Ina Negai Heitatao Oreana Ena Ḡaukara be Dahaka?

Aposetolo edia negai, grup maraḡina ta Ierusalema ai e nohova. Una grup lalonai na “aposetolo taudia bona heitatao taudia.” Idia na abi hidi badadia e karava, horoa Keristani kongrigeisen iboudiai idurudia totona. (Kara 15:2) Una grup ese abi hidi ta e urava baine karaia neganai, Toretore Helaḡadia ai e hetahuva bona lauma helaḡa ena hahekau e badinaiava. (Kara 15:25) Ina negai Heitatao Oreana na idia e tohotohodiamu.

Dirava ena ura e karaiamu. Heitatao Oreana ai e ḡaukaramu horoa tadikakadia ese Dirava ena Hereva e stadilaia namonamomu, emai ḡaukara e itataomu, bona henanadai badadia na Baibel amo e haerelaimu. Wiki ta ta e heboumu, emai orea iduruna daladia e herevalaimu. Guna bamona, ina negai Baibel ena hahediba herevadia na revareva, sekit o distrik e narimu taudia bona dala ma haida amo kongrigeisen ta ta e hadibadiamu. Una ese Dirava ena taunimanima bogaragidiai lalotamona e havaraiamu. (Kara 16:4, 5) Heitatao Oreana ese Dirava ena hereva e halasiamu, haroro ḡaukara e hahegoadalaiamu, bona maduna bae hua tadikakadia e abidia hidimu.

Dirava ena lauma helaḡa ena hahekau e badinaiamu. Heitatao Oreana ese ḡau iboudiai e lohiamu Diravana, Iehova, bona kongrigeisen Kwarana, Iesu, edia hahekau dalana e badinaiamu. (1 Korinto 11:3; Efeso 5:23) Idia na sibodia se hegwauraimu Dirava ena taunimanima biagudia. Idia na horoa Keristani taudia oredia ida “Mamoe Natuna [Iesu] murinai e rakamu, ena loa iboudiai.” (Apokalupo 14:4) Heitatao Oreana ese idia daidiai a gwauraimu ḡuriḡuridia na e moalelaimu.

• Aposetolo edia negai, daidia be heitatao oreana?

• Ina negai Heitatao Oreana be edena dalai Dirava ena hahekau e badinaiamu?