February

Tadikaka taihu baita dibadia namonamo. Hebou do se matama o hebou e oremu murinai idia ida baita herevahereva, baita haroro hebou, bona bema mai dalana baita boiridia ita ida baita aniani hebou. Unu bo kara tomamu neganai, bo lalopararamu taihu ta na se uramu ma haida baine bamodia badina ia na e hemaraimu, mai ena moni momo tadikakana ta na dia kohu e lalo badamu to heabidae tauna, eiava ruma bese ta na nega momo hebou e mai leidimu badina daḡedaḡe e haheaukalaimu. (Iobu 6:29) Una dainai, namona na ma haida ediai e varamu ḡaudia na basita maumaurai. (1 Tim. 5:13) To, tadikaka taihu na baita dibadia namonamo bona ediai e vara ḡaudia baita diba namonamo. Una ese be durudamu idia baita lalopararalaidiamu. Oi na tadikaka ta o taihu ta ena kara dainai so moalemu, to ena mauri dalana bo dibaia namonamomu neganai ia na bo bogaia hisimu. Vaia, tadikaka taihu idibadia na mai hekwarahina. To, mai kudoumu idoinai ida Baibul ena sisiba bo badinaiamu neganai, oi na Iehova o tohotohoamu, ia na “taunimanima iboudiai” e lalokau henidiamu.​—1 Tim. 2:3, 4; 2 Kor. 6:11-13. w20.04 rau 16-17 par. 10-12

Iesu do se mase hanuaboinai, ia ese ena hahediba na e hadibadia bae helalokau heheni. Mai dibana, sibona ena namo se tahumu lalokauna ese, baine durudia lalotamona ai bae noho bona tanobada ena inai karana bae haheaukalaia diba. Mani Tesalonika kongrigeisin ai e vara ḡauna a laloa. E hematama negana amo, tadikaka na e daḡedaḡe henidiava. To, unuseni ai e nohova tadikaka bona taihu ese Dirava ibadinana karana bona lalokau ai haheitalai namona e hahedinaraia. (1 Tes. 1:3, 6, 7) Paulo ese e hagoadadia lalokau na dounu bae hahedinaraia, bona ‘bae habadaia.’ (1 Tes. 4:9, 10) Idia ese Paulo ena hahediba herevana na e badinaia, badina laḡani ta murinai ena revareva iharuanai, Paulo na e gwa: “Emui heura heheni danu bada.” (2 Tes. 1:3-5) Edia lalokau ese e durudia nega aukadia bona daḡedaḡe karana bae haheaukalaia. w21.03 rau 22 par. 11

Bema ita na ta uramu mauri hanaihanai ahuna baita abia, namona na Kristen mauri dalana baita badinaia. (Apos. 20:24; 1 Pet. 2:21) To, Satana bona ia e badinaiamu taudia na asie uramu ita na Kristen mauri dalana baita badinaia to e uramu idia ida baita heau ‘hebou.’ (1 Pet. 4:4) Idia ese ita ta maurilaiamu mauri dalana na e kirikirilaiamu bona e laloamu edia mauri dalana na mauri dalana namona bona sibodia edia ura bae badina. To, una na koikoi. (2 Pet. 2:19) Mauri dala maorona baita badinaia na mai anina bada. Satana na se uramu ita iboudai na “mauri gabuna e laomu dalana” hekahi-hekahina ai dounu baita heau to ia na e uramu hari ina negai tanobada taudia momo ese e badinaiamu ‘dala lababana’ ai baita heau. Una dala ibadinana na asi hekwarahina. To, ia na “mase gabuna e laomu dalana.” (Mat. 7:13, 14) Dala maorona ai baita noho bona Iehova ena taravatu asie badinamu taudia ese basie koida totona, namona na Iehova enai baita tabekau bona Ia baita kamonai henia. w20.04 rau 26 par. 1; rau 27 par. 5, 7

Laḡani gunadia ai, Russia bona e durua tanodia na “tano herea-daena” lalonai e vareai. (Dan. 11:41) Edena dalai? Laḡani 2017 ai, hari e lohiamu not kahana pavapavana ese Iehova ena taunimanima edia ḡaukara e koua bona tadikaka taihu haida na dibura rumai e atodia. Bona eda pablikeisin bona New World Translation Baibul e taravatudia. Danu, idia ese eda brens ofis, Kingdom Hall, bona Assembly Hall Russia ai na e abidia. Unu e vara muridiai, laḡani 2018 ai, Gavanin Bodi ese e hamomokania Russia bona e duruamu tanodia na not kahana pavapavana. Ena be Iehova ena taunimanima na gavamani ese e daḡedaḡe henidiamu, to idia na gavamani ituari henina eiava isenisina karadia lalodiai asie vareaimu. Idia na Baibul ena sisiba e badinaiamu “hanua pavapavadia bona lohiadia danu daidiai” e ḡuriḡurimu, heḡereḡere bema gavamani na abi hidi e karamu eda tomadiho bae taravatua eiava lasi. w20.05 rau 14 par. 9

Tama sina e, bema o uramu natumu na baine hamomokania Baibul ena hahediba herevadia na momokani, namona na Dirava turana ai baela, bona sibodia ese bae hamomokania Baibul ena hahediba herevadia na momokani. Bema umui na o uramu Dirava ena hereva momokani na natumui ba hadibalaidia, namona na ba hahedinaraia Baibul istadilaina karana ai umui na haheitalai namona. Nega bavato o dibamu ḡaudia ba lalodia dobu na namo. Unu amo natumui ba durudia unu bae kara toma. Natumui na eda Baibul stadi tuludia iḡaukaralaidia daladia ba hadibalaidia, emui Baibul stadi o hadibadiamu heḡereḡerena. Unu bo kara tomamu neganai, natumui bo durudiamu Iehova bae lalokau henia bona bae abia dae momokani Iehova ese “hesiai tauna mai ena kamonai bona kara maoromaoro” amo e durudamu Baibul baita lalopararalaia totona. (Mat. 24:45-47) Natumui na Baibul ena hereva badadia mo ba hadibadia na dia heḡereḡere. Edia diba bona laḡanidia heḡereḡerediai “Dirava ena dobu ḡaudia” ba hadibalaidia, unu amo bo durudiamu edia abidadama bae hagoadaia totona.​—1 Kor. 2:10. w20.07 rau 11 par. 10, 12-13

Hari ina negai taunimanima hida ese edia hetura karana Iehova ida na e moalelaiamu? Taunimanima milioni momo. Una hetura karana na baine vara diba badina idia ese Iesu ena mauri idavalaina boubouna e abidadama heniamu. Una boubou ḡauna dainai ita na Iehova turana ai baitala diba, eda mauri na ienai baita gwauhamatalaia bona baita bapatiso. Unu baita kara tomamu neganai, ita bona ma haida, eda mauri ta gwauhamatalai bona bapatiso ta abi tauda milioni momo na herea mikamika Tauna ida eda hetura karana baita moalelaiamu. Edena dalai baita hahedinaraia eda hetura karana Dirava ida na ta laloa badamu? Abraham bona Iobu heḡereḡeredia, idia na laḡani handred mai kahana lalodiai Dirava e badinaia, ita danu herevana ina tanobada dikana ai ede daudauna Iehova ta hesiai henia, to dounu Ia baita badinaia. Daniel heḡereḡerena, eda hetura karana Dirava ida baita laloa bada na namo, ena be eda mauri na baita haboioa diba. (Dan. 6:7, 10, 16, 22) Iehova ena heduru dainai hahetoho baita haheaukalai diba, bona eda hetura karana Ia ida na baine goada.​—Flp. 4:13. w20.05 rau 27 par. 5-6

King David na ena ruma guhina amo tau ta adavana e diguva e itaia. Ia na mai dibana Iehova ena taravatu na: “Dekemu tauna, . . . adavana danu basio ḡahusia.” (Eso. 20:17) To, David na dounu una hahine e raraiava. Unu amo e hahedinaraia, ia lalona na se tamona badina ia na Bataseba e ura henia, to se ura Iehova baine hamoalea. Ena be David na laḡani daudau Iehova e hesiai henia, to ia na sibona ena ura e laloa bada. Una negai, David na dala kererena e badinaia. Una ese Iehova ladana na e hadikaia. Bona David na asi edia kerere taudia bona ena ruma bese ediai dika bada e havaraia. (2 Sam. 11:1-5, 14-17; 12:7-12) Iehova ese David na e matahakani henia, bona edia hetura karana na e namo lou. (2 Sam. 12:13; Sal. 51:2-4, 17) David na e lalo lou ia na sibona ena ura e laloa bada neganai, hekwakwanai bona hisihisi e havara. Iehova ese David e durua, a? Oibe, Iehova ena Hereva ese David na ini e herevalaia toma: “Iehova, ena Dirava, . . . e badinaiava.”​—1 Han. 11:4; 15:3. w20.06 rau 11 par. 12-13

Baibul ese e hahedinaraiamu Iehova ese ena lalokau amo ita na e veridamu. Edena dalai unu e kara tomamu? Mani ina haheitalai a laloa: Oi na guri dobuna ta ai o moru. Guri na dobu herea dainai oi na basio dae dibamu. To, ba dae totona ta ese varo baine tahoa dobi bena baine verimu dae. Iehova ese hari dina sirina ai e gwauraia herevana heḡereḡerena, ia ese Israel taudia na mai lalokauna ida e “hakaudia.” Hari ina negai danu Dirava ihesiai henina karana e hadokoa bona hekwakwanai bona lalohekwarahi ese e hametaudiamu taudia na Dirava ese e lalodiamu. Ia na e uramu idia na bae diba Ia ese idia na e lalokau henidiamu, bona e uramu baine durudia Ia bae lou henia. Iehova ese oi baine ḡaukaralaimu diba iena lalokau na idia ediai ba hahedinaraia. Namona na manoka taudia baita hadibadia Iehova ese idia na e lalokau henidiamu, bona ita ese danu idia na ta lalokau henidiamu. w20.06 rau 27 par. 12-13

Hahediba tauna Stefano e mase neganai, Kristen taudia momo na Ierusalem e rakatania bena “Iudea bona Samaria tanodia idoidiai” ela, ma haida be Kupro bona Antioka ela. (Apos. 7:58–8:1; 11:19) Hahediba taudia na hekwakwanai momo e davariva. To, idia ela gabudiai sivarai namona e harorolaiava, bona Roma Basileiana ena gabu momo ai kongrigeisin e hagini. (1 Pet. 1:1) To, gabeai Kristen taudia na ma hekwakwanai momo e davari. Heḡereḡere, laḡani 50 C.E. lalodiai, Roma Pavapavana Klaudio ese Iuda taudia iboudiai oda e henidia Roma bae rakatania. Una dainai, Kristen ai ela Iuda taudia na edia ruma e rakatani bona gabu idauidau ela. (Apos. 18:1-3) Laḡani 61 C.E. lalonai, aposetolo Paulo na eto, Kristen taudia na taunimanima ese e daḡedaḡe henidiava, dibura ruma ai e atodiava, bona edia kohu e dadiva. (Heb. 10:32-34) Danu, Kristen taudia e gorerediava bona ogoḡami maurina e haheaukalaiava.​—Roma 15:26; Flp. 2:25-27. w21.02 rau 26-27 par. 2-4

Bema baita hekwarahimu iseda abidadama baita hagoadaiamu, Satana bona ia e duruamu taudia na asi siahudia ita bae kouda hereva momokani lalonai baita raka totona. (2 Ioa. 8, 9) Ita na ta dibamu tanobada taudia ese be inai henidamu. (1 Ioa. 3:13) Ioane ese e hadibadamu “tanobada idoinai na dika tauna imana ai.” (1 Ioa. 5:19) Ina nega dokona e lao heniamu lalonai, Satana na e badu dikadikamu. Ia ese hahetoho idauidau heḡereḡere, matabodaḡa karadia bona aposteit taudia edia hereva koikoidia e ḡaukaralaimu, dia unu mo to daḡedaḡe karadia danu e ḡaukaralaimu. Satana na mai dibana ena nega na kwadoḡi herea dainai, ia na be uramu iseda haroro ḡaukara baine koua, bona iseda abidadama baine hadikaia. Asita hoamu badina tano haida ai iseda ḡaukara na e koua eiava e taravatua. Ena be unu e vara tomamu, to iseda tadikaka taihu na dounu e haheaukamu. Satana na ḡau idauidau e karamu ita baine hamorudia, to ita na dounu baita kwalimumu! w20.07 rau 24 par. 12-13

Iehova na e ura ena tanobada mai hairaina ai taunimanima na bae mauri hanaihanai bona bae moale. To, Adam bona Heva ese Tamadia e gwau-edeede henia dainai, idia bona edia bese na basie mauri hanaihanai diba. (Roma 5:12) To, Iehova be dahaka e kara? Maoromaoro, ia ese taunimanima baine hamauridia dalana e gwauraia hedinarai. (Gen. 3:15) Iehova na Iesu baine bouboulaia, unu amo Adam bona Heva edia bese na kara dika bona mase edia iḡui amo baine ruhadia. Bena Dirava ese ia bae abia hidi taudia ta ta na mauri hanaihanai baine henidia. (Ioa. 3:16; 1 Kor. 15:21, 22) Iehova ese Iesu amo mase taudia hutuma be hatoredia isi loumu neganai, reana haida do be hatoredia isi lou gunamu, bena una murinai ma haida be tore isi loumu. Dahaka dainai? Bema taunimanima iboudiai na nega tamona ai be tore isi loumu, una ese daradara be havaraiamu. Bona Iehova na ḡau iboudiai e karadia ḡoevaḡoevamu Diravana. Ia dibana bema ḡau iboudiai be organize namonamomu, taunimanima na maino ai be noho dibamu.​—1 Kor. 14:33. w20.08 rau 14 par. 3; rau 15 par. 5

Namona na stiuden ese baine lalopararalaia ḡauna binai: Ia na e uramu Baibul stadi ese baine durua ela bona Iehova ena Witnes ta ai bainela. Step-by-step o taina ruana stiuden baita durua ela bona baine bapatiso. Step ginigunana: Stiuden na Iehova baine dibaia, baine lalokau henia, bona baine abidadama henia. (Ioa. 3:16; 17:3) Step iharuana: Stiuden na Iehova bona kongrigeisin taudia baine bamodia. (Heb. 10:24, 25; Iak. 4:8) Step ihatoina: Stiuden ese e manadalai kara dikadia baine rakatanidia bena baine helalo-kerehai. (Apos. 3:19) Step ihahanina: Stiuden ese ma haida baine haroro henidia. (2 Kor. 4:13) Step ihaimana: Stiuden ese ḡuriḡuri amo ena mauri na Iehova enai baine gwauhamatalaia murinai, ia na baine bapatiso. (1 Pet. 3:21; 4:2) Bona una negai iboudiai na be moale dikadikamu! Stiuden ese unu step ta ta e haḡuḡurumu neganai, namona na ba hanamoa o ba tenkiu henia bona ba hagoadaia basine hesiku ela bona baine bapatiso. w20.10 rau 17-18 par. 12-13

Bema kongrigeisin ai ma haida edia ḡaukara na emu ḡaukara ida bo haheḡereḡerea tohomu, reana bo laloamu kongrigeisin ai oi na asi emu ḡaukara. Reana kongrigeisin taudia haida be hahediba taudia, haida be ḡaukara e haria namonamomu taudia, eiava ma haida be hereḡu taudia namodia. To reana oi na bo laloamu Dirava ese unu harihari ḡaudia na idia sibodia mo e henidia dainai, oi na dia heḡereḡere. Una ese e hahedinaraiamu oi na manau tauna. (Fili. 2:3) To, nahuamu na ba tohoa. Tadikaka haida na ḡaukara mai dibadia namonamo, bona bema edia ḡaukara na emu ḡaukara ida bo haheḡereḡerea louloumu, reana gabeai oi na bo lalomanokamu. Dia namo aposetolo Paulo ese e gwauraia herevana ai, lalohadai kererena bavabia, bena baoto, ‘Kongrigeisin lalonai lau na asi egu ḡaukara.’ Aposetolo edia negai, Iehova ese harihari ḡaudia na Kristen taudia iboudiai e henidia, to haida sibodia mo na ena lauma helaḡa amo durudiava hoa karadia bae kara. (1 Kor. 12:4-11) Iehova ese harihari ḡaudia idauidau e heni, badina be ia ese Kristen taudia ta ta na e lalodia badava. Hari ina negai, lauma helaḡa ese ita na se durudamu hoa karadia baita kara totona. To, iboudai ese baita badinaia sisibana binai: Ena be iseda aonega na idauidau, to Iehova ese ita ta ta na e laloda badamu. w20.08 rau 23 par. 13-15

Ba ḡuriḡuri ba goada totona. Iehova ese emu ḡuriḡuri iboudiai be haerelaidiamu bona oi na basine rakatanimumu. (Apos. 4:29, 31) Nega iboudiai, ia ese oi na be durumumu. Ma danu, ia ese oi e durumu metau idauidau o hanaidiamu bona emu mauri o senisiamu dalana na ba lalohadailaia loulou. Davara Kakakakana ai Israel taudia e hamauridia Diravana na oi be durumumu Keriso ena hahediba tauna ai baola totona. (Eso. 14:13) Salamo e torea tauna ena abidadama ba tohotohoa, bona hari dina ena siri ba laloa dobu. Taihu Tomoyo ena ekspiriens mani a laloa. Nega ginigunana ai, ia ese ruma-ta-ruma-ta haroro ḡaukara e karaia neganai, ruma hahinena ta ese e lolo henia, eto: “Launa asina uramu Iehova ena Witnes baina hereva henidia!” bena iduara e koua lalodika. Tomoyo na asi garina ida ia e bamoa taihuna e hamaoroa: “Iena hereva ome kamonai, a? Lau baina hereva na asi anina, bona ia na mai dibana lau na Iehova ena Witnes hahinena. Lau na moale dikadikamu!” Hari, Tomoyo na regula painia ḡaukara e karaiamu. w20.09 rau 6 par. 13-14

Asa ese taunimanima e hamaorodia, Iehova ese “maino” na idia e henidia. (2 Sis. 14:6, 7) To Asa dibana ina na dia laḡa-ani negana. Ia ese ḡaukara e hamatamaia heḡereḡere hanua, maḡu, kohoro, bona geiti e hagini. Ia ese Iuda taudia e hamaorodia: “Tano na doini iseda.” Una anina be dahaka? Anina binai: Taunimanima na Dirava ese e henidia tanona ai bae loaloa diba, ruma bae hagini diba, bona daḡedaḡe taudia garidia na basie gari. Asa ese taunimanima e hagoadadia una maino negana bae ḡaukaralaia namonamo. Danu, Asa ese una nega lalonai ena ami e hagoadaia. (2 Sis. 14:8) Una anina be Asa ese Iehova e dadaraia, a? Lasi. Asa dibana, namona na king ese taunimanima baine haheḡaeḡaedia, vaira negadia ai hekwakwanai idauidau bae hanaidia totona. Danu ia dibana, Iuda ai una maino negana na basine mia daudau, bona una na e momokani. w20.09 rau 15 par. 4-5

Elda ta na Dirava ena mamoa e lalodia badamu dainai, reana taravatu haida be atomu. To danu, elda tauna ta ena ḡaukara haida na ruma bese kwarana ena ḡaukara ida dia heḡereḡere. Haheitalai ta bina, Iehova ese elda taudia na judge o hahemaoro ḡaukarana e henidia, asie helalo-kerehaimu kara dika taudia na idia ese kongrigeisin amo bae kokia diba. (1 Kor. 5:11-13) To danu, Iehova ese ruma bese kwarana e henia ḡaukaradia haida na elda taudia na se henidia. Haheitalai binai, Iehova ese ruma bese kwarana na maoro e henia taravatu idauidau baine ato, bona ena ruma taudia baine hamaorodia unu taravatu bae badina. (Roma 7:2) Heḡereḡere, tama na mai ena maoro taravatu baine ato, hanuaboi ai natuna be dahaka taim ai ruma baine lou henia na namo. Bema natu ta ese una taravatu basine badinaia, tamana na mai ena maoro natuna baine matahakani henia. (Efe. 6:1) To, lalokau ruma bese kwarana na abi hidi ta do se kara neganai, adavana ida be herevahereva gunamu badina idia na tauani “tamona.”​—Mat. 19:6. w21.02 rau 16-18 par. 10-13

Hereva momokani na harihari ḡauna badina ma ta binai: Iehova ese hereva momokani na “ia e tahuamu taudia” eiava manau taudia sibodia mo e henidiamu. (Heb. 11:6) Manau taudia na e abia daemu, hesiai tauna mai ena kamonai bona mai ena kara maoromaoro ese hari ina negai Baibul amo ita e hadibadamu. (Mat. 11:25; 24:45) Idia edia heduru dainai ita ese hereva momokani anidia ta lalopararalaimu, una na hahenamo badana. (Her. 3:13) Iehova ese ita e henida hahenamo ma ta binai: Ia sivaraina bona ena gwauhamata iboudiai na ma haida baita hadibalaidia. (Mat. 24:14) Unu sivarai na mai anidia bada, badina una ese taunimanima e durudiamu Iehova ena bese ai baela bena mauri hanaihanai bae abia. (1 Tim. 4:16) Herevana haroro ḡaukara na ede baita habadaia toma, to hari ina negai ita na haroro ḡaukara hereadaena ta duruamu. (1 Tim. 2:3, 4) Momokani, Dirava ida ta ḡaukara heboumu na hahenamo badana!​—1 Kor. 3:9. w20.09 rau 26-27 par. 4-5

Paulo na Roma ela neganai, nega momo Iehova ese tadikaka taihu e ḡaukaralaidiava ia bae durua totona. Heḡereḡere Paulo turana namodia rua, Aristako bona Luka, na e ura Paulo ida Roma baela. Baibul ese se hahedinaraia Iesu na e gwauhamata Aristako bona Luka na dika ta basie davaria ela bona Roma ai bae kau. Una dainai una laolao e karaia neganai, edia mauri na asie laloa. To, mai edia ura ida unu e kara toma badina e ura Paulo bae durua. To gabeai, una laolao lalonai lai gubana e toa neganai, e laloparara edia mauri na basie haboioamu. Heḡereḡere, Sidono siti ai e kau neganai, Iulio ese Paulo gwaumaoro e henia “turana dekedia bainela bona dekediai baine laḡa ani.” (Apos. 27:1, 2) Bona gabeai, Puteoli siti ai, Paulo mai bamona ida na ‘varavara haida ida e hedavari; bena idia ese e dogodia tao, dina hitu idia ida bae noho.’ Unu Kristen taudia ese Paulo mai bamona ida edia dabu ḡaudia e heniva negadiai ta ta ai, Paulo na e moale dainai idia ihagoadadia ekspiriens haida e gwaurai.​—Aposetolo Edia Kara 15:2, 3 ida ba haheḡereḡerea. w20.11 rau 15-16 par. 15-17

Tama sina e, emu hereva bona kara amo natumu ba hadibaia oi ese Iehova na o lalokau henia badamu. Ba laloatao, oi ese natumu ba henia harihari ḡauna hereadaena be ina: Idia ba durudia Iehova bae lalokau henia. Bona ḡau badana na ba hadibadia hanaihanai Baibul bae stadilaia, bae ḡuriḡuri, hebou baela, bona haroro ḡaukara bae karaia. (1 Tim. 6:6) Vaia, natumu ba ubudia eiava tauanina kahanai ba durudia na namo. (1 Tim. 5:8) To ba laloatao, moni o kohu amo natumui ba durudia na dia ḡau badana, to namona na ba durudia Iehova turana ai baela, unu amo ina nega oromana gunana baine ore neganai, idia na bae roho mauri, Dirava ena tanobada matamatana lalonai bae noho. (Esek. 7:19) Ita na ta moalemu badina be Kristen tama sina ese abi hidi namodia e karamu, edia ruma bese e duruamu lauma dalanai baine goada totona! Ruma bese unuhetomadia ai natu e badamu neganai ini ḡau namodia na doini be karamu, bona idia na be moalemu badina tamadia o sinadia ese idia na e hadibadia namonamo!​—Her. 10:22. w20.10 rau 28-29 par. 10-11

Aposetolo Petro na nega haida e hereva haraḡava. Una dainai gabeai ena kara bona hereva daidiai e lalohisihisiva. Heḡereḡere, Iesu ese ena aposetolo taudia e hamaorodia ia na baine hisihisi bona baine mase neganai, Petro ese e hakaua siri, bena Iesu e gwau henia. (Mat. 16:21-23) Iesu ese Petro e sisiba henia. Hutuma ese Iesu bae dogoatao neganai, Petro na lalona e haraḡa, bena hahelaḡa tauna badana ena hesiai tauna taiana e utua oho. (Ioa. 18:10, 11) Una negai, Iesu ese Petro ma e sisiba henia. Danu Petro na mai hekokorokuna ida e gwa, ‘Ena be aposetolo haida na bae hekwakwanai, to lau be lasi.’ (Mat. 26:33) To Petro na taunimanima garidia e gari, bona nega toi Iesu e ḡorea. Petro na e lalohisihisi bada herea dainai, “e raka lasi, e tai dikadika.” (Mat. 26:69-75) Reana Petro na e lalo Iesu ese ena dika be gwautaomu, eiava? Ena be Petro na e lalometau to una ese ia na se koua Iehova baine badinaia totona. Petro na e moru to ma e goada lou, bona aposetolo ma haida ida Iehova e hesiai henia.​—Ioa. 21:1-3; Apos. 1:15, 16. w20.12 rau 20 par. 17-18

Ruma bese kwarana ese manau karana na dala momo ai baine hahedinaraia diba. Heḡereḡere, basineto ia adavana bona natuna na ḡoḡoevadae. Ia ese edia lalohadai baine kamonai, ena be edia lalohadai na idau. United States ai, taihu Marley na e gwa: “Nega haida adavagu bona lau emai lalohadai na i’idau. To na mamiamu ia ese e lalogu badamu bona e matauraigumu badina egu lalohadai e tahuamu, e lalodia namonamomu bena abi hidi e karamu.” Danu, manau tauna na mai moalena ida ruma ḡaukaradia e karamu, ena be ena gabu ai unu na ha’hine edia ḡaukara. Una na taina auka. Dahaka dainai? Taihu Rachel na e gwa: “Egu gabu ai, bema tau na adavana be duruamu mereki be hurimu o ruma be haḡoevaiamu, dekena taudia o varavara na be lalomu, ia be ‘tau korikori’ eiava. Be tomamu adavana na se biaguamu.” Bema emu gabu ai danu unuheto, ba helalotao Iesu na ena hahediba aedia e huri, ena be taunimanima e tomava una na hesiai tauna ena ḡaukara. Ruma bese kwarana namona na sibona se helalomu, to adavana bona natuna edia hemami e lalomu. w21.02 rau 2 par 3; rau 4 par. 11

Ina atikol ai tame herevalai ḡaudia toi amo dahaka tame diba? Nega namodia na Iehova ena harihari ḡauna; to ena be guna maurina na namo, to nega vairai eda mauri na be namo hereamu. Ena be haida ese e habadudamu, to bema edia dika baita gwautaomu, Iehova baita hesiai heniamu. Lalohisihisi bada karana dainai, Iehova ihesiai henina karana na basita moalelaiamu. To, aposetolo Paulo heḡereḡerena, namona na baita abia dae Iehova ese eda dika na vada e gwautao. (1 Tim. 1:12-15) Ita na mauri hanaihanai helarona baita abiamu. Tanobada matamatana lalonai baita nohomu neganai, laloda e hahisimu ḡaudia na ma basita lalodia loumu. Baibul ese una nega na ini e gwauraia toma: “Ḡau gunadia na basie lalodia tao bona basie lalodia une.” (Isa. 65:17) Mani a laloa: Ita haida na Iehova ta e hesiai henia ela bona ta buruka, to nega tanobada matamatana ai, baita matamata loumu. (Iobu 33:25) Una dainai, namona na laloda baita hadai guna maurina basita laloa momo. To, tanobada matamatana baita laloa, bona hari baita ḡaukara goada unu amo unuseniai baita noho diba! w20.11 rau 24 par. 4; rau 29 par. 18-19

Dahaka be vairai be varamu? Hisihisi badana lalonai, Iehova ese dala rua amo be hamauridamu. Ginigunana, Ia ese tanobada gavamanidia be doridiamu tomadiho koikoi ibounai be haoreamu neganai, ena kamonai hesiai taudia na be hamauridiamu. (Apok. 17:16-18; 18:2, 4) Bena, Satana ena tanobada kahana oredia na Aramagedono ai be haorediamu neganai, ena taunimanima na be hamauridiamu. (Apok. 16:14, 16) Iehova baita hakahikahiamu neganai, Satana ese basine hadikadamu. Ia hari be haorea vaitanimu. (Roma 16:20) Una dainai, tuari dabuana idoinai ba hahedokilaia​—bona basio kokia! Ina tuari ai sibomu basio tuari. Tadikakamu bona taihumu ba kahadia. Bona Iehova ena hahekau herevadia ba badina. Unu bo kara tomamu neganai, bo abia dae momokanimu Tamamu lalokauna gubai ese be hagoadamumu bona be gimamumu.​—Isa. 41:10. w21.03 rau 30 par. 16-17

Baibul ena sivarai momo herea ese e hahedinaraimu maino ai baita noho bona Iehova baita abidadama henia na ḡau badana. Unu sivarai o duahimu negadiai, namona na ba tahua dahaka ese Dirava ena taunimanima e durudia dainai daḡedaḡe lalonai asie gari. Heḡereḡere, Iuda ena supreme court ese haroro ḡaukara e taravatua neganai, aposetolo taudia na asie gari. To, idia na mai lalo goadadia ida eto: “Dirava ikamonai-henina be namo; taunimanima ikamonai-henidia be dika.” (Apos. 5:29) Ena be daḡedaḡe taudia ese aposetolo taudia e dadabadia, to idia na asie gari. Dahaka dainai? Badina dibadia Iehova na edia kahai gini. Ia na idia daidiai e moaleva. Una dainai, idia ese sivarai namona iharorolaina asie hadokoa. (Apos. 5:40-42) Una heḡereḡerena, daḡedaḡe taudia ese Stefano bae hamasea neganai ia na se gari; vairana na e kara “aneru ta vairana na heto.” (Apos. 6:12-15) Dahaka dainai? Badina ia dibana Iehova na ia dainai e moaleva. w21.01 rau 4 par. 10-11

Una anina na, idia lalodia na ḡoeva bona Iehova na edia kara e moalelaiamu. (Isa. 1:18) Idia ese edia mauri na ḡuriḡuri amo Dirava e henia, e bapatiso, Kristen taudia ai ela, idia ese Iesu ena boubou e abidadama heniamu, bona idia na Iehova turana. (Ioa. 3:36; 1 Pet. 3:21) Tanobada ai idia na Dirava isiaina e lao heni boimu e lao heni ranimu dainai, Dirava na e moalemu. (Apok. 7:15) Hari danu, idia ese Basileia e harorolaiamu bona hahediba ḡaukarana e goadalaiamu badina idia ediai Dirava ena Basileia na ḡau badana. (Mat. 6:33; 24:14; 28:19, 20) Hisihisi bada hereana amo e roho mauri hutuma bada herea na dibadia, Dirava na idia e naridiamu, badina be Baibul etomu, “terono ai e helaimu Diravana ese edia taruha ai bainela.” Hutuma bada ese e nariamu gwauhamatana ta na Baibul ese ini e gwauraia toma: “[Dirava] ese iruru-matadia iboudiai matadia amo baine dahu oho.”​—Apok. 21:3, 4. w21.01 rau 16 par. 9-10

Ita na Iehova ena ruma bese kahana ta, una dainai ta hekwarahimu Iehova ese e atoa kwara dagina baita matauraia. Baibul ese e hahedinaraiamu Iehova ese ha’hine bona tatau na e lalodia badamu. Heḡereḡere, aposetolo edia negai, Iehova ese lauma helaḡa na ha’hine bona tatau e henidia, unu amo idia na hoa karadia idauidau e karava, heḡereḡere gado idauidau ai e herevava. (Apos. 2:1-4, 15-18) Dirava ese ha’hine bona tatau na lauma helaḡa amo e horodia, Keriso ida bae lohia. (Gal. 3:26-29) Danu, ha’hine bona tatau na tanobada ai mauri hanaihanai ahuna be abiamu. (Apok. 7:9, 10, 13-15) Ma danu, tatau bona ha’hine ese haroro bona hahediba ḡaukarana e karaiamu. (Mat. 28:19, 20) Heḡereḡere, Baibul bukana Aposetolo Edia Kara ai taihu Priskila sivaraina baita duahiamu​—ia bona adavana, Akula, raruosi ese aonega tauna Apolo enai Dirava ena dala e hadibalaia maoromaoro.​—Apos. 18:24-26. w21.02 rau 14 par. 1; rau 15 par. 4

Baibul stadi e hakaumu taudia ba hadibadia bona ba hagoadadia. Elda e, emui maduna na bada pablisa ba durudia hesiai ḡaukara bae karaia namonamo, anina na Baibul stadi karana danu. Bema pablisa na oi noho dainai e hemaraimu stadi baine karaia, ba noia oi ese stadi ba karaia. Elda ese hahediba taudia bae durudia bada bona bae hagoadadia diba bae haheauka totona. (1 Tes. 5:11) Ena be hari Baibul stadi ta do asita karaiamu, to ta baita durua diba lauma dalanai baine goada. Basita hereva momo, to eda heḡaeḡae namonamo karana dainai heduru hereva namodia amo stadi lalonai, stadi e hakauamu tauna baita durua diba. Stadi taudia na hebou baema neganai baita hetura henidia, bona idia ediai haheitalai namona baita hahedinaraia. Bona elda ese stadi taudia bona stadi ihakauna taudia bae hagoadadia diba, bema idia totodia nega bae ato bae hadibadia bona bae hanamodia. Momokani, dala maraḡina ai ta baita duruamu Tamada Iehova be lalokau heniamu bona be hesiai heniamu neganai, baita moalemu. w21.03 rau 13 par. 18-19

David na ena dina ta ta maurinai ai e hahedinaraiava, ena maduna na e lalodia badava bona ia na bae abidadama henia diba. Heḡereḡere, ia eregabenai mai goadana ida tamana ena mamoe e naridiava. Una ḡaukara dainai baine mase diba. Gabeai David ese King Saulo e hamaoroa: “Lau binai emu hesiai tauna na tamagu ena mamoe na reḡudiava; bena leona ta eiava bea ta ema, mamoe natuna ta seri amo e abia negadia ai na lau na ia murina amo nala, na botaia, mamoe natuna na ia uduna amo na hamauria.” (1 Sam. 17:34, 35) David na e mamia mamoe baine naridia na iena maduna. Eregabe tadikakadia ese David bae tohotohoa diba bema e henidia madunadia na bae kara namonamo bona bae haḡuḡuru. David na eregabena amo ena hetura karana Iehova ida e laloa bada. Una hetura karana ese David ena boga-auka karana eiava iena diba miusik ai e hereaia. David enai Iehova na ena Dirava bona turana namona. Eregabe tadikakamui e, ba karaia mai anina bada ḡauna na, emu hetura karana Tamamui guba ai e nohomu ida ba hagoadaia. w21.03 rau 3 par. 4-5