Kaha 4

Diabolo be Daika?

Satana Diabolo​—ede amo ema? (1, 2)

Ededia dala ai Satana ese taunimanima e hakaudia kereremu? (3-7)

Dahaka dainai Diabolo ba dadaraia? (7)

1. Ina hereva “diabolo” anina na ta e sivarailaia koikoimu tauna. “Satana” anina be inai tauna eiava hepapahuahu tauna. Unu lada na Dirava inaina badana e henia. Matamanai, ia na aneru ğoevadaena Dirava ida guba ai e nohova. To, gabeai sibona e hahebada bona e urava Dirava sibona mo itoma diho henina karana maorona baine abia.​—Mataio 4:​8-10.

2. Hari aneru, Satana, ese gaigai ta amo Eva e hereva henia. Koikoi herevadia e hamaorolaia, unu amo e veria Dirava e gwau edeede henia. Una kara amo Satana ese Dirava ena “lohia siahuna” eiava ena Herea Mikamika dagina e hepapahuahulaia. Satana ena hepapahuahu herevana na Dirava ese e naridiamu taudia be dala namona ai e lohiadiamu bona edia namo e tahumu eiava. Satana ese e havaraia daradara herevana ma ta na taunimanima ese Dirava bae badinaia ğuğuru diba eiava. Unu e kara toma dainai, Satana na sibona Dirava inaina ai e hahelao. Una dainai ladana na e hatoa Satana Diabolo.​—Genese 3:​1-5; Iobu 1:​8-11; Apokalupo 12:9.

3. Satana ese taunimanima e koidiamu ia bae toma diho henia totona. (2 Korinto 11:​3, 14) Taunimanima e koidiamu dalana ta na tomadiho koikoi. Bema tomadiho ta ese Dirava e sivarailaia koikoimu, una tomadiho na Satana ena ura e duruamu. (Ioane 8:44) Tomadiho koikoi taudia na baeto idia na Dirava korikorina e toma diho heniamu, a ğau be Satana isiaina e lao henimu. Ia na “ina tanobada diravana.”​—2 Korinto 4:4.

4. Satana ese ena siahu henunai taunimanima e atodiamu dalana ma ta na babalau karadia. Idia ese lauma e noidiamu idia bae naridia, haida bae hadikadia, vaira ğaudia bae gwaurai, eiava hoa karadia bae kara. Unu ğau dikadia e havaramu tauna na Satana. Dirava baita hamoalea totona babalau karadia iboudiai baita dadarai.​—Deuteronomi 18:​10-12; Kara 19:​18, 19.

5. Satana ese bese iabi-isina badabada karana bona politikol oreadia itoma diho henidia karadia amo taunimanima e koidiamu. Haida na e laloamu idia edia bese ese ma bese haida e hereadia. To una na dia momokani. (Kara 10:​34, 35) Ma haida na politikol oreadia ediai e tabekaumu, idia ese taunimanima edia hekwakwanai bae haoredia. Unu e kara tomamu neganai, idia na Dirava ena Basileia e dadaraiamu. Una Basileia na iseda hekwakwanai ihaoredia ğauna tamona.​—Daniel 2:44.

6. Satana ese taunimanima e koidiamu dalana ma ta na ura dikadia amo e dibağanidiamu. Iehova ese ita e hamaorodamu kara dikadia baita dadaraidia badina ia dibana unu kara ese bae hadikada diba. (Galatia 6:​7, 8) Reana taunimanima haida na e uramu oi na idia ida unu kara ba kara hebou. To ba helalotao, una na Satana ena ura, e uramu oi na unu kara ba kara.​—1 Korinto 6:​9, 10; 15:33.

7. Satana ese reana dağedağe eiava inai heheni karana baine ğaukaralaia oi ese Iehova ba rakatania totona. Baibel o stadilaiamu dainai reana o lalokau henidiamu taudia haida na bae badu dikadika. Reana haida ese bae kirikirilaimu. To oiemu mauri be daika ese e heni? Satana na e uramu oi baine hagarimu bena Iehova idibana karana ba hadokoa. Satana na basio hakwalimua! (Mataio 10:​34-39; 1 Petro 5:​8, 9) Diabolo idadaraina karana amo, Iehova ba hamoalea diba bona ba hahedinaraia oi ese Iena lohia siahuna o abia isimu.​​—Hereva Lada-isidia 27:11.

[Pictures on page 9]

Tomadiho koikoi, babalau, bona bese iabi-isina karana na taunimanima e hakaudia kereremu

[Picture on page 9]

Iehova idibana karana ba hahesiriua amo Satana ba dadaraia