ese Iehova na e gwauraiamu ‘ikahada’ tauna. (Sal. 27:9; Heb. 13:6) King David na e gwa, Iehova ena heduru bona manau dainai ia e henia ḡaukara badana na e haḡuḡurua. Iesu ena haheitalai mani aita laloa. Ena be ia na ena hahediba edia Lohiabada, to ia ese idia aedia e huri. Dahaka dainai Iehova ese una sivarai na Baibul lalonai e torea? Unu amo taunimanima iboudiai, ruma bese kwaradia danu, baine hadibadia una haheitalai bae tohotohoa. Iesu eto: “Lau ese na karaiamu karana na umui danu ba kara.” (Ioa. 13:12-17) Ena be Iesu ena siahu na bada, to se ura haida ese isiaina bae lao heni. A ia hari haida isiaidia e lao heniva.​—Mat. 20:28. w21.02 rau 3-4 par. 8-10

Eregabe tadikakamui e, kongrigeisin ai ḡau momo ba kara diba. Umui momo na mai goadamui. Umui na ḡaukara momo o karamu tadikaka bona taihu ba durudia totona. Reana oi na o uramu hesiai tauna ta ai baola. To reana bo hemamimu haida na e laloamu, oi na do matamata dainai dia heḡereḡere mai anina bada ḡaukaradia ba kara. Ena be oi na do matamata, to hari ḡau haida ba kara diba kongrigeisin taudia ese bae abidadama henimu bona bae matauraimu totona. Umui eregabe tadikakamui, o diba ḡauna ta amo ma haida kongrigeisin ai ba durudia diba, a? Oibe, umui momo na mai emui diba. Heḡereḡere, bo itaiamu, badadia na e moalemu, stadi bona hebou totona edia tablet bona fon iḡaukaralaidia namonamo daladia o hadibadiamu neganai, emui diba ini ḡau ai na heduru bada herea idia ediai. Bona ḡau badana na, Tamamu guba ai kudouna ba hamoalea. w21.03 rau 2 par. 1, 3; rau 7 par. 18

Ena be tau adavana na e skuli namonamo, to ruma bese tomadihona bona tiokratik ḡaukaradia na ta ena maduna, namona na ia ese ena ruma bese baine gunalaia. (Efe. 6:4) Hahine ese adavana baine kamonai henia na maoro, to ena abidadama baine hagoadaia karana na ia sibona ena maduna. Una dainai, nega baine ato sibona baine stadi bona baine lalo dobu. Una ese be duruamu Iehova be lalokau heniamu bona be matauraiamu bona mai moalena ida adavana be kamonai heniamu. Iehova e lalokau heniamu dainai adavadia henudia ai e nohomu ha’hinedia na e moale badamu, to Iehova ese e ato kwara dagina asie badinaiamu hahinedia na basie moalemu. Idia na haheitalai namona matamata tatau bona ha’hine ediai. Bona idia ese dia ruma bese ai mo, to kongrigeisin ai danu hemami namona e havaraiamu. (Tito 2:3-5) Hari, Iehova e badinaiamu bona e hesiai heniamu taudia padadiai, ha’hine edia namba na bada herea.​—Sal. 68:11. w21.02 rau 13 par. 21-23

Aposetolo Paulo na asi gari dibana bona haheauka karana ai haheitalai namona e hahedinaraia. Ena be nega haida lalomanoka mamina e abiava, to Iehova ena goada ai e tabekauva dainai e haheauka. (2 Kor. 12:8-10; Fili. 4:13) Bema baita manau bona Iehova ena heduru ai baita tabekau, baita goadamu bona basita garimu. (Iak. 4:10) Ita ta davarimu hedibaḡani o hekwakwanai na Iehova ese se havaramu. Hahediba tauna Iakobo na e gwa: “Hedibaḡani ai ta basineto ‘Dirava ese e dibaḡanigumu’; badina be dika na Dirava idibaḡanina asi dibana, bona Dirava ese danu tau ta se dibaḡaniamu.” (Iak. 1:13) Una hereva baita abia daemu neganai, ita ese Tamada lalokauna guba ai baita hetura henia namonamomu. Iehova na “se idaumu.” (Iak. 1:17) Ia ese Kristen ginigunadia edia hekwakwanai negadiai e durudia heḡereḡerena, ita ta ta danu be durudamu. Iehova ba noia goadagoada aonega, abidadama, bona goada baine henimu. Ia ese emu ḡuriḡuri na be haerelaimu. w21.02 rau 31 par. 19-21

Emu Baibul stadi na hebou e maimu neganai, ba hahedinaraia o laloa badamu, unu amo ia bo hagoadaiamu. (Fili. 2:4) Dia iena mauri ibounai ba diba, to ena kara e haidau dainai ba hanamoa, bona ena Baibul stadi, ena ruma bese, bona ena moni ḡaukara daidiai ba henanadai. Unu bamona herevahereva karana ese emui hetura karana baine hanamoa diba. Stadi tauna bo hetura heniamu neganai, bo duruamu baine goada ela bona baine bapatiso. Stadi tauna na baine goada bona ena mauri baine haidaua neganai, ba durua bena baine mamia ia danu kongrigeisin tauna ta. Una na heabidae karana amo ba hahedinaraia diba. (Heb. 13:2) Stadi tauna na e heḡereḡeremu pablisa ai bainela neganai, ba noia oi ida ba haroro hebou. Diego, Brazil ai e nohomu pablisana, na e gwa: “Tadikaka momo ese e boirigu idia ida baia haroro. Una na dala namona idia baina dibadia namonamo. Unu na kara toma neganai, ḡau momo na diba, bona na mamia egu hetura karana Iehova bona Iesu ida na e hagoadaia.” w21.03 rau 12 par. 15-16

Iesu ese murinai e rakava taudia na e hamaorodia inaidia bae lalokau henidia. (Mat. 5:44, 45) Una haraḡa, a? Lasi! To Dirava ena lauma helaḡa amo baita karaia diba. Dirava ena lauma huahuadia na lalokau, bona danu haheauka, hebogahisi, manau bona boga-auka. (Gal. 5:22, 23) Unu kara ese bae duruda, inai karana baita haheaukalaia diba. Inai taudia momo ese edia kara na e haidau, badina adavadia, natudia o dekedia taudia ese unu kara namodia na e hahedinarai. Idia momo na ita tadikakada bona taihuda namodia ai ela. Una dainai, bema emu ai na e aukamu Iehova o hesiai heniamu dainai e inai henimumu taudia ba lalokau henidia, namona na lauma helaḡa totona ba ḡuriḡuri. (Luka 11:13) Bona namona na bavabia dae Dirava ena dala na hanaihanai namo herea. (Her. 3:5-7) Ena be inai karana ese hisihisi baine havaraia, to lalokau ena goada ese e hereaia. Haida ediai lalokau baita hahedinaraiamu neganai, edia kara na be idaumu. Bona una ese Iehova kudouna be hamoaleamu. To ena be inaida ese na dounu bae inai henida, to dounu baita moale diba. w21.03 rau 23 par. 13; rau 24 par. 15, 17

Peroveta tauna Ioel na tuari oreana ta e perovetalaia. (Ioel 2:1, 8, 11) Iehova na e gwa ia ese ena “tuari oreana badana” (Babulono ena tuari taudia) baine ḡaukaralaidia gwau-edeede Israel taudia baine panisidia totona. (Ioel 2:25) Una tuari oreana na e gwauraiamu not kahana amo bainema na maoro badina Babulono ena tuari taudia na “mirigini kahana” o not kahana amo Israel bae tuari henia. (Ioel 2:20) Una tuari oreana na e ḡaukara heboumu kwadi oreana ida e haheḡereḡerea. Ioel ese ini e herevalaidia tomamu: Tuari taudia na “ta ta ena dala ena dala ai e rakamu. . . . Hanua latanai e roho kaumu, . . . ruma lalodiai e dada daemu, gaba mauru amo e rau vareaimu, henao tauna na heto.” (Ioel 2:8, 9) Mani a laloa. Tuari taudia na gabu ibounai. Komu gabuna ta lasi. Babulono tuari oreana amo ta basine heau mauri diba. Laḡani 607 B.C.E. ai Babulono taudia (eiava Kaldea taudia) na kwadi na heto Ierusalem hanuana e habuaia tari. Baibul na e gwaumu: “Kaldea pavapavana . . . ese . . . tauhau eiava hane-ulato, tau badana eiava tau burukana, se bogadia hisi.​—2 Sis. 36:17. w20.04 rau 5 par. 11-12