August

Iesu turana ai baela taudia mo na iena mauri idavalaina boubouna amo namo bae davari. Iesu na e gwa, ia ese “ena mauri baine atoa diho, turana daidiai.” (Ioa. 15:13) Namona na Iesu tanobada do sema neganai e mauriva abidadama taudia ese Iesu bae dibaia bona bae lalokau henia. Unu abidadama taudia na be toreisi loumu, bona ena be idia na guna Iehova e hesiai henia kara maoromaoro taudia, to idia danu Iesu turana ai baela na mai anina bada, mauri hanaihanai bae abia totona. (Ioa. 17:3; Apos. 24:15; Heb. 11:8-12, 24-26, 31) Ita na ta moalemu badina Basileia sivaraina namona iharorolaina bona ihahedibalaina ḡaukaradia ai Iesu ida ta ḡaukara heboumu. Iesu tanobada ai e nohova neganai ia na hahediba tauna. Ia na kongrigeisin kwarana bona guba e lou lao negana amo ia na haroro bona hahediba ḡaukarana e hakauamu. Danu o hekwarahimu momo o durudiamu ia bona Tamana bae dibadia neganai ia ese una na e itaiamu bona e laloa badamu. Momokani, Iehova bona Iesu edia heduru amo ina ḡaukara baita haḡuḡurua diba.​—Ioa. 15:4, 5. w20.04 rau 22 par. 7-8

Matamanai ini dagi ladadia “diho kahana pavapavana” bona “mirigini kahana pavapavana” na idaunegai Israel ena not bona saut kahana pavapavadia e gwauraidia. (Dan. 10:14) Pentekoste 33 C.E. do lasi neganai, Dirava ena taunimanima na Israel besena korikorina. To, Pentekoste 33 C.E. amo Iehova ese e hahedinaraia iena taunimanima na Keriso ena hahediba taudia. Una dainai Daniel karoa 11 ena peroveta herevana kahana badana na dia Israel besena korikorina to Keriso ena hahediba taudia e herevalaidiamu. (Apos. 2:1-4; Roma 9:6-8; Gal. 6:15, 16) Bona nega idauidau ai, pavapava o gavamani idauidau na not kahana bona saut kahana pavapavadia ai ela. To idia iboudiai ediai bo davarimu ḡaudia na heḡereḡere. Ginigunana na, Dirava ena taunimanima momo e nohomu gabudia ai unu pavapava na e lohia eiava idia ese e daḡedaḡe henidia. Iharuana na, Dirava ena taunimanima e kara henidia dalana amo e hahedinaraia idia ese Dirava momokanina Iehova na e inai henia. Bona ihatoina na, siahu bae abi totona unu pavapava raruosi na e hetuari heheni. w20.05 rau 3 par. 3-4

Iehova na ena ura baine haḡuḡurua totona, sibona ḡau idauidau ai baine hahelao diba. Danu, Iehova na dia ḡoevadae taudia baine ḡaukaralaidia diba, ia bae hesiai henia bona ena ura baine haḡuḡurua totona. (Isa. 64:8) Unu dala amo Iehova ese ena ura baine haḡuḡurua. Momokani, ḡau ta ese Iehova na basine koua diba ena ura baine haḡuḡurua totona. (Isa. 46:10, 11) Tamada gubai e nohomu baita tenkiu henia dalana na, ia e kara ḡaudia bona ena heduru amo ta karamu ḡaudia baita lalodia dobu. Heḡereḡere, ia ese e havara ḡaudia iboudiai baita lalodiamu neganai baita hoamu. (Sal. 8:3, 4) Bona iena ura baita karaia totona e duruda daladia baita lalodia dobumu neganai, Ia na baita matauraia badamu. Momokani ina lada Iehova na mai hoana. Una lada anina ese Tamada ena kara, e kara ḡaudia, bona be karamu ḡaudia iboudiai e hahedinaraimu.​—Sal. 89:7, 8. w20.06 rau 9-10 par. 6-7

Oxygen na mauri ḡaudia bona taunimanima e durudiamu bae mauri totona. Hetahu ḡaukarana ta amo e davaria laḡani ta ta lalodiai mauri ḡaudia ese hodahoda namona e hahodia vareaimu. Unu mauri ḡaudia ese hodahoda dikana ladana carbon dioxide e halasiamu. To, oxygen ibounai na dia mauri ḡaudia ese e hahodia vareaimu bona carbon dioxide ese eda atmosphere o eda tanobada e ḡeḡeamu hodahodadia na se hadikaiamu. Dahaka dainai? Badina Iehova ese tubutubu ḡaudia idauidau​—au badadia bona matada amo asita itamu tubutubu ḡaudia​—e karadia bona unu ese carbon dioxide e abia vareaimu bena oxygen e halasiamu. Una ese ta hahodiamu hodahodana e havaraiamu, una ese hari dina siri ena hereva hamomokaniamu. Edena dala amo baita hahedinaraia ita ta noholaiamu tanobada mai hairaina bona ia lalona ḡaudia na ta lalodia badamu? (Sal. 115:16) Dala ta na, Iehova ese e kara ḡaudia na baita lalodia dobu. Unu amo be durudamu dina ta ta Iehova baita tenkiu henia, badina ia ese ita na ḡau namodia e henida. Bona dala ma ta na, ta noholaimu gabudia baita haḡoevadia. w20.05 rau 22 par. 5, 7

Iehova na Satana ese ladana e hadikaia karana baine hamaoromaoroa totona, mai ena aonega, haheauka, bona hahemaoro maoromaoro ida e kara. Bona ena siahu hereadaena na dala idauidau ai e hahedinaraia. Bada hereana na, e karamu ḡaudia iboudiai lalodiai ena lalokau e hahedinaraiamu. (1 Ioa. 4:8) Iehova na hanaihanai e ḡaukaramu ladana baine hahelaḡaia totona. Hari Satana na doini Dirava ladana e hadikaiamu. Ia na taunimanima e koidiamu unu amo idia na Dirava ena siahu, hahemaoro maoromaoro, aonega, bona lalokau karadia bae daradaralai. Heḡereḡere, Satana na taunimanima e hakaudia kereremu unu amo bae laloa Iehova na dia ḡau iboudiai e Havara Tauna. Bona bema taunimanima na e hamomokaniamu Dirava na e nohomu, Satana na e hekwarahimu unu amo idia na bae abia dae Dirava na kara auka Tauna bona ena taravatu na dia mamaoro. Bona taunimanima e hadibadiamu Iehova na daḡedaḡe Diravana, badina taunimanima na hel lahina ai e gabudiamu. Taunimanima ese unu hereva koikoidia be abi daemu neganai, idia ediai na be haraḡamu Iehova ena lohia dalana maorona bae dadaraia totona. Iehova ese Satana do se hamasea lalonai, Satana na dala be tahumu oi danu Iehova ba dadaraia totona. To ia be kwalimumu, a? w20.06 rau 5 par. 13-15

Kongrigeisin momo ai, tadikaka bona taihu na e hekwarahimu gado matamatana ta bae dibaia totona. Reana idia e uramu gado matamatana ai edia lalohadai bae herevalaia na auka. To idia ese gado e herevalaiamu dalana mo basita laloa, to baita laloa bada ḡauna ta binai: Idia ese Iehova e lalokau heniamu bona e uramu ia bae hesiai henia. Una ese ita be durudamu idia baita matauraidia totona. Herevana idia ese eda gado na do asie herevalaia namonamomu, to idia na basita hereva henidiamu basita tomamu, “Asi emui ḡaukara egu ai.” (1 Kor. 12:21) Iehova ese ena kongrigeisin ai ita ta ta na ḡaukara ta ta e henida. Herevana ita na tau o hahine, mero o kekeni, headava o singul, eregabe o buruka, bona gado ta ta herevalaia namonamomu eiava lasi, to Iehova bona taunimanima ma haida ese ita na e laloda badamu. (Roma 12:4, 5; Kol. 3:10) Unu amo ita na dala idauidau ai tadikaka bona taihu baita hagoadadiamu, bona una ese be durudamu nega iboudiai idia baita lalokau henidiamu bona baita matauraidiamu. w20.08 rau 31 par. 20-22

Aposetolo Paulo na Atena taudia daidiai se hesiku, ena be Atena hanuana na kaivakuku itoma henina diho karana, matabodaḡa karadia, bona dirava asi dibadia taudia edia aonega herevadia amo e honu; bona ihadikana herevadia daidiai danu se lalomanoka. Ena be guna Paulo na e ‘ere dikava, e daḡedaḡeva, [Dirava] ladana e hadikaiava’ to gabeai Kristen tauna ta ai ela. (1 Tim. 1:13) Iesu na e lalo Paulo na hahediba ta ai bainela diba heḡereḡerena, Paulo danu Atena taudia na unu e lalodia toma. Bona ena lalohadai na e momokani. (Apos. 9:13-15) Kristen ginigunadia edia negai, Iesu ena hahediba ai ela taudia edia mauri daladia na idauidau. Paulo ese Greece hanuana Korinto ai e nohova Kristen taudia e tore henidia neganai, ia na e gwa una kongrigeisin taudia haida na guna taravatu utu taudia bona edia mauri na dika herea. Bona ma e gwa: “Umui haida danu gunaguna unu heto; to vada e hurimui.” (1 Kor. 6:9-11) Oi be boma gwau diba idia na edia mauri bae haidau diba bona Iesu ena hahediba ai baela diba, a? w20.04 rau 12 par. 15-16

Elda taudia na Iehova ihesiai henina ena hahenamo e daradaralaiamu taudia basie hahemaoro henidia haraḡa na namo. To, bae hekwarahi idia edia hereva bona kara badidia bae lalopararalai. Bena una negana ai elda taudia ese Baibul amo hahegoada herevadia bae heni diba. Peroveta tauna Elia na kwin Iesebel ena amo e heau. (1 Han. 19:1-3) Ia na e hemami iena hesiai ḡaukara na asi anina, bona e ura baine mase. (1 Han. 19:10) Iehova ese Elia na se gwau henia, to e hadibaia ia na dia sibona, Dirava enai baine tabekau na namo, bona baine kara ḡaukaradia na dounu momo. Iehova ese Elia ena lalohekwarahi herevadia na e hakala heni bona ḡaukara matamatadia e henia. (1 Han. 19:11-16, 18) Una ese dahaka e hadibadamu? Ita iboudai, bada hereana na elda taudia ese Iehova ena mamoe na mai hebogahisidia ida bae kara henidia. Ena be ta na e gwaumu ia na e badumu eiava e laloamu Iehova ese ena dika na basine gwautaomu, namona na elda taudia na bae hakala. Bena elda taudia ese boio mamoena na bae hadibaia Iehova ese ia na e lalokau heniamu. w20.06 rau 22 par. 13-14

Iehova na e uramu turada bona eda ruma bese ida hebamo karana baita moalelaia. (Sal. 133:1) Iesu na mai turana namodia. (Ioa. 15:15) Baibul ese tura korikoridia baita bamodia karana ena namo e herevalaia. (Her. 18:24) Bona e hadibadamu dia namo turada baita hadaudaudia eiava siboda baita noho. (Her. 18:1) Momo na e laloamu social media e ḡaukaralaiamu neganai, turadia momo e davaridiamu, bena e hemamimu idia na dia sibodia. To, namona na social media amo ma haida ihereva henidia karana baita naria namonamo. Ripoti haida ese e hahedinaraimu social media ai laulau, vidio bona hereva itadia totona edia nega bada e ḡaukaralaimu taudia na e mamiamu idia na asi turadia bona e lalohisihisimu. Dahaka dainai? Badina nega momo taunimanima ese edia mauri ai e varamu ḡau namodia na social media ai e atomu. Heḡereḡere idia sibodia, turadia, bona gabu namodiai e loa laulaudia e atomu. Unu laulau e itamu taudia ese laulau e atomu taudia edia mauri bona sibodia edia mauri e haheḡereḡeremu, bena e lalomu edia mauri ai ḡau namodia na asie varamu. w20.07 rau 5-6 par. 12-13

The Watchtower, October 1, 1988 etomu: “Elda taudia ese be itaiamu ḡauna ta binai, Keriso na lauma helaḡa amo elda oreana ena elda ta ta baine durua diba, bena una elda ese Baibul ena sisiba o hahekau herevana ta baine gwauraia, unu amo elda taudia iboudiai bae diba edena dala ai hekwakwanai ta bae hamaoromaoroa eiava disisin badana ta bae karaia. (Apos. 15:7-15) Lauma helaḡa na kongrigeisin elda iboudiai be durudiamu, a dia elda tamona.” Elda taudia ma haida e matauraidiamu elda tauna na hebou lalonai basine hereva gunagunamu. Hebou ai ia mo basine herevamu, bona ia na basine ura dikamu, basine tomamu ena lalohadai na hanaihanai mamaoro. Lasi, to ia na mai manauna ida ena lalohadai be gwauraiamu. Ia ese haida edia lalohadai e hakala henidia namonamomu. Bona ḡau badana binai, nega momo ia ese Baibul ena sisiba e gwauraiamu, bona “hesiai tauna mai ena kamonai, bona mai ena kara maoromaoro” ena hahekau dalana e badinaiamu. (Mat. 24:45-47) Elda taudia na mai lalokaudia bona hematauraidia ida be herevaherevamu neganai, Dirava ena lauma helaḡa na idia padadiai be ḡaukaramu, bona idia ese disisin maorona be karaiamu.​—Iak. 3:17, 18. w20.08 rau 27 par. 5-6

Aposetolo Paulo e inai heniava taudia edia siahu na bada. Idia ese Paulo e dadabaia bona dibura ruma ai e tahoa vareai. Danu, Paulo na turana ese e daḡedaḡe heniava. Kristen kongrigeisin taudia haida ese danu Paulo na e inai heniava. (2 Kor. 12:11; Fili. 3:18) To, unu daḡedaḡe taudia iboudiai na Paulo ese e hadareredia. Edena dalai? Daḡedaḡe lalonai, Paulo ese haroro ḡaukara na se hadokoa. Ia ese tadikaka bona taihu e lalokau henidiava, ena be idia haida ese ia lalona e hahisia. Bona ḡau badana binai, ia ese Dirava e badinaia ela bona dokona. (2 Tim. 4:8) Ia na Iehova enai e tabekau dainai, hekwakwanai badadia iboudiai e hanaidia. Oi be haida ese e habadumumu o e hahisimumu, a? Oiemu ura badana binai, kara namo amo dika ba hadarerea, anina na taunimanima ba durudia Iehova bona Baibul bae dibadia. Dala haida bini, taunimanima edia henanadai idauidau na Baibul amo ba haerelai, eiava daḡedaḡe taudia ba matauraidia, bona taunimanima iboudiai ba kara namo henidia, oibe, oi e inai henimumu taudia danu.​—Mat. 5:44; 1 Pet. 3:15-17. w20.07 rau 17-18 par. 14-15

Ita na baita gwau dibamu, Iehova na manau Diravana, ani? Oibe, David ese hari dina ena siri ai e gwauraia heḡereḡerena. (Sal. 18:35) Una negai, reana David ese e laloa dinana binai: Samuel na David tamana ena ruma ela, bena Israel ena king ai bainela tauna e horoa. Una negai memero 8 amo David be mero dokona; to, Iehova ese David e abia hidi King Saulo gabuna baine abia totona. (1 Sam. 16:1, 10-13) Reana David ese salamo e torea tauna ena hereva na e moalelaia, badina ia ese Iehova na ini e herevalaia toma: “E igo dobimu, guba bona tanobada e nenediamu. Ia ese ogoḡami taudia na ḡahu amo e abidia isimu, e dabumu taudia na kahu gabuna amo e veridia isimu; pavapava ida e hahelaidia heboumu.” (Sal. 113:6-8) Iehova na manau Diravana, badina ia ese ena taunimanima na e kara namo henidiamu, ena be idia na dia ḡoevadae. Danu, Ia ese iseda tomadiho dalana na e abia daemu bona ita na ia turana ai e halaodamu. (Sal. 25:14) Una baine vara totona, Iehova na Iesu ena boubou ḡauna amo eda dika e gwauatao. Momokani, Iehova ese ita na e bogada hisimu! w20.08 rau 8 par. 1-3

Iehova sibona mai dibana edena dina bona hora ai ina nega oromana dikana baine haorea. (Mat. 24:36) To, ia na e makaia negana korikorina be nariamu. Ia na e ura dikadikamu mase taudia baine hatoredia isi lou, to doini e haheaukamu. (Iobu 14:14, 15) Ia na be narimu ela bona mase taudia baine hatoredia isi lou negana korikorina baine kau. (Ioa. 5:28) Iehova e haheaukamu badidia namodia daidiai, ia baita tenkiu henia. Mani a laloa: Iehova e haheaukamu dainai, ita bona taunimanima hutuma na mai iseda nega baita “helalo kerehai” totona. Iehova na e uramu taunimanima iboudiai bae mauri ela bona hanaihanai. Oibe, Iehova e haheaukamu dainai baita tenkiu henia. Edena dalai? Namona na mauri hanaihanai e uramu bae abia taudia baita tahudia ela bona baita davaridia, bena baita durudia Iehova bae lalokau henia bona bae hesiai henia. (Apos. 13:48) Bena idia na Iehova ena haheauka karana amo namo bae davaria, ita heḡereḡereda. w20.08 rau 18 par. 17

Ita na ta uramu stiuden ese Iehova baine dibaia. To namona na ia e dibamu ḡaudia ese ia lalona bae doria bena baine badinadia. Iesu ena hahediba dalana na unu heto. Una dainai, taunimanima na ia murina amo e loava. (Luka 24:15, 27, 32) Namona na stiuden ese baine itaia Iehova na e maurimu, lalokau Tauna, ia Tamana, ena Dirava, bona Turana. (Sal. 25:5) Baibul stadi lalodiai, stiuden ese Dirava ena kara namodia baine diba be namo. (Eso. 34:5, 6; 1 Pet. 5:6, 7) Hanaihanai ba hahedinaraia Iehova be daika, herevana edena topik o herevalaiamu. Stiuden ba durua Iehova ena kara namodia baine diba heḡereḡere lalokau, kara namo, bona hebogahisi. Iesu eto, “haheḡani gini-gunana bona hereana” be ina: Iehova “emu Dirava ba lalokau henia.” (Mat. 22:37, 38) Oibe, emu stiuden ba durua namonamo ela bona Iehova baine lalokau henia. w20.10 rau 10 par. 12

Iesu ese hahine iboudiai na e matauraidiava. (Ioa. 4:27) To, Iesu ese ia Tamana ena ura e karava hahinedia na e matauraidia badava. Momokani, ia ese na e gwauraidiava, “taihugu,” bona ia ese idia bona tatau na iena ruma bese taudia ai e halaodiava na heto. (Mat. 12:50) Iesu na idia turadia korikorina ai ela. Ia turana Maria bona Mareta aita lalodia, idia raruosi na singul. (Luka 10:38-42) Iesu ese ena hereva bona kara amo idia na asie hagaridia. Maria na Iesu ena hahediba hahinena ta bona ia na asi ena gari ida Iesu aena badinai e helai. Bona Maria ese Mareta se durua neganai, Mareta na e lalohisihisi​—ia na asi ena gari ida ena lalohisihisi na Iesu e hamaorolaia. Una nega ai, Iesu ese idia raruosi e durudia namonamo. Bona Iesu ese idia bona mai taihudia, Lasaro, ida e lalokau henidiava, badina nega haida ai ia ese e vadivadi henidiava. (Ioa. 12:1-3) Una dainai, Lasaro e gorere neganai, maoromaoro Maria bona Mareta na Iesu ena heduru e tahua.​—Ioa. 11:3. w20.09 rau 20 par. 3; rau 21 par. 6

Iesu ena hahediba taudia na e laloava Basileia na una negai baine hedinarai bena Roma daḡedaḡe taudia bogaraḡidiai idia baine hamauridia. Ita danu ta narimu ela bona dina ta ai Dirava ena Basileia ese kara dika taudia baine haoredia bena kara maoromaoro taudia ese tanobada matamatana bae noholaia. (2 Pet. 3:13) To, namona na baita haheauka bona Iehova ese e abia hidi negana baita naria. Iehova ese nega taina bada e heni dainai, Noa ese lagatoi e karaia bona taunimanima e hadibadia abata na baine kau. (2 Pet. 2:5; 1 Pet. 3:20) Iehova ese Sodoma bona Gomora ai daḡedaḡe taudia baine hadikadia ena disisin e karaia neganai, Abraham na henanadai momo e heni, to Dirava na e hakala. (Gen. 18:20-33) Ena be laḡani momo lalodiai Israel taudia e gwau-edeedeva, to Iehova na e haheaukava. (Neh. 9:30, 31) Hari danu Iehova na e haheaukamu badina ta itaiamu ia ese nega taina bada e heni taunimanima iboudiai bae “helalo kerehai” totona. (2 Pet. 3:9; Ioa. 6:44; 1 Tim. 2:3, 4) Iehova e haheauka nohomu lalonai, namona na haroro ḡaukara bona hahediba ḡaukara baita karaia hanaihanai. w20.09 rau 10 par. 8-9

Tore isi lou neganai, taunimanima edia memori bona kara iboudiai na Iehova ese be henidia loumu. Una anina be dahaka? Iehova ese oi na e lalokau henimumu dainai, ia ese emu lalohadai, hemami, hereva, bona kara na e lalodia taomu. Una dainai, bema ia ese oi na mase amo baine hatoremu isi lou, ia ese emu memori, lalohadai, bona kara na be henimu lou haraḡamu. King David dibana Iehova ese ita ta ta na e laloda badamu. (Sal. 139:1-4) Iehova ese ita e dibada ḡoevaḡoeva herevana ta kamonaimu neganai, iseda hemami be ede heto? Iehova ese ita e dibada ḡoevaḡoeva karana baita laloa dobumu neganai, ita na basita lalohekwarahi. Dahaka dainai? Baita laloatao, Iehova ese ita ta ta na e laloda badamu. Ia ese eda kara idauidau na se lalodia maraḡimu. Eda mauri lalonai ta karamu ḡaudia iboudiai na Ia ese e lalodia taomu. Una ese ita laloda e hagoadaiamu! Ita na siboda asita nohomu. Dina ta ta ena miniti ta ta lalodiai, Iehova na ita dekedekedai e nohomu bona e uramu baine duruda.​—2 Sis. 16:9. w20.08 rau 17 par. 13-14

Iehova na mai moalena ida ena taunimanima e hadibadiamu. Ia na e uramu idia na ia bae diba, bae lalokau henia, bae mauri hanaihanai, bona ia natuna lalokauna ai baela. Unu na Iehova ena edukeisen dalana amo bae abi. (Ioa. 17:3) Kongrigeisin amo Iehova ese ena taunimanima e hadibadiava. (Kol. 1:9, 10) Lauma helaḡa be ḡaukara badana e karaia. (Ioa. 14:16) Ia dainai hahediba taudia ese Dirava ena Hereva e lalopararalaia, bona idia ese Iesu ena hereva o kara​—Evanelia bukadia ai e tore ḡaudia​—e lalodia lou. Una diba ese Kristen ginigunadia edia abidadama e hagoadaia, bona e durudia idia ese Dirava, Iesu, bona taunimanima iboudiai bae lalokau henidia. Iehova e peroveta, “dina gabedia ai,” ena ororo na bese iboudiai ese bae aru henia, ia ese ena dala na idia baine hadibalaidia. (Isa. 2:2, 3) Una peroveta herevana anina e ḡuḡurumu na hari vada ta itaiamu. w20.10 rau 24 par. 14-15

Edena kara dainai ta na turana namona ena sisiba baine dadaraia diba? Hekokoroku karana. Hekokoroku taudia na e uramu “taiadia do bae hemaihemai.” Bona “taiadia ese hereva momokani enai bae kudima.” (2 Tim. 4:3, 4) Idia na se uramu sisiba bae abi, badina e laloamu idia na mai aonegadia eiava ma haida e hereadia. To aposetolo Paulo na e gwa: “Badina be ta sibona baineto, ‘Lau na namo,’ a ḡau be dia namo, sibona e hekoimu.” (Gal. 6:3) King Solomon ese ina kara na herevalaia namo herea, eto: “Eregabe tauna mai aonegana . . . ese pavapava burukana mai ena kavakava, aonega taudia edia hahealo iabi-daena vada e rakatania tauna, na e hereaiamu.” (Koh. 4:13) Aposetolo Petro a laloa, ia na Paulo ese taunimanima vairadiai e sisiba henia neganai, ia e karaia karana mani a laloa. (Gal. 2:11-14) Petro na Paulo ena hereva dalana bona haida vairadiai e gwau henia dainai, reana bema badu. To Petro na aonega karana e hahedinaraia. Ia ese una sisiba e abia dae bona Paulo na se badu henia. Gabeai, Petro ese Paulo na e gwauraia tadikaka lalokauna.​—2 Pet. 3:15. w20.11 rau 21 par. 9, 11-12

Dahaka ese Baibul stiuden bae durudia bae goada totona? Kristen heboudia ilao henidia karana. Hebou ai e kamonaimu herevadia ese idia be durudiamu ḡau momo bae diba, edia abiadadama bae hagoadaia, bona edia lalokau Dirava enai bae habadaia totona. (Apos. 15:30-32) Pablisa ta ese reana stiuden baine hamaoroa diba, ia na Iehova e lalokau henia badamu dainai una ese e durua Dirava ena haheḡani baine badina totona. (2 Kor. 7:1; Fili. 4:13) Baibul stiuden na abidadama pablisa idauidau be dibadiamu neganai, stiuden na edia haheitalai amo Keriso ena haheḡani, Dirava bona dekemu tauna ilalokau henina karana be dibaiamu. (Ioa. 13:35; 1 Tim. 4:12) Baibul stiuden na be itaiamu pablisa momo na stiuden e davarimu hekwakwanai heḡereḡeredia e davari bona e hahanaidia. (Deu. 30:11) Kongrigeisin ai ita ta ta ese dala idauidau ai Baibul stiuden bae durua baine goada totona.​—Mat. 5:16. w20.11 rau 5 par. 10-12

Reana aposetolo Paulo na Efeso ena stadium ai animal korikoridia ida e heatuva karana e herevalaiava. (2 Kor. 1:8; 4:10; 11:23) Eiava reana ia e daḡedaḡe heniava Iuda taudia bona ma haida e gwauraidiava “uda boromadia.” (Apos. 19:26-34; 1 Kor. 16:9) Momokani, Paulo na daḡedaḡe bada herea e davari. To ia na vaira negai bae vara hahenamo idauidau e lalodia. (1 Kor. 15:30, 21; 2 Kor. 4:16-18) Ita na nega dikadia ai ta nohomu. Eda tadikaka haida na raskol karadia daidiai e varamu hisihisidia e haheaukalaimu. Haida be tuari e varamu tanodia ai e nohomu. Bona haida na haroro ḡaukara e taravatua tanodia ai dounu Iehova e hesiai heniamu, ena be edia mauri bae haboioa eiava dibura ruma ai bae atodia diba. To, unu tadikaka bona taihu na e ḡaukara goadamu Iehova bae tomadiho henia, bona ita edai idia na haheitalai namodia. Idia na asie garimu badina dibadia ena be hari ina negai bae mase, to Iehova na e gwauhamata vaira negai mauri namona baine henidia. w20.12 rau 9 par. 3-4

Emu teritori ai taunimanima na asie kamonaimu, eiava ruma ai so davaridiamu neganai, nega haida o lalomanokamu, a? Nega unu bamodiai, eda moale be ede baita habadaia toma? Haroro ḡaukara ai lalohadai maorona baita abia na ḡau badana. Una anina be dahaka? Dirava ladana bona iena Basileia dainai ta haroromu. Iesu ese e hahedinaraia ḡoevaḡoeva mauri dalana ai be rakamu taudia na dia momo. (Mat. 7:13, 14) Haroro ḡaukara ai Iehova, Iesu, bona aneru ida ta ḡaukara heboumu na hahenamo badana. (Mat. 28:19, 20; Apok. 14:6, 7) Iehova sibona ese kudou maoro taudia e veridiamu. (Ioa. 6:44) Una dainai bema ta ese sivarai namona se abia daemu, reana nega ma ta ai be kamonaimu. Deborah na e gwa: “Satana ese e ḡaukaralaiamu tulu badana ta na lalomanoka karana.” To Iehova vairanai Satana ese e ḡaukaralaimu ḡaudia na asi siahudia. w20.12 rau 26 par. 18-19; rau 27 par. 21

Abidadama Kristen taudia momo na ful-taim moni ḡaukara e karamu, unu amo sibodia bona edia ruma bese bae naridia. To idia na dala idauidau ai Dirava ena orea e duruamu. Heḡereḡere, disaster e varamu gabudiai e hedurumu, konstraksen projek haida ai e ḡaukaramu, eiava kontribiusin amo tanobada heḡeḡemadai ḡaukarana e duruamu. Unu e kara tomamu badina Iehova bona tadikakadia e lalokau henidiamu. Wiki ta ta heboudia ai ta heboumu bona haere ta henimu neganai, ta hamomokaniamu tadikakada na ta lalokau henidiamu. Ena be tauanida na e hesikumu, to dounu hebou ta laomu. Ena be ta garimu, to dounu hebou ai haere ta henimu. Bona ena be ita ta ta na mai eda hekwakwanai, to hebou do se hematamamu o hebou e oremu murinai ta hahegoada hehenimu. (Heb. 10:24, 25) Tadikakada na unu e kara tomamu dainai edia ḡaukara namodia na ta lalo badamu! w21.01 rau 10 par. 11

Hekokoroku taudia ese ma haida bae hanamodia na auka, idia na e uramu ma haida ese bae hanamodia na namo. Ia ese ena ḡaukara na ma haida edia ḡaukara ida e haheḡereḡeremu, bona ia na e uramu haida baine halusidia. Ia ese ma haida basine ha treininidiamu, bona ena ḡaukara basine hariamu, badina e laloamu ia mo sibona ese ḡaukara na be karaia namonamomu, a haida ese na be karaia kereremu. Nega iboudiai e laloamu ia ese ma haida na e hereadia, bona e maumaumu bema haida ese ḡau ta e karaia namonamomu. Bema hekokoroku karana na eda hekwakwanai badana ta, namona na ḡuriḡuri amo Iehova baita noia ‘laloda baine hamatamata,’ unu amo una kara dikana baita dadaraia vaitani. (Roma 12:2) Iehova ena haheitalai namona dainai ta moalemu. (Sal. 18:35) Ia na mai manauna ida ena hesiai taudia e durudiamu, bona ta uramu ia baita tohotohoa. Danu, ita na ta uramu Baibul ese e sivarailaidia manau taudia edia haheitalai baita tohotoho. Nega iboudiai Iehova baita hanamoa be maoro.​—Apok. 4:11. w20.08 rau 13 par. 19-20

Headava na harihari ḡauna ḡoevana Dirava ena amo, to taunimanima na dia ḡoevadae. (1 Ioa. 1:8) Una dainai, Baibul ese headava taudia e hadibadiamu, metau idauidau daidiai idia na “hisi do bae ani.” Iehova ese headava tadikakadia e haḡanidiamu edia ruma bese bae naridia, bae ubudia bona bae durudia Dirava bae tomadiho henia. (1 Tim. 5:8) Danu, ena be headava taihudia na e bisimu, to namona na idia ese nega bae ato Baibul bae duahia, bae laloa dobu, bona Iehova bae ḡuriḡuri henia goadagoada. Una na mai hekwarahina. Ha’hine na e bisimu, una dainai be hemamimu idia na asi edia nega eiava goada unu bae kara, to nega bae ato na mai anina bada. Dahaka dainai? Badina Iehova na e uramu ita ta ta eda hetura karana ia ida na baine goada. (Apos. 17:27) Ta itaiamu hahine na baine ḡaukara goada adavana, dia ḡoevadae tauna, henunai baine noho totona. To, Iehova ese e henia madunana na be haḡuḡuruamu bema Baibul ese adavana baine badinaia badidia na be lalopararalaimu bona be abi daemu. w21.02 rau 9 par. 3, 6-7

Hekwakwanai o hedibaḡani na kaia e gabuamu lahina ida baita haheḡereḡereamu. Una kaia na lahi lalonai e gabuamu, bena ranu lalonai e urua dobimu bona e hakeruamu neganai, kaia na e aukamu. Una heḡereḡerena, hekwakwanai baita haheaukalaimu neganai, eda abidadama danu be goadamu. Iakobo na e gwa: “Haheauka ese ena ḡaukara baine haḡuḡurua baine namo, bena ba ḡoeva dae bona ba namo ḡuḡuru, ḡau ta ai basio dabu.” (Iak. 1:4) Ta davarimu hekwakwanaidia ese eda abidadama e hagoadaiamu neganai, mai moaleda ida baita haheaukamu. Iakobo ena revareva ai e hahedinaraia danu ḡau haida daidiai eda moale baita haboio dibamu. Hekwakwanai ta na, bema asi dibada dahaka baita kara. Hekwakwanai e varamu neganai, ita na ta uramu Iehova ena heduru amo, abi hidi maorodia baita kara, eda tadikaka taihu baita durudia, bona Iehova baita badinaia. (Ier. 10:23) Namona na baita aonega unu amo baita diba e daḡedaḡe henidamu taudia ediai dahaka baita gwaurai bona dahaka baita kara. Bema asi dibada dahaka baita kara, reana baita lalomanokamu bona eda moale baita haboioa haraḡamu. w21.02 rau 28 par. 7-9

Iehova na eda haheitalai namona. Iena lalokau na bada herea dainai, bema ia baita badinaiamu, ḡau ta ese Dirava ena lalokau amo basine bibida oho diba. (Roma 8:38, 39) Ina hereva “mai lalomui idoidiai,” anina na baita hekwarahi lalokau baita hahedinaraia. Nega haida reana be aukamu eda tadikaka taihu baita lalokau henidia. Haida ese e hahisidamu neganai, namona na ‘lalokau ai baita haheauka heheni. Lauma ena lalo-tamona baita kahua tao, maino ena iḡui ai.’ (Efe. 4:1-3) Eda tadikaka edia kerere na basita lalodiamu bona Iehova ese eda tadikaka taihu e lalodiamu heḡereḡerena baita lalodiamu. (1 Sam. 16:7; Sal. 130:3) Eda tadikaka taihu edia kerere baita lalomu neganai, be aukamu idia ediai lalokau baita hahedinaraia. Kristen ginigunadia edia negai una hekwakwanai na haida ediai e vara, heḡereḡere, Euodia bona Sunutuke. Aposetolo Paulo ese e hagoadadia, “lalodia bae tamona Lohiabada lalonai.”​—Fili. 4:2, 3. w21.01 rau 22-23 par. 10-11

Iahudia ese “mai lalodia tamona ida” Iehova e hesiai heniamu eregabe taudia na e lalodia badamu! (Sef. 3:9) Idia ese e ura henimui badamu badina mai goadamui ida e henimu ḡaukaradia na o karamu. Idia ese umui na e lalonamo henimuimu. Eregabe tadikakamui e, basio helaloboio, Iehova ese umui na e lalokau henimuimu bona e abidadama henimuimu. Ia na e peroveta, dina gabediai, eregabe taudia na tuari oreana ta heḡereḡerena mai edia ura bada ida ia bae hesiai henia. (Sal. 110:1-3) Iehova na mai dibana umui ese ia o lalokau heniamu bona o uramu mai emu goada ibounai ida ba hesiai henia. Una dainai mai haheaukamui ida ma haida ba kara henidia bona basio haraḡaharaḡa. O kereremu neganai, o abimu treininidia bona sisibadia bavabi dae, ba lalo unu na Iehova ena amo. (Heb. 12:6) E henimui ḡaukaradia na ba karadia namonamo. Bona ḡau badana na, Tamamu guba ai kudouna ba hamoalea.​—Her. 27:11. w21.03 rau 7 par. 17-18

Ḡau idauidau ese lalomanoka e havaraiamu heḡereḡere lalohadai kereredia, eiava eda kerere ta lalodia momomu, bona gorere. Danu Iehova ena hesiai ḡaukara ai ta ura heniamu asainmen asita abiamu, eiava teritori ai taunimanima na asie uramu bae kamonai neganai reana ta lalomanokamu. Lalohadai kereredia bona eda kerere ta lalo momomu dainai asita moalemu. Reana ta laloamu Iehova na basine uramu Paradaiso ai baita noho. Lalohadai unu bamodia na basita abi. Baibul na e gwaumu, taunimanima iboudiai “vada e kara dika.” (Roma 3:23) To Iehova na dia eda kerere e lalotaomu, bona mai dibana ita na dia ḡoevadae. Ia na Tama lalokauna ta bona e uramu baine duruda. Danu ia na e haheaukamu. Ia na e itaiamu ita na ta hekwarahimu kara maorona baita karaia, bona lalohadai kereredia baita dadarai.​—Roma 7:18, 19. w20.12 rau 22 par. 1-3

Ita iboudai na laolao ta lalonai. Bona ta ḡaukara goadamu Iehova ta hesiai heniamu, unu amo tanobada matamatana lalonai baita noho diba. Dina ta ta ai, ta hekwarahimu mauri e lao heniamu dalanai baita raka totona. To Iesu eto, una dala na rotona eiava maraḡi, bona nega haida ibadinana na auka. (Mat. 7:13, 14) Ita na dia ḡoevadae tauda dainai, una dala irakatanina na haraga. (Gal. 6:1) Bema ita na ta uramu mauri e lao heniamu dala maraḡina baita badinaia, namona na mai eda ura ida eda lalohadai bona kara baita haidau. Aposetolo Paulo ese e hagoadadamu ‘laloda baita hamaoromaoro.’ Ita na dia heḡereḡere siboda eda lalohadai bona hemami baita tahu namonamo totona. Dahaka dainai? Badina ita kudouda eiava laloda ese baine koida diba, bona nega haida abi hidi maorodia baita kara na auka. (Ier. 17:9) Una dainai hereva koikoidia amo siboda baita hekoi diba. (Iak. 1:22) Namona na Dirava ena Hereva amo siboda baita heseke, unu amo “eda lalo-hadai bona eda ura” baita dibadia namonamo.​—Heb. 4:12, 13. w20.11 rau 18 par. 1-3

Manau taudia na e moalemu. Dahaka dainai? Badina bema dibada ḡau haida na basita karadia dibamu to ma haida ese e durudamu neganai, ita na ta moalemu. Heḡereḡere, Iesu ese lepra taudia 10 edia gorere e haorea negana mani aita laloa. Idia 10 amo, tamona mo Iesu dekena ela, e tenkiu henia badina be ena gorere dikana​—tau ta ese basine haorea diba gorerena​—vada e ore. Oibe, una manau tauna na e abia heduruna dainai e moale bona Dirava e hanamoa. (Luka 17:11-19) Manau taudia na ma haida ida e ḡaukara heboumu bona e hetura namonamomu. Dahaka dainai? Idia na e moalemu badina e itaiamu, ma haida edia kara danu namo herea bona ḡaukara idauidau na bae haḡuḡuru diba. Momokani, manau taudia na ma haida ediai e moalemu bona e tenkiu henidiamu badina be idia e abi ḡaukaradia na e haḡuḡurudia namonamomu. w20.08 rau 12 par. 17-18