April

Sibomu ba henanadai: ‘Lau ese sisiba herevadia be ede na lalo tomamu? Egu kerere be na gwaurai hedinarai haraḡamu, eiava egu kerere baina lao-ahu totona, egu maoro na gwauraimu, a? Lau ese gwau be haida na henidiamu, a?’ Abidadama tatau bona hahine sivaraidia Baibul ai o duahimu neganai, hekwakwanai unu bamodia e haheaukalai daladia ba lalo. Unu sivarai ta ta o duahimu neganai, ba henanadai: ‘Dahaka baina kara diba, ina Iehova e badinaia tauna ena haheitalai baina tohotohoa?’ Tadikaka taihu eregabedia bona iahudia edia haheitalai baita haeromu neganai, namo baita abi dibamu danu. Heḡereḡere, emu kongrigeisin ai mai ena abidadama ida turana ena hedibaḡani karana, ruma bese edia daḡedaḡe karana, eiava gorere e haheaukalaiamu tadikakana ta o taihuna ta o laloamu, a? Una tadikaka o taihu ese e hahedinarai karadia o itamu bona o uramu ba tohotoho, a? Una tadikaka o taihu ena haheitalai namona bo haeroamu neganai, o davariamu hahetohona ba haheaukalaia daladia haida bo dibamu. Ta moale dikadikamu badina unu tadikaka edia haheitalai na ta itamu bona baita tohotoho diba—momokani unu ese e hamoaleda badamu!—Heb. 13:7. w22.04 rau 13 par. 13-14

Eda mauri ai hekwakwanai ta davarimu neganai, ta moalemu bema elda ta na mai lalokauna ida nega e atomu eda hereva e kamonaimu bona e hagoadadamu. Baibul stadi ta ikarana totona heduru ta uramu neganai, ta moalemu bema painia ḡaukara ai mai ena diba tadikaka o taihu ta na e uramu eda stadi ai baine helai vareai bona heduru herevadia e henimu. Unu tadikaka bona taihu iboudiai na e ura dikadikamu ita bae duruda. Baita moalemu bema dala baita tahumu tadikakada baita durudiamu. Bema oi na o uramu ini dala eiava dala ma haida ai Iehova ihesiai henina ai emu ḡaukara ba habadaia, dahaka ese baine durumu emu tahua ḡaudia ba haḡuḡurudia? Sibomu emu ai basio haḡuḡuru diba tahua ḡauna na basio karaia. Heḡereḡere, reana bo lalomu, ‘Na uramu kongrigeisin ai ḡaukara ma haida baina kara.’ To reana ba haḡuḡuru diba tahua ḡaudia idibadia karana be aukamu, bona oiemu ai na be aukamu ededia nega ai oi o uramu ba haḡuḡuru ḡaudia ba diba. Una dainai ba karaia diba tahua ḡauna ta bavabia hidi. Reana una tahua ḡauna bona ba haḡuḡurua diba dalana ba torea diho. w22.04 rau 25 par. 12-13

Hari Iehova na “hutuma bada-herea” e haboudiamu bona e hadibadiamu dahaka bae kara unu amo ena Basileia henunai bae noho. (Apok. 7:​9, 10) Ena be ina tanobada ai, taunimanima momo na tuari bona inai heheni karadia daidiai e pararamu, to hutuma bada herea na e hekwarahimu inai heheni karadia iboudiai bae dadarai totona. Edia kara amo e hahedinaraiamu, vaitani edia dare na tano ḡei ḡaudia ai e halaomu. (Mika 4:3) Idia na tuari lalodiai asie vareaimu, to Dirava momokanina bona ena ura na taunimanima e hadibalaidiamu, unu amo e durudiamu ‘mauri korikorina’ bae abia. (1 Tim. 6:19) Dirava ena Basileia e badinaiamu dainai, ruma bese taudia ese e inai henidiamu eiava moni dalanai e hekwakwanaimu, to Iehova ese edia dabu ḡaudia na e henidiamu. (Mat. 6:​25, 30-33; Luka 18:​29, 30) Unu iboudiai ese e hadibadamu, Dirava ena Basileia na ḡau korikorina bona Iehova ena ura na baine haḡuḡurua. w22.12 rau 5 par. 13

Laḡani 1,000 dokonai, tanobada ai be nohomu taudia iboudiai na be ḡoevadaemu. Adam amo e abia hanai kara dikana ese basine hahisidia loumu. (Roma 5:12) Adam ena kara dika amo e vara hisihisidia na be ore vaitanimu. Una dainai, tanobada ai be nohomu taudia na be “mauri loumu,” bona laḡani 1,000 dokonai idia na be ḡoevadaemu. (Apok. 20:5) Ita na ta dibamu tau ḡoevadaena Iesu na Satana ese e tohoa neganai, ia na dounu Dirava e badinaia. To ḡoevadae taudia iboudiai na Satana ese be tohodiamu neganai, idia be mai edia ura ida Dirava be badinaiamu, a? Laḡani 1,000 dokonai, Satana na guri dobu masemasena amo be ruhaiamu neganai, taunimanima ta ta ese una henanadai be haerelaiamu. (Apok. 20:7) Hahetoho ginigabena ai Dirava be badinaiamu taudia ese mauri hanaihanai be abiamu, bona ura kwalimu hereadaena be moalelaiamu. (Roma 8:21) To gwau-edeede taudia na be haoredia vaitanimu.—Apok. 20:​8-10. w22.05 rau 19 par. 18-19

Satana ese Iuda taudia bona Roma taudia e haḡanidia Dirava Natuna e hamasea neganai, una peroveta herevana na e ḡuḡuru. (Luka 23:​13, 20-24) Ta aena geduna e totomu neganai, nega sisina lalonai se raka namonamomu heḡereḡerena, Iesu e mase neganai, ia na nega sisina lalonai ḡau ta se karaia bona gara ai dina toi e hekure. (Mat. 16:21) Genese 3:15 ena peroveta herevana baine ḡuḡuru totona, Iesu na gara ai na basine noho hanaihanai. Dahaka dainai? Badina peroveta herevana heḡereḡerena, hahine garana ese gaigai kwarana baine huaria. Una dainai Iesu aena geduna totona baine namo lou na namo. Bona una toto na e namo! Iesu e mase bena dina ihatoina ai, e toreisi lou murinai basine mase diba aneruna ta ai ela. Dirava ena nega korikorina ai, Iesu ese Satana na be haorea vaitanimu. (Heb. 2:14) Keriso bona ia ida be lohia heboumu taudia ese tanobada ai Dirava e inai heniamu taudia—gaigai garana, na be haoredia vaitanimu.—Apok. 17:14; 20:​4, 10. w22.07 rau 16 par. 11-12

Tama bona sina, natumui ba durudia tura namodia bae abidia hidi. Dirava ena Hereva ese e hahedinaraia ḡoevaḡoevamu, turada ese eda kara bae hanamoa eiava bae hadikaia diba. Natumui turadia be mai dibamui, a? Dahaka ba kara diba unu amo natumui ba durudia Iehova e lalokau heniamu taudia bae bamodia? (1 Kor. 15:33) Natumui ba durudia abi hidi maorodia bae kara totona, lauma dalanai e goadamu taudia ba boiridia emui ruma bese ida ba moale hebou. (Sal. 119:63) Tama ta ladana Tony na e gwa: “Laḡani momo lalodiai, lau bona adavagu ese tadikaka taihu—laḡanidia idauidau bona edia mauri daladia idauidau—na a boiridiava emai ruma e maiva. Idia ida a aniani hebouva bona emai ruma bese ena tomadiho ai e helai vareaiva. Una na Iehova e lalokau heniamu bona mai moaledia ida ia e hesiai heniamu taudia idibadia dalana namo hereana ta. . . . Edia ekspiriens, hesiai ḡaukara e goadalaiva bona sibodia edia ura e dadaraiva karana ese natumai na e hagoadadia bada bona e durudia Iehova bae hetura henia totona.” w22.05 rau 29-30 par. 14-15

Elda taudia ese kerere tauna e hereva heniamu neganai, bae laloa ḡauna na, Iehova ese kerere tauna ihahemaoro henina totona vada e atoa dalana heḡereḡerenai bae hahemaoro. Una dala ese kongrigeisin be ede e durua tomamu? Asie helalo-kerehaimu kara dika taudia na kongrigeisin murimurinai e atodiamu neganai, una ese kongrigeisin e gimaiamu unu amo Iehova ena mamoe na basie hekwakwanai. (1 Kor. 5:​6, 7, 11-13; Tito 3:​10, 11) Danu kara dika tauna e duruamu baine helalo-kerehai bona Iehova ese ena dika baine gwauatao. (Luka 5:32) Elda taudia na helalo-kerehai tauna dainai bae ḡuriḡuri bona Iehova bae noia baine durua lauma dalanai baine goada lou totona. (Iak. 5:15) Bema e kara dika tauna na elda taudia ese bae hereva henia, to basine helalo-kerehai be ede bamona? Ia na kongrigeisin murimurinai bae atoa. To, bema ta na gabeai baine laloparara e karaia karana na kerere bona baine helalo-kerehai momokani bona ena kara baine haidaua, Iehova na mai ena ura ida ena dika be gwauataomu. (Luka 15:​17-24) Una na momokani, ena be e karaia karana na kara dika badana.—2 Sis. 33:​9, 12, 13; 1 Tim. 1:15. w22.06 rau 9 par. 5-6

Tanobada heḡeḡemadai Kristen taudia na Iehova ena heduru dainai, hekwakwanai idauidau e hahanaidiamu bona Diabolo na e dadaraiamu. (1 Pet. 5:9) Oi danu unu ba kara toma diba. Kahirakahira, Iehova ese Iesu bona ia ida be lohiamu taudia be haḡanidiamu “diabolo ena kara dika” bae haore. (1 Ioa. 3:8) Una murinai, tanobada ai Dirava ena hesiai taudia na ḡau ta garina basie garimu bona ḡau ta ese basine hagaridiamu. (Isa. 54:14; Mika 4:4) To, una do se vara neganai, namona na baita ḡaukara goada eda gari karana baita hanaia. Eda gari karana baita hanaia totona, Iehova ese ena hesiai taudia e lalokau henidiamu bona e gimadiamu karana na baita abia dae momokani. Una baita karaia totona, guna Iehova ese ena hesiai taudia e gimadia daladia baita lalodia dobu bona baita herevalai. Bona eda hekwakwanai lalodiai Ia ese ita ta ta e duruda daladia baita lalodiatao. Iehova ena heduru dainai, ita ese gari karana baita hahanaia diba!—Sal. 34:4. w22.06 rau 19 par. 19-20

Tanobada idoinai baine lohiaia basileia orena, hari ‘ae palapaladia na taidia auri bona taidia raro’ ese e laulaulaia na vada e lohiamu. Tanobada Tuarina Ginigunana e hematama neganai, Britain bona United States na e gwaubou bae ḡaukara hebou neganai Anglo-America e haginia, una neganai una basileia orena na de lohia matama. Nebukanesa ena nihi ai e itaia kaivakukuna ese guna e lohia basileiadia ma haida amo ina basileia orena edia idau e hahedinaraia. Anglo-America na dia mata-hanai ai e herevalaidia basileiadia ma haida heḡereḡeredia, badina ia na dia auri aukana heḡereḡere golo eiava siliva ese e laulaulaia, to ia na auri bona raro amo e miksia ḡauna ese e laulaulaia. Raro ese taunimanima natudia eiava taunimanima e laulaulaidia. (Dan. 2:​43, NWT) Hari ina negai ta itaiamu taunimanima edia siahu election negadiai, kempein negadiai, protest negadiai eiava ḡaukara taudia edia maoro igwaurai hedinaraidia negadiai na bada herea, una dainai tanobada idoinai e lohiaiamu basileiana ese ena taravatu taunimanima ediai baine haheḡanilaia na auka. w22.07 rau 4-5 par. 9-10

Oi be bapatiso iabina be o garimu eiava o daradaramu, a? Reana bo henanadaimu, ‘Dahaka ese e kougumu?’ (Apos. 8:36) Iesu ese Tamana ena ura ikarana na aniani ida e haheḡereḡerea. Dahaka dainai? Badina aniani ese tauanida e duruamu. Iesu na mai dibana Iehova e uramu baita kara ḡaudia na iseda namo totona. Iehova na se uramu baita karaia ḡauna ta ese baine hahisida. Iehova be e uramu ba bapatiso, a? Oibe. (Apos. 2:38) Una dainai bavabia dae bapatiso iabina haheḡanina bo badinaiamu neganai, namo bo davarimu. Aniani namona ta e atoa lasimu neganai, oi na ḡau ta ese se koumumu una aniani bavania, una heḡereḡerena namona na ḡau ta ese basine koumu ba bapatiso totona. Oi be heḡereḡere ba bapatiso, a? Momo na reana be gwaumu, “Lau na do dia heḡereḡere.” Vaia Iehova enai emu mauri ba gwauhamatalaia bona ba bapatiso na abi hidi badana. Una dainai nega bavato ba lalohadailaia namonamo, bona ba hekwarahi unu amo ba heḡereḡere ba bapatiso totona. w23.03 rau 7 par. 18-20

Iesu e horoa neganai, ia na hahine garana kahana ginigunana ai ela. Iesu e mase bena e toreisi lou murinai, Dirava ese ‘hairai mai hemataurai ida’ na ‘kwarana e havavalaia,’ bona ‘siahu idoinai guba ai bona tanobada ai’ e henia, una dainai anina na “Diabolo ena kara dika baine ha-ore” siahuna danu e henia. (Heb. 2:7; Mat. 28:18; 1 Ioa. 3:8) To hahine garana kahana iharuana danu noho. Aposetolo Paulo ese Iuda bona Idau Bese horoa Kristen taudia e hereva henidia neganai, una hahine garana kahana iharuana na e hahedinaraia, e gwa: “Umui Keriso ena dainai, umui danu Abraham garana bona gwauhamata dihina.” (Gal. 3:​28, 29) Iehova ese lauma helaḡa amo Kristen tauna ta e horoamu neganai, ia na hahine garana ai vada e laomu. Una dainai, hahine garana na Iesu Keriso bona ia ida be lohia heboumu 144,000 taudia. (Apok. 14:1) Idia ese Tamadia, Iehova Dirava ena kara e tohotohomu. w22.07 rau 16 par. 8-9

Ini dina gabedia ai hahetoho na baita davarimu. (2 Tim. 3:1) Nega unu bamodiai, baita lalometaumu bona basita dibamu dahaka baita kara, unu baita hemami toma dibamu bema hahetoho na murina murina eiava nega tamona be varamu. To, baita helalotao, Iehova ese ita na e itada-taomu, bona iena heduru amo mai eda goada ida baita davarimu hahetoho idauidau baita haheaukalaidiamu. Mani Iehova ese abidadama tauna Iobu e durua dalana aita laloa. Ia na nega kwadoḡi lalonai hahetoho dikadia haida e davari. Dina tamona lalonai, Iobu na e kamonai ena ubu-ubu ḡaudia iboudiai na e henao eiava e mase, ena hesiai taudia na e mase, bona dika hereana be natuna lalokaudia iboudiai e hamasedia. (Iobu 1:​13-19) Unu e daradokolaiva lalonai, se daudau, Iobu na gorere dikana ta ese e abia. (Iobu 2:7) Iehova ese Iobu na e itaia-tao. Ia ese Iobu na e lalokau henia dainai, ena hahetoho ihaheaukalaina ḡaudia na e henia. w22.08 rau 11 par. 8-10

Sisiba o matahakani ese lalohisihisi na baine havaraia diba. Baita mamiamu una sisiba na dia maoro eiava sisiba aukana. Unu amo mai anina bada ḡauna baita laloa boiomu—matahakani na Iehova ena lalokau karana. (Heb. 12:​5, 11) Una dainai sisiba bavabi dae, bona emu kara ba haidau. Nega momo Iesu na aposetolo ma haida vairadiai Petro e sisiba henia. (Mar. 8:33; Luka 22:​31-34) Reana Petro na e hemarai dikadika! To, Petro na dounu Iesu e badinaia. Ia na sisiba e abi dae bona ena kerere e hamaoromaoro. Una dainai, Iehova ese Petro ena abidadama karana na e hanamoa bona kongrigeisin lalonai maduna badadia e henia. (Ioa. 21:​15-17; Apos. 10:​24-33; 1 Pet. 1:1) Haida vairadiai e sisiba henidamu dainai ta hemaraimu hemamina basita laloa bada, to una sisiba baita abia dae, bona eda kara baita hamaoromaoroa neganai, ita bona ma haida na namo baita davarimu. Unu baita kara tomamu neganai, Iehova ese be ḡaukaralaidamu bona tadikakada baita durudiamu. w22.11 rau 21-22 par. 6-7

Abraham na e diba Iehova na dia kara gageva tauna eiava asi ena lalokau. Aposetolo Paulo ena hereva heḡereḡerena, Abraham na e diba Iehova ese ia natuna lalokauna Isaak na baine hatorea isi lou diba. (Heb. 11:​17-19) Bona Iehova na e gwauhamata Isaak na bese ta tamadia ai bainela, bona una negai Isaak na do asi natuna. Abraham ese Iehova na e lalokau henia dainai, e diba Tamana na nega iboudiai be kara maoromaoromu. Ena be enai na e auka, to mai abidadamana ida e kamonai. (Gen. 22:​1-12) Abraham be ede baita tohotohoa toma diba? Ia e kara heḡereḡerena, namona na dounu Iehova baita dibaia. Unu baita kara tomamu neganai, Iehova baita hakahikahiamu bona eda lalokau iena na be badamu. (Sal. 73:28) Laloda mamina baita hadibaiamu amo Dirava ena lalohadai baita hahedinaraiamu. (Heb. 5:14) Ta ese be dibaḡanidamu ḡau kererena ta baita karaiamu neganai, una na baita dadaraia dibamu. Basita uramu Tamada lalona ihahisina karana ta baita karaia bona Ia ida eda hetura karana baita hadikaia. w22.08 rau 28-29 par. 11-12

Aposetolo Paulo bona Banaba na Lustera, Ikonio, bona Antioka e lou lao neganai, idia ese “ekalesia oreadia iboudiai lalodiai heitatao taudia vada e abidia hidi.” (Apos. 14:​21-23) Ta dibamu unu elda matamatadia ese edia kongrigeisin na e durua bada, hari ina negai elda taudia e karamu heḡereḡerena. Elda taudia e, heduru e uramu taudia ba durudia, reana idia na umui amo hahegoada “hereva namona” be kamonaimu. Paulo ese ena tadikaka taihu na e hadibadia Iehova ena goada amo witnes “taudia hutuma” ese edia hekwakwanai na e haheaukalai. (Heb. 12:1) Paulo na e laloparara guna e nohova taudia, mai goadadia ida edia hekwakwanai e haheaukalai taudia, edia mauri sivaraidia ese ena tadikaka taihu baine hagoadadia bona baine durudia “Mauri Diravana ena hanua” bae laloa bada totona. (Heb. 12:22) Hari danu unu bamona. Momokani, Iehova ese Gideon, Barak, David, Samuel, bona ma momo e durudia sivaraidia baita duahimu neganai, una ese be hagoadadamu, ani?—Heb. 11:​32-35. w22.08 rau 21-22 par. 5-6

Mase amo bae tore isi lou taudia be ededia “kara” daidiai bae hahemaoro henidia? Idia do se mase neganai e karava karadia daidiai bae hahemaoro henidia, a? Lasi! Baita laloatao, idia edia mase ese edia kara dika gunadia na vada e rohodia. Apokalupo 20:​12, 13 (“edia kara”) na mase taudia edia kara gunadia se herevalaimu. To, una na reana tanobada matamatana ai idia ese be karamu karadia e herevalaimu. Una negai Noa, Samuel, David, bona Daniel ese Iesu Keriso bona ena boubou iabidadama henina dalana bae dibaia be namo. Bema unu bamona, anina na asi edia kara maoromaoro taudia ese ḡau momo herea bae dibadia be namo! Una heduru namona bae dadaraia taudia ediai be dahaka be varamu? Apokalupo 20:15 ese e hamaorodamu: “Tau ta bema asi ladana mauri bukana, ia na lahi gohuna ai bema tahoa dobi.” Oibe, Dirava ese idia na be hamasedia vaitanimu. Una dainai, ita na ta uramu Dirava ese ladada na mauri bukana ai baine tore bona bae mia hanaihanai! w22.09 rau 19 par. 17-19

Iseda helt bona medikol hedurudia ai abi hidi ta karamu neganai, Baibul amo ta diba ḡaudia baita badina. (1 Tim. 3:9) Abi hidi ta karamu bona haida ediai ta herevalaimu neganai, Filipi 4:5 ena hahekau herevana baita badinaia, etomu: “Emui lalo-manau [“lalo maoromaoro,” NWT] na taunimanima iboudiai bae diba.” Baita lalo maoromaoromu neganai, eda helt dainai na basita lalohekwarahi momomu. Ita ese tadikaka bona taihu na ta lalokau henidiamu bona ta matauraidiamu, ena be idia e karamu abi hididia na i’idau ita eda amo. (Roma 14:​10-12) Iehova, mauri Badina, baita hanamoa totona, eda mauri baita gimaia bona mai laloda bona goada ibounai ida ia baita hesiai henia. (Apok. 4:11) Hari, gorere bona hekwakwanai idauidau na ta davarimu. To, Ihavarada Diravana na se uramu eda mauri na unu baine heto. Una dainai kahirakahira ia ese mauri hanaihanai be henidamu, bona hisihisi bona mase na be haorediamu. (Apok. 21:4) Una nega ta nariamu lalonai, baita moale badina ta maurimu bona Tamada lalokauna Iehova ta hesiai heniamu! w23.02 rau 25 par. 17-18

Iehova ese e hahedinaraia ḡoevaḡoeva, ia na herea mikamika Diravana. (Roma 13:1) Mani haheitalai toi aita lalodia. Aigupto ena Farao ese Iehova ena taunimanima na hesiai taudia ai e halaodia bona se urava baine siaidia. To, Dirava ese e ruhadia bona Farao na Davara Kakakakana ai e hamaloaia. (Eso. 14:​26-28; Sal. 136:15) King Belesasara, Babulono pavapavana na aria ta e karaia bona sibona e heabi isi, silva bona golo amo e karadia diravadia e imodaidia, to dia Iehova. (Dan. 5:​22, 23) To, Dirava ese una hekokoroku tauna na e hamanaua. “Una hanuaboi” ai, Belesasara na e hamasea bona ena basileia na Mede bona Parasa taudia e henidia. (Dan. 5:​30, 31) Palestine e lohiaiava tauna, King Herod Agripa Ginigunana ese aposetolo Iakobo e hamasea bona aposetolo Petro na e hadiburaia, badina e urava ia danu baine hamasea. To, Iehova ese Herod na e koua ena palani basine haḡuḡurua. “Lohiabada ena aneru ta ese e huaria” bena e mase.—Apos. 12:​1-5, 21-23. w22.10 rau 15 par. 12

Iehova ese ia e badinaia taudia e naridia daladia baita duahimu neganai, eda helaro na be goadamu. Dirava ena Hereva lalonai e tore ḡaudia iboudiai na “ita ihadibalaida totona e tore, bena Buka Helaḡa ese haheauka bona tauhalo bae havara, ela bona helaro baita davaria.” (Roma 15:4) Iehova ese ena gwauhamata e hamomokani daladia ba lalo dobu. Dirava ese Abraham bona Sara dainai e kara ḡaudia mani aita lalo. Idia na natudia na basie havara diba badina buburuka heherea. To, Dirava ese e gwauhamata henidia natudia ta bae havaraia. (Gen. 18:10) Abraham be dahaka e kara? Baibul na e gwa: “Abidadama dainai e helarova; taunabunai ia na bese loḡora tamadia ai ela.” (Roma 4:18) Ena be taunimanima edia rohoroha ai Abraham na asi dibana Dirava ena gwauhamata be ede baine hamomokani toma, to ia na e abia dae vaitani Iehova ese ena gwauhamata na baine haḡuḡurudia. Una abidadama tauna na se lalohisihisi. (Roma 4:​19-21) Sivarai unu bamodia ese e hadibadamu Iehova na hanaihanai ena gwauhamata na e haḡuḡurumu. w22.10 rau 27 par. 13-14

Iuda taudia na iḡui amo e ruhadia neganai unu hereva na e ḡuḡuru. Iehova ese e hamomokania ia na idia edia Hahediba Tauna Badana, bona iena hahekau henunai, ena taunimanima ese tomadiho ḡoevana e haginia lou. Hari ina negai ta moale dikadikamu badina Iehova na eda Hahediba Tauna Badana. Isaia 30:​20, 21 ai, Isaia ese ita na stiuden ida e haheḡereḡereda bona Iehova ese e hadibadamu. Isaia na e gwa: “Matamui ese emui Hahediba Tauna bae itaia.” Una na heḡereḡere, hahediba tauna na stiuden vairadiai gini. Hari ina negai Iehova ese e hadibadamu na hahenamo ta. Iehova ese ita be ede e hadibada tomamu? Ia ena orea amo e hadibadamu. Iehova ena orea ese e hadibada namonamomu dainai ta moalemu! Eda hebou, pablikeisin idauidau, broadcast, bona ma ḡau momo amo e hadibadamu, bona e durudamu nega aukadia ai baita haheauka mai moaleda ida. w22.11 rau 10 par. 8-9

Iesu ese Ierusalema bona ena dubu bae ore negana bona hari ta nohomu negana “dokona” e herevalai neganai, eto: “Una dina, una hora, ta asi dibana, guba anerudia na asi dibadia, Natuna danu asi dibana, a Tamana sibona mai dibana.” Bena ena hahediba iboudiai e hamaorodia, namona na ‘bae lalo maoromaoro’ bona ‘bae gima.’ (Mar. 13:​32-37) Iuda Kristen taudia na bae mauri totona, bae gima na mai anina bada. Iesu ese ena hahediba e hamaorodia, eto: “Tuari oreadia ese Ierusalem bae koua heḡeḡe ba itaia, vada ba diba ia dokona vada eme kahira-kahira.” Una neganai, idia na Iesu ena hereva bae badinaia bona “ororo bae heau lao.” (Luka 21:​20, 21) Roma taudia ese Ierusalem e hadikaia neganai, una hereva e badinaia taudia na e roho mauri. Hari ita na nega dikana dokona lalonai ta nohomu. Una dainai ita danu baita lalo maoromaoro bona baita gima na namo. w23.02 rau 14 par. 1-2; rau 16 par. 3

Iehova ese ena hesiai taudia na e hadibadiamu, bae kara momokani bona bae kara maoromaoro. Unu amo bae matauraidia bona lalodia na bae maino. (Her. 13:​5, 6) Baibul o stadilaia neganai, Iehova ese oi danu e hadibamu unu ba kara toma, a? O laloparara oiemu ai bona taunimanima iboudiai ediai Iehova ena dala na hereadae. (Sal. 77:13) Una dainai o ura Dirava ena kara maoromaoro ba badinaia. (Mat. 6:33) O uramu hereva momokani ba gwauraia hedinarai, bona ba hahedinaraia Satana ese eda Dirava Iehova e sivarailaiamu herevadia na koikoi. Edena dala ai unu ba kara toma? Namona na emu mauri dalana amo ba hahedinaraia, oi na o gwaumu: “Lau ese Satana ena koikoi herevadia na dadaraimu, bona hereva momokani na badinaiamu. Na uramu Iehova na egu Lohia Badana, bona e gwauraimu karadia maorodia baina kara.” Edena dala ai una ba karaia? Iehova ba ḡuriḡuri henia, emu mauri na ia enai ba gwauhamatalaia bona una gwauhamata ihamomokanina totona ba bapatiso. Oibe, hereva momokani bona kara maoromaoro o ura henimu dainai, ba bapatiso na maoro. w23.03 rau 3 par. 4-5

Maino ta na mia, ina tanobada taudia asi dibadia mainona. Una na “Dirava ena maino,” bona una na Tamada guba ai ihetura henina karana amo e varamu mainona. Dirava ena maino dainai eda noho na be namomu bona basita garimu. (Fili. 4:​6, 7) Dirava e lalokau heniamu taudia ida hetura karana namona ta moalelaiamu. Bona “maino Diravana” ida eda hetura karana danu ta moalelaiamu. (1 Tes. 5:23) Tamada baita dibaiamu, baita abidadama heniamu, bona baita badinaiamu neganai, ena maino ese dika negadiai laloda baine hamainoa diba. Ḡau dikadia e varamu, heḡereḡere daihanai goreredia, disasta, heiriheiri, eiava daḡedaḡe negadiai, Dirava ena maino baita abia diba, a? Unu dika daidiai baita lalo hekwarahimu o baita gari dibamu. Ta moalemu, badina tadikaka taihu ese Iesu ena hereva, hari dina sirina ai e hetore herevana, e badinaiamu. Iehova ena heduru amo, idia na maino ai e nohomu bona dika badadia e haheaukalaimu. w22.12 rau 16 par. 1-2

Eda mauri ai e varamu ḡaudia iboudiai na basita biagu diba. Una dainai, eda hesiai ḡaukara ai ta moalelaimu hahenamodia na ma haida ese e moalelaimu hahenamodia ida basita haheḡereḡere na mai anina bada. (Gal. 6:4) Namona na dala baita tahu baita kara diba ḡaudia baita lalo bada. Ba heḡereḡere hesiai ḡaukara ai hahenamo ta bavabia totona, namona na emu mauri ai moni bona kohu momo na basio tahu bona abitorehai asi anidia ikarana karana na ba dadaraia. Nega kwadoḡi lalonai ba kara diba tahua ḡaudia bavato una ese baine durumu nega daudau lalonai o uramu ba kara tahua ḡaudia ba haḡuḡuru diba. Heḡereḡere, bema nega daudau lalonai o uramu ba haḡuḡurua tahua ḡauna na regula painia ai baola, hari oi ese hua iboudiai heduru painia ḡaukarana ba karaia hesiriu diba, a? Bema emu tahua ḡauna na hesiai tauna ai baola, hesiai ḡaukara ai emu nega ba habadaia diba, a? Hari o abiamu dibana ese dala be kehoamu vaira negai hesiai ḡaukara ena hahenamo idauidau bo moalelai dibamu. Lalomu ba hadaia herevana edena ḡaukara e henimumu, mai lalomu idoinai ida ba karaia. w22.04 rau 26 par. 16-17

Iehova ese ita na be durudamu eda mauri ai e varamu hekwakwanaidia baita haheaukalai bona eda hesiai ḡaukara ai baita moale. Ita ese eda lalohekwarahi ḡauna ta na Iehova ta hamaorolaiamu neganai, ia na haraḡa herea goada be henimu baita haheauka totona. To bema eda hekwakwanai na se ore haraḡamu, Iehova baita noia loulou goada baine henida baita haheaukalaia totona. Ia ese e hamaorodamu unu baita kara toma. Una na Isaia ese e gwaurai herevadia amo e hedinarai, eto, Iehova na “basio halaḡaia ani.” (Isa. 62:7) Una hereva anina be dahaka? Eda ḡuriḡuri ai Iehova ta noia louloumu neganai, una na vaitani ia na asita halaḡaia animu. Isaia ena hereva dainai Iesu ese ḡuriḡuri karana ai e gwaurai haheitalaidia Luka 11:​8-10, 13 ai ta lalodiamu. Unu siri lalodiai, Iesu ese ita e hagoadadamu lauma helaḡa iabina totona baita “noinoi loulou.” Danu Iehova baita noia baine duruda, unu amo abi hidi maorodia baita kara. w22.11 rau 8 par. 1; rau 9 par. 6-7

Oi bona emu ruma bese na hari ba heḡaeḡae diba daḡedaḡe do se vara ai. Bae vara diba ḡau dikadia na basio lalodia. To, emu hetura karana Iehova ida ba hagoadaia bona natumu ba durudia unu bae kara toma. Bema nega haida o lalohekwarahimu, Dirava enai emu hemami ibounai ba gwauraia hedinarai. (Sal. 62:​7, 8) Emu ruma bese ida Iehova o abidadama heniamu badidia ba herevalai. Disasta do se vara ai, emu heḡaeḡae bona Iehova iabidadama henina karana ese natumu be durudiamu basie gari bona bae lalomaino. Dirava ena maino ese laloda e gimaiamu. (Fili. 4:​6, 7) Una dainai, ena be gorere, disasta, bona daḡedaḡe karadia na bae vara, to basita lalohekwarahi badamu o basita garimu. Dirava ese e ḡaukara goadagoadamu elda taudia e ḡaukaralaidiamu ita e durudamu. Bona dala e kehoamu ita iboudai baita heduru heheni totona. Hari, ta moalelaiamu mainona ese be durudamu, gabeai bae vara hahetoho badadia baita hanaidia totona, “hisihisi badana” danu.—Mat. 24:21. w22.12 rau 27 par. 17-18

Namona na baita hekwarahi, guna ta kara kerere badadia ilalohisihisilaina karana baita dadaraia. Bona basita laloa Iesu ena mauri idavalaina boubouna ese eda dika be gwauataomu dainai, kara dika na ‘mai eda ura ida baita karaia.’ (Heb. 10:​26-31, NWT) Bema ita na kara dika badana ta amo ta helalo-kerehai momokani, Iehova ena heduru daladia ta tahu, bona eda kara ta haidaua, baita abia dae Iehova ese eda dika na vada e gwauatao vaitani. (Isa. 55:7; Apos. 3:19) Mauri idavalaina boubouna na mai siahuna eda kara dika baine gwautao bona una ese dala be kehoamu Paradaiso ai baita nohomu. Unuseni ai mauri na baita moalelaia hanaihanaimu. Taunimanima idauidau baita hedavari henidiamu bona ḡaukara namodia baita karamu. Hereadaena be, dina ta ta ai Tamada guba ai baita dibaia namonamomu bona ia ese be henidamu ḡaudia baita moalelaimu. Ia idibana karana na be hesiriu hanaihanaimu, bona e kara ḡaudia ma momo herea baita dibadiamu. w22.12 rau 13 par. 17, 19

“Hahine” na dia Heva e herevalaia. Una peroveta herevana na e gwa hahine garana ese gaigai kwarana baine “huaria.” Una gaigai na aneru dikana Satana, bona Heva natuna, dia ḡoevadae taudia ta na dia heḡereḡere ia kwarana baine huaria. Una dainai, Satana kwarana be daika ese baine huaria diba? Genese 3:15 ai e herevalaia hahinena be daika na Baibul bukana ginigabena ese e gwauraia hedinarai. (Apok. 12:​1, 2, 5, 10) Ia na dia hahine korikorina ta! Hua na ia aena badinai bona kwaranai e atoa koronana na hisiu 12 amo e karaia. Ia na beibi idauna ta e havaraia—una na Dirava ena Basileia. Una Basileia na guba Basileiana dainai, una hahine danu guba ḡauna. Una hahine na Iehova ena orea guba ai e laulaulaia, una orea lalonai na abidadama anerudia iboudiai. (Gal. 4:26) Dirava ena Hereva ese be durudamu danu hahine garana kahana ginigunana baita dibaia. Ia na Abraham besena amo baine vara.—Gen. 22:​15-18. w22.07 rau 15-16 par. 6-8

Iehova ena harihari ḡauna, Baibul, na aonega herevadia amo e honu. Baibul ena sisiba ese taunimanima e durudiamu bona edia mauri e haidaumu. Mose ese Baibul bukadia ginigunadia e tore neganai, Israel taudia e hamaorodia, eto: “Ina na dia ḡau pipikina emui ai. Ina na emui mauri.” (Deu. 32:47) Toretore Helaḡadia e badina taudia ese mauri namona e moalelaia. (Sal. 1:​2, 3) Ena be Baibul na idaunegai e torea, to ia na mai siahuna taunimanima edia mauri baine hanamoa. Baibul ai aonega sisibadia na e mia hanaihanaimu, bona nega idauidau ai taunimanima e durudiamu. Una buka helaḡana ta duahiamu bona ta dibaiamu ḡauna ta laloa dobumu neganai, Itorena Tauna ese ena lauma helaḡa amo e durudamu, Baibul ena sisiba ibadinadia dalana ta lalopararalaiamu. (Sal. 119:27; Mal. 3:16; Heb. 4:12) Oibe, Baibul Itorena Tauna na e ura dikadikamu oi baine durumu. Una ese e hagoadadamu Baibul baita duahia hanaihanai! w23.02 rau 3 par. 5-6

Apokalupo karoa 13 na e gwa, ina kwara namba 7, Anglo-American World Power, na animal mai daḡedaḡena na heto bona ‘doana rua, mamoe na heto,’ to “erena na huala (“gaigai badana,” NWT) erena na heto.” Una animal ese “hoa karadia badadia danu e kara: ta be lahi guba amo e hadihoa taunimanima vairadiai.” (Apok. 13:​11-15) Apokalupo karoa 16 bona karoa 19 ese una animal mai daḡedaḡena na e gwauraia “peroveta koikoi tauna.” (Apok. 16:13; 19:20) Daniel ese unu bamona ḡauna ta e herevalaia, una na, Anglo-American World Power ese “hahebua-tari badana baine havaraia.” (Dan. 8:​19, 23, 24) Una na e vara Tanobada Tuarina Iharuana ai. Pasifik ai una tuari ikouna totona e ḡaukaralai atomic bomu rua na Britain bona America edia saiens taudia ese e kara. Unu amo Anglo-American World Power ese vaitani “lahi [na] guba amo e hadihoa” tanobada ai. w22.05 rau 10 par. 9