August

Dahaka dainai ‘Iehova garina e garimu bona ia ladana e helalolaiamu taudia ilalo-taodia bukana’ ai, edia hereva amo e hahedinaraiamu Dirava e gari heniamu bona ia ladana e laloa dobumu taudia ladadia ba hetore na maoro? Eda hereva ese kudouda ai e miamu ḡauna e hahedinaraiamu. Iesu na e gwa: “Lalona e honu honu daemu ḡaudia amo uduna e herevamu.” (Mat. 12:34) Iehova na e uramu ia e lalokau heniamu taudia na tanobada matamatana ai mauri bae moalelaia hanaihanai. Eda hereva dalana ese be hahedinaraiamu, Iehova ese eda tomadiho be abia daemu eiava lasi. (Iak. 1:26) Dirava asie lalokau heniamu taudia haida na mai badudia bona mai hekokorokudia ida e herevamu. (2 Tim. 3:​1-5) Ita na asita uramu idia heḡereḡeredia ai baitala. Ta ura dikadikamu eda hereva amo Iehova baita hamoalea. To Iehova be moalemu bema Kristen heboudia eiava hesiai ḡaukara ai baita hereva ḡoevaḡoeva mai manauda ida, to ruma ai eda bese taudia be mai baduda bona dia lalokau dalana ai baita hereva henidia, a?—1 Pet. 3:7. w22.04 rau 5 par. 4-5

Dirava ese ena lalohadai na animal mai daḡedaḡena doana ten lalodiai baine atoa Babulono Badana bae hadikaia ore totona. Io, Iehova na bese iboudiai lalodia be dorimu, unu amo idia ese animal mai daḡedaḡena kakakakana, eiava United Nations bae ḡaukaralaia, bena tanobada idoinai tomadiho orea koikoidia iboudiai bae inai henidia bona bae hadikadia ore vaitani. (Apok. 18:​21-24) Una anina be dahaka ita edai? Eda Dirava vairanai tomadiho dalana ḡoevana bona asi bebeka-bebekana baita badinaia na namo. (Iak. 1:​27, NWT) Danu Babulono Badana ena hahediba koikoidia, krismas o dina unuhetomadia ma haida, bona demoni edia kara idauidau baita dadaraidia. Bona taunimanima na dounu baita hadibadia, Babulono Badana amo bae “raka lasi,” unu amo Dirava vairanai idia na bae ḡoeva bona Babulono ida basie hisihisi hebou.—Apok. 18:4. w22.05 rau 11 par. 17; rau 14 par. 18

Tama sina e, dala ba kara natumu ediai Iehova bona ia ese oi daimu ai e kara ḡau namodia ba herevalai. (Deu. 6:​6, 7) Una na mai anina bada bema ruma ai tomadiho na dia tamona dainai natumu ida na so stadi momomu. Taihu ta ladana Christine na e gwa: “Lauma ḡaudia baia herevalai negadia na dia momo dainai, dala a davariva negadia iboudiai Iehova a herevalaiava.” Danu, Iehova ena orea bona tadikaka taihu edia namo ba herevalai. Elda na basio gwau henidia. Elda bo herevalaidiamu dalana ese natumu be durudiamu hekwakwanai negadiai idia edia amo heduru bae tahu diba. Ruma ai maino ba havaraia. Hanaihanai adavamu bona natumu ediai ba hahedinaraia idia na o lalokau henidiamu. Adavamu na mai emu gado namo bona hemataurai ida ba herevalaia, bona natumu danu ba hadibadia unu bae kara toma. Unu amo maino na be varamu dainai ḡau ta ese natumu na Iehova idibana karanai basine kouamu.—Iak. 3:18. w22.04 rau 18 par. 10-11

Iesu ena sisiba Efeso kongrigeisin taudia ediai ese e hahedinaraia, idia na hekwakwanai idauidau lalodiai e haheaukava bona Iehova ena hesiai ḡaukara na asie hesikulaiava. To, idia ese edia lalokau gunana na vada e negea. Una lalokau bae hagoadaia lou na namo—bema unu basie kara tomamu, Dirava ese edia tomadiho dalana na basine abia daemu. Una heḡereḡerena, hari ina negai baita haheauka mo na dia heḡereḡere. Namona na badi maorodia daidiai baita haheauka. Eda Dirava na dia ita ta karaiamu ḡauna mo e laloamu, to ta karaiamu badina danu e laloamu. Ia ese eda kara badidia na e lalo badamu, bona e uramu Ia ta tomadiho heniamu badina na ta lalokau henia badamu bona ta tenkiu heniamu. (Her. 16:2; Mar. 12:​29, 30) Namona na nega idoinai baita noga bona baita gima. Sadi kongrigeisin taudia edia hekwakwanai na ma idau. Ena be idia na guna lauma dalanai e goadava, to hari idia ese Dirava ena hesiai ḡaukara na vada e hesikulaiamu. Iesu ese e hamaorodia bae “gima.” (Apok. 3:​1-3) Momokani, Iehova ese eda ḡaukara na basine laloboiomu.—Heb. 6:10. w22.05 rau 3 par. 6-7

Solomon ese eda hekwarahi amo ta abiamu moalena na e gwauraia, “Dirava ena harihari ḡauna.” (Koh. 5:​18, 19) Solomon na mai dibana una hereva na momokani. Ia na ḡaukara goada tauna ta! Ia ese ruma e hagini, vine imeadia e hado, uma e kara bona ranu gabudia e ḡei. Danu, hanua haida e hagini. (1 Han. 9:19; Koh. 2:​4-6) Una ḡaukara na mai hekwarahina, bona ia ese na e moalelai. To, Solomon na dia unu ḡaukara ai mo moale e davaria. Ia ese Dirava ihesiai henina ḡaukaradia momo e kara danu. Heḡereḡere, ia ese Iehova itomadiho henina totona, dubu helaḡa mai hairaina ihaginina ḡaukarana e naria—una ḡaukara na laḡani seven lalodiai e karaia! (1 Han. 6:38; 9:1) Solomon na ḡaukara idauidau e kara murinai, e laloparara Dirava ihesiai henina ḡaukarana na mai anina bada. Ia na e gwa: “Ḡaukara dokona binai; hereva iboudiai vada o kamonai. Dirava garina ba gari, bona ena haheḡani ba badinadia.”—Koh. 12:13. w22.05 rau 22 par. 8

Baibul ai Iehova ese edia dika e gwautao taudia momo e sivarailaidia. Oi be daika ena sivarai o laloamu? Reana King Manase ena sivarai o laloamu. Una kara dika tauna na dala dika hereadia ai Iehova vairanai e kara dika. Ia ese dirava koikoidia e tomadiho henidiava bona haida e hagoadadiava unu bae kara toma. Natuna e aladia bona dirava koikoidia ediai e bouboulaidia. Danu, Iehova ena dubu helaḡa lalonai kaivakuku au-tubuana ta e haginia. Baibul ese ia na ini e herevalaia toma: “Iehova vairanai e kara havara-havara, bona e habadua.” (2 Sis. 33:​2-7) To, Manase na mai kudouna idoinai ida e helalo-kerehai neganai, Iehova ese ena dika na e gwautao. (2 Sis. 33:​12, 13) Danu, reana King David ena sivarai o laloamu, ia na Iehova vairanai kara dika badadia e kara, e heudahanai bona e ala-ala. To, David na mai kudouna idoinai ida e helalo-kerehai bona ena kerere e gwaurai hedinarai neganai, Iehova ese ia danu ena dika e gwautao. (2 Sam. 12:​9, 10, 13, 14) Oibe, ta diba momokanimu Iehova na e ura dikadikamu eda dika baine gwautao. w22.06 rau 3 par. 7

Eda helaro baita hagoadaia na mai hekwarahina. Dirava ena gwauhamata baine haḡuḡurudia negana ta nariamu lalonai, reana nega haida baita hesikumu. To, Iehova na e noho hanaihanaimu dainai, ia ese nega e laloamu dalana na idau ita eda amo. (2 Pet. 3:​8, 9) Ia ese e gwauhamatalai ḡaudia na be haḡuḡurudiamu, to dia ita ta laloamu negana ai be karaiamu. Dirava ese ena gwauhamata baine haḡuḡurudia negana ta nariamu lalonai, dahaka ese baine duruda diba eda helaro baita hagoadaia totona? (Iak. 5:7) Iehova, helaro e henida Diravana, dekedekenai baita noho. Baibul na e gwa eda helaro baita hagoadaia totona, namona na baita abidadama Iehova na e maurimu bona “ia e tahuamu taudia davadia namodia baine henidia.” (Heb. 11:​1, 6) Bema baita abia daemu Iehova na e nohomu, baita diba momokanimu ia ese ena gwauhamata iboudiai na be haḡuḡurudiamu. Eda helaro baita hagoadaia totona, namona na Iehova baita ḡuriḡuri henia, bona ena Hereva baita duahia. Ena be Iehova na asita itaiamu, to ia na baita raka henia kahi diba. Eda ḡuriḡuri ai ia baita hereva henia diba, dibada ia ese ita na be kamonai henidamu.—Ier. 29:​11, 12. w22.10 rau 26-27 par. 11-13

Mani ina a laloa. Iobu na kahu ai helai, hisihisi bada herea e animu. (Iobu 2:8) Turana ese e gwau heniamu bona ladana e hadikaiamu. E davari hahetohodia na vaitani nadi metaudia na heto ia latanai, a natuna e haboioa hisihisina be vaitani ḡau ta ese kudouna bema gwadaia bamona. Matamanai Iobu na ḡau ta se gwauraia. (Iobu 2:13) Bema Iobu turana na Iobu ḡau ta se gwauraia dainai bae laloa ia na da e uramu Dirava baine rakatania, edia lalohadai na kerere. Bamona koikoidia ese e hereva heniava lalonai, reana Iobu na e gaga isi bena idia e hamaorodia eto: “Harihari ela bona baina mase, egu lalo-maoromaoro basina negea!” (Iobu 27:5) Dahaka ese Iobu e durua baine boga auka bona baine goada, ena be e hisihisi bada herea? Ena be unu hahetoho ese e hametaua bada herea, to e abia dae momokani ia e lalokau heniamu Diravana ese ia na baine durua. Mai dibana ena be baine mase, to Iehova ese baine hatorea isi lou.—Iobu 14:​13-15. w22.06 rau 22 par. 9

Ita na hahenamo hereadaena ta e henida—una na guba bona tanobada e karadia Tauna baita ḡuriḡuri henia diba. Mani a laloa: Herevana edena nega ai eiava edena gado ai, to kudouda ai e miamu ḡaudia na Iehova baita hamaorolaia diba. Ta abia daemu hospele ai eiava dibura ruma ai, Tamada lalokauna ese eda ḡuriḡuri na be kamonaimu. Una hahenamo na basita laloa maraḡi. King David ese ḡuriḡuri karana ena hahenamo na e laloa bada. Iehova dainai ane e abi neganai eto: “Egu ḡuriḡuri na muramura mai bonana ai bainela oi vairamu ai.” (Sal. 141:​1, 2) David ena negai, tomadiho momokanina totona hahelaḡa taudia ese e ḡaukaralaiava muramura helaḡana na e heḡaeḡaelaiava neganai, una muramura na e karaia namonamova. (Eso. 30:​34, 35) David ese muramura mai bonana e herevalaia neganai, e hahedinaraia ia na e ura Tamana gubai e nohomu baine ḡuriḡuri henia neganai, ena hereva na baine lalodia namonamo. Ita danu ta uramu unu baita kara toma. Ta uramu eda ḡuriḡuri ese Iehova baine hamoalea. w22.07 rau 20 par. 1-2; rau 21 par. 4

Dika davana iheni louna na Iehova sibona ese baine karaia ḡauna. Iehova ese maoro na se henida e hahisidamu tauna ena dika davana baita haloua. (Roma 12:​20, 21) Ita na dia ḡoevadae dainai, hahemaoro maoromaoro na basita karaia dibamu, Dirava e karamu heḡereḡerena. (Heb. 4:13) Bona nega haida, eda hemami ese eda hahemaoro karana na baine hadikaia diba. Iehova ena lauma helaḡa ena heduru amo Iakobo ese ina hereva e torea: “Taunimanima edia badu ese Dirava ena kara maoromaoro se havaraiamu.” (Iak. 1:20) Baita abia dae diba Iehova ese kara maorona bona hahemaoro maoromaorona baine karaia diba. Kara dika igwautaona karana ese be hahedinaraiamu, Iehova ena hahemaoro karana na ta abidadama heniamu. Hekwakwanai na Iehova imanai baita atoa karana ese e hahedinaraiamu, ta abia daemu Iehova ese e vara kereredia iboudiai baine hamaoromaorodia diba. Ia ese e gwauhamatalaia tanobada matamatana lalonai, hemami e hadikamu ḡaudia iboudiai na “basie lalodia tao bona basie lalodia une” ela bona hanaihanai.—Isa. 65:17. w22.06 rau 10-11 par. 11-12

Unu be inai henida tomamu karana ese e hamomokaniamu Iehova ese ita na e lalonamo henidamu. (Mat. 5:​11, 12) Unu daḡedaḡe karadia na Diabolo ena amo e maimu. To, Iesu ena siahu ese Satana ena siahu na e hereaia! Iesu ena heduru dainai, sivarai namona na bese idauidau taudia ese e kamonaiamu. Mani hahemomokani ḡaudia haida aita herevalai. Basileia sivaraina ta harorolaiamu lalonai, ta davariamu hekwakwanaina ma ta na, gado na idauidau. Iesu ese matahanai ai aposetolo Ioane e hamaoroa, gado idauidau ai sivarai namona baita harorolaia diba. (Apok. 14:​6, 7) Edena dalai? Dala ta karamu taunimanima momo herea baita durudia Basileia sivaraina bae kamonaia. Hari ina negai, tanobada heḡeḡemadai taunimanima ese Baibul e herevalaiamu pablikeisin-dia na eda jw.org websait ai bae duahi diba, badina una websait na gado 1,000 mai kahana ai e hahanaia! Gwaumaoro na de heni Mauri Ba Moalelaia Hanaihanai! bukana, una na eda hahediba ḡaukarana ai baita ḡaukaralaiamu stadi bukana, bae hahanaia bona gado 700 mai kahana ai vada e hahanaia! w22.07 rau 9 par. 6-7

Iesu ese taunimanima na e bogadia hisiva. Aposetolo Mataio na e gwa: “Aru taudia e itadia e bogadia hisi, badina be taudia e boera, bona e karoho, mamoe asi ireḡudia na heheto.” (Mat. 9:36) Bona Iehova ena hemami be ede bamona? Iesu na e gwa: “Unuhetomana, Tamamui guba ai e nohomu na se uramu ini memero-memero ta baine mase.” (Mat. 18:14) Una ese kudouda na e hamoalea badamu! Iesu baita dibaia namonamomu neganai, eda lalokau Iehova enai na be badamu. Danu, emu lalokau na be bada be laomu bona lo Kristen tauna ai bo lao dibamu, bema emu kongrigeisin ai lo Kristen taudia bo bamodiamu bona bo dibadiamu. Idia na e moale badamu. Asie lalohisihisimu Iehova e hesiai heniamu dainai. Ba nanadaidia Iehova ena hesiai ḡaukara lalona e davari ekspiriens haida bae gwaurai. Bema mai anina bada abi hidina ta o uramu ba karaia, edia amo heduru herevadia ba noi diba. Ba helalotao, “hahealo taudia bema hoho, taunimanima edia noho baine namo.” w22.08 rau 3 par. 6-7

Ita iboudai ese hahetoho na baita davarimu. To, dia siboda ese unu hahetoho baita vaira henimu. Tama lalokauna ta heḡereḡerena, Iehova ese nega iboudiai e itada-taomu. Ia na ita badidai, noho heḡaeḡae eda heduru noinoidia baine kamonai bona e ura badamu baine duruda. (Isa. 43:2) Ta diba momokanimu hahetoho na baita haheaukalai diba badina iduruda ḡaudia na momo herea e henidamu. Ia ese ḡuriḡuri karana ena hahenamo, Baibul, lauma aniani momo herea, bona lalokau tadikaka oreana e heni nega aukadiai bae duruda totona. Ta moale badamu badina Tamada guba ai e nohomu ese ita na e itada-taomu! “Oibe, ita laloda ese ia e moalelaiamu.” (Sal. 33:21) Iehova ena lalokau dainai baita tenkiu henia diba, bema ita iduruda totona e heni heduru ḡaudia iboudiai baita ḡaukaralaidia. Danu, baita hekwarahi Dirava ena henari henunai baita noho. Eiava baita gwa diba, bema baita hekwarahimu dounu Iehova baita kamonai henia bona dala maorona baita badinaia, ia ese ita na be itada-tao hanaihanaimu! w22.08 rau 13 par. 15-16

Hari ina negai momo na asi dibadia daidia bae abidadama henidia. Idia na e daradaramu bema politikol, saiens bona bisnes taudia ese idia be e lalodiamu eiava lasi. Danu, idia ese Kristendom dubu igunalaina taudia na asie matauraidiamu. Una dainai, idia ese Baibul—unu dubu igunalaina taudia e gwaumu e badinaiamu bukana—na asie abia daemu. Ita na Iehova ena hesiai taudia dainai, ta abia daemu Iehova na “kara momokani Diravana” bona hanaihanai iseda namo e lalomu. (Sal. 31:​5, NWT; Isa. 48:17) Ta dibamu Baibul ai ta duahimu herevadia na baita abidadama henidia diba. Baibul mai dibana momo tauna ta na e gwa: “Dirava ena hereva na se koikoimu eiava ena hereva iboudiai na e ḡuḡurumu. Dirava ena taunimanima ese iena hereva na e abi daemu, badina idia ese unu hereva e gwaurai Diravana na e abidadama heniamu.” w23.01 rau 2 par. 1-2

Tadikaka taihu edia abidadama Iehova enai ta hagoadaiamu neganai, una ese idia na e durudia badamu. Idia haida na dia Witnes taudia ese e kirikirilaidiamu. Haida be gorere badadia eiava ma haida edia kara bona hereva daidiai lalodia na e hisihisimu. A ma haida be nega daudau lalonai ina tanobada oromana dokona ena ore e nariamu. Unu ḡau idauidau ese hari ina negai Kristen taudia edia abidadama na baine tohoa diba. Kristen ginigunadia danu hekwakwanai unu bamodia e davari. Aposetolo Paulo ese Toretore Helaḡadia e ḡaukaralai ena tadikaka taihu edia abidadama baine hagoadaia totona. Heḡereḡere, Iuda taudia haida, dia Kristen taudia na e hegwau heniva e gwauva Iuda tomadihona ese Kristen tomadihona na e hereaia dainai, Iuda Kristen taudia na asi dibadia idia be ede bae haere henidia toma. Una dainai, ta dibamu Paulo ena revareva ese Heberu Kristen taudia na e hagoadadia bada. (Heb. 1:​5, 6; 2:​2, 3; 9:​24, 25) Paulo ena hereva ese idia na bema durudia diba edia ruma bese taudia, dia Kristen taudia bae haere henidia totona. w22.08 rau 23-24 par. 12-14

Satana ena tanobada ai, taunimanima na asi dibadia daidia be bae abidadama henidia diba. Idia ese bisnes taudia, politikol taudia, bona tomadiho igunalaina taudia edia kara na asie moalelaimu. Danu idia ese turadia, dekedia taudia, bona edia ruma taudia edia kara na asie moalelaimu. Una basita hoalaia be namo. Badina Baibul e peroveta: “Dina gabedia ai . . . , taunimanima na . . . ma haida basie badinadia; . . . ma haida ladadia bae hadika; . . . turadia edia mauri ihadikadia daladia bae kara.” Eiava baita gwa diba, taunimanima na ina tanobada ena dirava, Satana, ena kara bae tohotoho—taunimanima ta ese Satana na basie abidadama henia dibamu. (2 Tim. 3:​1-4, NWT; 2 Kor. 4:4) To, ita be Kristen tauda bona dibada Iehova na baita abidadama henia diba. Ta dibamu ia ese ita na e lalokau henidamu bona ia ese turana na basine “rakatanidia.” (Sal. 9:10) Ita ese danu Keriso Iesu na baita abidadama henia diba badina ia na ita daidai ena mauri e heni. (1 Pet. 3:18) Bona iseda mauri ai e vara ḡaudia amo ta dibaia, Baibul ese baine hakauda namonamo diba.—2 Tim. 3:​16, 17. w22.09 rau 2 par.1-2

Moale korikorina na dia ta abiamu bena e ore haragamu hemamina. To ia na taunimanima ta ena mauri ibounai lalonai baine abia moalena. Edena dalai? Iesu na ena Ororo Harorona ai una e herevalaia, eto: “Dirava idibana totona e hitolomu taudia na e moalemu.” (Mat. 5:3; NWT) Iesu na mai dibana taunimanima ediai Ihavaradia Tauna, Iehova Dirava bae dibaia bona bae tomadiho henia urana na mia. Bona Iehova na “moale Diravana” dainai, ia e tomadiho heniamu taudia danu bae moale diba. (1 Tim. 1:11; NWT) O laloamu ita be nega namodia ai mo baita moalemu, a? Lasi. Iesu ena Ororo Harorona ai e hahedinaraia “taitai taudia” na bae moale diba. Iesu na ‘kara maoromaoro daidiai e daḡedaḡe henidiamu taudia’ ediai danu una hereva tamona e gwauraia. (Mat. 5:​4, 10, 11) Iesu ese ita na e hadibadamu dia mauri lalonai ta abimu ḡau namodia amo moale korikori baita davariamu, to Dirava idibana bona ia ihetura henina karana amo una baita davariamu.—Iak. 4:8. w22.10 rau 6 par. 1-3

Kristen tauna mai aonegana ese ina sisiba na e badinaiamu: “Asi reḡereḡeda baita noho na mai negana, baita herevahereva na mai negana.” (Koh. 3:7) Momo na ina nao gado herevana mai dibadia: “Speech is silver, but silence is golden.” Una anina binai, nega haida ai be baita hereva, a nega haida ai be basita hereva. Haheitalai ta aita laloa. Nega momo elda ta na tadikaka ese e boiriamu, baela kongrigeisin ma haida baine durudia, edia hekwakwanai baine hamaoromaorodia. Elda ma ta ese una elda na ini e herevalaia toma: “Ia na hanaihanai nahuana e tohoamu, kongrigeisin haida edia hekwakwanai na se sivarailaimu.” Una elda ena aonega karana dainai, iena kongrigeisin elda oreana ese e matauraiamu. Idia dibadia momokani, ia ese ma haida edia hehuni ḡaudia na idia vairadiai basine sivarailaidiamu. Baita heabidadama heheni totona, kara momokani na mai anina bada danu. Kara momokani tauna na baita abidadama henia dibamu, badina dibada ia na nega iboudiai hereva momokani be gwauraimu.—Efe. 4:25; Heb. 13:18. w22.09 rau 12 par. 14-15

“Aonega na ariara ai e boi lolomu” neganai, momo na asie uramu bae kamonai. (Her. 1:20) Baibul ese e hahedinaraiamu, aonega e dadaraiamu taudia edia orea na toi: ‘Asi aonegadia (o mata-lahui) taudia,’ “ḡonaḡona taudia,” bona “kavakava taudia.” (Her. 1:​22-25) ‘Asi aonegadia (o mata-lahui) taudia’ na, hereva iboudiai e abi dae haraḡamu eiava ikoidia na haraḡa. (Her. 14:15) Heḡereḡere, mani a laloa, taunimanima milioni momo na tomadiho eiava politikol igunalaidia taudia ese e hakaudia kereremu. Haida na e dibamu unu hegunalai taudia ese e koidia neganai, e badu dikadikamu. To, Hereva Lada-isidia 1:22 ai e gwauraidia taudia na e uramu asi aonegadia taudia heḡereḡeredia bae noho, badina una dala na e uramu dounu bae badinaia. (Ier. 5:31) Idia na asie uramu Baibul ena hereva bae dibaia eiava Baibul ena taravatu bae badinaia. Asita uramu mai lalodia idoidiai ida dala kereredia e badinamu taudia baita tohotohodia!—Her. 1:32; 27:12. w22.10 rau 19 par. 5-7

Dirava ena orea ese hahediba herevadia e henimu, dika basita davari totona. Hanaihanai e hahelaloda taomu eda fon namba na elda taudia baita henidia, unu amo dika negadiai bae rini henida diba. Danu be hadibadamu edena gabu ai baita noho, o gabu baita rakatania, heduru ḡaudia ma haida baita abi, o edena dala ai bona edena nega ai haida baita durudia. Bema unu hahediba herevadia basita badinamu, iseda mauri bona elda taudia edia mauri na dika ai baita atoa diba. Unu tadikaka na ita e gimadamu. (Heb. 13:17) Disasta, o heiriheiri karadia daidiai edia gabu e rakatani tadikaka taihu momo na, e ḡaukara goada edia noho dalana matamatana e badinaia, bona maoromaoro tiokratik ḡaukaradia e kara. Daḡedaḡe karadia daidiai e heau Kristen ginigunadia heḡereḡeredia, idia ese “sivarai namo” na gabu idauidau ai e harorolaiamu. (Apos. 8:4) Haroro ḡaukara ese e durudia Basileia bae laloa bada, dia edia hekwakwanai. Una dainai, e moale bona e lalomaino. w22.12 rau 19 par. 12-13

Iehova ese ita ta ta na e laloda badamu. Iesu ese ena aposetolo na haroro totona do se siaidia neganai, e hagoadadia taunimanima garidia basie gari. (Mat. 10:​29-31) Ia ese bisini e herevalaia, una na Israel ai momo mai dibadia manuna ta. Iesu ena negai momo ese unu manu na asie lalodia badava. To Iesu eto: “Idia ta tano ai basine moru, Tamamui na basine ura negana ai.” Ma eto: “Umui ese bisini diaḡau o hereadiamu.” Unu hereva amo Iesu na ena hahediba e hagoadadia, Iehova ese idia ta ta na e lalodia badamu, una dainai taunimanima garidia basie gari. Hahediba na taoni bona hanua ai e harorova lalonai bisini e itadiava neganai, Iesu ena hereva e laloava. Oi danu manu maraḡina ta o itaiamu neganai, ba lalotao Iehova ese oi na e lalomu badamu badina oi “ese bisini diaḡau o hereadiamu.” Ia ese be durumumu dainai, e inai henimumu taudia garidia na basio gari. w23.03 rau 18 par. 12

Nega haida, ruma bese ese e inai henidamu eiava moni ḡaukara ta haboiomu. Ta davarimu hekwakwanaidia na nega daudau lalonai ta haheaukalaimu neganai, reana baita laloamu dala ta na lasi bona baita lalo metaumu. Satana na nega unu bamodia e ḡaukaralaimu, e uramu ita ese Iehova ena lalokau ita edai baita daradaralaia. Diabolo na e uramu baita laloa Iehova o Iena orea ese eda hisihisi e havaramu. Aigupto ai Israel taudia haida na lalohadai unu bamona e abia. Matamanai idia na e abia dae Iehova ese Mose bona Aaron e abidia hidi, Aigupto ena iḡui amo idia bae ruhadia. (Eso. 4:​29-31) To gabeai, Farao ese edia mauri e ha-aukaia neganai, edia hekwakwanai dainai gwau na Mose bona Aaron e henidia. (Eso. 5:​19, 20) Idia ese gwau na Dirava ena hesiai taudia e henidia. Una na dia namo, ani? Bema o davari hekwakwanaidia na nega daudau lalonai o haheaukalaidia, kudoumui ai e miamu ḡaudia na Iehova enai ba ḡuriḡurilai, bona ia enai ba tabekau. w22.11 rau 15 par. 5-6

Iehova na Mauri Ihenina Diravana bona mai ena siahu mase taudia baine hamauridia lou. Ia ese peroveta tauna Elia na siahu e henia Sarefata ai vabu ta natuna merona e hatorea isi lou. (1 Han. 17:​21-23) Gabeai, Iehova ena heduru dainai, peroveta tauna Elisaia ese Suneme hahinena ta natuna merona e hatorea isi lou. (2 Han. 4:​18-20, 34-37) Unu tore isi lou bona tore isi lou ma haida ese e hamomokanimu, Iehova na mai ena siahu mase taudia baine hatoredia isi lou. Iesu na tanobada ai e nohova neganai, e hamomokania Tamana ese una siahu na ia e henia. (Ioa. 11:​23-25, 43, 44) Hari, Iesu na guba ai bona Dirava ese “siahu idoinai guba ai bona tanobada ai vada” e henia. Una dainai, ia ese ina gwauhamata baine haḡuḡurua diba, “gara ai e nohomu taudia iboudiai” baine hatoredia isi lou bona bae mauri hanaihanai.—Mat. 28:18; Ioa. 5:​26-29. w22.12 rau 5 par. 10

Taunimanima ese Esekiel e dadaraia neganai, Iehova danu e dadaraia. Hari dina ena siri herevadia ese Esekiel na e hagoadaia ia na dia peroveta tauna dikana, ena be taunimanima ese e dadaraia. Danu, Iehova ese Esekiel e hagoadaia baine harorolai hahemaoro herevadia bae ḡuḡuru neganai, taunimanima na bae diba “peroveta tauna ta na idia bogaraḡidiai vada ema.” (Esek. 2:5; 33:33) Ta dibamu unu hereva ese Esekiel e hagoadaia ena hesiai ḡaukara baine karaia. Ita danu ta dibamu Iehova ese e siaida baita haroro dainai, una ese ita na e hagoadadamu. Ia ese e laloda badamu badina e gwauraidamu ena ‘hereva ihamomokanidia taudia’ o witnes taudia. (Isa. 43:10) Una na hahenamo hereadaena! Iehova ese Esekiel e hamaoroa: “Basio gari.” (Esek. 2:6) Una heḡereḡerena ita e hamaorodamu: “Asio gari.” Dahaka dainai e daḡedaḡe henidamu taudia garidia basita gari? Badina Esekiel heḡereḡerena, ita na Iehova ese e siaida bona e durudamu.—Isa. 44:8. w22.11 rau 3-4 par. 4-5

Hari ina negai, kongrigeisin elda taudia bona hesiai taudia na ta abidadama henidiamu. Unu tadikaka ese e narida namo hereamu dainai, Iehova baita tenkiu henia! Haida ese bae abidadama henida totona, dahaka ma baita kara be namo? Iseda tadikaka bona taihu na ta lalokau henidiamu, bona ta uramu edia noho daladia baita diba. To, namona na edia hehuni herevadia na ma haida ediai basita herevalai. Aposetolo edia negai, Kristen kongrigeisin ai, haida na ‘e udu mauriva, ma haida edia mauri lalodiai e varava ḡaudia e herevalaiva, bona basie herevalai ḡaudia e herevalaiva.’ (1 Tim. 5:​13, NWT) Asita uramu idia baita tohotohodia. To, bema ta ese hehuni herevana ta baine hamaorolaida, bona baine noida ma ta enai basita herevalaia be ede bamona? Haheitalai binai: Reana taihu ta ese ena gorere eiava hekwakwanai ma ta na ita edai be herevalaiamu, bona be noidamu ma ta enai basita herevalaia. Iena ura o noinoi baita matauraia be namo. w22.09 rau 10 par. 7-8

Grik gado herevana e hahanaia “lalomui ba hamatamata” anina na lalomui ba haḡoeva. Una dainai, eda mauri ai kara namodia haida mo baita kara na dia heḡereḡere. To, namona na eda lalohadai bona kara baita haerodia namonamo, unu amo baita diba ededia be baita haidaudia, Iehova ena taravatu heḡereḡerena baita mauri totona. Una na baita karaia hanaihanai ḡauna. Ita baita ḡoevadaemu neganai, baita karamu ḡaudia iboudiai lalodiai Iehova baita hamoaleamu. To hari, namona na baita hekwarahi Iehova baita hamoalea. Roma 12:2 ai, Paulo ese laloda baita hamatamata bona Dirava ena ura baita diba na e gwauraidia hebou. Ina nega oromana ese eda lalohadai basine biagua totona, ḡau ginigunana na siboda baita heseke, iseda ura bona ta abi hidimu ḡaudia be Dirava ena lalohadai heḡereḡerena eiava lasi. w23.01 rau 8-9 par. 3-4

Iehova ese edai e varamu ḡaudia iboudiai e hamaoromaoromu o e koumu, a? Ia ese eda mauri ai e varamu ḡaudia iboudiai e biagumu, a? Lasi. Baibul na unu se gwau toma. (Koh. 8:9; 9:11) To, ina ta dibamu: Hahetoho ta davarimu neganai, Iehova na mai dibana bona ena heduru totona ta noiamu neganai e hakala henidamu. (Sal. 34:15; Isa. 59:1) Dia una mo, Iehova ese baine duruda diba hekwakwanai baita haheaukalaidia. Edena dala ai? Iehova ese ita e durudamu dalana ta na, nega korikori ai tauhalo bona hahegoada e henidamu. (2 Kor. 1:​3, 4) Emu mauri lalonai Iehova ese nega korikori ai oi e hagoadamu negana ta o laloamu, a? Nega momo hekwakwanai ta hanaiamu murinai, Iehova ese e duruda dalana ta lalopararalaiamu. w23.01 rau 17-18 par. 13-15

Ina animal mai daḡedaḡena toana na taina kwarana hitu animal mai daḡedaḡena toana heḡereḡerena, to ia na animal kakakakana. Baibul na e gwa, ia na “una daḡedaḡe ḡauna [“animal mai daḡedaḡena,” NWT] laulauna” bona pavapava “ihataura-hanina.” (Apok. 13:​14, 15; 17:​3, 8) Ioane na e gwa, ina pavapava na guna “e nohova, ma lasihia,” bona gabeai “ma bainema.” Una na United Nations oreana e laulaulaia ḡoevaḡoeva, ia ese tanobada ena politikol oreadia iboudiai e durudiamu! Guna ladana na League of Nations. Bena Tanobada Tuarina Iharuana ai, ena ḡaukara na e ore. Gabeai una orea e hedinarai lou neganai, e gwauraia United Nations. Unu animal mai daḡedaḡedia o gavamani na lalo veri hereva koikoidia amo taunimanima e hagoadadiamu, Iehova bona ena taunimanima bae inai henidia. Laulau dalanai, idia ese “tanobada idoinai hanua hanua pavapavadia” e haboudiamu Aramagedono tuarina o “siahu idoinai Diravana ena dina badana tuarina” totona.—Apok. 16:​13, 14, 16. w22.05 rau 10 par. 10-11

Iesu na Toretore Helaḡadia iduahina karana e dibaia neganai, ia na dia Toretore Helaḡadia mo e diba to e ura henidia bona e badinadia danu. Heḡereḡere, Iesu laḡanina 12 neganai dubu helaḡa ai e vara ḡauna mani a laloa. Mose ena Taravatu mai dibadia namonamo hahediba taudia ese Iesu ena “lalo-parara bona ena haere e hoalai.” (Luka 2:​46, 47, 52) Ita danu hanaihanai Baibul baita duahiamu neganai, Dirava ena hereva baita dibamu bona baita ura heniamu. Iesu ese Taravatu mai dibadia taudia, itorena taudia, Farisea taudia, bona Sadukea taudia danu, e herevalai henidia ḡaudia amo ḡau haida baita dibamu. Idia na nega momo Toretore Helaḡadia e duahiva, to asie badinava. Unu tatau ese asie kara ḡaudia toi na Iesu ese e herevalai. Ena hereva ese be durudamu Baibul iduahina karana baita hanamoa, unu amo (1) ta duahiamu ḡauna baita lalopararalaia, (2) hereva momokanidia baita dibadia, bona (3) eda mauri baita haidaua. w23.02 rau 8-9 par. 2-3

Namona na heḡahusi herevadia o karadia, inuinu kekero, aniani momo, haida ihadikadia herevadia, daḡedaḡe moale karadia, bona ponografi i’itadia karana, bona ḡau unu bamodia baita dadarai. (Sal. 101:3) Diabolo na hanaihanai dala e tahumu, eda hetura karana Iehova ida baine hadikaia totona. (1 Pet. 5:8) Bema basita gimamu, Satana ese mama, koikoi, mataḡaniḡani, inai karana, hekokoroku, bona badu na darada bona kudouda ai be hadomu. (Gal. 5:​19-21) To bema basita kokidia haraḡamu, poisin avana ta bamona be tubumu bona dika be havaraiamu. (Iak. 1:​14, 15) Ita baine hadikada ḡauna ta na hebamo dikadia. To baita helalotao hebamo dikadia ese eda kara namodia bae hadika diba. (1 Kor. 15:33) Iesu ena hereva heḡereḡerena, bema siboda nahuada baita tohomu, Iehova ena taravatu asie badinamu taudia ibamodia karana baita dadaraiamu. (Luka 21:34; 2 Kor. 6:15) Oibe, ita baine hadikada ḡauna na baita itaiamu bona baita dadaraiamu. w23.02 rau 16 par. 7; rau 17 par. 10-11

Iehova o dibaia namonamo dainai emu lalokau ia enai na e badamu. Momokani, o uramu ia ba hetura henia hanaihanai. Bona una na bo karaia dibamu. Ia ese e hagoadamumu, ia kudouna ba hamoalea. (Her. 23:​15, 16) Una na emu hereva bona kara amo ba hahedinaraia. Unu bo kara tomamu neganai, bo hahedinaraiamu oi na Iehova o lalokau henia momokanimu. Una na emu mauri lalonai ba karaia ḡauna hereadaena. Emu lalokau Iehova enai be ede ba hahedinaraia toma? Ginigunana na, ḡuriḡuri amo emu mauri na Dirava momokanina tamona enai ba gwauhamatalaia. (Sal. 40:8) Bena, una gwauhamata ihamomokanina totona ba bapatiso. Emu bapatiso na mai anina bada bona mai moalena. Oiemu mauri na dia oi sibomu, to Iehova totona ba ḡaukaralaia. (Roma 14:8; 1 Pet. 4:​1, 2) Una na abi hidi badana. To una ese dala e kehoamu mauri namona ba moalelaia. w23.03 rau 5-6 par. 14-15