O Helalotaomu, A?
Gima Kohorona matamatadia o duahidia namonamomu, a? Mani ini henanadai ba haerelaidia:
Idau tano ai e ha nohomu tama sina ese lauma dalanai natudia bae durudia totona, dahaka dainai gado ma ta idibana karana bae laloa na namo?
Natu ese idau tano gadona na sikuli ai o haida edia amo be dibamu. Gado rua idibadia karana ese natu na baine durua diba. Namona na tama sina ese bae haeroa bema natudia na edia gado korikori ai eiava idau tano gadona ai hereva momokani e lalopararalaia namonamomu bona lauma dalanai e goadamu eiava lasi. Kristen tama sina na sibodia edia namo asie lalomu to natudia edia lauma dalana e laloa badamu.—w17.05, rau 9-11.
Iesu ese Petro e nanadaia: “Idia ese e lalokau henigu maraḡimu, to oi ese o lalokau henigu badamu, a?” Ina hereva “Idia,” anina be dahaka? (Ioa. 21:15)
Toana na Iesu ese badidiai gwarume heatodia eiava haoda ḡaukarana e herevalaia. Iesu e mase murinai, Petro na ena haoda ḡaukarana e lou henia. Kristen taudia ese moni ḡaukara ai lalohadai maorona bae abia na namo.—w17.05, rau 22-23.
Bema Kristen tauna ta na e uramu sibona baine hegima totona ipidi ta baine dogoatao, ededia hahekau herevadia baine lalo na namo?
Haida bini: Dirava matanai mauri na helaḡa. Iesu ese ena hahediba taudia na se hamaorodia dare bae abi sibodia bae hegima totona. (Luka 22:36, 38) Eda dare na ruarua isivadia ai baita halaomu. Mauri na mai anina bada, dia kohu. Ma haida lalodia mamina baita matauraia, bona haheitalai namona baita hahedinaraia. (2 Kor. 4:2)—w17.07, rau 31-32.
Dahaka dainai Mataio ese Iesu ena mauri sivaraina e herevalaia dalana na Luka ena amo idau?
Mataio bukana ese Iosef enai e vara ḡaudia e sivarailai, heḡereḡere Iosef na Maria e rogorogo neganai e daradara, bona Dirava ena hereva dainai Aigupto ela bena gabeai ma e lou. Luka bukana ese Maria e sivarailaia momo; heḡereḡere Elisabeta e vadivadia bona Iesu maraḡina ai dubu helaḡa ela neganai Maria e kara ḡaudia e sivarailai.—w17.08, rau 32.
Dahaka ḡau haida daidiai Dirava ena Hereva na e gini hanaihanai?
Nega e laomu lalonai, gado na e idaumu dainai Baibul ihahanaina ai e ḡaukaralaimu gadodia danu e idaumu. Gavamani e idaumu dainai, momo ese e herevalaiamu gadona danu e idaumu. Momo ese Baibul ihahanaina ḡaukarana e koua toho.—w17.09, rau 19-21.
Lalokau hereadaena be dahaka?
Baibul ena hahekau herevadia ibadinadia karana amo e varamu lalokauna (a·gaʹpe) na lalokau hereadaena. Una lalokau dainai haida baita ura henidiamu bona baita kara namo henidiamu. To una lalokau ta hahedinaraiamu badina korikorina na haida edia namo ta lalo gunamu.—w17.10, rau 7.