Mauri Bona Hesiai Ḡaukara Hebou Pepana Ena Refrens
MAY 2-8
DIRAVA ENA HEREVA ENA NAMO | 1 SAMUEL 27-29
“David Na Ena Tuari ai Aonega E Ḡaukaralaia”
it-1 rau 41
Akisi
David na nega rua Saulo ena amo e heau neganai King Akisi ese e lohiaiava gabuna ai e nohova. Nega ginigunana na, Akisi ena hesiai taudia na e laloava ia na idia inaidia neganai, David na kava tauna heḡereḡerena e kara, una dainai Akisi ese e rakatania. (1Sa 21:10-15; Sa 34:Sup; 56:Sup; NWT) Nega iharuana na, David na ena tuari tataudia 600 bona edia ruma bese ida ela, bona Akisi ese Siklag hanuana e henidia bae noholaia. Laḡani ta hua hani unuseniai e nohova neganai, Akisi na e abia daeva David bona ena tuari oreana ese Iudea hanuadia e tuari henidiava, to David mai ena tuari oreana na Gesuru taudia, Girisi taudia, bona Amalek taudia e tuari henidiava bona edia kohu e abiva. (1Sa 27:1-12) Akisi ese una koikoi karana na e abia dae dainai, Filistia taudia ese King Saulo bae tuari henia neganai, Akisi ese David na ia igimana tauna ai e halaoa, to una neganai, Filistia “lohiadia” edia hereva dainai, David bona ena tatau na e siaidia lou Siklag. (1Sa 28:2; 29:1-11) David na king ai ela bona Gata hanuana e tuari henia neganai, Akisi na se hamasea. Ia na e mauri ela bona Solomon ena lohia negana.—1Han 2:39-41; GATH ba itaia.
Eregabe Memeromui E, Edena Dalai Ma Haida ese Bae Abidadama Henimui?
8 David ese e abia hekwakwanai ma ta mani a laloa. Ena be David na e horoa pavapava ai bainela, to ia na e nari laḡani momo muridiai Iuda pavapavana ai ela. (1 Sam. 16:13; 2 Sam. 2:3, 4) E nariva lalonai, dahaka ese David e durua baine nari mai ena haheauka ida? Ia na se lalometau, to baine kara diba ḡaudia e kara. Heḡereḡere, Filistia edia gabu ai e noho loava neganai, David ese ena nega na e ḡaukaralaia, Israel inaidia e tuari henidia. Unu amo, ia ese Iuda ena tano hetoadia e gimadia.—1 Sam. 27:1-12.
it-2 rau 245 par. 6
Koikoi
Baibul ese koikoi karana na e taravatua, to una anina na dia ita ese asi edia maoro bae kamonai taudia ediai hereva iboudiai baita gwaurai. Iesu Keriso na e sisiba, eto: “Helaḡa ḡaudia na sisia basio henidia, bona emui aḡeva mai hairaidia na boroma vairadiai basio nege, aedia amo bae moi tao bena bae mede kerehai bae doamui na garina.” (Mt 7:6) Una dainai Iesu na nega haida sivarai ibounai se gwauraiava eiava henanadai haida haeredia na se heniva ena be unu be kara tomamu neganai dika be varamu. (Mt 15:1-6; 21:23-27; Ioa 7:3-10) Abraham, Isaak, Rahaba, bona Elisaia na unu e kara toma, idia ese Iehova asie tomadiho heniava taudia ediai sivarai korikorina ibounai na asie gwauraia hedinaraiva.—Ge 12:10-19; karoa 20; 26:1-10; Ios 2:1-6; Iak 2:25; 2Han 6:11-23.
Dirava Ena Hereva Ba Tahua Namonamo
w10 1/1 rau 20 par. 5-6
Mase Taudia ese Mauri Taudia Bae Durudia Diba, A?
Mani a laloa. Baibul na e gwaumu ta e masemu neganai ia na “tano e lou heniamu” bona “ena lalo-hadai e oremu.” (Salamo 146:4) Saulo bona Samuel na mai dibadia Dirava ese babalau taudia ihereva henidia karana na e taravatua. Una dainai, matamanai Saulo ese babalau karadia e karava taudia na Israel tanona amo e luludia!—Levitiko 19:31.
Mani ina a laloa, bema abidadama tauna Samuel na lauma tauna ta dainai dounu bema mauri, ia ese Dirava ena taravatu bema utua bena babalau tauna ena amo Saulo bema hereva henia, a? Iehova na se ura Saulo ida baine herevahereva. Anina be, babalau tauna ta ese Siahu Idoinai Diravana e doria mase tauna Samuel amo Saulo ida baine herevahereva, a? Lasi. E hahedinaraia ḡoevaḡoevamu, ina “Samuel” na dia Dirava ena abidadama peroveta tauna. To ia na lauma tauna ta—demoni dikana e koikoi mase tauna Samuel ai e hahelao.
MAY 9-15
DIRAVA ENA HEREVA ENA NAMO | 1 SAMUEL 30-31
“Iehova Emu Dirava Enai Goada Bavabi”
w06 8/1 rau 28 par. 12
Iehova Garina Ba Gari—Ba Moale!
12 David na Iehova e gari heniava dainai kara dika e dadarai, to dia una mo. Iehova igari henina karana ese e hagoadaia hekwakwanai negadiai mai ena aonega ida abi hidi maorodia e kara. Laḡani ta hua hani lalodiai, David bona ena tatau na Saulo ena amo e heau bona Filistia taudia edia hanua Siklag ai e nohova. (1 Samuel 27:5-7) Nega ta David bona ena tatau lasihidia ai, Amalek tuari oreana na ema edia hanua e gabua, ha’hine, natudia, bona edia animal seridia e abidia mauri. David bona ena tatau e lou bona e vara ḡaudia e ita neganai, e tai dikadika. David ena tatau na e lalohisihisi dainai, eto David na nadi amo bae hodoa. Ena be David lalona na e hisihisi bada, to se lalomanoka. (Hereva Lada-isidia 24:10) Dirava igari henina karana ese e hagoadaia dainai, Iehova ena heduru e tahua, bona Ia “enai goada e abia.” Dirava ena heduru amo, David bona ena tatau ese Amalek taudia e hadareredia bona edia kohu iboudiai e abi lou.—1 Samuel 30:1-20.
w12 4/15 rau 30 par. 14
Iehova ese E Gimadamu Badina E Uramu Ita Baine Hamaurida
14 David na ena mauri lalonai hisihisi momo e davari. (1 Sam. 30:3-6) Iehova ena lauma helaḡa ena heduru amo e tore herevadia ese e hahedinarai Iehova ese ena hemami na e lalopararalaia. (Salamo 34:18; 56:8 ba duahi.) Dirava ese eda hemami danu e lalopararalaimu. Ta ‘lalohisihisimu’ eiava ta ‘dara-dokomu’ neganai, ia na ita dekedekedai. Una ese tauhalo e henidamu, David heḡereḡerena, ia na eto: “Lau baina moale, emu hebogahisi baina moalelaia; badina be egu hisihisi vada o itaia, egu hekwarahi vada o haeroa.” (Sal. 31:7) To Iehova na dia eda lalohisihisi mo e itaiamu. Ia ese e durudamu bona e hagoadadamu danu. Una e karaiamu dalana ta na, eda Kristen heboudia amo.
Dirava Ena Hereva Ba Tahua Namonamo
w05 3/15 rau 24 par. 8
Samuel Ginigunana Bukana Ena Hereva Badadia
30:23, 24. Ina abi hidi na Numera 31:27 ena hereva heḡereḡerena, bona una ese e hahedinaraiamu Iehova ese kongrigeisin e duruamu taudia na e lalodia badamu. Ena be dahaka ḡaukara baita kara, to namona na ‘eda kara iboudiai na baita kara balaheni, [Iehova] vairanai, dia taunimanima mo vairadiai.’—Kolose 3:23.
MAY 16-22
DIRAVA ENA HEREVA ENA NAMO | 2 SAMUEL 1-3
“David ese Saulo Bona Ionatan Daidiai E Abia Anena amo Dahaka Ta Dibamu?”
w00 6/15 rau 13 par. 9
Igunalaimui Totona E Abidia Hidi Taudia Ba Matauraidia
9 David na haida ese e kara auka henia neganai e lalometau, a? David ese Iehova e tai henia, eto: “Daḡedaḡe taudia ese egu mauri iabi-ohona e tahuamu.” (Salamo 54:3) Kudouna ai e miava ḡaudia na Iehova e hamaorolaia, eto: “Egu Dirava e, inaigu edia amo ba hamaurigu. . . . Daḡedaḡe taudia na lau ihadikagu totona e heboumu. Iehova e, dia lauegu kara dika eiava lauegu kara havara daidiai, idia ese e heaumu bona e heḡaeḡaemu. A noga, ikahagu aoma, a itaia!” (Salamo 59:1-4) Oi danu unu o hemami tomamu, ena be siahu tauna ta enai kerere ta so karaia to ia ese e kara auka henimu, a? David ese Saulo na dounu e matauraiava. Saulo e mase neganai, David na se moale, to ina lalohisihisi anena e torea: “Saulo bona Ionatan, mai lalokaudia bona mai raho-namodia, mauri ai. . . . Ugava edia haraḡa na e hereadia, leona edia goada na e hereadia. Israel hahinemui e, Saulo taina ba tai.” (2 Samuel 1:23, 24) Ena be Saulo ese David na e kara auka heniava to David na Iehova ese e abia hidi tauna e matauraia, una na haheitalai namona!
w12 4/15 rau 10 par. 8
Taotore—Ina Nega Dikana Toana Ta!
8 Baibul ese hebadina heheni karana e hahedinaraia taudia momo e herevalaidia danu. Mani sivarai rua aita herevalai bona idia amo baita dibamu ḡaudia baita lalodia. Ginigunana na, David enai badinaia karana e hahedinaraia tauna, Ionatan. Ia na King Saulo natuna roboana dainai, reana gabeai tamana gabuna baine abia bona Israel pavapavana ai bainela diba. To, Iehova ese David e abia hidi Israel pavapavana ai bainela. Ionatan ese Dirava ena abi hidi na e matauraia, bona David na se mama henia. Ia na David ida “lalotamona ai e hetura heheni,” bona e gwauhamata David na dounu baine badinaia. Ia ese ena dabua, dare, peva bona beleta na David e henia, unu amo ena hemataurai karana e hahedinaraia. (1 Sam. 18:1-4) Ionatan na e ḡaukara goada David e “hagoadaia,” ena be Saulo vairanai David ena maoro e gwauraia neganai ena mauri na bema haboioa diba. Ionatan ese David e hamaoroa: “Oi na Israel pavapavana ai baola, bona lau na oi murimu ai bainala.” (1 Sam. 20:30-34; 23:16, 17) Una dainai, Ionatan e mase neganai, David ese ane ta ai ena lalohisihisi bona lalokau e gwaurai hedinarai.—2 Sam. 1:17, 26.
Dirava Ena Hereva Ba Tahua Namonamo
it-1 rau 369 par. 2
Tadikaka
Ina hereva “tadikaka” na ḡau ta ihaḡuḡuruna eiava ikarana totona e ḡaukara heboumu taudia ese e ḡaukaralaiamu danu. Heḡereḡere, Turo edia King Hirama ese King Solomon na e gwauraia tadina, dia edia dagi na heḡereḡere dainai, to reana badina na dubu helaḡa ihaginina totona King Hirama ese au bona ma ḡau haida na King Solomon e heniava, una ḡaukara hebou karana dainai idia na e hetadikaka. (1Ki 9:13, NWT; 5:1-12) David na e gwa: “A itaia, tadikaka bae noho hebou mai lalodia tamona, una na namo, bona mai moalena danu.” Unu hereva amo David ese e hahedinaraia, dia taunimanima na boga tamona dainai mo maino bona lalotamona ai bae noho diba. (Sa 133:1) David bona Ionatan na e helalokau heheniva bona edia ura na tamona dainai David ese Ionatan na e gwauraia kakana, dia tamadia sinadia tamona dainai. (2Sa 1:26, NWT) Edia kara bona ura na heheḡereḡere taudia na e gwauraidiamu tadikaka, ena be unu ura bona kara haida na dia nanamo.—Her 18:9.
MAY 23-29
DIRAVA ENA HEREVA ENA NAMO | 2 SAMUEL 4-6
“Iehova Ihabaduna Karana ta Basita Karaia”
w05 5/15 rau 17 par. 8
Samuel Iharuana Bukana Ena Hereva Badadia
6:1-7. Ena be David na Maua helaḡana baine laohaia na maoro, to una Maua treila ai e udaia karana na dia Dirava ena haheḡani heḡereḡerena bona una ese dika e havaraia. (Esodo 25:13, 14; Numera 4:15, 19; 7:7-9) Danu, Usa ese Maua helaḡana e dogoatao karana ese e hahedinaraia, badi namodia ese Iehova ena ura na basie haidaua diba.
w05 2/1 rau 27 par. 20
Iehova Na Nega Iboudiai E Kara Maoromaoromu
20 Ba helalotao, Usa na taravatu na mai dibana. Maua helaḡana ese Iehova ena noho e laulaulaia. Taravatu na e gwa idau tauna ta ese basine dogoatao, una ese e hahedinaraia ḡoevaḡoeva una taravatu baine utua tauna na bae hamasea. (Numera 4:18-20; 7:89) Una dainai, Maua helaḡana na gabu ma ta bae laohaia karana na basie laloa maraḡi. Usa na Levi tauna ta (to dia hahelaḡa tauna ta), una dainai Taravatu na mai dibana namonamo. Danu, laḡani haida gunadiai Maua helaḡana na e laohaia ia tamana ena ruma ai bae naria. (1 Samuel 6:20–7:1) Maua helaḡana na unuseniai e mia laḡani 70 heḡereḡerena, ela bona David ese dala e karaia gabu ma ta bae laohaia. Una dainai, Usa na maraḡina negana amo una Maua helaḡana ena taravatu na da mai dibana.
w05 2/1 rau 27 par. 21
Iehova Na Nega Iboudiai E Kara Maoromaoromu
21 Matamanai ta herevalaia heḡereḡerena, Iehova na taunimanima kudoudia na e itamu. Iena Hereva ese Usa e karaia karana na e gwauraia “dia hemataurai” karana dainai, Iehova na e itaia reana Usa na sibona ena namo e laloa bona una na Baibul ese se hahedinaraia. Reana Usa na e hekokoroku dainai, taravatu e utua, a? (Hereva Lada-isidia 11:2) Eiava taunimanima vairadiai ia na Maua helaḡana, ena ruma bese ese e nariava ḡauna, vairanai e raka dainai, sibona e heaḡi, a? (Hereva Lada-isidia 8:13) Usa be se abidadama Iehova ese una maua helaḡana, Iena noho e laulaulaia ḡauna, na baine naria diba, a? Herevana dahaka, to ta diba momokanimu Iehova ena kara na maoromaoro. Ia ese Usa kudouna ai e itaia ḡauna dainai, maoromaoro e hamasea.—Hereva Lada-isidia 21:2.
Dirava Ena Hereva Ba Tahua Namonamo
w96 4/1 rau 29 par. 1
Hanaihanai Emu Maduna Na Iehova Enai Ba Tahoa Kau
David na pavapava dainai una kaha ai haheitalai namona baine hahedinaraia na namo. Ena kara ese e hahedinaraiamu, Iehova e hetura henia namonamomu tauna danu hahetoho negadiai baine kara kerere diba. Matamanai David na e badu, bena gabeai e gari. (2 Samuel 6:8, 9) Ena abidadama Iehova enai na e tohoa. Una negai Iehova ena haheḡani se badinaia dainai, vaitani ia ese ena maduna na Iehova enai se tahoa kau. Reana nega haida ita danu unu ta kara tomamu, ani? Nega haida Iehova ena haheḡani asita badinamu dainai hekwakwanai ta davarimu neganai, gwau be Iehova ta heniamu, a?—Hereva Lada-isidia 19:3.
MAY 30–JUNE 5
DIRAVA ENA HEREVA ENA NAMO | 2 SAMUEL 7-8
“Iehova Na David ida Gwauhamata ta E Karaia”
w10 4/1 rau 20 par. 3
‘Emu Basileia Na Baine Gini Tutuka-tutuka’
Iehova ese David na mai kudouna ibounai ida e ura baine karaia ḡauna na e moalelaia. Dirava na David ese ia e badinaiava bona peroveta herevana dainai, David ida gwauhamata ta e karaia, eto Ia ese David ena bese amo ta baine abia hidi bena baine lohia ela bona hanaihanai. Natan ese Dirava ena gwauhamata David enai na ini e gwauraia toma: “Emu iduhu bona emu basileia na bae gini tutuka-tutuka vairagu ai, bona emu terono na baine hedai hanaihanai.” (Siri 16) Una gwauhamata lalonai daika be una King dagina baine abia bona baine lohia hanaihanai?—Salamo 89:20, 29, 34-36.
w10 4/1 rau 20 par. 4
‘Emu Basileia Na Baine Gini Tutuka-tutuka’
Iesu, tau Nasaret, na David ena bese tauna ta. Aneru ta ese Iesu ena vara e herevalaia neganai, e gwa: “[Iehova] Dirava ese tamana David ena terono na baine henia; Iakob ena iduhu baine halohiaia hanaihanai; ena basileia na basine doko.” (Luka 1:32, 33) Una dainai Dirava ese David ida e karaia gwauhamatana na Iesu Keriso enai e ḡuḡuru. Iesu na dia taunimanima ese e abia hidi dainai baine lohia, to Dirava ese ena gwauhamata heḡereḡerena maoro e henia baine lohia ela bona hanaihanai. Namona na baita helalotao Dirava ena gwauhamata na nega iboudiai e ḡuḡurumu.—Isaia 55:10, 11.
w14 10/15 rau 10 par. 14
Basileia Bavabidadama Henia Goada
14 Mani Iehova ese idaunega Israel Pavapavana David enai e karaia gwauhamatana aita laloa, una na David gwauhamatana. (2 Samuel 7:12, 16 ba duahi.) Iehova ese una gwauhamata na David ese Ierusalem e lohiaiava neganai e karaia, e gwauhamata Mesia na iena bese amo baine vara. (Luka 1:30-33) Una dainai, Iehova ese garana ena bese sivaraina ma haida e gwaurai, bona e hahedinaraia David ena bese amo ta na Mesia Basileia “biaguna korikorina” ai bainela. (Ese. 21:25-27) Iesu ena amo David ena terono na “baine gini hanaihanai.” Momokani, David garana na baine “hesiriu hanaihanai, iena terono baine mia, dina . . . e miamu heḡereḡerena.” (Sal. 89:34-37) Oibe, Mesia ena lohia dalana na maoromaoro, bona be haḡuḡurumu ḡaudia na be mia hanaihanaimu!
Dirava Ena Hereva Ba Tahua Namonamo
it-2 rau 206 par. 2
Dina Gabedia
Balaam Ena Peroveta Herevana. Israel taudia na Gwauhamata Tanona ai do asie vareai neganai, peroveta tauna Balaam ese Moab Pavapavana Balak e hereva henia, eto: “Baina hamaoromu, ina bese taudia ese oiemu bese [Israel] taudia ede bae karadia toma dina gabedia ai. . . . Hisiu ta Iakob ena amo baine dae, dagi auna ta Israel ena amo baine heabi isi; Moab baguna baine huaria, Set garana iboudiai kwaradia baine huaridia.” (Nu 24:14-17) Una peroveta herevana kahana ginigunana na e ḡuḡuru, una “hisiu” na King David e laulaulaia, ia ese Moab taudia e hadareredia. (2Sa 8:2) Una dainai, una peroveta herevana ibounai baine ḡuḡuru totona, “dina gabedia” na David e pavapava negana amo e hematama. David ese Iesu, Mesia Pavapavana, e laulaulaia dainai, una peroveta herevana ese Iesu na inaina baine hadareredia negana danu e herevalaia.—Isa 9:7; Sa 2:8, 9.
JUNE 6-12
DIRAVA ENA HEREVA ENA NAMO | 2 SAMUEL 9-10
“David Na Mia Hanaihanai Lalokauna E Hahedinaraia”
w06 6/15 rau 14 par. 6
Oibe, Ba Moale Diba
David na e gwa: “Ogoḡami taudia e lalodiamu tauna na namo.” Bona ma e gwa: “Iehova ese e harohoa maurimu, hekwakwanai dinana ai; Iehova ese e gimaiamu bona e hamauriamu; tano ai namo e gwauraiamu.” (Salamo 41:1, 2) David na mai ena lalokau ida Mefiboset, turana namona Ionatan natuna, aena hedairikena, e bogaia hisi karana amo ogoḡami taudia ilalodia bada karana e hahedinaraia.—2 Samuel 9:1-13.
w05 5/15 rau 17 par. 12
Samuela Iharuana Bukana Ena Hereva Badadia
9:1, 6, 7. David ese ena gwauhamata na e badinaia. Ita danu eda gwauhamata baita haḡuḡuru na namo.
w02 2/15 rau 14 par. 10
Ḡiniḡini E Haheaukalai
10 Laḡani haida muridiai, King David na Ionatan e lalokau henia bada dainai, Mefiboset enai hebogahisi karana e hahedinaraia. David ese Saulo ena kohu iboudiai na Mefiboset e henia bona Saulo ena hesiai tauna Siba na tano inarina tauna ai e halaoa. Danu, David ese Mefiboset e hamaoroa: “Egu pata ai bavaniani, nega idoinai.” (2 Samuel 9:6-10) Momokani, David ena hebogahisi karana ese Mefiboset na e hagoadaia bona una ese e mamiava hisihisina na e hamaraḡia. Una na haheitalai namona! Ita ese danu e hisihisimu taudia na baita bogadia hisi.
Dirava Ena Hereva Ba Tahua Namonamo
it-1 rau 266
Auki Huina
Idaunegai East kahanai e nohova taudia momo bona Israel taudia ediai danu, auki huina ese tau dagina e hahedinaraiava, una dainai bae matauraia na namo. Dirava ena taravatu na e gwa Israel taudia ese taiadia bona matadia padanai hui, bona aukidia huidia na basie “utu.” (Le 19:27, NWT; 21:5) Una na asie daradaralaiava, badina dirava koikoidia e tomadiho henidiava taudia ediai henau karana na tomadiho karana ta.
JUNE 13-19
DIRAVA ENA HEREVA ENA NAMO | 2 SAMUEL 11-12
“Ura Dikadia ese Basie Biagumu”
Satana Ena Idoa amo Ba Roho Mauri Diba!
10 Iehova ese King David na ḡau momo e henia, heḡereḡere taḡa, king dagina, bona tuari ai e duruava inaina e hadareredia. David ese unu harihari ḡaudia dainai Dirava e hanamoa bona e gwa unu harihari ḡaudia na momo herea dainai ‘basine duahidia diba.’ (Sal. 40:5) To gabeai, David na e mataḡaniḡani bona e ura ḡau ma haida danu baine abi. Ena be David adavana na momo, to ia na tau ma ta adavana danu e ura heniava. Una hahine na Bataseba, bona ia adavana na Uria, Hiti tauna. David na Bataseba ida e mahuta hebou bona una hahine na e rogorogo. David na e heudahanai bona dala e karaia Uria e hamasea. (2 Sam. 11:2-15) David be e lalo ia e karaia karana na Iehova ese se itaia, a? Ena be David na laḡani momo Iehova e hesiai heniava, to ena mataḡaniḡani karana dainai hisihisi bada e davari. Gabeai, David na ena kara dika e gwaurai hedinarai bona e helalo-kerehai. Ia na e moale badina Iehova ese ena dika e gwauatao.—2 Sam. 12:7-13.
Iehova Baita Matauraia—Dahaka Dainai Bona Edena Dalai?
15 David na Iehova ese maduna e henia dia ena ruma bese mo to Israel besena ibounai danu baine gunalaia totona. David na king dainai, iena siahu na bada. To nega haida, ia ese ena siahu na e ḡaukaralaia kerere, bona kerere badadia haida e kara. (2 Sam. 11:14, 15) To ia ese Iehova ena matahakani na e abia dae unu amo e hahedinaraia Ia na e matauraia. Ḡuriḡuri amo ena hemami na Iehova e hamaorolaia. Bona e ḡaukara goada Iehova ena sisiba baine badinaia. (Sal. 51:1-4) Danu, ia na e manau badina sisiba namodia na dia tatau edia amo mo to hahine edia amo danu e abi dae. (1 Sam. 19:11, 12; 25:32, 33) David na ena kara kereredia e lalopararalai bona ena mauri ibounai lalonai Iehova ihesiai henina karana na ḡau badana ai e halaoa.
Dirava Ena Taravatu Bona Ena Hahekau Herevadia ese Lalomu Mamina Bae Hadibaia
7 Dia namo Dirava ena taravatu iutudia karana amo hisihisi baita davari bena mai anina bada ḡaudia baita diba. Baibul ai e herevalaidia taudia edia kerere amo ḡau haida baita diba. Hereva Lada-isidia 1:5 na eto: “Aonega tauna danu baine kamonai, bena ena diba baine habadaia.” Momokani, Baibul sivaraidia baita duahimu bona baita lalodia dobumu neganai, Dirava ena amo diba hereadaena baita abiamu. Heḡereḡere, King David ese Iehova ena haheḡani se badinaia bona Bataseba ida e heudahanai neganai, e mamia hisihisina a laloa. (2 Sam. 12:7-14) Una sivarai baita duahiamu bona baita laloa dobumu neganai, siboda baita henanadaimu: ‘King David na Bataseba ida e heudahanai dainai e mamia hisihisina be ede bema hanaia toma? Bema lau na una hedibaḡani baina davaria, mai goadagu ida baina dadaraia, a? Lau be Iosef heḡereḡerena baina heau, eiava David heḡereḡerena una hedibaḡani ai baina moru?’ (Gen. 39:11-15) Kara dika ese e havaramu hisihisidia baita haeromu neganai, laloda baita hagoadaiamu ‘dika baita inai henia’ totona.
Dirava Ena Hereva Ba Tahua Namonamo
it-1 rau 590 par. 1
David
To, Iehova ese e vara kererena ibounai e itaiava, bona e hahedinaraia. Bema Iehova ese David bona Bataseba na hahemaoro taudia ese Mose ena Taravatu heḡereḡerena bema hahemaoro henidia, reana idia raruosi na bema hamasedia bona una heudahanai karana amo bema havaraia besena na sinana ida bema mase. (Deu 5:18; 22:22) To, Iehova sibona ese una kerere e hamaoromaoroa bona David na e bogaia hisi, badina na Basileia gwauhamatana dainai (2Sa 7:11-16), David ese hebogahisi karana e hahedinaraia dainai (1Sa 24:4-7; Iak 2:13 ida ba haheḡereḡerea), bona Dirava ese e itaia idia na edia kerere amo e helalo-kerehai dainai. (Sa 51:1-4) To edia kerere dainai e vara hisihisidia amo na asie roho mauri. Iehova na peroveta tauna Natan ena amo e gwa: “Oi sibomu emu ruma lalona amo dika baina havaraia latamu ai.”—2Sa 12:1-12.
JUNE 20-26
DIRAVA ENA HEREVA ENA NAMO | 2 SAMUEL 13-14
“Amnon Na Sibona Ena Namo E Laloa Dainai Dika E Vara”
it-1 rau 32
Absalom
Amnon e alaia. Absalom taihuna Tamara ena hairai dainai, kakana daelaina Amnon ese e ḡahusia. Amnon na e gorere koikoi, bena e noinoi Tamara na iena ruma bainela ana baine nadu, una neganai ia ese Tamara e hadikaia. Una murinai Amnon ena lalokau Tamara enai na e ore, ia ese Tamara na e inai henia bada bona ena ruma amo e lulua lasi. Bena Tamara ese ena dabua, pavapava natuna rami-hebou ulatodia ese e hahedokilaiava dabuana, na e darea, bena Absalom ese e davaria kwarana mai kahuna ida. Absalom ese e vara ḡauna e haeroa neganai, e gwa una kerere na Amnon ese e karaia, badina matamanai Amnon ese ia taihuna na e ḡahusiava dainai. To, Absalom ese taihuna na e hadibaia kara ta basine karaia, bona e abia ena ruma ai e hanohoa.—2Sa 13:1-20.
Siboda Baita Hebiagu Karana Baita Hahedinaraia
11 Lalodia asie biagu dainai matabodaḡa karadia e kara taudia na Baibul ese danu e herevalaidia. Bona edia kara daidiai e vara hisihisidia danu e herevalai. Bema ta na Kim ese e davaria hahetohona e davariamu, namona na Hereva Lada-isidia karoa 7 ai e herevalaia kavakava merona enai e vara ḡauna baine laloa. Danu, Amnon ese e karaia karana bona ena dika ba laloa. (2 Sam. 13:1, 2, 10-15, 28-32) Ruma bese tomadihona ai, tama sina ese atai ai e hetore sivaraidia amo natudia bae durudia, memero o kekeni ida bae hetura neganai, aonega bona sibodia bae hebiagu karana bae hahedinaraia totona.
it-1 rau 33 par. 1
Absalom
Laḡani rua vada de ore. Mamoe huidia iutudia negana e kau, una na moale negana, bona Absalom ese Baal-hasoro ai aria ta e heḡaeḡaelaia, Ierusalem ena notist kahana amo una gabu ena daudau na 22 kilomita (14 mi) heḡereḡerena, bona ia ese King David bona natuna memerodia e boiridia. Tamana se ura bainela neganai, Absalom ese e noia loulou, Amnon, pavapava natuna roboana, na ia gabunai bainela. (Her 10:18) Amnon na aria gabunai, ‘vine ranuna ese e hakekeroa’ neganai, Absalom ese ena hesiai taudia e haḡanidia bena e alaia. Pavapava natuna memerodia ma haida na e lou Ierusalem, to Absalom na e heau bona tubuna, Suria tauna dekena ela, Gesuru basileiana ai e nohova, una gabu na Galilea Gohuna ena ist kahanai. (2Sa 13:23-38) Peroveta tauna Natan ese e perovetalaia ‘darena,’ na David ena “ruma” ai vada e vareai, bona David ena mauri dinadia iboudiai lalonai una dare na ena ruma ai baine noho.—2Sa 12:10.
Dirava Ena Hereva Ba Tahua Namonamo
g04 12/22 rau 8-9
Mai Anina Bada Hairaina
Mai anina bada hairaina baita diba totona, mani David natuna Absalom aita laloa. Taunimanima ese ena kara dainai asie ura heniava, ena be ena hairai dainai e imodaiava. Baibul ese ia na ini e herevalaia toma: “Israel idoinai raho-namo tauna ta asie imodaiava, Absalom heḡereḡerena; aena henuna amo ela bona kwarana tubuana ia na asi bebeka-bebekana.” (2 Samuel 14:25) To, Absalom na e ura dagi bada baine abi dainai tamana e gwau-edeede henia bona tamana ena pavapava dagina e abia toho. Ia ese danu tamana adavana ma haida e hadikadia. Una dainai, Absalom na Iehova ese e badu henia dikadika bona e hisihisi bada herea ela bona e mase.—2 Samuel 15:10-14; 16:13-22; 17:14; 18:9, 15.
O uramu Absalom ba hetura henia, a? Lasi. Ena kara dainai taunimanima ese na asie ura heniava. Ena be ena hairai na bada, to e hekokoroku bona Dirava se badinaia dainai Dirava ese e hahemaoro henia. Baibul ese mai edia aonega bona kara namo taudia momo edia haheitalai e herevalai, to dia idia toadia. Una ese e hahedinaraia, ḡau badana na idia lalodia hairaina, dia murimuri hairaina.
JUNE 27–JULY 3
DIRAVA ENA HEREVA ENA NAMO | 2 SAMUEL 15-17
“Absalom Na E Hekokoroku Dainai E Gwau-Edeede”
it-1 rau 860
Vairai E Heau Guna Tauna
East hanuadia edia kara na pavapava ena kariota vairanai taunimanima haida na e heau gunava, unu amo pavapava ena mai bae haripiulaia bona iduruna karadia bae heḡaeḡaelai. (1Sa 8:11) Absalom bona Adonia ese una kara, pavapava sibodia ese e karaiava karana, bae tohotohoa totona bona edia dagi bona gwau-edeede karana bae hahedinaraia totona, tatau 50 na idia edia kariota vairadiai e haheaudia.—2Sa 15:1; 1Han 1:5; RUNNERS ba itaia.
w12 7/15 rau 13 par. 5
Ura-Kwalimu Diravana Ba Hesiai Henia
5 Baibul lalonai haida e hakaudia kerereva taudia momo e herevalaidia. Idia ta na King David natuna Absalom. Absalom na raho namo. To gabeai Satana heḡereḡerena, kudouna ai mataḡaniḡani urana e abia, badina e ura tamana ena king dagina baine abia, ena be asi ena maoro king dagina baine abia. Absalom na ena ura ḡauna iabina totona tadikakana Israel taudia e koidiava, e gwauva king ese idia na se lalodiava. Oibe, Eden imeana ai Diabolo e kara heḡereḡerena, Absalom na taunimanima e koidiava bena bae lalo ia ese idia na baine durudia diba, danu koikoi herevadia amo tamana ladana e hadikaia.—2 Sam. 15:1-5.
it-1 rau 1083-1084
Heberon
Laḡani haida muridiai, David natuna Absalom na Heberon e lou lao bona unuseniai eto tamana ena lohia dagina baine abia karadia e kara. (2Sa 15:7-10) Reana Absalom ese una hanua e abia hidi ena terono baine hadaia badina na, histori ai Heberon na guna Iuda ena siti badana bona reana ia na una hanua tauna dainai. Gabeai, David tubuna, King Rehoboam, ese Heberon hanuana e haginia lou. (2Sis 11:5-10) Babulono ese Iuda e hadikaia bena abi mauri taudia e lou murinai, Iuda taudia haida na Heberon (Kiriat-araba) ai e hanoho.—Ne 11:25.
Dirava Ena Hereva Ba Tahua Namonamo
Sivarai Korikorina mai Dibamu, A?
11 Ita ta ta na haida ese e hahemaoro henida kereremu badina sivarai kahadia haida mo e kamonaimu. Mani King David bona Mefiboset edia sivarai aita laloa. David ese Mefiboset enai hariharibada bona hebogahisi karana e hahedinaraia, bona tubuna Saulo ena tano ibounai e henia lou. (2 Sam. 9:6, 7) To gabeai, David ese Mefiboset ihahebadelaina herevadia haida e kamonai. David na se hetahu una be sivarai momokanina eiava, to ia ese Mefiboset ena kohu iboudiai e abi. (2 Sam. 16:1-4) Gabeai, Mefiboset ida e herevahereva neganai, David na e laloparara ia na kerere bona Mefiboset ena kohu kahana ma e henia lou. (2 Sam. 19:24-29) Bema David na sivarai kahana e kamonai neganai basinema haraḡa to ḡau iboudiai bema tahu namonamo guna, una hahemaoro kererena na basinema vara diba.