June

Iobu na Iehova ida ena hetura karana na namo herea. Ena ruma bese na bada, to e lalotamonamu, bona ena kohu na momo herea. (Iobu 1:​1-5) Dina tamona lalonai, Iobu ese kahirakahira ḡau iboudiai e haboio. Ena kohu iboudiai e haboiodia guna. (Iobu 1:​13-17) Bena, natuna lalokaudia iboudiai e mase. Mani Iobu bona adavana ese natudia gwauta-osi e mase neganai e abia hemamina a laloa, idia na e hoa, e lalohisihisi bona e daradoko bada herea. Una dainai, ta dibamu Iobu na natuna daidiai e taitaiva neganai, ena dabua e darea bona tano ai e moru! (Iobu 1:​18-20) Gabeai Satana ese Iobu e hagorerea bona e hahemaraia. (Iobu 2:​6-8) Guna, Iobu na ena gabu ai taunimanima ese e matauraia badava tauna. Taunimanima na heduru totona ia dekena e laova. (Iobu 31:18) Hari na da asie urava ia dekena baela. Ia na da ta ese se ura heniava, tadikakana, bamona namodia, bona ena hesiai taudia ese e dadaraia!—Iobu 19:​13, 14, 16. w22.06 rau 21 par. 5-6

Bapatiso murinai, ita iboudai na Paulo ese Efeso Kristen taudia e henidia sisibana baita badinaia na namo. E hagoadadia, “lo” Kristen taudia ai baela. (Efe. 4:13) Eiava baita gwau dibamu, anina na dounu bae ḡaukara goada. Oi ese Iehova na da o lalokau henia bada. To, emu lalokau ia enai na baine bada diba. Edena dalai? Aposetolo Paulo ese Filipi 1:9 ai dala ta e herevalaia. Paulo na e ḡuriḡuri Filipi taudia edia lalokau “baine vara badabada” na namo. Una dainai, eda lalokau Iehova enai na baine bada diba. Una na “diba maoromaoro bona laloparara” baita abimu neganai baita karaia dibamu. Iehova baita dibaia namonamomu neganai, eda lalokau ia enai be badamu bona iena kara bona ḡau e karamu daladia baita lalodia badamu. Ia ihamoalena urana na be goadamu, bona ihabaduna ḡauna ta basita karaiamu. Baita ḡaukara goadamu iena ura baita dibaiamu bona iena ura heḡereḡerena baita karamu. w22.08 rau 2-3 par. 3-4

Apokalupo bukana na dia taunimanima iboudiai totodia, to ita, Dirava ena gwauhamata hesiai tauda, ihadibalaida totona e torea. Ita na Dirava ena taunimanima dainai, basita hoa bema ta dibamu ita ese Apokalupo bukana ena peroveta herevadia e ḡuḡurumu karana ta duruamu. Aposetolo Ioane ese ini peroveta herevadia bae ḡuḡuru negana na e gwauraia, eto: “Lohiabada ena dina ai Lauma ese e rohegu.” (Apok. 1:10) Ioane ese unu hereva na laḡani 96 C.E. heḡereḡerena ai e tore neganai, “Lohiabada ena dina” na do se matama. (Mat. 25:​14, 19; Luka 19:12) To Baibul ena peroveta herevana heḡereḡerena, una dina na laḡani 1914 ai e matamaia—una laḡani ai Iesu na guba ai King dagina e abia. Una laḡani amo ema bona hari, Apokalupo ena peroveta herevadia—Dirava ena taunimanima ediai e ḡuḡurumu herevadia—na vada e ḡuḡuru matama. Oibe, hari ita na “Lohiabada ena dina” lalonai ta nohomu!—Apok. 1:3. w22.05 rau 2 par. 2-3

Animal mai daḡedaḡena bona peroveta koikoina na mauridia ai lahi gohuna, teio e aramu gabuna, lalonai e tahodia dobi. Anina na Dirava e inai heniamu politikol oreadia iboudiai na doini e lohiamu lalonai, Dirava ese be haoredia vaitanimu. Una anina be dahaka ita edai? Ita na Kristen tauda dainai, namona na Dirava bona ena Basileia baita badinadia. (Ioane 18:36) Tanobada ena politikol karadia amo baita gini siri na namo. To una baita karaiamu na auka, badina tanobada gavamanidia ese ita na e doridamu eda hereva bona kara amo idia baita durudia. Unu gavamani e durudiamu taudia na animal mai daḡedaḡena ena maka e abia. (Apok. 13:​16, 17) To, una maka bae abia taudia iboudiai na Iehova ese baine badu henidia bona mauri hanaihanai na basie abia dibamu. (Apok. 14:​9, 10; 20:4) Una dainai, ita ta ta na tanobada amo baita gini siri vaitani na ḡau badana, ena be gavamani ese e doridamu idia baita durudia. w22.05 rau 10-11 par. 12-13

Tahua ḡauna ta na, ba karaia diba ḡaukarana ta ai emu diba ba habadaia diba. Bema ḡaukara ta ikarana ai eda diba baita habadaiamu, Iehova ihesiai henina ai ḡaukara ma haida baita kara dibamu. Mani a laloa Betele rumadia, Assembly Hall, bona Kingdom Hall e haginimu taudia na momo herea. Idia momo na mai edia diba bada tadikaka bona taihu ida e ḡaukarava amo unu ḡaukara idauidau ikaradia e diba. Hari ina nega ai, tadikaka bona taihu na Assembly Hall bona Kingdom Hall inaridia ḡaukaradia idauidau e dibamu. Ini bona ma dala haida ai, Iehova Dirava, “uru iboudiai edia Pavapava,” bona Iesu Keriso, “pavapava edia Pavapava,” ese ḡaukara ikaradia mai dibadia taudia e ḡaukaralaidiamu ḡaukara hereadia e haḡuḡurumu. (1 Tim. 1:17; 6:15) Dia siboda baita hahenamo, to ta uramu baita ḡaukara goada bona eda diba baita ḡaukaralai Iehova baita hanamoa.—Ioa. 8:54. w22.04 rau 24 par. 7; rau 25 par. 11

Solomon na taḡa tauna, bona ruma mai hairaina ta ai e nohova. (1 Han. 10:​7, 14, 15) To, Iesu be dia kohu momo tauna, bona asi ena ruma. (Mat. 8:20) To, unu tatau raruosi na kohu ai lalohadai maorona e abia, badina edia aonega na Iehova Dirava ena amo. Solomon na e gwa, moni amo ita ese eda mauri iduruna ḡaudia bona reana eda ura ḡaudia haida baita hoi diba. Ena be Solomon na taḡa tauna, to e laloparara mai anidia bada ḡaudia haida ese moni na e hereaia. Heḡereḡere, ia na eto: “Lada namona iabi-hidina ese taḡa badadia iabi-hididia e hereadiamu.” (Her. 22:1) Danu, Solomon na e gwa moni e ura heniamu taudia ese dekediai miadia ḡaudia na basie moalelaimu. (Koh. 5:​10, 12) Bona ma e gwa, moni ai na basita tabekau, badina herevana eda moni na bada o maraḡi to be ore haraḡamu.—Her. 23:​4, 5. w22.05 rau 21 par. 4-5

Ina harihari ta abimu hahenamodia baita lalodia dobumu neganai, eda hetura karana Iehova ida baita hagoadaiamu. Bona Iehova ese vaira negai be henimu hahenamodia baita lalodia dobumu neganai, ia baita hesiai henia hanaihanai urana na be goadamu. Unu baita kara tomamu neganai, mai moaleda ida Iehova baita hesiai heniamu. Iehova ese tanobada dikana be haoreamu neganai, ia na ita daidai be “tore isimu.” Ta diba momokanimu Iehova na “hahemaoro ḡoevaḡoeva Diravana” dainai, Satana ena tanobada baine hahemaoro henia dinana na basine hadaudauamu to ena nega korikori ai be kaumu. (Isa. 25:9) Basita hesiku to Iehova ida una hahemauri dinana baine kau totona baita nari. To hari, namona na laloda baita hadai hanaihanai ḡuriḡuri karana baita laloa bada, Dirava ena Hereva baita stadilaia bona baita badinaia, bona eda hahenamo idauidau baita lalodia dobu. Unu baita kara tomamu neganai, Iehova ese be durudamu ia itomadiho henina karana ai baita haheaukamu mai moaleda ida. w22.11 rau 13 par. 18-19

Ena be Baibul ese Timoteo e bapatiso neganai e vara ḡaudia na se gwaurai, to sinana Eunike ese una dina ai e abia moalena na laloda matana amo baita itaia diba. (Her. 23:25) Eunike na natuna ese Iehova bona Natuna Iesu Keriso, baine lalokau henidia totona e hadibaiava lalonai e davari hekwakwanaidia iboudiai na e hahanaidia. Timoteo e tubuva neganai edia ruma ai tomadiho na rua. Ia tamana be Grik tauna, to ia sinana bona tubuna hahinena be Iuda taudia. (Apos. 16:1) Reana Timoteo laḡanina na 13 ela 19 padanai neganai, tubuna bona sinana ese Kristen tomadihona e badinaia matama. To dounu, una ruma bese lalonai tomadiho na rua. Timoteo be edena tomadiho be badinaiamu? Hari ina negai danu, Kristen sina ese edia ruma bese na e lalokau henidiamu. Bona e ura dikadikamu natudia bae durudia Iehova bae hetura henia. Bona eda Dirava ese edia hekwarahi na e laloa badamu. (Her. 1:​8, 9) Iehova ese sina momo e durudia dainai, idia ese natudia na e durudia hereva momokani e abia dae. w22.04 rau 16 par. 1-3

Kahirakahira Iehova ese politikol gavamanidia lalodia ‘be ha-uradiamu, ena lalo-hadai bae haḡuḡurua.’ Bena dahaka be varamu? Unu politikol gavamanidia o “pavapava gwauta” ese tomadiho koikoi oreadia iboudiai be haorediamu. (Apok. 17:​1, 2, 12, 16) Ede ta diba tomamu Babulono Badana na kahirakahira be oremu? Una henanadai baita haerelaia totona, baita helalotao idaunegai Babulono hanuana e gimaiava ḡauna ta na Eufrate Sinavaina. Apokalupo bukana ese Babulono Badana e duruamu taudia milion momo na ia e gimaiamu “ranudia” ida e haheḡereḡerea. (Apok. 17:15) To, danu e hahedinaraia, unu ranu na bae “kororo,” anina na tanobada heḡeḡemadai tomadiho koikoi oreana e durudiamu taudia momo ese bae rakatania. (Apok. 16:12) Una peroveta herevana na e ḡuḡurumu, badina hari ina negai taunimanima momo ese tomadiho koikoi na da e rakataniamu bona heduru na ma gabu haida ai e tahumu. w22.07 rau 5-6 par. 14-15

Dika ta gwautaomu karana ese e hahedinaraiamu Iehova ena hebogahisi karana na ta laloa badamu. Parabole ta ai, Iesu ese Iehova na hanua pavapavana ta ida e haheḡereḡerea; una tau ese ena hesiai tauna ena abitorehai na bada herea bona basine haloua diba dainai e gwauatao. To, una hesiai tauna ese bamona hesiai tauna ma ta, enai moni maraḡina e abiatorehai tauna, na se bogaia hisi. (Mat. 18:​23-35) Iesu be dahaka ita e hadibadamu? Bema Iehova ena hebogahisi karana ita edai baita laloa badamu, una ese be doridamu ma haida edia dika baita gwautaomu. (Sal. 103:9) Laḡani momo gunadiai, The Watchtower ese ini e herevalaia toma: “Herevana nega hida bamoda edia dika baita gwautaomu, to una ese Dirava na Keriso amo eda dika e gwautao bona e bogada hisi karana na basine haheḡereḡere diba.” Dika e gwautaomu taudia na edia dika be hegwautaomu. Iehova ese hebogahisi taudia na e bogadia hisimu. (Mat. 5:7) Iesu ese ena hahediba taudia ḡuriḡuri dalana e hadibadia neganai, una e hahedinaraia.—Mat. 6:​14, 15. w22.06 rau 10 par. 8-9

Iesu na taunimanima ta bamona tanobada ema. Ia ese Tamana ena kara na e hahedinarai ḡoevaḡoeva. (Ioa. 14:9) Una dainai, iena amo Iehova Dirava ta dibaia bona ta lalokau heniamu. Danu hari ina negai Iesu ese Kristen kongrigeisin e hakauamu lalonai, ena hahediba herevadia bona hahekau daladia amo namo ta abimu. Ia ese e hadibada ede baita mauri toma, Iehova ena lalonamo baita abia totona. Bona ita iboudai na Iesu ena mase amo namo baita abi diba. Iesu e toreisi lou neganai, ia ese rarana na boubou ḡauna ḡoevadaena heḡereḡerena e heni, unu amo ‘eda dika iboudiai e huri oho.’ (1 Ioa. 1:7) Hari ia na basine mase diba Pavapavana ai dela. Iesu ese kahirakahira gaigai kwarana baine huaria. (Gen. 3:15) Satana be haoreamu neganai, abidadama taudia na be moale dikadikamu! To una nega ta nariamu lalonai, basita hesiku. Eda Dirava na baita abidadama henia diba. Iehova ese ḡau namodia momo herea na “tanobada besedia iboudiai” ediai be havaramu. w22.07 rau 18 par. 13; rau 19 par. 19

Baita haḡuḡuru ḡaudia baita karamu neganai, ḡau haida baita haidau na ḡau badana. Dahaka dainai? Badina eda mauri ai e varamu ḡaudia na basita biagudia diba. Haheitalai na ina: Aposetolo Paulo na Tesalonika ai kongrigeisin ta e hamatamaia. To daḡedaḡe taudia na asie urava Paulo na una gabu ai baine noho. (Apos. 17:​1-5, 10) Bema Paulo na bema noho, ia ese tadikakana na dika ai bema atodia. To Paulo na se hesiku. Ena be ena noho dalana na e idau to ia na dounu dala matamatadia e ḡaukaralaiva baine haroro. Gabeai, Timoteo e siaia Tesalonika ai lauma dalanai tadikaka bona taihu baine durudia. (1 Tes. 3:​1, 2) Tesalonika taudia na e moale bada. Tesalonika ai Paulo ena haheitalai amo diba baita abi diba. Reana ita na ta uramu hesiai ḡaukara ena hahenamo ta baita abia, to basita biagu diba ḡaudia haida daidiai edai na be aukamu unu baita abi totona. (Koh. 9:11) Bema una na oiemu ai e varamu, namona na mai emu ura ida ba haḡuḡurua diba tahua ḡauna ta bavatoa. w22.04 rau 25-26 par. 14-15

Iehova ese vaira nega helarona amo e hagoadadamu. Mani hahetoho negadiai Baibul ena hahegoada herevadia haida aita herevalai. Baibul ai Iehova na e gwa, ḡau ta—hahetoho aukadia danu—ese “Dirava ena uraheni, . . . amo basine bibida oho diba.” (Roma 8:​38, 39) Bona e gwa, ia na ḡuriḡuri amo ia “e boi heniamu taudia iboudiai dekedekediai.” (Sal. 145:18) Iehova na e gwa bema ienai baita tabekaumu, hahetoho idauidau baita haheaukalai diba bona ena be baita hisihisimu to dounu baita moalemu. (1 Kor. 10:13; Iak. 1:2) Dirava ena Hereva ese danu e hadibadamu, bema mauri hanaihanai ena hahenamo na ta davarimu hahetohodia ida baita haheḡereḡeremu, baita dibamu, ta davarimu hahetohodia na nega kwadoḡi ḡaudia mo bona be oremu. (2 Kor. 4:​16-18) Iehova ese helaro na e henidamu, unu hahetoho idauidau e havaramu tauna, Satana Diabolo bona ena kara dikadia e tohotohomu taudia iboudiai na be haoredia vaitanimu. (Sal. 37:10) Vaira neganai bae vara hahetohodia daidiai, Baibul ena hahegoada herevadia haida do laloatao, a? w22.08 rau 11 par. 11

Oi ese dina bona laḡani iboudiai Iehova ena kara maoromaoro taravatudia ba badina diba eiava lasi o laloa momomu, a? Iehova na e gwauhamata eda kara maoromaoro na “davara hurehuredia” heḡereḡeredia. (Isa. 48:18) Mani a laloa, oi na kone lata hereana ta ai gini, asie ore dibamu hurehuredia, na murina murina e laomu e maimu o itadiamu. Una maino dalana heḡereḡerena, oi be bo lalomu dina ta unu hurehure be, be dokomu, a? Lasi! Oi na mai dibamu hurehure na asi edia doko daladia. Emu kara maoromaoro na davara hurehuredia heḡereḡeredia ai baela diba! Edena dalai? Abi hidi ta o uramu ba karaia neganai, Iehova ena ura oi o uramu ba karaia ḡauna ai, ba laloa guna na namo. Bena una ba badinaia. Herevana o karaiamu abi hidina na auka, to Tamamu lalokauna na nega iboudiai oi be hagoadamumu bona be durumumu emu mauri ai dina iboudiai Iena kara maoromaoro taravatudia ba badinadia totona.—Isa. 40:​29-31. w22.08 rau 30 par. 15-17

Laḡani 1,000 dokonai, Satana na dibura ruma amo baine raka lasi na heto. Bena ia ese ḡoevadae taudia baine hakaudia kerere toho. Una hahetoho lalonai, namona na ḡoevadae taudia iboudiai ese ina bae abia hidi: Idia ese Dirava ladana bona ena lohia dalana e matauraiamu o lasi. (Apok. 20:​8-10) Satana bae dadaraia taudia ladadia na Dirava ese ink pen amo mauri bukana ai baine toredia. Taunimanima haida na Adam bona Heva be tohotohodiamu, Iehova ena lohia dalana be dadaraiamu. Idia ediai be dahaka be varamu? Apokalupo 20:15 e gwaumu: “Tau ta bema asi ladana mauri bukana, ia na lahi gohuna ai bema tahoa dobi.” Oibe, ini gwau-edeede taudia na Dirava ese baine haoredia vaitani. To, ḡoevadae taudia hutuma na hahetoho ginigabena ai bae kwalimu. w22.09 rau 23-24 par. 15-16

Kristen ginigunadia edia negai haida na kongrigeisin ai e hepapahuahu, e urava Idau Bese taudia na bae peritomedia, unu amo Iuda taudia ese basie maumauraidia. (Gal. 6:12) Aposetolo Paulo ese edia ura na se lalotamonalaia, bona se ura idia ese iena dala bae badinaia, to ia na mai manauna ida una hepapahuahu bae hamaoromaoroa totona Ierusalem ai aposetolo taudia bona elda taudia edia amo sisiba e noi. (Apos. 15:2) Una dainai, iena kara ese Kristen taudia na e durudia bae moale bona kongrigeisin ai bae maino. (Apos. 15:​30, 31) Bema hepapahuahu badana ta e varamu, maino dalana baita badinaiamu bema Iehova ese e abidia hidi taudia edia amo hahekau daladia baita tahumu. Nega momo, Baibul ena hahekau daladia na eda pablikeisin ai o orea ese e halasimu hahekau daladia ai baita davarimu. Bema baita hekwarahimu unu hahekau daladia baita badinamu to dia siboda eda ura baita lalomu, ita ese kongrigeisin ai maino baita havaraiamu. w22.08 rau 22 par. 8-9

Iseda mauri ai, nega haida ai be ta uramu sivarai ta na turada ta baita hamaorolaia. To nega ma haida ai, unu baita kara toma na auka. Reana ita na asita manada, ita laloda ai e miamu ḡauna ta na tau ta baita hamaorolaia, bona ta lalohisihismu bema ta kamonai turada ida ta herevalaia ḡauna ta na ia ese gabeai ma haida e hamaorolaidia. To, turada ma haida be unu asie kara tomamu dainai ta moalemu! Elda taudia ese hehuni ḡaudia na haida vairadiai asie sivarailai kavamu dainai, idia na edia tadikaka edia komu gabuna o hehuni gabuna na heto. (Isa. 32:​2, NWT) Ita ese ḡau ta na elda ediai baita herevalaia diba, badina dibada idia ida ta herevalaia ḡauna na ma ta basie hamaorolaiamu. Elda na basita doridia hehuni herevadia na ita bae hamaorolaida. Danu, elda adavadia baita matauraidia be namo badina idia ese adavadia asie doridiamu hehuni herevadia bae gwaurai hedinarai totona. Momokani, elda tauna adavana ese ena tadikaka bona taihu edia hehuni herevadia basine diba na mai ena namo. w22.09 rau 11 par. 10-11

Ta diba momokanimu Iehova ese ena abidadama hesiai taudia na ‘hisi bada-hereana’ o hisihisi badana be varamu neganai be hamauridiamu. (Mat. 24:21; Dan. 12:1) Una na Gog, Magog tauna eiava tanobada besedia iboudiai be heboumu bena Iehova e abidadama heniamu taudia be tuari henidiamu neganai, be varamu. Ena be unu tanobada besedia na United Nations ena memba besedia 193 iboudiai, to Herea Mikamika Diravana bona ena guba tuari oreana ediai idia na ḡau ta lasi! Iehova na e gwauhamata: “Unu amo egu herea-dae bona egu helaḡa baina hahedinaraidia, bona bese momo vairadiai sibogu baine hahedinarai. Bena idia bae diba lau na Iehova.” (Ese. 38:​14-16, 23) Gog ese Iehova ena taunimanima be hahisidiamu neganai, una ese Aramagedono tuarina be havaraiamu, una neganai Iehova ese be karaiamu ḡauna ginigabena na, “tanobada idoinai hanua hanua pavapavadia” iboudiai be haorediamu. (Apok. 16:​14, 16; 19:​19-21) To, “kara maoromaoro taudia [mo] na tano bae noholaia, bona lalo-maoromaoro taudia [mo] na ia lalonai bae noho.”—Her. 2:21; w22.10 rau 16-17 par. 16-17

Ita ese ta kudouna na basita itaia diba; a Iehova sibona mo “ese lalo e tohodiamu.” (Her. 16:2) Ia ese taunimanima iboudiai, noho daladia idauidau bona tano idauidau taudia na e lalokau henidiamu. Bona Iehova ese e hagoadadamu “[eda] lalokau na baita habadaia.” (2 Kor. 6:13) Baita hekwarahi tadikaka taihu iboudiai baita lalokau henidia, dia baita hahemaoro henidia. Una anina na kongrigeisin murimurina taudia danu basita hahemaoro henidia. Oi ese varavaramu, dia Iehova ena Witnes tauna, bo hahemaoro heniamu, bo tomu, “Ia na hereva momokani na basine abia dae dibamu”? Lasi, baita gwau dibamu, una na siboda ta helalomu ta tomu ita na mamaoro-mamaoro karana. Iehova na doini dala e kehoamu “taunimanima iboudiai gabu idoidiai” bae helalo-kerehai totona. (Apos. 17:30) Nega iboudiai ba helalotao sibomu o helalomu oi na maoromaoro karana na dia kara maoromaoro karana. Namona na Iehova ena kara maoromaoro taravatudia iura henina karana ese moale baine havaraia bona baine duruda haheitalai namodia ai baitala, unu amo haida baita durudia Dirava bona ita ida eda hetura karana baine hagoadaia. w22.08 rau 31 par. 20-22

Eda haroro ḡaukara baita karaiamu neganai haida ese be inai henidamu. Bona nega vairai una na be bada be laomu. (Dan. 11:44; 2 Tim. 3:12; Apok. 16:21) To, ta diba momokanimu Iehova ese ita na be durudamu. Dahaka dainai? Badina Iehova ese ena hesiai taudia na hanaihanai e durudiamu, edia ḡaukara bae haḡuḡuru totona—ena be unu na ḡaukara aukadia. Mani Babulono ai Iuda taudia e haroro henidia peroveta tauna Esekiel, ena mauri ai e vara ḡaudia haida aita lalodia. Esekiel ese e haroro henidia taudia be taunimanima ede bamodia? Iehova ese idia na e gwauraidia asi edia hemataurai, lalo-auka, bona daḡedaḡe taudia. Edia hahehisi karadia na ava ginigini bona doadoa edia hahehisi na heto. Una dainai, Iehova ese Esekiel e hamaoroa loulou: “Garidia basio gari”! (Esek. 2:​3-6) Esekiel ese ena haroro ḡaukara na e karaia, badina ia na (1) Iehova ese e siaia, (2) Dirava ena lauma amo goada e abi, bona (3) Dirava ena Hereva ese ena abidadama e hagoadaia. w22.11 rau 2 par. 1-2

Iehova ese tanobada ai e havara mauri ḡaudia edia mauri na mai hetoadia, to taunimanima be lasi. Ia ese taunimanima na helaro idauna e henidia, idia na basie mase. Danu Iehova ese ita e karada neganai mauri hanaihanai urana e henida. Baibul na e gwaumu Dirava ese taunimanima “kudoudia ai noho hanaihanai urana e atoa.” (Koh. 3:​11, NWT) Ita ese mase ta inai heniamu badina ta be una. (1 Kor. 15:26) Bema ta gorere dikadikamu, ita be ḡau ta asita karaiamu to ta narimu baita mase, a? Lasi. Vaia, dokta dekena baita laomu eiava nega haida muramura baita abimu baita namo helaoreana. Oibe, ḡau idauidau ta karamu basita mase totona. Bona ta lalokau heniamu tauna ta, maraḡina o badana, e masemu neganai, nega daudau lalonai ta lalohisihisimu, ani? (Ioa. 11:​32, 33) Momokani, e Havarada Tauna lalokauna na e uramu baita mauri hanaihanai, una dainai harada e karaia dalana na diba baine abi hanaihanai bona kudouda ai noho hanaihanai urana e atoa. w22.12 rau 3 par. 5; rau 4 par. 7

Ina nega aukana lalonai, eda tadikaka taihu momo na e goreremu, e garimu, o sibodia noho hemamina e abiamu. Tadikaka taihu edia heduru ba tahua. Gabu momo ai daihanai gorerena ta dainai, tadikaka taihu ida ta hedavarimu negadiai padada na bae daudau. Nega unu bamodiai, oi na aposetolo Ioane e lalo bamona bo lalo dibamu. Ia na e ura turana Gaio baine itaia. (3 Ioa. 13, 14) To, Ioane na e laloparara nega taina be laomu murinai, Gaio baine itaia diba. Una dainai Ioane na baine karaia diba ḡauna e karaia, ia ese Gaio ena revareva ta e torea. Bema tadikaka taihu na basio itadia dibamu, dala ma haida amo ba hereva henidia. Unu bo kara tomamu neganai, emu hemami na be namomu bona bo lalo mainomu. Elda taudia ba hereva henidia bema o lalo hekwarahimu, bona edia heduru bona hahegoada herevadia na bavabi dae.—Isa. 32:​1, 2. w22.12 rau 17-18 par. 6-7

Baibul ese e hahedinaraiamu Iosef aena na auri gadeadia amo e ḡuidia bona aiona na auri amo e ḡuia. (Sal. 105:​17, 18) Iosef ena mauri lalonai ḡau dikadia momo e vara. Matamanai ia na e abidadama henia hesiai tauna ta, to gabeai dibura ruma ai e atoa. Nega ta emu ai e vara hahetohona ta na e bada herea, ena be o ḡuriḡurilaia loulou, a? Una na baine vara diba. Iehova ese Satana ena tanobada ai e varamu hahetohodia na se koudiamu. (1 Ioa. 5:19) To, ina ba diba na namo: Iehova ese emu ai e varamu ḡaudia iboudiai na e itamu, bona ia ese oi na e lalomu badamu. (Mat. 10:​29-31; 1 Pet. 5:​6, 7) Danu, ia na e gwauhamata, eto: “Lau na basina negemu bona basina rakatanimu, lasi ona lasi vaitani.” (Heb. 13:5) Ena be o laloamu emu ai e varamu ḡauna na asi ihanaina dalana, to Iehova ese be durumu dibamu ba haheaukalaia totona. w23.01 rau 16 par. 7-8

Baibul ese e hadibadamu ena be baita kereremu to Dirava ese ita na basine rakatanidamu. Israel taudia na Iehova vairanai e kara dika loulouva, to e helalo-kerehai momokani neganai, Dirava ese edia dika na e gwautao. Kristen ginigunadia danu e diba Dirava ese idia na e lalokau henidia badava. Aposetolo Paulo na lauma helaḡa ena heduru amo tadikakana e hagoadadia, kara dika badana ta e karaia to e helalo-kerehai tauna ena ‘dika bae gwau tao bona tauna bae haloa.’ (2 Kor. 2:​6, 7; 1 Kor. 5:​1-5) Iehova ese ia e tomadiho heniava taudia e kerereva neganai se rakatanidiava, to mai ena lalokau ida e durudiava, e sisiba henidiava, bona e boiridia louva ia turana ai baela. Ia na e gwauhamata hari ina negai edia dika amo e helalo-kerehaimu taudia iboudiai danu unu baine kara henidia toma. (Iak. 4:​8-10) Baibul ese Dirava ena aonega, hahemaoro maoromaoro, bona lalokau e hahedinaraidia. Danu, e hahedinaraiamu Iehova na e uramu ia baita dibaia bona turana ai baitala. w23.02 rau 7 par. 16-17

Badi namodia daidiai, ta uramu tanobada ai e varamu ḡaudia ese Baibul ena peroveta herevadia e haḡuḡurumu daladia baita diba. Heḡereḡere, Iesu ese bae vara ḡaudia e gwaurai, unu amo baita diba Satana ena nega dokona na e kahikahimu. (Mat. 24:​3-14) Aposetolo Petro ese e hagoadadamu peroveta herevadia e ḡuḡurumu daladia baita haerodia namonamo, unu amo eda abidadama baine goada. (2 Pet. 1:​20, 21) Ia ena ura na Baibul ena peroveta herevadia ta lalodiamu neganai, lalohadai maorona baita abia. Ia ese e hagoadadamu Iehova “ena dina ena mai” baita naria. (2 Pet. 3:​11-13) Dahaka dainai? Badina dia ta uramu Iehova ese Aramagedono baine mailaia ‘dinana bona horana’ baita diba, to ta uramu nega orena miana baita ḡaukaralaia, unu amo eda ‘kara bae helaḡa bona Dirava baita badinaia.’ (Mat. 24:36; Luka 12:40) Ta uramu kara namodia baita goadalai bona Iehova ena hesiai ḡaukara ai baita hahedinaraia ia na ta lalokau heniamu. Unu ta kara tomamu neganai, siboda nahuada baita toho na namo. w23.02 rau 16 par. 4, 6

“Mamoe idaudia” ese ḡau ma haida bae kara na namo, unu amo bae heḡereḡere Paradaiso ai bae noho. Namona na eda tenkiu karana Iesu enai baita hahedinaraia. Heḡereḡere, Iesu tadikakana horoa taudia ta kara henidiamu dalana amo ta hahedinaraiamu, Iesu na ta lalokau heniamu. Iesu na e gwa mamoe na ia tadikakana e kara henidiamu dalana heḡereḡerenai baine hahemaoro henidia. (Mat. 25:​31-40) Haroro bona hahediba ḡaukaradia na mai moaleda ida baita karamu neganai, idia ta durudiamu. (Mat. 28:​18-20) Ita na basita nari ela bona Paradaiso ai baita noho bena Iehova ena ura heḡereḡerena ai baita mauri. Namona na hari baita hekwarahi mai momokanida ida baita hereva bona baita kara, bona eda mauri na baita biagua namonamo. Danu, iboudai ese Iehova baita badinaia, headava taudia bae hebadina heheni, bona tadikaka taihu baita durudia. Bema ina tanobada dikana lalonai, Dirava ena taravatu baita badinadia namonamomu, Paradaiso lalonai unu taravatu ibadinadia na be haraḡamu. Danu ḡaukara ikaradia daladia baita diba, unu amo baita hahedinaraia ita na ta heḡaeḡaemu una negai baita noho totona. w22.12 rau 11-12 par. 14-16

Ita ese eda King Iesu ta lalokau heniamu, badina ia na Lohia Tauna hereadaena. Iehova sibona ese Natuna e hadibaia bona e abia hidi baine lohia. (Isa. 50:​4, 5) Danu, Iesu na sibona ena ura idadaraina lalokauna e hahedinaraia. (Ioa. 13:1) Iesu na emu King dainai, ia o lalokau heniamu na maoro. Iesu ese ia e lalokau henia momokanimu taudia na e gwauraidiamu turana, bona ena haheḡani e badinamu amo edia lalokau e hahedinaraiamu. (Ioa. 14:15; 15:​14, 15) Momokani, Iehova Natuna turana ai baitala na hahenamo badana! O diba Iesu na manau bona Tamana ena kara e hahedinarai ḡoevaḡoeva. Ia ese hitolo taudia e ubudia, lalomanoka taudia e hagoadadia, bona gorere taudia e hanamodia. (Mat. 14:​14-21) Danu, hari ina negai kongrigeisin e hakauamu dalana na o itaiamu. (Mat. 23:10) Bona mai dibamu ia na Dirava ena Basileia Pavapavana dainai, vaira negai ḡau namodia momo be karamu. Edena dala ai ba hahedinaraia ia na o lalokau heniamu? Iena haheitalai ba tohotohoa. Una ba karaia dalana ta na, Iehova enai emu mauri ba gwauhamatalaia bona ba bapatiso. w23.03 rau 4 par. 8, 10

Iehova ese guba, tanobada, bona davara ai ḡau iboudiai e karadia, unu amo ia ta dibaiamu. (Sal. 104:​24, 25) Mani ita e karadia dalana a laloa. Ia ese e havara ḡaudia hairaidia ta itamu neganai ta moalemu, ani? Danu, ita e karada neganai ḡau idauidau baita ita, baita kamonai, baita dogotao, baita mami, bona baita hairu diba. Baibul ese e hahedinaraiamu Iehova e kara ḡaudia baita stadilai na mai anina bada, badina unu amo Iena kara namodia baita dibamu. (Roma 1:20) Heḡereḡere, Iehova e kara ḡaudia bo itadiamu neganai mai hairaidia. Idia ese iena aonega e hahedinaraiamu, ani? Bona ta moalelaimu anianidia idauidau mani a lalodia. Unu ese iena lalokau ita edai e hahedinaraiamu. Iehova e kara ḡaudia baita haerodiamu neganai, ia baita dibaiamu bona turana ai baita laomu. w23.03 rau 16 par. 4-5.

Ina tanobada maurina e dika hereamu lalonai, iseda abidadama Dirava ena hereva momokani ai na be tohoamu. Reana taunimanima ese daradara be havaramu, heḡereḡere be gwaumu Baibul ena hereva be momokani eiava; o hesiai tauna mai ena kamonai bona kara maoromaoro be momokani Iehova ese e abia hidi ita baine hakauda eiava lasi. To bema baita abia daemu Iehova ena Hereva na hanaihanai momokani, eda abidadama ihadikana herevadia na baita dadaraidiamu. Laloda baita hadai Iehova ena ‘taravatu karadia baita kara, nega iboudiai, ela bona dokona.’ (Sal. 119:112) Basita hemarai to ma haida ediai hereva momokani baita herevalaia bona baita hagoadadia Baibul ena sisiba bae badinaia. (Sal. 119:46) Bona ita ese nega aukadia bona daḡedaḡe danu baita haheaukalaidia ‘mai moaleda ida.’ (Kol. 1:11; Sal. 119:​143, 157) Hereva momokani ese e durudamu dainai, asita garimu bona asita daradaramu. Danu, Dirava ena Basileia henunai nega vaira helarona e henida. w23.01 rau 7 par. 16-17

Iesu do se mase hanuaboinai, nega daudau lalonai ena hahediba daidiai e ḡuriḡuri, Tamana e noia ‘Tau Dikana ena amo baine hamauridia.’ (Ioa. 17:15) Iesu ese ena hahediba na e lalokau henidia bada! Ena be kahirakahira hahetoho badana ta baine davaria; to dounu ena hahediba taudia edia namo e laloa bada. Iesu baita tohotohoa totona, dia eda ura ḡaudia mo baita lalo. To, hanaihanai tadikaka taihu daidiai baita ḡuriḡuri. Unu baita kara tomamu neganai, ita na Iesu ena haheḡani, ba helalokau heheni karana, ta badinaiamu bona Iehova enai ta hahedinaraiamu tadikaka bona taihu na ta lalokau henidia badamu. Eda tadikaka taihu daidiai ta ḡuriḡurimu karana na dia nega ta haorea kavamu karana. Baibul ese e hadibadamu “kara maoromaoro tauna ena ḡuriḡuri ese anina e havaraiamu mai siahuna ida.” (Iak. 5:16) Eda tadikaka taihu daidiai baita ḡuriḡuri na namo, badina idia ese hahetoho idauidau e davarimu. w22.07 rau 23-24 par. 13-15