April

Hahetoho aukana ta o davariamu, a? Reana kongrigeisin ai ta ese e hahisimu. (Iak. 3:2) O reana o ḡaukara heboumu eiava o skuli heboumu taudia ese e kirikirilaimumu badina Iehova o hesiai heniamu. (1 Pet. 4:3, 4) Eiava emu ruma bese taudia ese reana e koumumu basio ha hebou o emu abidadama basio herevalaia. (Mat. 10:35, 36) Bema hahetoho ta dainai o hisihisimu, reana bo uramu Iehova ihesiai henina karana ba hadokoa. To namona na bavabia dae herevana dahaka hahetoho o davarimu, Iehova ese aonega be henimumu dahaka ba kara bona be hagoadamumu ba haheaukalaia. Iehova ena Hereva ai, ena hesiai taudia ese hahetoho aukadia e haheaukalai sivaraidia e herevalai. Dahaka dainai? Unu amo diba baita abi. Una dainai Iehova ese Paulo na e haḡania una badi baine torea. Unu sivarai baita duahi karana ese tauhalo bona helaro baine henida. Unu sivarai amo namo baita abi totona, dia Baibul mo baita duahia, to ḡau ma haida danu baita kara. Namona na Baibul ese eda lalohadai baine haidaua bona kudouda baine hamarere. w21.03 rau 14 par. 1-2

O laloamu o haroro henidiamu taudia be e lo uitidia bamona, a? Bema oibe, ini ḡau toi na be varamu. Ginigunana na, oi na bo uramu haroro ḡaukara na ba karaia haraḡa. Uit iutuna o taboro negana na kwadoḡi; anina na nega na basita haorea kava. Iharuana na, taunimanima ese sivarai namona be kamonaiamu neganai oi na bo moalemu. Baibul na e gwaumu, “taboro” neganai taunimanima na e moalemu. (Isa. 9:3) Bona ihatoina na, bo lalopararamu o davaridiamu taudia ta ta iboudiai na Iesu ena hahediba ai baela diba dainai, emu haroro herevana lalonai idia e lalo badamu ḡaudia bo herevalaimu. Iesu ena hahediba taudia haida na e laloava Samaria taudia na Iesu ena hahediba ai basiela diba, to Iesu na unu na se lalo toma. Ia na e laloava idia haida na iena hahediba ai baela diba. Ita danu namona na baita laloparara eda teritori ai e nohomu taudia danu Keriso ena hahediba ai baela diba. Aposetolo Paulo ese haheitalai namona e hahedinaraia ita ese baita tohotohoa totona. Ia na e diba e haroro henidiava taudia be dahaka e abi daeva, idia e lalo badava ḡaudia e lalopararalai, bona idia na Iesu ena hahediba ai baela diba. w20.04 rau 8-9 par. 3-4

Namona na taunimanima ta na ena kara dainai basita hahemaoro henia haraḡa, to baita hekwarahi ena hemami baita lalopararalaia. Iehova sibona ese ita na e lalopararalaida namonamomu. Una dainai, ba noia baine durumu ia ese taunimanima e lalodiamu dalana ba diba bona ba bogadia hisi dalana ba lalopararalaia totona. Ini na basita lalo toma tadikaka taihu haida be ba bogadia hisi a haida be lasi. Idia iboudiai na Iona, Elia, Hagara, bona Lot heḡereḡeredia hekwakwanai e davarimu. Nega momo hekwakwanai na sibodia ese e havaramu. Anina na, ita iboudai danu nega haida siboda ese eda hekwakwanai ta havaramu. Una dainai, Iehova na e uramu iboudai baita hekaha heheni. (1 Pet. 3:8) Iehova baita kamonai heniamu neganai, iena orea tanobada heḡeḡemadai ruma besena lalonai lalotamona karana baita hagoadaiamu. Una dainai, laloda baita hadai eda tadikaka taihu ta kara henidiamu neganai, namona na baita hakala henidia, baita dibadia namonamo, bona baita bogadia hisi. w20.04 rau 18-19 par. 15-17

Iehova ibadinana ai Iesu na haheitalai namona. Iehova baita badinaia dalana badana ta na, Iesu ena haheitalai baita tohotohoa. (Ioa. 8:29) Hereva momokani ai baita raka totona, namona na baita abia dae Iehova na Dirava momokanina, bona Baibul lalonai e tore herevadia iboudiai na momokani. Danu baita abia dae Iesu na e gwauhamatalaia Mesiana. Hari, momo na asie abia daemu Iesu na Dirava ese e horoa iena Basileia ena King ai e halaoa. Ioane na e gwa, “koikoi taudia hutuma” ese Iehova bona Iesu e herevalaidiamu hereva momokanidia asie abi daemu taudia na bae koidia diba. (2 Ioa. 7-11) Ioane na e gwa: “Koikoi tauna be daika? Iesu na dia Keriso e tomamu tauna, ani.” (1 Ioa. 2:22) Ma haida ese basie koida totona, dala tamona na Dirava ena Hereva baita stadilaia. Unu amo Iehova bona Iesu baita dibadiamu. (Ioa. 17:3) Bema unu baita kara tomamu, baita dibamu hereva momokani vada ta abia. w20.07 rau 21 par. 4-5

Eda tadikaka taihu basita ‘hahekwakwanaidia’ dalana ta na, baita uramu edia lalohadai danu baita abi dae to dia eda ura daladia mo baita badina. (Roma 14:19-21; 1 Kor. 8:9, 13) Unu amo ta hahedinaraiamu ita na dia heau-helulu ta lalonai e heaumu tauna ta heḡereḡerena, ia na e uramu baine kwalimu dainai e heaumu, bona e ura badamu ahuna baine abia. Heau taudia na sibodia edia namo e tahumu. Una dainai, vaira kahanai bae heau totona heau taudia ma haida na be doridiamu. To, ita eda heau-helulu na dia unu bamona. (Gal. 5:26; 6:4) Ita na ta uramu taunimanima momo baita durudia unu amo dokona baita heau henia hebou bona ahuda mauri hanaihanai baita abia. Una dainai, ta uramu Paulo ena sisiba herevana baita badinaia, siboda ‘[eda] namo basita tahu, a bamoda edia namo baita tahu.’ (Fili. 2:4) Ita ese ta heaulaiamu heau-heluluna lalonai, Iehova ena taunimanima ese edia heau-helulu bae haḡuḡurua neganai, Ia na mai ena hebogahisi ida ahudia​—mauri hanaihanai gubai ai eiava tanobada ai​—baine henidia. w20.04 rau 28 par. 10; rau 29 par. 12

Kristen taudia milioni momo na tanobada matamatana ai be vareaimu. E roho mauri taudia ese guna e mase taudia bilioni momo be toreisi loumu karana na be itaiamu. Una nega namo hereana be varamu neganai, baita moale dikadikamu! (Apos. 24:15) Bena Iehova e badinaia ela bona dokona taudia ese Adam amo e abia ḡauna, mase, be hadadareamu. Idia na be mauri hanaihanaimu. Paulo ese Korinto taudia ediai toreisi lou e herevalaia revarevana ese hari e maurimu Kristen taudia e hagoadadiamu. Unu badi namodia daidiai Paulo ena sisiba, “Lohiabada ena ḡaukara lalonai ba goada balaheni,” sisibana baita badinaia. (1 Kor. 15:58) Bema mai goadada ida una ḡaukara baita karaiamu, ita ese vaira negai mauri namona baita moalelaiamu. Una nega namona ese ḡau iboudiai e hereadia. Una ese e hadibadamu Lohiabada ena ḡaukara lalonai ta karamu ḡaukaradia na asita hekwarahilai kavamu. w20.12 rau 13 par. 16-17

Toana na Esekiel 38:10-23; Daniel 2:43-45; 11:44–12:1; bona Apokalupo 16:13-16, 21 edia peroveta herevadia na ḡau tamodia e herevalaimu. Bema unu na momokani, ini na be varamu. Hisihisi bada hereana baine matama murinai, “tanobada idoinai hanua hanua pavapavadia” na be hegogomu tanobada besedia oreana ta be haginiamu. (Apok. 16:13, 14) Baibul ai una tanobada besedia na e gwauraiamu “Gog, Magog tanona tauna.” (Esek. 38:2) Unu tanobada besedia na Dirava ena taunimanima be tuari henidiamu bona be uramu iboudiai bae hamasedia. Aposetolo Ioane ese e itaia una peroveta herevana baine vara negana ai, aisi nadidia na Dirava e inai heniamu taudia latadiai baine tubu. Unu aisi nadidia na hahemaoro hereva aukadia e laulaulaidiamu, unu na Iehova ena taunimanima ese be herevalaimu. Unu hereva ese Gog, Magog tanona tauna be habaduamu dainai ia na be uramu Dirava ena taunimanima baine tuari henidia bona ina tanobada amo baine haoredia vaitani.​—Apok. 16:21. w20.05 rau 15 par. 13-14

Dirava ena ḡaukara siahuna na harihari ḡauna ta bamona baita laloa bada. Hari ina negai lauma helaḡa ena heduru amo e varamu ḡau namodia baita lalomu neganai, lauma helaḡa ena heduru na baita laloa badamu. Iesu na guba do sela neganai, ena hahediba taudia e hamaorodia eto: “Lauma Helaḡa ese baine rohemui, bena siahu bavabia, bona lau igwaurai-hedinaraigu taumui ai baola, . . . ela bona tanobada heḡeḡe-madai.” (Apos. 1:8) Lauma helaḡa ena heduru amo tanobada heḡeḡemadai taunimanima 8 milioni mai kahana na Iehova e toma henia dihomu. Ita na Dirava ena taunimanima dainai, mai lalotamonada ida tadikaka oreana lalonai bona lauma helaḡa ese e durudamu kara namodia baita hahedinarai, heḡereḡere lalokau, moale, maino, haheauka, hebogahisi, kara maoromaoro, hereva ibadinana, manau, boga-auka. Unu na ‘lauma huahuadia.’ (Gal. 5:22, 23) Momokani, lauma helaḡa na Dirava ena harihari ḡauna ta. w20.05 rau 28 par. 10; rau 29 par. 13

Badi haida daidiai ta dibamu, tore isi lou dinanai, eda famili bona turada toadia na basita readiamu. Gunaguna mase amo e tore isi lou taudia amo ta dibamu, vaira negana ai Iehova ese taunimanima toadia, gadodia reḡena, bona edia memori na be heni loumu, unu amo ta na ena mase dinana ai ta itaia heḡereḡerena ai ma baita itaia loumu. Baita helalotao, Iesu ese mase na mahuta ida e haheḡereḡerea, bona tore isi lou be mahuta amo ta nogamu karana ida e haheḡereḡerea. (Mat. 9:18, 24; Ioa. 11:11-13) Ita na mahuta amo ta nogamu neganai, ita toada, gadoda reḡena, bona eda memori na gabudiai. Lasaro ena haheitalai mani aita laloa. Ia na dina foa vada e mase dainai, tauanina na e bodaḡa. To, Iesu ese Lasaro na mase amo e hatorea isi lou neganai, Maria bona Mareta ese Lasaro toana na se reaia, bona Lasaro ese danu idia na dounu e lalodiatao.​—Ioa. 11:38-44; 12:1, 2. w20.08 rau 14 par. 3; rau 16 par. 8

Dirava ese horoa taudia bona hutuma bada herea na e lalokau henidiamu. Ia matana ai unu orea ruaosi na heḡereḡere, idia ta dia maraḡi ta dia bada. Bona Dirava na Natuna lalokauna ena mauri amo unu orea ruaosi e hoidia. To edia idau be, orea ta be guba ai be nohomu taudia bona orea ta be tanobada ai be nohomu taudia. To unu orea ruaosi ese Dirava bona Keriso bae badinadia hari na namo. (Sal. 31:23) Bona ba laloatao: Dirava ese lauma helaḡa amo unu orea ruaosi edia ḡaukara na e hanamoamu. Una anina na, Iehova na ena lauma helaḡa amo taunimanima tamona tamona be durudiamu, herevana ia na horoa tauna o hutuma bada herea tauna. Iehova ese ia e gwauhamata henia hesiai taudia ta ta na ahudia e heni, vaira negana ai guba ai o tanobada ai bae mauri hanaihanai totona. (Ier. 29:11) Keriso ena mase ena Memorial ai, namona na ita ta ta ese Dirava bona Keriso baita tenkiu henidia, badina idia ese dala e kehoa baita mauri hanaihanai totona. Laḡani ta ta ai, Memorial neganai Kristen taudia korikoridia bae hebou na mai anina bada. w21.01 rau 18 par. 16; rau 19 par. 19

Memorial e laomu taudia hutuma bada herea na tanobada ai be maurimu taudia. To, dahaka dainai e laomu? Mani a laloa, dahaka dainai oi na turamu ena wedin o laomu? Badina o uramu ba hahedinaraia oi ese turamu bona adavana na o lalokau henidiamu bona o uramu ba sapotidia. Una heḡereḡerena, hutuma bada herea na Memorial e laomu badina idia ese Keriso bona horoa taudia e lalokau henidiamu bona e uramu bae sapotidia. Danu, Memorial e laomu badina e uramu bae hahedinaraia idia ese Iesu ena boubou na moalelaiamu​—oibe, una boubou dainai idia na tanobada ai be mauri hanaihanaimu. Hutuma bada herea na Memorial e laomu badina ma ta binai: Idia na Iesu ena haheḡani e badinaiamu. Una Anibou e hamatamaia neganai, Iesu ese aposetolo e hamaorodia, eto: “Ini ba kara toma, lau ba lalogu.” (1 Kor. 11:23-26) Una dainai, horoa orena taudia ese tanobada ai Lohiabada Ena Anibou e karaiamu lalonai, hutuma bada herea na asie uramu una hebou bae reaia. w21.01 rau 17-18 par. 13-14

Namona na lalokau na eda kara amo baita hahedinaraia. (Iakobo 2:17, 26 ida ba haheḡereḡerea) Heḡereḡere, Iehova ese ita na e lalokau henidamu. (1 Ioa. 4:19) Bona Baibul ai e tore herevadia amo e hahedinaraia ita na e lalokau henidamu. (Sal. 25:10; Roma 8:38, 39) Danu dia ena hereva ai mo, to ena kara amo ta dibamu ita na e lalokau henidamu. Iehova ese Natuna lalokauna e heni, ita daidai e hisihisi bona e mase. (Ioa. 3:16) Una dainai ta diba momokanimu Iehova ese ita na e lalokau henidamu. Iehova bona Iesu baita kamonai henidiamu neganai, ta hahedinaraiamu idia na ta lalokau henidiamu. (Ioa. 14:15; 1 Ioa. 5:3) Bona Iesu na ita e haḡanida baita helalokau heheni na ḡau badana. (Ioa. 13:34, 35) Namona na eda hereva bona kara amo baita hahedinaraia tadikakada na ta lalokau henidiamu.​—1 Ioa. 3:18. w21.01 rau 9 par. 6; rau 10 par. 8

Lauma helaḡa amo e horodia taudia edia helaro na Iesu ida Dirava ena Basileia ai be lohiamu ela bona hanaihanai. Idia na Keriso ida be nohomu, anina na ia be itaiamu, ia ida be herevaherevamu bona ia be bamoamu. (Ioa. 14:2, 3) Tanobada helarona taudia danu Iesu ena lalokau be mamiamu. Ena be idia ese Iesu na basie itaiamu, to Iehova bona Iesu ese be henidiamu maurina be moalelaiamu lalonai Iesu ida edia hetura karana na be goadamu. (Isa. 9:6, 7) Iesu na e uramu ita na ia turana ai baitala, bona una ta abia daemu neganai hahenamo momo ta davarimu. Heḡereḡere, hari ita na iena lalokau bona heduru ta mamidiamu. Bona mauri hanaihanai baita abia diba. Bona mai anina bada ḡauna na, Iesu ida eda hetura karana ese dala be kehoamu ia Tamana Iehova baita hetura heniamu, una na hetura karana hereadaena. Iesu ese baine gwauraida ia turana na hahenamo namona. w20.04 rau 25 par. 15-16

Aposetolo Paulo ese Korinto ai e nohova horoa Kristen taudia e tore henidia, idia na guba toreisi louna bae abia taudia. Unu Kristen taudia na ‘Keriso Iesu lalonai vada e hahelaḡadia, helaḡa taudia vada e gwauraidia.’ Bona Paulo ese ‘Keriso lalonai vada e mahuta’ horoa Kristen taudia danu e herevalaidia. (1 Kor. 1:2; 15:18; 2 Kor. 5:17) Paulo ena revareva ma ta ai, ia na e gwa Iesu ida bae tamona taudia na ia e ‘mase heḡereḡerena bae mase,’ bona ‘ia e tore isi lou heḡereḡerena do bae toreisi lou.’ (Roma 6:3-5, NWT) Iesu na lauma ai e toreisi lou bena e dae guba. Una heḡereḡerena, Keriso ida bae tamona taudia, eiava horoa Kristen taudia ediai danu unu be vara tomamu. Paulo na e gwa Keriso na mase ai vada e “mahuta taudia edia tore isi lou roboana.” (1 Kor. 15:20) Iesu sibona mo tau ginigunana lauma ai e toreisi lou bona mauri hanaihanai e abia. w20.12 rau 5-6 par. 15-16

Hari ina negai, e masemu horoa Kristen taudia na maoromaoro guba toreisi louna e abiamu. Una ese Paulo ena hereva 1 Korinto 15:51, 52 ai e hamomokaniamu. Keriso tadikakana e toreisi loumu neganai, idia na e moale badamu. “Mata-hekunumai tamona ai” be idaumu taudia ese guba ai be karamu ḡaukaradia na Baibul ese e herevalaia. Iesu ese e hamaorodia eto: “Kwalimu tauna, egu kara baine badina ela bona dokona tauna, na siahu baina henia. Ia ese tanobada besedia baine lohiadia, auri itotohina amo baine reḡudia. Uro e huari kohikohimu na heto ia ese baine huaridia. Lau danu siahu unuhetomana Tamagu ena amo vada na abia.”​—Apok. 2:26, 27. w20.12 rau 12 par. 14-15

Aposetolo Paulo ese Iesu na e gwauraia “tore isi lou roboana,” anina na ia murinai bae mase taudia haida danu guba toreisi louna bae abia. Aposetolo taudia bona ‘Keriso lalonai vada e mahuta’ horoa taudia na Iesu heḡereḡerena do bae toreisi lou bena guba ai bae mauri hanaihanai. (1 Kor. 15:18) Paulo ese Korinto taudia e tore henidia neganai, ‘Keriso lalonai vada e mahuta’ horoa taudia na guba ai do asie toreisi lou. Paulo na vaira negana e herevalaia, eto: “Ta ta ena nega ena nega ai mauri bae abia; guna Keriso, tore-isi-lou roboana; murinai, [“iena noho negana lalonai,” NWT] Keriso ibadinana taudia.” (1 Kor. 15:23; 1 Tes. 4:15, 16) Hari ita na Keriso ena “noho negana lalonai” ta nohomu. Oibe, una ese e hahedinaraiamu e mase aposetolo taudia bona horoa Kristen taudia haida na e nari ela bona Keriso ena noho negana lalonai guba ai ahudia e abi, bona ‘[Iesu] e tore isi lou heḡereḡerena e toreisi lou.’​—Roma 6:5. w20.12 rau 5 par. 12; rau 6 par. 16-17

Aposetolo Paulo na guba ai “lauma tauanina” ai baine toreisi lou tauna e herevalaia. (1 Kor. 15:43, 44, NWT) Iesu na tanobada ai e nohova neganai, ia tauanina na hidio bona rara. To ia e toreisi lou neganai, ia na [“hahemauri laumana,” NWT] ai ela bena e dae guba. Una heḡereḡerena, horoa Kristen taudia danu lauma tauanidia ai be toreisi loumu. Paulo na e gwa: “Tano amo ema tauna oromana vada ta abia na heto, guba amo ema tauna oromana do baita abia.” (1 Kor. 15:45-49) Iesu na dia taunimanima tauanidia ai e toreisi lou. Paulo na e gwa, guba ai “hidio bona rara ese Dirava ena basileia basie abia diba.” (1 Kor. 15:50) Aposetolo taudia bona horoa taudia ma haida na dia hidio bona rara, baine bodaḡa diba tauanidia, ai guba baela. w20.12 rau 10-11 par. 10-12

Kristen ginigunadia edia nega ai, Dirava ena lauma helaḡa ena hahekau henunai Iesu ena hahediba taudia haida ese guba toreisi louna e herevalaia. Aposetolo Ioane na e gwa: “Harihari ita na Dirava natuna, a gabe amo ede baita heto do se hedinarai. Ina mo dibada, ia bainema negana ai, ita na ia ida-idana baitala.” (1 Ioa. 3:2) Una dainai horoa Kristen taudia na dibadia guba be laomu, to guba ai ede bae heto na asi dibadia. Guba ai ahudia be abimu neganai, idia ese Iehova na be itaiamu. Baibul ese una na taina e herevalaia. Keriso ese ‘lohia iboudiai bona siahu taudia iboudiai baine haoredia’ neganai horoa taudia na vada ia ida guba ai. Bona ‘inai gini-gabena, mase’ danu do baine haorea. Dokonai, Iesu bona ia ida be lohiamu taudia bona ḡau iboudiai na Iehova henunai be atodiamu. (1 Kor. 15:24-28) Una na moale negana, ani? w20.12 rau 8 par. 2

Guba ai basie nohomu abidadama Kristen taudia danu mai edia helaro. Aposetolo Paulo na e gwa, guba helarona bae abia taudia ese “tore-isi-lou gini gunana” bae abia. (Apok. 20:6) Una anina be toreisi lou ma ta danu be varamu, a? Oibe, Iobu na vaira negai enai baine vara ḡauna e gwauraia herevana ese una e hamomokania. (Iobu 14:15) Iesu ese lohia iboudiai bona siahu taudia iboudiai baine haoredia neganai, “Keriso ibadinana taudia” na ia ida guba ai bae lohia. Bona ‘inai gini-gabena mase’ danu do baine haorea. Momokani, guba toreisi louna bae abia taudia na basie mase loumu. (1 Kor. 15:23-26) Paulo ese guba basie laomu taudia edia helaro na hari dina ena siri ai e herevalaia. E hahedinaraia ḡoevaḡoeva, asi ena kara maoromaoro tauna na guba basinela diba, anina na vaira negai tanobada ai toreisi lou be varamu. w20.12 rau 6-7 par. 18-19

Nega haida baita lalomu, ‘Ede bamona ba dibamu Iehova ese lau na e lalogu badamu?’ Bema unu o henanadai tomamu, namona na ba diba Iehova ese emu dika na be gwautao dibamu. Laḡani momo gunadiai, The Watchtower na e gwa: “Reana kerere tamona ta karaia louloumu. Iehova ta hesiai henia matama neganai, reana guna ta manadalai karadia na asita hanai eiava asita dadarai. . . . Basitato ita na dika badana ta ta karaia dainai Iehova ese eda dika na basine gwautaomu. Satana na e uramu unu baita lalo toma. Kerere ta ta karaiamu neganai, eda hemami na e dikamu bona ta badumu. Una ese e hahedinaraiamu ita na dia taunimanima dikadia, bona Iehova ese eda dika na be gwautaomu. Baita manau bona Dirava baita ḡuriḡuri henia eda dika baine gwautao, lalomamina ḡoevana baita abia, bona baine dururuda una kerere ma basita karaia lou.” Aposetolo Paulo na Kristen tauna ta ai do sela neganai, kara dikadia momo e kara. Paulo na e kara karadia e lalodiava, to se lalodia loulouva. (1 Tim. 1:12-15) Ia ese mauri idavalaina boubouna na harihari ḡauna ta bamona e laloa. Una dainai Paulo na ena kerere daidiai se lalohisihisi bada, to e ḡaukara goada Iehova e hesiai henia. w20.11 rau 27 par. 14; rau 29 par. 17

Satana na ḡau idauidau amo e dibaḡanidamu kara kereredia baita kara totona. Ita be dahaka baita kara? Reana baita lalomu unu na dia didika. Heḡereḡere, reana ini baita lalo tomamu: ‘Ini ba kara tomamu neganai orea murimurinai na basie atogumu, una na dia kara dika badana.’ Lalohadai unu bamona na kerere. Namona na siboda baita henanadai: ‘Satana be uramu una hedibaḡani baine ḡaukaralaia lau baine hamorugu totona, a? Bema ini ura dikadia ba lalo momomu, Iehova ladana ba hadikaiamu, a? Ina kara ese egu hetura karana Dirava ida be hanamoamu eiava be hadikaiamu?’ Unu henanadai na ba lalodia dobu. Iehova ba ḡuriḡuri henia aonega baine henimu bena mai momokanimu ida unu henanadai ba haerelai. Una ese oi na be gimamumu. Bona be durumumu hedibaḡani ba dadaraidia, Iesu e kara bamona, ia na eto: “Satana e, dauha aola.” (Mat. 4:10) Ba helalotao, bema ita na dia mai laloda idoinai ida ḡau ta baita karaiamu, una na dia namo. w20.06 rau 12-13 par. 16-17

Mai manauda ida Iehova ena taravatu baita badinadia, badina Iehova na mai dibana dahaka ese ita baine duruda. (Efe. 4:22-24) Baita manaumu neganai, Iehova ena ura baita atoa gunamu bona ma haida baita lalodia badamu. Unu amo eda hetura karana Iehova bona tadikaka taihu ida na be namomu. (Fili. 2:3) Bema basita henari namonamomu, tanobada taudia edia hekokoroku bona sibodia e helalomu karana baita tohotohoamu. Toana na Kristen taudia ginigunadia haida ediai una na hekwakwanai ta, badina aposetolo Paulo na Roma taudia e hamaorodia, eto: “Umui ta ta na haduamuimu, basio hekokoroku, a lalomui bae manau.” Paulo na e laloparara siboda ese eda namo na baita lalo bada diba. To manau karana ese be durudamu lalohadai maorona baita abia, bona be durudamu basita hekokoroku totona. w20.07 rau 2 par. 1-2

King Asa ena negai, maino negana na gabeai e doko. Ami goadana ta​—tatau 1 milioni mai kahana bamona​—na Etiopia amo ema. Una ami e gunalaiava tauna, Sera, e laloava ia bona ena ami ese Iuda taudia na bae hadareredia. To, King Asa na ami ena namba ai se tabekau, to ia na Dirava, Iehova enai e tabekau. Asa e ḡuriḡuri, eto: “Iehova e, emai Dirava, a kahamai; badina be emu ai a hetao kaumu, bona oi ladamu ai ini hutuma baia tuari henidia.” (2 Sis. 14:11) Ena be Sera ena ami ena namba ese Asa ena ami ena namba e hanaia, to Asa dibana Iehova ena siahu na bada herea bona ena taunimanima be durudiamu. Bona Iehova ese ena taunimanima na e durudia, bona Etiopia ena ami e haoredia. (2 Sis. 14:8-13) Ena be asi dibada gabeai ita ta ta edai be dahaka be varamu, to dibada Dirava ena taunimanima edia maino negana na basine mia daudaumu. Iesu e peroveta eto, dina gabediai, ena hahediba taudia na ‘bese iboudiai ese be inai henidiamu.’​—Mat. 24:9. w20.09 rau 17-18 par. 14-16

Vaia, ita na asita uramu tau ta ese ita baine habaduda. To, bema ita e daḡedaḡe henidamu taudia ese badu herevadia bae gwaurai bona unu hereva baita lalodia louloumu, ita na baita lalomanoka dibamu. (Her. 24:10) To unu daḡedaḡe taudia edia badu herevadia be ede baita lalodia toma? Aposetolo Paulo baita tohotohoa, badina ia eto: “Badu herevadia . . . be Keriso dainai na moalelaimu.” Dahaka dainai? Badina taunimanima edia badu herevadia eiava edia daḡedaḡe karadia amo e hahedinaraiamu, ita na Iesu ena hahediba taudia korikoridia. (1 Pet. 4:14) Iesu eto, iena hesiai taudia na ma haida ese be daḡedaḡe henidiamu. (Ioa. 15:18-20) Aposetolo edia negai na unu e vara toma. Una negai, Grik edia kastom e badinava taudia na e laloava, Kristen taudia na asi aonegadia bona asi anidia. Bona Iuda taudia ma haida na e laloava, Kristen taudia heḡereḡere aposetolo Petro bona Ioane na “hahediba gabuna ta asi ela bona asi aonegadia.” (Apos. 4:13) Momo e laloava Kristen taudia na manoka, eiava idia na asi anidia gavamani vairadiai badina be politikol karadia eiava tuari oreadia lalodiai asie vareaiva dainai tuari ai be daika ese bae gimadia, bona kominiti ai idia na taunimanima ese asie matauraidiava bona asie ura henidiava. Daḡedaḡe taudia ese unu Kristen taudia ginigunadia e koudia, a? Lasi. w20.07 rau 14-15 par. 3-4

Aposetolo Ioane ese tadikakana e lalokau henidia bada, bona e ura edia abidadama na bae hagoadaia. Ena revareva toi lalodiai e heni sisibana ese una na e hahedinaraia. Ta dibamu Keriso ida gubai bae lohia tatau bona hahine na Ioane heḡereḡerena, tadikakadia e lalokau henidiamu bona e lalodia badamu! (1 Ioa. 2:27) Una sisiba na baita laloatao. Namona na laloda baita hadai, hereva momokani ai baita raka, bona ta karamu ḡaudia amo baita hahedinaraia ita na Iehova ta badinaiamu. Iena Hereva baita stadilaia, bona baita abidadama henia. Iesu baita abidadama henia. Taunimanima edia lalohadai bona aposteit taudia edia hahediba herevadia baita dadarai. Mauri daladia rua na basita badina, bona kara dikadia na baita dadarai. Iehova ena taravatu ḡoevadia baita badina. Bona tadikakada edia dika baita gwautao bona heduru e uramu neganai baita durudia unu amo bae goada. Ena be hekwakwanai idauidau ta davarimu, to hereva momokani ai baita raka. w20.07 rau 24-25 par. 15-17

Iehova ese ena hesiai taudia ta ta na e lalokau henidiamu bona ena kongrigeisin lalonai e abidia dae. Ena be kongrigeisin ai iseda ḡaukara na idauidau, to Dirava ese ita ta ta na e laloda badamu. Aposetolo Paulo ese e hahedinaraia heḡereḡerena, Iehova ena hesiai tauna ta ese ma ta na basine hereva henia, basineto ‘Asi emu ḡaukara egu ai.’ (1 Kor. 12:21) Bema ita na ta uramu kongrigeisin ai maino baine mia, namona na baita hemataurai heheni bona baita ḡaukara hebou. (Efe. 4:16) Unu baita kara tomamu neganai, tadikaka taihu iboudiai be helalokau hehenimu bona kongrigeisin be goadamu. Kongrigeisin elda taudia iboudiai na Iehova ese lauma helaḡa amo e abidia hidi. To, idia ta ta edia aonega bona goada na idauidau. (1 Kor. 12:17) Haida be elda matamatadia dainai, edia ekspiriens na dia bada. Ma haida be buruka o gorere dainai, ḡaukara haida mo bae kara diba. To, namona na elda ta ese ma elda ta na basine hereva henia, basineto ‘Asi emu ḡaukara egu ai.’ Lasi, namona na elda ta ta ese Baibul bukana Roma 12:10 ai Paulo ese e torea sisibana bae badinaia. w20.08 rau 26 par. 1-2; rau 27 par. 4

Iehova ese ita e hakaudamu mauri dalanai baita raka dalana ta na, ena tanobada oreana e ḡaukaralaiamu. Dirava ena orea ese Baibul ena hahediba hereva matamatana ta e herevalaiamu, eiava kara maoromaoro taravatudia e henidamu neganai, namona na baita abi dae bona baita badinadia. To, bema Dirava ena orea ese senisi bae kara bona una ese eda mauri bae haidau, heḡereḡere ta lao heniamu Kingdom Hall bae hoihoilaia, ita be dahaka baita kara? Eda moale baita habadaia totona, namona na baita helalotao ita na Iehova dainai ta ḡaukaramu, bona ia ese ena orea e haheauamu. (Kol. 3:23, 24) King David na haheitalai namona badina kontribiusen e heni dubu helaḡa bae haginia totona. Ia na eto: “Lau be daika, bona egu orea taudia be daidia, bena mai emai dala emai lalo-rua ai herahia baia heni? Badina be ḡau iboudiai na oiemu amo e maimu, bena oi sibomu emu ḡau ma vada a henimu lou.” (1 Sis. 29:14) Kontribiusen ta henimu neganai, una na Iehova ese ita e henida ḡaudia ta henia loumu. To eda nega, goada, bona moni ta ḡaukaralaimu iena ḡaukara ta karaiamu neganai, Iehova na e moale badamu.​—2 Kor. 9:7. w20.11 rau 22-23 par. 14-16

Ita na Iehova ena Witnes dainai, herevana taunimanima hida na Dirava ena orea lalonai baita veridia vareai, to basita gwaumu, ita na kwalimu tauda. (Luka 8:11-15) A bema nega iboudiai sivarai namona baita harorolaiamu bona baita hahedibalaiamu, Iehova ese ita na kwalimu tauda be gwauraidamu. Dahaka dainai? Badina ita ese ia bona Iesu ta kamonai henidiamu. (Mar. 13:10; Apos. 5:28, 29) Ina nega oromana dokona na e mai haraḡamu! Ina hahemauri ḡaukara baita karaia negana na kwadoḡi herea. Basio nari eiava ini na basio gwau toma: ‘Launa baina nari ela bona egu noho dalana baine namo guna, una murinai ina ḡaukara badana baina karaia.’ Harihari kara ta ba karaia, heḡereḡere emu ura ba habadaia, ba aonega, ba goada, bona ba boga auka. Taunimanima e haoda-henidiamu taudia 8 milion ba bamodia, unu amo Iehova ena moale ba mamia. (Neh. 8:10; Luka 5:10) Lalomu idoinai ida sivarai namona ba harorolaia goadagoada ela bona Dirava baineto, ‘Ḡaukara na vada ba hadokoa.’ w20.09 rau 7 par. 18-20

Ita na asita uramu kohu o moni ese laloda bae hadiburaia. Iehova ilalokau henina karana, o Dirava ena Hereva iura henina karana, o taunimanima ma haida baita durudia urana na “taḡa ena koikoi siahuna” ese baine hadikaia diba. (Mat. 13:22, NWT) Bema ita na ta uramu Iehova ese e henida ḡaudia baita gimadia, namona na dika negadiai, kara ta baita karaia haraḡa. Nega bada lalodiai plan baita kara, bena dika negana ai ita na mai dibada dahaka baita kara. Ita danu nega bada lalonai kara ta baita karaia haraḡa, heḡereḡere bema Intanet ta ḡaukaralaiamu, o muvi ta o TV program ta itaiamu lalonai, matabodaḡa laulauna, o daḡedaḡe laulauna, o aposteit taudia edia sivarai ta baine hedinarai taku, ita ese baita dadaraia haraḡa. Bema hekwakwanai ta do se vara lalonai baita heḡaeḡaemu, ita ese eda lauma dalana baita gimaia haraḡamu bona nega iboudiai Iehova matanai kara maorona baita karaiamu. (Sal. 101:3; 1 Tim. 4:12) Iehova ese ita e henida ḡaudia na baita gimadia​—ḡaudia bini, Dirava ena Hereva momokanidia bona ma haida baita hadibadia ḡaukarana. Unu baita kara tomamu neganai, laloda mamina be namomu, eda mauri baita moalelaiamu, bona mai moaleda ida ma haida baita durudiamu Iehova bae dibaia totona. w20.09 rau 30 par. 16-19

Oi be o bapatiso, a? Bema oibe, una negai oi ese taunimanima vairadiai o hahedinaraia oi na Iehova o abidadama heniamu bona o uramu ia bona ena orea isiaidia ba lao heni. Hari ina negai, Iehova ese ena orea e hakauamu dalana amo e hahedinaraiamu ia be daika, ia be e uramu dahaka baine haḡuḡurua, bona iena taravatu be dahaka. Mani aita itaia ina orea ese Iehova ena kara toi be ede e hahedinaraia tomamu. Ginigunana, “Dirava ese taunimanima oromadia se lalomu.” (Apos. 10:34) Lalokau dainai Iehova ese Natuna e heni, “taunimanima iboudiai idavalaidia.” (1 Tim. 2:6; Ioa. 3:16) Iehova ese ena taunimanima amo sivarai namona na kamonai taudia ediai e harorolaiamu, unu amo momo na boubou ḡauna amo namo bae abia. Iharuana, Iehova na dia heiri-heiri Diravana, a maino Diravana. (1 Kor. 14:33, 40) Una dainai, namona na Dirava e tomadiho heniamu taudia na basie heiriheiri, a maino ai bae noho. Ihatoina, Iehova na “Hahediba Tauna.” (Isa. 30:20, 21) Una dainai, Dirava ena orea taudia na e uramu kongrigeisin ai bona haroro ḡaukara ai Baibul bae ḡaukaralaia. w20.10 rau 20 par. 1-3